Luuka 22

UYuuda iyiitikha kimudoolela Yeesu

(Mataayo 26:1-5, 14, 16; Maluko 14:1-2, 10-11; Yohana 11:45-53)

1Uluhaavi lwa shiwungo sha makhaate gina gasiponyisiiwe ishiwumulilo#22:1 Shiwungo sha makhaate gina gasiponyisiiwe ishiwumulilo: Yimba iliswi ili mu Maswi aMahensa. lukhandi nkholeela. Ishiwungo isho shikhandi shitambulwa Pasaakha.#22:1 Pasaakha: Yimba iliswi ili mu Maswi aMahensa. 2Avatambule avakhome na vamanyisaaji va ndaji sa Musa, vakhandi visakula insila iya kimubuda uYeesu. Vakhandi viigaha ilyo kwa kityega, kwa kiiva vakhandi vikivatiila avaanu.

3Baaho, uShetaani wámuyinjila uYuuda, yuna akhandi itambulwa Isikaliyoote. Umuunu uyu akhandi munyaayumo mu vamanyisiwa vala ishumi na vavili va Yeesu. 4Baheene uYuuda wáaluta kwa vatambule avakhome, na kwa vakhome va vasulukhali vina vakhandi viyangalila inanda imbaagule iya kifuunyila. Wápulinkhana na woope shina hambi vikimukhata uYeesu. 5Ilyo lyavashendeefya mandu avakhome vala, baheene vapulinkhana nu mwene kimupeela ihela. 6UYuuda wáyiitikha, baheene wáyansa kisakula uluhaavi luna ishipuga sha vaanu shilikusiina, kiija amudoolele uYeesu.

Ulunoso ulwa shakiilya sha Pasaakha

(Mataayo 26:17-25; Maluko 14:12-21; Yohana 13:21-30)

7Ilijuva ilya shiwungo sha makhaate gina gasiponyisiiwe ishiwumulilo, lyafikha. Ilijuva ilyo, lilyene lina aVahayuudi vakhandi vikisishinja inyana nkholo sina sikhandi sivishiilwe kwa kiiva ya shiwungo sha Pasaakha. 8Baheene uYeesu wávafilikha uPetulo nu Yohana, wávajovela wáaja, “Mulute mutunosese ishakiilya sha shiwungo sha Pasaakha.” 9Vamuposa vaaja, “Wisakula tinose kwi?” 10Wávajovela wáaja, “Pina mwiyinjila mu lijumbi lya Yelusalemu, ukho musitangaane nu mugoosi yumonga, avegeele injiilo ya malenga. Uyo yumwene mumufwataje mbakha ilitembe lina hambi iyinjila. 11Apo mujovelaji umunya litembe kiija, ‘UMumanyisaaji iijova, “Uwudaama wa vahensa wuli kwi wuna nikwiliile kiliila ishakiilya sha shiwungo sha Pasaakha lumo na vamanyisiwa vangu.”’ 12Apo, asivasoonele uwudaama uwukhome uwa pa juulu, wuna wuvishiilwe pa kikhala. Umo mumwene mutunosese.”

13Avamanyisiwa vala vawuukha viiluta, vaafikha ku Yelusalemu. Vaganaga kifikha, vagaaga goona ngaja shina uYeesu akhandi avajoveele. Baheene vashinosa ishakiilya sha shiwungo sha Pasaakha.

IShakiilya sha Mutwa

(Mataayo 26:26-30; Maluko 14:22-26; 1 Vakolinto 11:23-25)

14Uluhaavi ulwa kiilya lwafikha. Baheene uYeesu wáakhala kiilya ishakiilya lumo na vanandeje vaakwe. 15Wávajovela wáaja, “Nina lihaahi mandu kiilya ishakiilya isha shiwungo ishi isha Pasaakha lumo noomwe, pina nisinalafisiwe. 16Nikivajovela kiija, nisikhalya khanji ishiwungo sha Pasaakha, uluganulo lwakwe mbakha pina yikhakhamiilikha mu Wutwa wa Nguluvi.”

17Baheene uYeesu wátoola ikhoomasi ya divaayi, wámuhonjesa uNguluvi wáaja, “Tooli iyi, woona mungʼwe! 18Nikivajovela kiija, shiyooli nisikhangʼwa khanji idivaayi mbakha uWutwa wa Nguluvi pina wukhayinsa.”

19Baheene wátoola umukhaate wámuhonjesa uNguluvi, wágumenyulania, wávapeela avamanyisiwa vaakwe wáaja, “Ugu gugwene muvili gwangu, guna guhumisiwa kwa kiiva yeenyu. Mugahaje ndeeni, kwa kinikumbukha one.” 20Vaganaga kiilya, uYeesu wáagaha khanji shishila, wátoola ikhoomasi ya divaayi wávajovela wáaja, “Idivaayi iya mu khoomasi iyi, shimanyilo sha lufingo ulupya,#22:20 Lufingo ulupya: Yimba iliswi Lufingo mu Maswi aMahensa. luna lusenjekha kwa danda yangu.

21“Leelo mumanyaje kiija, umuunu yuna ikinidoolela ali baaha tiilya lumo. 22Lulwene niijova one Lusawo lwa Muunu niiluta kibudwa, ngaja uNguluvi shina wáviishile mu lugoto. Leelo aka, umuunu uyo yuna ikinidoolela!” 23Apo, avanandeje va Yeesu vayansa kiposania vaveene kiija, yu naani mu veene yuna akwiliile kisenga ilyo.

Avamanyisiwa va Yeesu viposania kiija yu naani mukhome

24Avamanyisiwa va Yeesu vayansa kikhaanania kiija, yu naani yuna mukhome mu veene. 25Baheene uYeesu wávajovela wáaja, “Avatwa va vaanu va mu nyi iyi vikivatema avaanu vaanave kwa ngufu, leelo avatwa awo vikiyijova kiija mutango kwa vaanu.

26“Leelo omwe, musikhagahaji ndeeno. Umuunu yuna mukhome kunyeenyu, uyo aveesaje ngaja muunu yuna mudoodo kwa woona. Umuunu yuna ilongosa avaanu, aveesaje ngaja muunu yuna ikivasenjela avanji. 27Lino, yu naani yuna mukhome, yula yuna ali pa meesa iilya, awu yula yuna ileeta ishakiilya? Aasi! Asili yula yuna iikhala kiilya? Lino, one nili lumo noomwe, nili ngaja umuunu yuna ikivasenjela.

28“Omwe yuumwe mukhandi noone uluhaavi loona luna niijelwa. 29Lino, one nikivapeela ingufu sa kitema mu Wutwa wangu, ngaja uDaada wangu shina wánipeelaga kitema. 30Apo mukhava mwilya na kiingʼwa noone, mu Wutwa wangu. Khanji mukhakhala mu fitengo ifya shitwa, mukivahiga avaanu va fikholo ishumi na fivili ifya Isilaheli.”

UYeesu iikuva amalago kiija uPetulo asimukhaane

(Mataayo 26:31-35; Maluko 14:27-31; Yohana 13:36-38)

31UYeesu wáaja, “Simoni, puliisa! Umanyaje wunofu kiija uShetaani alombile na kipeelwa kivajela omwe, ngaja umuunu yuna ikungula ingano yaakwe na kiyiyeleelula. 32Leelo one, nakufuunyila kwa Nguluvi, kiija usikhalekhaga ilihuuvi lyakho kunyangu. Leelo pina waatina kunyangu, uvakhangasaaje avayaago.” 33USimoni Petulo wámugomosesa wáaja, “Wee Mutwa, one niyipinyile kiiva noowe, hata nda yive kidindilwa mu shifungo na kiifwa!”

34UYeesu wámugomosesa wáaja, “Petulo, nikikujovela kiija, iminsiyaano injogolo pina yisinaavishe, usiive wanikhaana mala khatatu kiija usinimeenye!”

Kiyipinya kigugumila mu makhamu

35Baheene uYeesu wávaposa avamanyisiwa vaakwe wáaja, “Uluhaavi luna navafilikhaga bila hela, musigo hata ndaatu, wuli, mukhashepushiilwe shoshoona?” Vamugomosesa vaaja, “Ndaali.” 36Baheene uYeesu wávajovela wáaja, “Lino, umuunu yuna ana hela, awu imbukuli, atoolaje. Woope yuna asiina panga, agusaaje ilikhooti lyakwe, baheene ihela iso agulile ipanga.#22:36 Ihela iso agulile ipanga: Iyi yikhandi nsila ya kivajovela avamanyisiwa vaakwe kiija, vayipinyaje kipata amalava. 37Kwa kiiva yiyandiikhwe, ‘Akhavasiiwe lumo na vanansi.’#22:37 Yimba mu litaafili lya Isaaya 53:12. Amaswi ago gakhayandiikhwe kwa kiiva ya one. Lino nikivajovela kiija ago gasisenjeshe kunyangu, khanji gali nkholeela kisenjekha.” 38Vamujovela vaaja, “Wee Mutwa, loleela! Apa sikwali panga sivili.” Woope wáaja, “Musikhajendelelaji kijova imola iya panga.”

UYeesu ifuunya mu shidunda sha Miseyituni

(Mataayo 26:36-46; Maluko 14:32-42)

39Baheene uYeesu wáwuukha iiluta mu shidunda sha Miseyituni, ngaja shina yikhandi ngʼoma yaakwe. Woope avamanyisiwa vaakwe vaava vikimufwata. 40Pina wáafikha mu shidunda shila, wávajovela wáaja, “Mufuunyaji uNguluvi kiija, avatanje musikhagahaga uwunansi pina mwijelwa.”

41Baheene, wávalekha baaho, wáaluta pamwandi padoodo, uwutali uwa kitaaga ilingʼanga. Wáfugama, wámufuunya uNguluvi wáaja, 42“Wee Daada! Nda wisakula, nikikulomba uniwuusise ikhoomasi iyi iya malava aga. Leelo, yisikhaveesaga shina nisakula one, leelo yive shina wisakula owe!” [43Apo, umalayikha kihuma kushaanya wámutwiwushila uYeesu, wáava ikimukhangasa. 44Leelo uYeesu wáyitenekha kifuunya, kwa kiiva akhandi na malava makhome. Pina ifuunya, inwinsi ngaja danda yaava yidomola pansi.]#22:43-44 Amaswi aga, gakusiina mu mayandikhwa agamonga amakuulu.

45Wáganile kimala kifuunya, wáyiima wáaluta kwa vamanyisiwa vaakwe, wávaaga vagoneleele utulo, kwa kiiva vakhandi vasugumiilwe. 46Wávajovela wáaja, “Kwashi mugoneleele utulo? Lamushi! Mufuunyaji uNguluvi kiija, avatanje musikhagahaga uwunansi pina mwijelwa.”

UYeesu iikhatwa

(Mataayo 26:47-56; Maluko 14:43-50; Yohana 18:3-11)

47UYeesu pina ilogola ago, shayinsa ishipuga sha vaanu shilongosiiwe nu Yuuda, umunyaayumo mu vamanyisiwa vaakwe ishumi na vavili. Baheene uYuuda wámuvejeela uYeesu wámuhunjila kwa kimunoonela. 48UYeesu wámuposa wáaja, “Wee Yuuda! Ukimudoolela uLusawo lwa Muunu kwa kimunoonela?” 49Baheene avamanyisiwa va Yeesu pina vikigaaga ago na kimanya gina gisenjekha, vamuposa vaaja, “Wee Mutwa! Tivateme ni panga?”

50Baaho, umunyaayumo wa vamanyisiwa wámudumula ni panga, ilikutu ilya kundiilo umuvanda wa mutambule umukhome. 51UYeesu wálogola wáaja, “Lekha kigaha ilyo!” Wálipyasa ilikutu ilya muvanda yula, wámuponia.

52Baheene uYeesu wávaposa avatambule avakhome, avakhome va vayimililaaji va nanda imbaagule iya kifuunyila, lumo na vakhome va Vayahuudi, wáaja, “Kwashi muniyinsiile ni panga ni ndulugu, ngaja muyinsile kimukhata muhiiji? Wuli, mwihiiva kiija one nikiyikhaana iselekhaali? 53Nsiku soona tikhandi lumo mu lukeeke lwa nanda imbaagule iya kifuunyila, leelo musikhanikheete! Lino, ulu luhaavi lwenyu, luna iitema umutwa wa nshiisi.” 54Baheene avaanu vala vamukhata uYeesu, vamutwala mu litembe lya mutambule umukhome. Woope uPetulo akhandi ikimufwata kwa kutali.

UPetulo ikimukhaana uYeesu

(Mataayo 26:57-58, 69-75; Maluko 14:53-54, 66-72; Yohana 18:12-18, 25-27)

55Avaanu vala pina vaafikha ku litembe ilya mutambule umukhome, vapemba umooto paakhati naakhati mu lukeeke, vaakhala viyoota. Woope uPetulo wávejeela, wáakhala lumo na veene. 56Leelo kwa kiiva ya lumuli lwa mooto, umuvanda umuhinja yumonga wámuloleela wunofu uPetulo, wáaja, “Woope umuunu uyu, wáava lumo nu mwene.” 57Leelo uPetulo wákhaana wáaja, “Wee washimaayi owe! Umuunu uyu, one nisimumeenye!”

58Paanyuma, umuunu uyunji wámwaga uPetulo wáaja, “Na yuuwe uli munyaayumo wa vala.” Leelo uPetulo wámugomosesa wáaja, “Wee muunu wee! Nisili yuune!”

59Lyaganaga kishila lisala limo ndeeni, umuunu uyunji wákhangasa wáaja, “Shiyooli, umuunu uyu wáava lumo na woope! Kwa kiiva woope uyu ahumile ku Galilaya!” 60UPetulo wáyankha wáaja, “Wee muunu wee! One nisigameenye gina wiijova!”

Baaho pina ilogola ago, injogolo yaavikha. 61UYeesu wáseetukha, wámuloleela uPetulo. Baheene uPetulo wákumbukha ulwa liswi lila lina uYeesu wámujovelaga kiija, “Iminsiyaano, injogolo pina yisinaavishe, usiive wanikhaana mala khatatu.” 62Baaho uPetulo wáahuma panja wáyansa kikhoola kwa kisugumilwa mandu.

Avasulukhali vikimubeda uYeesu

(Mataayo 26:67-68; Maluko 14:65)

63Avagoosi vina vakhandi vikimuyangalila uYeesu, vaava vikimubeda na kimutova. 64Vamugubikha ni shitambala ku meeho, baheene vaava vikimuposa viija, “Kuva amalago! Yu naani yuna wákutova?” 65Vaava vapikimuliga amaligo minshi.

UYeesu iihigwa na vakhome va Vayahuudi

(Mataayo 26:59-66; Maluko 14:55-64; Yohana 18:19-24)

66Kwaganile kuhenga kunena, avatambule avakhome, avakhome va Vayahuudi na vamanyisaaji va ndaji sa Musa, vakungaanaga lyava livansa lya Vayahuudi.#22:66 Livansa lya Vayahuudi: Yimba iliswi ili mu Maswi aMahensa. UYeesu wátwalwa kuveene. 67Baheene vamuposa vaaja, “Tujovela! Wuli, owe yuuwe Mukulusaaji yuna uNguluvi wátahisaaga kimufilikha?”#22:67 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. UYeesu wávagomosesa wáaja, “Hata nivajovele, musikwiliile kihuviilila khabisa. 68Khanji, nda nivapose, musikwiliile kinigomosesa. 69Kiyansa lino, one Lusawo lwa Muunu nisiive nikheele ulubali lwa kundiilo#22:69 Ulubali lwa kundiilo: Uluganulo lwakwe, uYeesu akhapeelwa ingufu nu wutawulilwa. lwa Nguluvi, uMunya Ngufu Soona.”

70Apo woona vaajova, “Lino tijove owe yuuwe Lusawo lwa Nguluvi?” UYeesu wávagomosesa wáaja, “Omwe yuumwe mwajova kiija one yuune!”

71Baheene avakhome vala vaajova, “Tisakula avalunjikhaaji vaashi khanji? Mbona ose yuuse tapulikha iliswi ili kihuma kunyaakwe yumwene!”

Dewis Presennol:

Luuka 22: Shisangu

Uwcholeuo

Rhanna

Copi

Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda

Dysgu mwy am IShiyanso nu Lufingo uLupya

Luuka 22

Adnodau Beiblaidd Poblogaidd o
Luuka 22

Gwranda ar Luuka 22

Beibl:

Sangu

Fersiwn: IShiyanso nu Lufingo uLupya - Shisangu

Luuka 22

Luuka 22

Adnodau Beiblaidd Poblogaidd o Luuka 22

Gwranda ar Luuka 22

Beibl:

Sangu

Fersiwn: IShiyanso nu Lufingo uLupya - Shisangu

Luuka 22

Adnodau Beiblaidd Poblogaidd o
Luuka 22