Matiye 14
14
Tar yo lə Jan-Batisi
1Dɔ ndɔɛ̂ tə̂ənn, Erodə Antipas kə̂ to mbay kə̂ Galile oo tam Jeju a, 2pa arə njê kə̂ aw ddaje kula kɔyɛ̂ tə̂ nan: «Dingaw nəənn to Jan-Batisi le njaa. Ne kə̂ noy le â ndol! Mba yeenn bba, ninga singa dda nɛ̂n-mɔrije.»
3Ləw, Erodə Antipas arə duwa Jan n̂-tɔɛ̂ dilɛ̂ kəy-kula tə̂ mba Erodiyadə kə̂ to dɛnɛ̂n lə ngokɔɛ̂n Pilipi. 4Jan pa arɛ̂ nan: «Ndu ari ddəw ta karə ə-taa Erodiyadə to dɛnɛ̂n ləi ang.» 5Erodə ndiki ta tɔl Jan le, a n̂-bbəəl kəm Jiipije mba dooje Jan to nje-kila mbər tar lə Lubba njaa.
6A ndɔ kə̂ Erodə inga bbal kâra dɔ marɛ̂ tə̂ asə ngaâ n̂-dda kusu a, ngonn lə Erodiyadə kə̂ dɛnɛ̂n la nɔn dəwje tə̂ arə nəəl Erodə nya. 7Yeenn bba, Erodə unda yo arə ngonn kə̂ dɛnɛ̂n le nan: «Nɛ̂n tɔyn kə̂ ə-dujum a, mâ kari.» 8Kɔɛ̂nje tulɛ̂ arə n̂-pa nan: «Lo tə̂ nəənn njaa, arəm dɔ Jan-Batisi mə bay-sambe tə̂.» 9Rɔ tɔkə mbay Erodə nəəle ang. A mba nunda yo kəm dəwje tə̂ kə̂ n̂-bbarde mban le, nunn ndu karə darɛ̂ nɛ̂ɛnn le. 10Yeenn bba, nula kəy-kula tə̂ narə n̂-gangə dɔ Jan le. 11N̂-ddee kə dɔ Jan le mə bay-sambe tə̂ ngaâ darə ngonn kə̂ dɛnɛ̂n le aw nɛ̂n arə kɔɛ̂nje. 12Njê-njaje go Jan tə̂ le ddee unnje niinnɛ̂ aw dubbuje. Goe tə̂ a, daw paje tarɛ̂ darə Jeju.
Jeju arə nɛ̂n-kusa dəwje doro min
13 Jeju oo tar nəənn le a, unn tɔkə to ɔtu lo tə̂ənn le aw kə karɛ̂ baa lo tə̂ kə̂ iya rɔɛ̂. A dəwje kə̂ banya ooje tarɛ̂ ngaâ inje mə tɔkə bbeje tə̂ unnje go maann ɔruje goe kə gɔlde. 14Jeju in mə tɔkə to tə̂ le uru nangə̂ ngaâ oo dəwje kə̂ banya le a, ddɛɛ̂ ndoo ngaâ naji njê-rɔ-toje.
15Kar andə a, njê-njaje go Jeju tə̂ ddee paje arɛ̂ nan: «Lo nəənn to mə kɔr baa ngaâ kar nday nya mban tɔ. Ə-tubba dəwje kə̂ banya nəənn le arə dawje mə bbeje tə̂ daw ndokoje nɛ̂n dusaje.» 16A Jeju ilade tə̂ nan: «Moo a, to maji karə dawje ang. Sese njaa arəjede nɛ̂n dusaje.» 17A n̂-paje darɛ̂je nan: «Mapa min kə kanjije joo baa to jije tə̂ nəənn.» 18Jeju pa arəde nan: «Ə-ddeeje nɛ̂n arəmje.» 19Goe tə̂ a, narə dəwje kə̂ banya le isije dɔ muje tə̂, a n̂-taa mapa kə̂ min kə kanjije kə̂ joo le, nunn kəmɛ̂ kə darâ ngaâ narə wooyo Lubba. Goe tə̂ a, n̂-tətə mapa kə̂ min le narə njê-njaje goe tə̂ narə n̂-kaynje dəwje kə̂ banya le. 20Dede tɔyn dusaje darə məde ndann ngaâ n̂-mbɔnje kəse kə̂ nayn ddusu karɛ dɔku gire joo. 21Dəwje kə̂ usaje nɛ̂n le asəje nɛ̂n kə̂ doro min, dɛnɛ̂nje kə̂ ngannje n̂-turade ang.
Jeju nja dɔ maann tə̂
22Njangə baa goe tə̂ a, Jeju arə njê-njaje goe tə̂ aalje tɔkə to karə daw kete daw nginɛ̂je tura maann tə̂. A ne, nâ nayn ta tubba dəwje kə̂ banya le karə n̂-təlje bbeje tə̂ ləde. 23N̂-tubba dəwje kə̂ banya le. Goe tə̂ a, naal marə ddingiri ddəw əw ta duju Lubba. Lo-kul a, n̂-nayn lo tə̂ənn le kə karɛ̂ baa. 24Tɔkə to le aw ddəw əw kə ta kongo ngaa, a ləl ula aw tila kəm njê-njaje go Jeju tə̂ le arə maann le aw ləngə tɔkə to le kə singa nya. 25Ngɔsi kə ta lo-karɛ a, Jeju aw nja dɔ maann tə̂ le aw nɛ̂n kə̂ rɔ njê-njaje goe tə̂ le. 26Njê-njaje goe tə̂ ooeje naw nja dɔ maann tə̂ le a, dɔde ayn ngaâ n̂-paje nan: «Uman â nəənn!» Ngaâ bbəəl uta dɔde arə daw duruje əkii. 27A Jeju pa arəde njangə baa nan: «Əman â nəənn, ə-bbəəlje ang!»
28Yeenn ngaâ Piyɛr ilɛ̂ tə̂ nan: «Əbbə-dəwje, bbo to əi a, unn ndui arə m-nja dɔ maann tə̂ maw rɔi tə̂.» 29Jeju pa nan: «Ə-ddee!» Piyɛr in mə tɔkə to tə̂ le ddisi ngaâ unn kutu nja dɔ maann tə̂ le ta kaw kə rɔ Jeju tə̂. 30A Piyɛr oo ləl kə̂ aw ula kə singa nya le a, n̂-bbəəl ngaâ nunn kutu dii. Nuru əkii nan: «Əbbə-dəwje, ajim!» 31Njangə baa njaa Jeju ula jia uwɛ̂ nɛ̂n ngaâ pa arɛ̂ nan: «Əi dəw kə̂ mə-kunn ləi ngaji baa, mba ddi bba əjə tar wa?» 32Dede joo kəm daalje mə tɔkə to tə̂ le ngaâ ləl le əw rɔɛ̂. 33Njê-njaje go Jeju tə̂ kə̂ isije mə tɔkə to tə̂ le ɔsuje məkəjə-gɔlde nangə̂ nɔɛ̂n tə̂ ngaâ paje nan: «Ə-to Ngonn lə Lubba njaa.»
Jeju aji njê-rɔ-toje nangə tə̂ kə̂ Jenejarɛtə
34Daalje dɔ maann le n̂-teeje nangə tə̂ kə̂ Jenejarɛtə. 35Dəwje kə̂ lo tə̂ənn le gɔɔnje Jeju gəreje. Dulaje kə tar laa dɔ nangə tə̂ənn le tɔyn darə dəwje ngaâ n̂-ddeeje kə njê-rɔ-toje tɔyn rɔɛ̂ tə̂. 36N̂-ddaje rɔde to ndoo rɔɛ̂ tə̂ karə ninyade narə ta-kubbu laa baa njaa kara, njê-rɔ-toje le ɔruje kə jide. Yeenn bba dede tɔyn kə̂ dɔruje ta-kubbu laa le dajije.
Dewis Presennol:
Matiye 14: KabbaDkS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020, ACOTBA