Zaa 1

Zezwii Kliisɩ mɔɔ glɩnɩɛ Wɛlɩ

1'Pɩwʋ a tɛɛnɩdɛ,

‑mɔ wa laa Wɛlɩɩ, ɔ ‑bhölɩ a.

‑Mä Lagɔ yɔwʋ ‑mä ɔ ‑wʋ a‑a.

Ɔ'bhë, Lagɔ 'mö ɔ glɩnɩɛ.

2'Pɩwʋ a tɛɛnɩdɛ, ‑mä Lagɔ yɔwʋ, ‑mä ɔ ‑wʋ a‑a.

3'Mö Lagɔ ghlɛnɩɛ 'mö, 'n ɔ yiɛ 'pɩwʋ a ‑lii 'wuë ‑bhɛ.

‑Lu a ‑mu Lagɔ ‑bhɛɛ, 'n ɔ 'nɔɔ 'mö ghlɛnɩɩ, wʋ'ʋä ‑bhölɩ.

4Ɔ 'mö, ‑mä ‑bhölɩbhölɛ ‑wʋ a‑a,

‑bhölɩbhölɛ 'la, mɛɛ glɩnɩ a‑a nɩkpa 'wuë a lɩlɛ.

5Lɩlɛ 'la, mɛɛ lɩnɩɛ ‑mä guylukwëa 'mö,

‑maa guylukwëa 'nɛɛ 'wlu 'mänanɩ.

6Nɩkpɛ ‑bhlʋ 'mö wa laa Zaa#1.6 Zaa Batisɩ 'mö wa gaaa. , 'mö Lagɔ tiee. 7Nɩkpɛ 'la, mɔɔ yiɛ, ɔ 'kä ‑ɔ glɩnɩɛ lɩlɛ a dɛ bhïla, ɔ za, wa 'kɔ dlɩ 'tɛɛnɩ. 8Zaa a'bhë, ɔnyɩgäsɛ mɔɔ 'nɩɛ lɩlɛ glɩnɩ, ‑maa ɔ 'kʋä ‑ɔ glɩnɩɛ lɩlɛ a 'dɩ 'nyɛ, nza ɔ yiɛ. 9‑Ɔ glɩnɩɛ Wɛlɩɩ, mɔɔ glɩnɩɛ ‑tiamö a lɩlɛ. Ɔ 'kä nɩkpa 'wuë 'wʋ ngäla, nza ɔ yiɛ mä'ä dʋdʋ 'wʋ.

10'Mö Lagɔ ghlɛnɩ a‑a 'mö, 'n ɔ yi a‑a wa 'wuë 'wäla.

‑Sɩbhä yɩ ‑wʋ 'mö, ‑maa ɔ yiɛ mä'ä wa jijo'wʋʋ,

wa 'nɔɔ ‑sɩbhä yɩbhlɩnɩ.

11Ɔnyɩ a ‑nʋa jijo'wʋ, ‑mä ɔ yiɛ, ‑maa wa 'nɔɔ päla.

12‑Sɩbhä yɩ ‑wʋ 'mö, ‑maa wa gla'mö a 'yɛya pälɔɔ,

mʋa 'tɛɛnɔɔ wabhlɩ dlɩ.

Nɩkpa 'la ‑wa pälɔɔɔ,

'ɔ 'mötɛɛnɔɔ 'mö, mʋa 'zʋä Lagɔ a 'yuë.

13Sɛɛ nɩkpɛ zʋä mä'ä 'pɩwʋ a dɔ'wʋ nɩkpɛ a 'yuu, ‑sɩbhä wa'aa Lagɔ a 'yuë 'zʋ. Ɛ'ɛ ‑bhö'ɛ sɛɛ nɩkpɛ 'yɩbhɩɛ a za, ‑maa Lagɔ a'bhë, mɔɔ 'yɩbhɩɛ ‑sɩbhä.

14‑Ɔ glɩnɩɛ Wɛlɩɩ, mɔɔ 'zʋä nɩkpɛ,

'n ɔ yiɛ mä'ä ‑aa jijo'wʋ ‑bhölɩnɩɛ yi.

Ɔ 'wuë, ngäzɩdlɩɛ,

'ɔ ngli a wɛlɩɩ 'wuë gbëaa yɩ glɩnɩɛ.

Mɔɔ glɩnɩɛ ɔ dɩba Lagɔ 'a yuu ‑bhʋlʋ ‑kpɔ.

‑A 'yoo 'ylɩmöö,

'ghïlinɔɔ ɔ dɩba Lagɔ 'nyɔɔ, a‑a yuä yɩbhlɩnɩ.

15Ɔ dɛ Zaa bhïlaa, ɔ 'yoo 'ylɩmöö, 'n ɔ yiɛ wɛlɩ 'pä, ɔ lɛ naa: «Nɩkpɛɛ n gaa a‑a mɔɔ da'a. Sɛ'ɛ n gbä a‑a ɔ dɛ nɩɩ: Nɩkpɛ ‑bhlʋ, ɔ ‑gä nimï. Mɔɔ 'ghïliɛ, mɔɔ ziiiɛ 'wʋ. Ɛ'ɛ ‑bhö nyɩasɛ, ‑maa na'bhë dɛɛ n'n a‑a ‑bhlɛ 'wlʋʋ, ɔ ‑bhölɩ a ɔbhlɩ.»

16‑A 'wuë sɛɛ Lagɔ 'pää ɔ za ‑aa ngäzɩdlɩ,

'n ɔ paanyɩɛ 'kwädlɩ 'nyuu, ‑sɩbhä 'nɩɛ yɛkanɩyi ‑kä.

17Lagɔ ‑kanyɩɛ 'ɔ Gböö sʋlʋnɩɛ yii, Moyizɩ 'mö ɔ ghlɛnɩɛ 'mö 'n ɔ ‑yinyiɛ sʋlʋnɩ. ‑Maa ɔ 'kää ‑aa ngäzɩdlɩ 'pää yii, ɔ ‑kanyɩɛ gbëaa 'nyɛɛ yii, Zezwii Kliisɩ 'mö, ‑mä ɔ ghlɛnɩɛ. 18‑Bɛ 'nɩɛ ‑bhlɛ tɛkäsɛ Lagɔ 'ylɩmö, ‑maa 'ɔ yuu ‑bhʋlʋ ‑kpɔ, ‑ɔ glɩnɩɛ Lagɔ, ‑ɔ ‑wʋä ‑mä ɔ yɔwʋʋ, mɔɔ sʋlʋnɩnyɔɔ.

Zaa Batisɩ lɛ mɔɔ 'nɩɛ Kliisɩ glɩnɩ

(Matie 3.1-12; Maakö 1.1-8; Lwiikö 3.1-18)

19‑Mä Zeluzalɛɛmö a Zwiiföwaa mʋa tie Zaa Batisɩ nɩkpa 'wʋ. 'Wa Lagɔbʋbɔwa ‑mumuë, wa ‑nyɛ Leviiwa ‑mumuë 'sɔ, 'mö wa tioo 'wʋ wa 'kɔ nimï 'yɩbhä nɩɩ: «‑Mɔ a'bhë ‑n glɩnɩ bhä 'nɩ?» 20Wa 'yɩbhɔɔ nimïï, ɔ'ɔɔ 'wʋ ‑gɔ, ‑maa nɩkpabhë a 'yila 'klʋ, 'dɩ ɔ 'nyuää gbëaa, ɔ lɛ naa: «Kliisɩ, Puënyɔɔ Lagɔ ‑sɛɛ ‑lɛ, 'mö n 'nɩɛa glɩnɩ.» 21Wa lɛ: «Zaa, ‑mɔ ‑n glɩnɩ bhä 'nɩ? Lagɔ 'a 'möbhïlanɩnyɔɔ Elii 'mö ‑n glɩnɩ bhä ‑a?» Ɔ lɛ: «N'nn, 'mö n 'nɩɛ glɩnɩ.» Wa lɛ: «Zaa, Lagɔ 'a 'möbhïlanɩnyɔɔ ‑a ‑kʋnɩɛ mö ‑n glɩnɩ bhä ‑a?» Ɔ lɛ: «N'nn.» 22Wa lɛ: «'Ɔɔ! Zaa, ‑mɔ ‑n glɩnɩ bhä a'bhë 'nɩ? ‑Mɔ ‑n libhï bhä ‑nanyɩ 'mö 'wʋ 'nɩ? Nyɩanyɩ 'dɩ, ‑wa tianyɩɛ, ‑a 'kʋä ‑mä 'dɩ kwä.» 23Wa gbää sa'aa, Zaa lɛ naa: «Ezayii, Lagɔ a 'möbhïlanɩnyɔ, sɛ'ɛ ɔ gbä a‑a nɩɩ: Nɩkpɛ ‑bhlʋ ‑wʋ ‑mä 'muse 'klʋ, ɔ pä wɛlɩ nɩɩ: A nɩ ‑sɛ 'ywii 'wuë a 'kɩ 'mö zlɔmanɩ ‑Alowli a za, ‑maa ɔ ‑wʋ yi dɔ'wʋ.#1.23 Ezayii 40.3. ‑Lɛ a nɩkpɛ 'la, 'mö n glɩnɩɛ.»

24Nɩkpaa wa tiee Zaa 'wʋʋ, Falizɩɛwaa. 25'N wa yo'ɛɛ nimï 'yɩbhä nɩɩ: «‑N ‑nɛɛ Kliisɩ mö ‑n 'nɩɛ glɩnɩ. Elii mö ‑n 'nɩɛ glɩnɩ. Lagɔ 'a 'möbhïlanɩnyɔɔ ‑a ‑kʋnɩɛ, mö ‑n 'nɩɛ'ɛ glɩnɩ. Zaa, sɛ yɩ ‑wʋ ɔ 'mö n‑n wɔlʋ bhä nɩkpa 'wlu 'nɩ?» 26Ɔ lɛ naa: «‑Amö na a, 'nyu a 'yize n wɔlʋnanyɩɛ 'wlu cuu. ‑Maa ‑mä a gla'mö, nɩkpɛ ‑mɔmɔɔ ‑bhlʋ ‑wʋ ‑mä. A 'nɔɔ ‑bhlɛ ‑yi. 27Ɔ ‑gä nimï, ‑maa n'n‑ä a'bhë 'ke ‑kä n 'kä 'ɔ 'siikplii a 'likpïï bulonɩ.»

28‑Li 'la 'wuë, ‑mä Zludɛɛ ‑gömö, ‑mä a glɔ ‑bhlʋ wa laa Betanii, mää Zaa glɩ a‑a 'n ɔ wɔlʋä nɩkpaa 'wluu, ‑mä yɩ 'plɩnɩɛ 'wʋ.

Zaa Batisɩ lɛ Zezwii mɔɔ glɩnɩɛ Lagɔ 'a 'bhlawadɩgbaa

29Zlɩ zɩɛ, Zaa lɛ zʋ a sɛ'ɛ, Zezwii yinɔ. Ɔ 'yoo 'ylɩmöö, ɔ lɛ naa: «A yɩɛ, Lagɔ 'a 'bhlawadɩgbaa ‑a 'kää mä'ä 'pɩwʋ a nɩkpaa 'wa 'nyinylolii a gbʋʋ ‑gömö ‑sɛɛ, ma‑a da'a. 30Ɔ dɛ n bhïla a‑a ‑kido 'wʋ nɩɩ: Nɩkpɛ ‑bhlʋ, ɔ ‑gä nimï, ‑maa n ‑nyɔɔ 'sɔ a dɔ'wʋ, mɔɔ 'ghïliɛ mɔɔ ziiiɛ 'wʋ. Ɛ'ɛ ‑bhö nyɩasɛ, ‑maa dɛɛ n'n a‑a ‑bhlɛ 'wlʋʋ, ɔ ‑bhölɩ a ɔbhlɩ. 31Na'bhë, n'n a ‑mɔ ɛ 'kä glɩnɩɛ ‑yi. ‑Maa n 'kɔ Yizlaɛlɩ a ‑nʋa sʋlʋnɩ nza n yiɛ nɩkpa 'nyu 'mö 'wlu wɔlʋnɩɛ. 32-33Sɛ'ɛ n gbää nɩɩ, na'bhë n'n a ‑mɔ ɛ 'kä glɩnɩɛ ‑yi. ‑Maa Lagɔ ‑ɔ tieaa a‑a nɩɩ, n nɩ wɔlʋnɩ nɩkpa 'nyu 'mö 'wluu, mɔɔ nyɩaa a‑a 'dɩ nɩɩ: ‑N yi nɩkpɛ ‑bhlʋ 'ylɩmö, 'na 'Wugɔmʋʋ yo ‑gömö yi, ɔ 'kɔ 'kwädlɩ ‑gömö ‑wʋ. ‑Lɛ a nɩkpɛ 'la, nɩkpɛ n ‑sɛɛ ‑lɛ ɔ 'kä nɩkpa 'na 'Wugɔmʋʋ ‑gömö 'zʋʋ, mɔɔ. Sa'a Lagɔ nyɩaaa 'dɩ. ‑Tiasɛ, n yɩ 'Wugɔmʋʋ 'Wlɩlɩ 'ylɩmö, ɔ 'kä ‑bhɩɛ ‑kpakʋ 'n ɔ yiɛ ‑mä ghäyɩ 'wʋ 'bhöönɩ, 'n ɔ yoo ‑gömö yi. 34Na'bhë n 'yi ‑sɩbhä 'ylɩmö, nza n gbää nɩɩ: Zezwii, mɔɔ glɩnɩɛ Lagɔ 'a Yuu.»

Zezwii yɛ 'ɔ tɛkägänɩwaa wäzɩ

35Zlɩ zɩ'ɛɛ, Zaa Batisɩ ‑nyɛ 'ɔ ‑gänɩwaa gla'mö a nɩkpa 'sɔ glɩ ‑bhlɛ da ‑bhʋlʋ ‑kpɔ 'yize, ‑gänɩwaa 36'n Zezwii yiɛ 'plɩɛ yi. Zaa Batisɩ 'yoo 'ylɩmöö, ɔ lɛ nɩɩ: «A yɩɛ, Lagɔ 'a 'bhlawadɩgbaa ma‑a da'a.» 37Ɔ gbää sa'aa, 'ɔ ‑gänɩwaa 'sɔ ‑kpɔ, 'n wa yiɛ 'wʋ ‑sɔ 'n wa yiɛ Zezwii 'bɩwʋ bhlinɩ. 38Zezwii 'bhɛlɔɔ 'möö, 'n ɔ yuëë 'ylɩmö, 'n ɔ yuëë nimï 'yɩbhä nɩɩ: «'Saa a tɛlɩ bhä sɛ?» Wa lɛ: «Ghlabii, dɛ ‑n glɩ bhä?» Wa 'bhigbʋ 'mö, Ghlabii, mɩɩ sɛɛ zɛmö nɩɩ, 'cɩanyɔɔ. 39Wa 'yɩbhɔɔ sa'a nimïï, ɔ lɛ naa: «Dɛ n glɩɛ, a nɩ yi, a 'kä ‑lɛ 'ylɩmö.» 'N wa yiɛ mö. Dɛ ɔ glɩɛ 'n wa yiɛ ‑lɛ 'ylɩmö. ‑Kidogïle ‑mʋäna 'mö a sɛ wa ghlɛɛ ‑lɛ. Wa ‑nyɔɔ 'sɔ wa glɩ ‑lɛ ‑këë 'n swe yiɛ ylu.

40Nɩkpa 'la 'sɔ ‑kpɔ, Zaa 'nyɛ a‑a 'dɩ, ‑wa bhlinɩ a‑a Zezwii 'bɩwʋʋ, wa gla'mö a ‑nɔ ‑bhlʋ 'mö wa laa Adlee. Simɔɔ Piɛlɩ a ‑daayu mɔɔ. 41Simɔɔ 'la, 'mö ɔ ‑daayu Adlee kwää tɛɛ 'dɩ nɩɩ: «Simɔɔ, Kliisɩ, Puënyɔɔ Lagɔ ‑sɛɛ ‑lɛ, ‑a kɔ 'ylɩmö.» 42Ɔ ‑nyɔɔ 'sɔ, 'n wa yiɛ Zezwii ‑mä ghlɩ. Wa ghlɛɛ ‑mä, Zezwii yɩlɩɛ Simɔɔ 'wʋ ‑këë, ɔ lɛ naa: «‑Nmö Zaa ‑yowli Simɔɔ, tɛɛnɩa'a dɛ'ɛ, ‑na nglɩɛ Sefaasɩ.» Wa 'bhigbʋ 'mö a dɔ'wʋ, wa ‑kä Sefaasɩ nʋʋ, miɛ nɩɩ Piɛlɩ, yɩ zɛmöä nɩɩ kpayi.

Zezwii yɛ Filiipö ‑nyɛ Natanaɛlɩ 'sɔ wäzɩ

43Zlɩ zɩɛ, 'n Zezwii yiɛ 'wʋ ‑sɔ, 'n ɔ yiɛ ‑mä Galilee‑bhölɩɩ 'mö mö. Ɔ ‑wʋ mö dɔ'wʋ 'n ɔ yiɛ nɩkpɛ ‑bhlʋ wa laa Filiipö 'ylɩmö. Ɔ lɛ naa: «Filiipö, yi ‑n ‑kaa ‑gänɩ.» 44Filiipö, Adlee ‑nyɛ ɔ ‑daayu Piɛlɩ 'sɔ, wa 'bhele Bɛtɩsayidaa a nɩkpɛ ɔ glɩnɩɛ. 45Filiipö 'bhöö'ɛɛ ɔbhlɩ ‑lɛ, 'n ɔ yiɛ Natanaɛlɩ ‑mä ghlɩ, ɔ lɛ nɩɩ: «Lagɔnɩkpɛɛ ‑ɔnyɩ dɛ Moyizɩ 'cɛlɩ a‑a ‑mä Lagɔ 'a Gböö a 'bɔgʋʋ 'mö, ‑ɔnyɩ dɛ Lagɔ 'a 'möbhïlanɩwaa bhïla a‑a, ‑a kɔ 'ylɩmö. ‑Mä Nazalɛɛtɩ ‑glɔ 'mö a nɩkpɛɛ Zɩzɛɛfʋ, ɔ yowli Zezwii mɔɔ.» 46Filiipö 'nyɛɛ ‑sɩbhä Natanaɛlɩ 'dɩɩ, ɔ lɛ naa: «‑Nn'n! ‑Mä Nazalɛɛtɩ glɔ 'mö abhlɩ, ‑lu a ‑lu bhɛnɩ bhä wʋ 'kä ‑mä 'bhöönɩ ‑a?» Filiipö lɛ naa: «Yi ‑n 'kɔ ‑na'bhë 'ylɩmö.»

47Wa möä, Zezwii 'yɩɛ Natanaɛlɩ 'ylɩmöö, ɔ lɛ naa: «Nɩkpɛ a ‑mɔɔ glɩnɩɛ ‑tiamö a Yizlaɛlɩyii, mɔɔ yiɛ da'a ‑mä. Ɔ'ɔɔ ylʋ ‑kä.» 48Zezwii gbää sa'aa, Natanaɛlɩ lɛ nɩɩ: «Dɛ ‑n ‑yinɩɩ bhä 'nɩ?» Ɔ lɛ: «Dɛɛ Filiipö ‑nɩmöä a ‑bhlɛ wäzɩ, ‑lɛ fiigösuu zɛmö dɛ ɔ ghlɩnɩmöä, ‑n ‑wʋ a ‑bhlɛ ‑lɛ, 'n n ‑yimö a‑a 'ylɩmö.» 49Zezwii gbää sa'aa, ɔ lɛ naa: «‑Atʋ, Lagɔ 'a Yuu, Yizlaɛlɩ 'a 'bhlɩlowlii, mö ‑n glɩnɩɛ.» 50Zezwii lɛ naa: «Gbʋmö n gbä nɩɩ, ‑n ‑wʋ a ‑bhlɛ ‑mä fiigösuu zɛmö, 'n n ‑yimöä 'ylɩmö a za, nza ‑n ‑kaa bhä dlɩ 'wʋ? Dɩ n nyɩamöä dɛ'ɛ nɩɩ, ‑li a ‑mi ‑n 'kää 'ylɩmöö, yɩ yi 'ghïli, yɩ yi ‑mi nɩ 'wʋ zi. 51‑Maa ‑tiamö n nyanyɩɛ dɛ'ɛ 'dɩ nɩɩ, zlɩ yi nuë do, a yi Lagɔzuzuku 'ylɩmö, Lagɔ yi Nɩkpɛ a 'Yu 'wʋ tie, yɩ yi kwli yɩ yi ‑gbälɛ.»

Dewis Presennol:

Zaa 1: bet

Uwcholeuo

Rhanna

Copi

Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda

Dysgu mwy am BdG2

Zaa 1

Adnodau Beiblaidd Poblogaidd o
Zaa 1

Gwranda ar Zaa 1

Beibl:

Bété, Guiberoua

Fersiwn: BdG2 - bet

Zaa 1

Zaa 1

Adnodau Beiblaidd Poblogaidd o Zaa 1

Gwranda ar Zaa 1

Beibl:

Bété, Guiberoua

Fersiwn: BdG2 - bet

Zaa 1

Adnodau Beiblaidd Poblogaidd o
Zaa 1