मत्ति 6
6
येसु दान हियानाता बारेते करहान्तोर
1येसु असा ओरकुन इतुर, “केवल मानेयकुन तोहान साटि निमाट मिया सोबाय बुतो ओरा मुने केमाट इदाम सावदान मन्ट! आयोते आपुनोर स्वरगतोर बाबोनिकेडाल मिकुन बाताले प्रतिफळ पुटो आयार#मत्ति २३:५।”
2“इन्जोर गरिबलोकुरकुन दान हियानपा मानेयना कयदाल वाहवा पुटि इन्जोर कपटि लोकुरक यहुदि समाज मन्डलितिगा अनि गलितिगा कियाना लेहका निया मुने बोरे पिपारि उहकमाकिर। ओरकुन इदेना पुरा प्रतिफळ पुटतुरक इन्जोर नना मिकुन खरोय इन्तोना। 3मति बसके निमा बोरे गरिब मानेयिन दान हिन्तोन ते निया दान मकस मनि इन्जोर निया तिन्दान कय बाताल कियाला आता अदेन निया डावाल कय पुन्माकि। 4निमा मकिहिच किन्तोन अदेन वने हुळान्तोर नियोर स्वरगतोर बाबो निकुन अदेना प्रतिफळ हियानुर।”
येसु प्रार्थनाता बारेते करहान्तोर
(लूका ११:२-४)
5येसु असा ओरकुन इतुर, “निमाट प्रार्थना कियाकिट ते कपटिलोरा लेहका प्रार्थना केमाट, बाक्याकि ओर दुसरो लोकुरकुन तोहान साटि समाज मन्डलितिगा अनि हरिता चोवकतिगा नितस प्रार्थना कियाना इच्चा किन्तोरक। ओरकुन अदेना प्रतिफळ पहलेय पुटता मन्ता इन्जोर नना मिकुन खरोय इन्तोना#लूका १८:१०-१४। 6मति निमा प्रार्थना कियाकि ते आपुना खोलितिगा हन अनि कवाळ बन्द किस मकस परमेस्वरना मुने प्रार्थना किम। असके निया मकस प्रार्थनातुन हुळान्तोर नियोर बाबो निकुन प्रतिफळ हियानुर। 7प्रार्थना कियान बेरा खरोय परमेस्वरिन पुनोर लोकुरा लेहका बेकार पोल्लोनुंग असा-असा वळकमाट, बाक्याकि ओरा पकाय वळकानाते ओरा प्रार्थनातुन उत्तर पुटानुर इन्जोर ओरक समजेमान्तोर। 8इन्जोर निमाट ओरा लेहका आयमाट, बाक्याकि मिया बाताल-बाताल जरुरि मन्ता इन्जोर मिवोर स्वरगतोर बाबो मिया तलकानाता मुनेय पुन्तोर।”
प्रबु येसु करिहता प्रार्थना
9येसु असा ओरकुन इतुर, “निमाट इद रितिते प्रार्थना किसोर हन्ट:
‘स्वरगतिगा मन्तोन हे मावोर बाबो, निया पोरोय पवित्र मानेमायिर,
10निया राज्य वायि, निया इच्चा स्वरगतिगा बदाम पुरो आन्ता अदामे दरतितिगा वने आयि।
11मावा दियामेटा जेवन नेन्ड माकुन हिम।
12अनि माक आपुना दोषिहकुन मापि कितोम अदामे निमा वने मावा दोषतुन मापि किम।
13अनि माकुन परिक्षाते अरिहमा, सयतानताल पिसहा;
बाक्याकि राज्य, लाव अनि महिमा दरोज नियाय मन्ता। आमिन।’ ”
14“इन्जोर निमाट मानेयना गुनातुन मापि कियाकिट ते मिवोर स्वरगतोर बाबो वने मिकुन मापि कियानुर। 15अनि निमाट मानेयना गुनातुन मापि केवि आयकिट ते मिवोर बाबो वने मिया गुनातुन मापि केवोर आयनुर#मर ११:२५-२६।”
उपासता बारेते येसु करहान्तोर
16येसु असा ओरकुन इतुर, “निमाट उपास पयकिट ते, कपटिलोरा लेहका मिया चेहरातिगा दुःख तोहमाकि, बाक्याकि ओर उपास मन्तोर इदाम दुसरो लोकुरकुन तोहान साटि आपुना तोडी दुःखते बनेहकिस मन्तोर। अनि ओरक आपुना प्रतिफळ पुटिहतोर इन्जोर नना मिकुन खरोय इन्तोना। 17मति निमा ते उपास पयकि असके निया उपास दुसरो लोकुरकुन तोहान साटि आयो मति गुपित मन्तोर नियोर स्वरगतोर बाबो परमेस्वरिन तोहान साटि आपुना तलापोरो निय होकस आपुना चेहरा नोरा। 18निमा मकस किता उपवास नियोर बाबो परमेस्वर हुळस निकुन प्रतिफळ हियानुर।”
स्वरगतिगा धन जमा कियाना बारेते
(लूका १२:३३-३४)
19येसु असा ओरकुन इतुर, “पुळियिक तिन्तांग अनि जंग लागान्ता अनि कलेर बुका अरहिच कलिला परान्तोर इद दरतितिगा आपुन साटि धन जमा केमाट#याकु ५:२-३। 20मति पुळीयिक तिनोंग अनि जंग लागो, अनि अगा कलेरक बुका अरहिच कलिला परोर स्वरगतिगा आपुन साटि धन जमा किम्ट। 21बाक्याकि बगा निया धन मन्ता अगा निया मन वने लागेमास मन्दार।”
कोन्डा निया मेन्दुलता टिवरि
(लूका ११:३४-३६)
22येसु इतुर, “मेन्दुलता टिवरि कोन्डा आन्दु, इन्जोर निया कोन्डा बेस मन्दार ते निया सबोय मेन्दुल वने वेळिचि मन्दार। 23मति निया कोन्डा खराब मन्दार ते निया सबोय मेन्दुल वने आन्दार मन्दार, इद कारणते नियागा मन्ता ओद वेळिचि आन्दार आयि ते ओद आन्दार बचोन हजोर आयार!”
रन्ड मालकान सेवा किया परोर
(लूका १६:१३; १२:२२-३१)
24येसु असा ओरकुन इतुर, “रन्ड मालकाना सेवा कियाला बोरायि मानेय आय परोर, बाक्याकि ओर वरोन दुश्मन किस दुसरोन मया इरानुर, या वरोन मिलेमास मन्दानुर अनि दुसरोन तुच्च समजेमायनुर। निमाट परमेस्वर अनि धन इव रन्डासना सेवा किया परविट। 25इन्जोर नना मिकुन इन्तोना, मति माक बाताल तिन्काट अनि बाताल उन्काट इन्जोर आपुना जिवा साटि अनि बाताल करकाट इन्जोर आपुना मेन्दुल साटि चिन्ता केमाट। जेवनताल जिवा अनि सन्दराताल मेन्दुल बाताल हजोर हिले बहे? 26आबारता पिटेनुंग हुळाट अव विजा वीतोंग अनि बाताले कोयोंग, अनि टोलितिगा निहच वने इरोंग ते वने मिवोर स्वरगतोर बाबो अवेहकुन तिहान्तोर। बाताल मिया अवेहनताल पकाय किमत हिले? 27अनि चिन्ताकिस आपुना वरसानुंग हुडुक गेला विळहिला परान्तोर मियागडाल बोर मानेय मन्तोर?”
28येसु असा इतुर, “सन्दरांग साटि बाक्या चिन्ता किन्तोरिट? केळाता पुंगाह बदाम बरसान्तांग इन्जोर हुळाट; अव बाताले मेहनत केवोंग अनि आपुन साटि सन्दरांग बनेह केवोंग। 29सुलेयमान राजाना पकाय हजोरपणते वने ओर केळाता इव पुंगाह लेहका बसकेय सिंगार केवोर इन्जोर नना मिकुन इन्तोना#१ राजा १०:४-७; २ इति ९:३-६। 30अनि नेन्ड मन्ता नाळि किस्तिगा अचियानुर दिपा पल्लातिगा रोन्डातुन परमेस्वर इदाम लेहका मोळिहतोर ते, हे कमि विस्वास केवालोरक, मिकुन परमेस्वर अदेनताल वने बचोन सोबातांग सन्दरांग करहाहनुर?”
31येसु असा ओरकुन इतुर, “माक बाताल तिनकोम, बाताल उन्डकोम, बाताल करकाट इन्जोर निमाट चिन्ता केमाट। 32बाक्याकि इव सबोय चिजतुन खरोय परमेस्वरिन पुनोर लोकुरक पळकसोरिंग मन्तोरक मति मिकुन इव सबोय चिजता जरुरि मन्ता इन्जोर मिवोर स्वरगतोर बाबो पुन्तोर। 33इन्जोर पहले निमाट परमेस्वरना राज्य अनि ओना गिरिदा कियाना बुतोतुन पळकाट अनि अदेनासंग इव सबोय चिजक वने मिकुन पुटानुंग। 34इन्जोर नाळ दियाता चिन्ता नेन्ड केमाट, बाक्याकि नाळता दियाते ओद दियाता चिन्ता पकाय मन्दार इन्जोर नेटा साटि नेटाय दुःख पकाय मन्ता।”
Dewis Presennol:
मत्ति 6: fmu
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© (Active) Wycliffe Bible Translators, Inc. All rights reserved.