Génesis 7
7
Que cuchárique chapídome gué dequejnangóri nanique
1Iji udojo quigade ga Pangarádejnai Dupade catecãrápoi Noé nanique rĩ enga chojningame uté nanique: "Gusu ua iji erámi tudé uje babé yojningane cucha, yajegaidode ore jnese. Bojode erámi unirísoño ore jnese que tangárapoi yu to rĩ iji deréjnane jnese. Jecute gusu bajogasui uaque uje yidejéna uaque aja cucoi ajei. 2Mu ujetiga dosipeque cuchisórique uje e yingome uaque ujetiga ẽcho ore ome yu enga ãra ore aja cucoi ajei to enga gare iji ti choquírigo jne, jé aja chequérigui rĩ garapo iji ti to jne rĩ. Jé basa ga cuchisode uñane enga chojmára jne chequéraque, chojmárapo choquírique jne rĩ jetiga ãra ore aja cucoi ajei to. 3Jé adi tupo rĩ ome chugúpẽre ponáyone jnese rĩ ujetiga ãra ore aja to enga ãrája chequérigui aja ujetiga gare ore iji ti, enga átaja choquírigo to jetiga gare ore iji ti yijmanuñai. Yigaidi tu gu ujetiga chugúperone dépoji erámi údode jnese to rĩ ujetiga yodi íjnongapo iji jnumi te rĩ. 4Bamo arĩ́e uje e garósi yui ujetiga yiroque guei taja jnumi jne. Qué dirode amirone gare iji ti iji yui. Enga yojningai tuté gue jeta beque jne enga a dejade chejna ayoré gárode jne, jé chopo dirode rĩ, a chejnapo ayoré gárode jne rĩ enga ore chopise ñane jne. Enga a yejnapise yipesudode cucha jnese jne iji erámi údode jnese, enga a ca cuchárique chapídome gue dequejnangóri tuté jnese jne." 5Enga Noé uté tangaripísi Pangarádejnai Dupade nanique enga dopísi ojningane cucha nanique.
6Uje chise diri nanique uje yodi chaco erámi gai nanique enga Noé guejnanie sequeré chise 600 años nanique. 7Uje cáma beque nanique enga Noé uté chacája dapesudi cuco ajei nanique enga nóna dacoté taja, jé aja dajnacarode ore, jé aja dacaridie rĩ. Ore gaidi tu gu ujetiga cucoi tuté chãraque ore nanique ome gue dequejnangóri. 8Que gusu Noé ore nanique mu cuchisode ore chacája cuco cuchábi ajei to nanique. Dosipéode déji ga cuchisode dépoji jnese te rĩ, jé aja cuchisode to uje que ore guichárique cuse to iji jnumi uje quĩrique ore diguiji jnumi, jé aja chugúpẽre ponáyone jnese to rĩ. 9Ga cuchisode udore nóna Noé aja cuco cuchábi ajei enga ga ga gare ore aja ajei. Ga cuchiso chojmarai, choqui jé aja chequé ore nóna ñane aja cucoi ajei, jé aja ujetiga cuchisode ore déji cucoi ajei jnese. Enga Dupade uruode e tocadepise ome Noé ome cuchade udore jnese uje e ore jnome ajei, cucha ponáyone.
10Ga jé u uje Dupade uruode tocade enga e chise dirode uje gare iji ti enga jé u uje e beque enga e yodi chicáji gaté enga e chaco jnumi gai. 11Enga Noé guejnanie sequerei e chise 600 años nanique uje cuchade udore e tocade. Mu cáma jnani bajade pésu guedosíode íode nanique enga gusu uje ore chisecãru dirode batigade nanique. Jecute dirode e chise 17 nanique iji guedosi bajai uéchaminóre gatei uje guei tṍraji yote quedéjnai údi enga cho jnipe, jnipe aja gaté enga jé u uje ibisógaja gaté enga yote quedéjnai quérã gaté. Enga cho ujetiga cuchárique chuchẽre gaté gai to enga yodi tṍraji gaté nanique to enga cho corágaja jnumi, yodi. 12Enga beque nanique ga que cha nanique iji dejade, dirode ore jnese enga dejade chise dejnanie ayoré gare uje beque nanique. Ga jé chopome dirode rĩ uje beque nanique.
13Enga uje chise diri tuté uje guei base nanique enga Noé chacája dapesudi cuco cuchape ajei, enga acoté, ujnacarode, ore chacája ajei jnese, jé aja dacaridie ore to rĩ. Enga Noé ujnacarode udore ore íode u udojo nanique: uñai i tu Sem, jé basa uñai i tupo rĩ Cam, jé basa uñai i tupo Jafet nanique rĩ. 14Que gusu ore nanique jeta ore chacája mu jé upo ome cuchiso sijnángone, parágode ore rĩ, ore chacája jnese. Jé aja cuchiso uñane to rĩ uje que ore guichárique cuse, enga quĩrique ore diguiji jnumi. Jé aja chugúperone to rĩ, ore chacája to. 15Yojningane udore cuchisode ore nóna ñane aja ajei to, ga ga gare, ga ga gare ore aja ajei to uje Noé, jogasui ore chacája cucoi to nanique. 16Enga jé Dupade urúo nanique gu ome Noé ga cuchiso ponáyone nóna chequé jé aja choqui, jé aja cucoi ajei te rĩ uje ore chacája. Uje e ore déji ajei jnese nanique ga jé u nanique uje Pangarádejnai Dupade suru piagode gai iji ore quigade nanique.
17Enga guei tuté que cha beque nanique enga dirode guejnanie ayoré gare nanique uje beque. Enga jé u nanique uje yodi irágu erámi nanique enga cucoi chicáji gaté, chicáji gaté, chicáji gaté, gaté ga diguiji yodi gai. 18Enga yodi jé ate nanique uje chicáji gaté, gaté mu jé cho cucoi nanique uje diguiji yodi gai nanique. 19Enga yodi jé ate nanique uje chicáji gaté, chicáji gaté enga chaco cucaranone gáyode jnese. Jé chuságaja cucarãte umarone to uje chaco udore gáyode jnese to iji erámi údode jnese. 20Mu uje e chaco cucarãte umarone udore gáyode nanique mu que cha ujetiga doi gaté, doi gaté. Chicáji gaté, chicáji gaté gatuaque enga que cha chicáji gaté iji cucarãte umarone ójodie enga gariji ti métrodie iji cucarãte umarejnai ójo iquei uje quene yodi chácare. 21Ga jé u nanique uje erámi unirisórone toi jnese ga ore cachodi tu. Que gusu ore nanique mu jé u chugúperone ore to, ore toi jnese. Jé aja cuchiso parágode, sijnángone ore jnese, ore íjnoque to. Jé aja cuchisode uñane uje que ore guichárique cus enga quĩrique ore diguiji jnumi ga ore topóji to rĩ. 22Enga jé u uje cucha uecade jnese iji erámi údode ore toi jnese. Uje cuchade ujñari déji nanique mu que cuchade udore chapídome Dupade ujuyaquédatéi tuté nanique. 23Enga gusupúsu Noé, jorane ore iji cuco cuchábi ajei uje ore eca jnese iji cucoi ajei. Jé basa ga Dupade chejna erámi unirisórone uñane jnese nanique: jnanione, chequedíe, cuchiso parágode, sijnángone ore, jé aja chugúpẽre chogode iji gaté yui, jé aja cuchisode rĩ uje que ore guichárique cuse iji jnumi. Ore toi jnese nanique. 24Enga dirode chise 150 iji yui nanique uje yodi jé jogate gaté enga chaco erámi gai jnese.
Dewis Presennol:
Génesis 7: Ayore
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2021 Ethnos360