Génesis 12
12
Dupade chiroque jnani bajai Abram aja punire quedéjnarique mu chingo uje a cho quigome jne
1Enga chise diri uje Pangarádejnai Dupade catecã́ri Abram enga chojninga: "Boji baniri tudé enga ajíñome bai casé uacajogasui iji te jne, jé aja barasade ore jnese. Gusu uáguiji uacajesúrique jne. Enga acáji punire quedéjnarique jne enga a yo quigome ua jne. 2A yipésu uaque jne enga a jiépisi uacape disi ejode jne enga a etoque ore jne enga a erámi unirisórone todo ore jne iji erámi údode jnese. A yipésu ua jne enga a ujnomerãque ua jne iji erámi údode jnese enga erámi unirisórone ore agutíyabádi tu ua jne. 3A yo yurúja bajnorasórone ore jne ome cucha omone, jé basa ga a yo yurúja betesórone ore ome cucha gajnaréngone. Enga a chise diri jne ujetiga erámi unirisórone jnese iji erámi údode jnese ore chiraja yicaniratiguei gu ua jne."
4Enga jé u nanique uje Abram chudute Dupade uruode udore ome re enga jé u uje angoninguite guesaque nanique. Enga jé u uje jnoji Harán nanique. Enga guejnanie sequerei chise 75 uje jno enga chicáji punire quedéjnai nanique uje i tu Canaán nanique.
5Enga jé u nanique uje Abram jnoji oridai uté enga nóna dacoté Sárai, jé aja dajnacare uñai Lot uje uté dai Harán toji Ur uté nanique. Enga chejnapise dagúchade aja dabai jnese uje jno. Enga Abram chise darógode iji harángosode ore enga jé nóna darógode udore to aja dajesui nanique. 6Uje ore jnoji Harán nanique enga ore jno, ore jno, ore jno iji puniri uté yui jec aja uje ore chise ore idáidatéi Siquem ejode nanique. Enga ore chácariji ore atetai iji ejoi uje i tu More. Enga purása quedéjnaringo déji to nanique uje cananéogose ore. 7Enga iji jogadi uté enga Pangarádejnai Dupade chiqueta raja Abram nanique rĩ enga catecã́ri. Enga chojninga: "A yisi ome puniri udé jne ome bape disi ejode enga ore gajnenguipise jnese jne."
Enga jé u nanique uje Abram pésu daserani iji uté nanique iji cucaranenie uje chojninga: "Pangarádejnai Dupade chiqueta raja yu iji pijogadi tudé, jecute a yipésu yaserani jne iji de ome Dupade." 8Mu udojo quigade enga Abram ore jnopo rĩ enga chicáji ore idai uñai údi uje i u Betel, ga ore cáputapísiji cucarani yui uje déji guedé garani yui. Enga ore pésu darengúi iji uté. Enga ore irengúi déji guidáidatéode ujai. Enga ore idáidatéode uñai déji guedé garani yui enga i tu Hai, jé basa uñai déji guedé cacadi yui, uje i tu Betel. Enga Abram pésu daserãte uñai tiji irengúi uté ome Dupade rĩ. Enga catecã́ri Dupade iji uté. 9Enga ore jnopóji uté rĩ enga que ore ibisógaja dajesui, mu ore moji udore, udore aja daqui ore idai Neguev yui.
Uje íjnonguipíse cucha pibosode ome Abram ore nanique enga ore chicáji punire quedéjnarique Egípto nanique
10Enga ore chise daqui ore idai Neguev uté enga ore pésu darengúi iji ejórique. Mu udojo quigade ga íjnonguipíse cucha pibosode iji uté nanique. Jecute ore jnopo iji rĩ ga ore chicapóji punire quedéjnarique uñai te rĩ uje i tu Egípto nanique. Enga ore chise nanique enga diyajmanguipise ore iji. 11Enga e ore chirõre daqui uté punire enga Abram catecã́ri dacoté Sárai nanique enga chojningame: "Yiraja uje chequé omé ua. 12A egíptogosode uñeque chajire ua jne enga a pota ua. Jetiga ore chajire jne uje babai cuse ga a ore chujé yu jne. A ore chujé yu jne mu a ca ore chujé ua to jne uje a ore pota ua gu. 13Enga yuruode udore tocade jne enga be enga apógu báringa yacoté enga ojninga: "Uté nero yu arĩ́e."
14Enga uje ore chise Egípto enga jé upúsu Abram uruode. Uje ore chimo acoté Sárai enga omépise uaté ome ore nanique. 15Enga eduguéjna cuchábi Faraón iroguipísode uñane uje eduguéjna ore to enga ore chimo Sárai to uje chequé omépise. Enga ore chingome deduguéjnai Faraón nanique enga uté chojninga: "Beyoi uaté enga ajnáño aja ne enga yajirape to." Jecute ore jno údi aja deduguéjnai.
16Enga jé u nanique uje Faraón nejé Abram údode enga chisi ome dachidode cucha ome jnese: áyasadie, aja aquirájnanie, aja burica quedéjnanie, aja cuchiso quedéjnane uje quĩrique cho buricade to uje udore i u caméllo. Enga que gusu udojo nanique mu chisiapome darógode ome rĩ, enga jé chátaja daróguedie to iji chequedíe. Pota Sárai gu, jecute tẽrája Abram nanique, uje chose eti nero gu. 17Mu chise diri nanique uje Pangarádejnai Dupade chirota Sárai ore nanique enga Dupade chiroque dequejnarei aja Faraón, jogasui ore nanique. 18Mu eduguéjnai uté chiraja nanique uje Dupade ujuyaquéode u udore ga tibidi Abram nanique enga chojningame: "¿Gotique gu a uje que angome yu uje bacoté chequé tuaté? A ejnarétaque yoque gu ua." 19Enga chojninga: "¿Gotique gu a uje bãra yu, uje chiese bẽro chequé tuaté? Uje e idógosi ujetiga yisárase chequé unejángueraque uje abai cus. De daque jã bacoté, bo údi, enga boyóji yuniri udé." 20Enga jé u nanique uje eduguéjna cuchábi Faraón catecã́ri daroguipísode enga chojninga: "Ajócãcho jnani uté ujetiga jno iji yocuniri udé, jé aja acoté, urasade ore jnese."
Dewis Presennol:
Génesis 12: Ayore
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2021 Ethnos360