Yohana 10
10
Ishihwano sha mudimaaji umunofu
1UYeesu wáyitenekha kilogola kwa Vafalisaayo wáaja, “Shiyooli nikivajovela, umuunu yoyoona yuna asiyinjila mu lupanga lwa nkholo kishilila pa shikwilo, leelo iyinjilila panji, uyo iiva muhiiji khanji mupokhaaji. 2Leelo yuna iyinjilila pa shikwilo, uyo mudimaaji wa nkholo. 3Umuyangalilaaji wa lupanga, ikimudindulila ishikwilo umudimaaji uyo. Soope inkholo sikwiliile kipulikha ishawuti yaakwe. Umudimaaji ikiyishemeela shila nkholo kwa litaawa lyakwe na ikisilongosa kipoola kunja. 4Pina wásihumya kunja inkholo saakwe soona, umudimaaji uyo ilongola kumwandi, soope sikimufwata kwa kiiva siyimeenye ishawuti yaakwe.#10:4 Mu ngʼoma sa Vayahuudi, avadimaaji va nkholo vakhandi vilongola kumwandi, inkholo sikimufwata kunyuma. 5Inkholo sisikwiliile kimufwata umuhensa, ila sikimusiga kwa kiiva sisiyimeenye ishawuti yaakwe.” 6UYeesu wávajovelaga aVafalisaayo ishihwano ishi, leelo aveene vasikhalumeenye uluganulo lwa gala gina akhandi ikivajovela.
7Lino uYeesu khanji wávajovela wáaja, “Shiyooli nikivajovela, one nili ngaja shikwilo isho, shina inkholo siyinjilila mu lupanga. 8Woona vina vanilongolaga vajovaga aveene vadimaaji va nkholo, vakhandi vahiiji khanji vapokhaaji, leelo inkholo sisikhavapuliishe. 9One nili ngaja shikwilo isho. Yoyoona yuna iyinjila mu lupanga kishilila kunyangu akhakulusiwa, khanji iiva nu wutawulilwa uwa kiyinjila na kihuma, kiluta ku masole amanofu. 10Umuhiiji iyinjila mu lupanga kwa lugulumilo lwa kihiija inkholo hela, kibuda na kinanganga. Leelo one nayinsaga kiija, vave nu wuumi, khanji vave nawo kwa winshi.
11“One nili mudimaaji munofu wa nkholo. Umudimaaji umunofu, iiva ayipinyile kiwuyasa uwuumi waakwe, kwa kiiva ya nkholo saakwe. 12Umusenga nsengo yuna asili mudimaaji wa nkholo, khanji inkholo sisili saakwe, nda ayaaje imbwawa yiyinsa, iisiga na kisilekha inkholo seene duguli. Baheene imbwawa yikisikhata inkholo simonga, isinji sipalankhana. 13Umusenga nsengo iisiga, kwa kiiva inkholo iso sisili saakwe, lulwene asikisiyangalila. 14One nili mudimaaji munofu wa nkholo. Nisimeenye wunofu inkholo sangu, soope sinimeenye, 15ngaja uDaada shina animeenye, na yuune nimumeenye. Shiisho ndeeno na yuune niiva niyipinyile kiwuyasa uwuumi wangu, baheene inkholo sangu sisikhayagaga. 16One nina nkholo isinji sina sisili mu lupanga ulu, soope nisakulwa nisilongose. Inkholo iso soope, sisiyimanye ishawuti yangu. Ndeeno, hambi siiva shipuga shimo nu mudimaaji yumo.
17“UDaada ikinigana, kwa kiiva nikiwuyasa uwuumi wangu, kiija niwupate khanji. 18Kusiina umuunu yuna akwiliile kipokha uwuumi wangu. One yuune yuna nihaagula kiwuyasa uwuumi wangu. One nina wutawulilwa uwa kiwuyasa uwuumi wangu, leelo khanji nina wutawulilwa uwa kiiva muumi khanji. Yu Daada yumwene yuna wánilajisaaga kigaha ndeeno.” 19Vaganaga kipulikha amaswi ago, aVayahuudi vabagunkhana khanji vaveene kwa vaveene, kiiva ya mamanyiso ago. 20Vinshi mu veene valogola vaajova, “Uyu ana lilungu lina limupeelile ulukwale. Ndeeno, musikhamupulisaaji.” 21Leelo avamonga vakhaania vaajova, “Amaswi ago gasiihuma kwa muunu yuna ana lilungu. Wuli, ililungu likwiliile kimuponia umupofu kiija aloleele?”
Avaanu vinshi vikimukhaana uYeesu
22Ino, lwafikha uluhaavi ulwa shiwungo sha Vayahuudi isha kikumbukha kidindula inanda imbaagule kula ku Yelusalemu. Uluhaavi ulo, lukhandi lwa shipepo. 23UYeesu akhandi ijenda mu lukeeke lwa nanda imbaagule iya kifuunyila, luna lukhandi lutambulwa Nsila yina niime iya Selemaani. 24AVayahuudi avamonga vamupilima vamuposa vaajova, “Wuli, usitulafye mu numbula seesu mbakha yooli? Nda yuuwe Mukulusaaji yuna uNguluvi wátahisaaga kimufilikha,#10:24 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. tujovela bahawuvalafu.” 25Leelo uYeesu wávagomosesa wáaja, “One navajovela kiija yuune naani, leelo omwe mwikhaana kinihuviilila. Amabikha gina niigaha kwa wutawulilwa wa Daada, gageene gina gikinibedela kiija one yuune naani. 26Leelo mwikhaana kinihuviilila, kwa kiiva musili va shipuga sha nkholo sangu. 27Inkholo sangu sipulikha ishawuti yangu. One nisimeenye wunofu, soope sikinifwata. 28One nikisipeela inkholo sangu uwuumi wa shiluta, na sisikhayaga kaa. Khanji kusiina umuunu yuna akwiliile kisipokha kwa ngufu mu mawokho gangu. 29UDaada yuna anipeelile iso, mukhome kishila woona. Lino, kusiina umuunu yuna akwiliile kisipokha mu mawokho gaakwe. 30One nu Daada tili shiinu shimo.”
31Lino aVayahuudi vamonga vaganaga kipulikha ago, vayansa khanji kitoola amangʼanga, kiija vamuhude na kimubuda uYeesu. 32Leelo uYeesu wávajovela wáaja, “Navawonensa insengo nyinshi inofu sina nisisenjile kwa wutawulilwa wa Daada. Nsengo nshi yina yikivagaha omwe, munihude na mangʼanga?” 33AVayahuudi vamugomosesa vaajova, “Tisisakula kikuhuda na mangʼanga kwa kiiva ya kisenga amanofu, leelo kwa kiiva ukimutofola uNguluvi. Kwa kiiva owe ukiyijova Nguluvi, humbe na yuuwe uli muunu ngaja avaanu avanji!” 34UYeesu wávagomosesa wáaja, “Wuli, yisiyandiikhwe mu Mayandikhwa aManofu kiija, uNguluvi wájovile, ‘Omwe muli manguluvi’?#10:34 Yimba mu litaafili lya Sabuli 82:6. 35Yiyandiikhwe mu Mayandikhwa aManofu kiija, avaanu vina vaposheelile iLiswi lya Nguluvi, uNguluvi wávajovaga kiija manguluvi. Na yuuse timeenye kiija, gina gayandiikhwe mu Mayandikhwa aManofu ga shiyooli nsiku soona. 36Wuli, kwashi mwijova one nikimuliga uNguluvi pina niijova kiija, ‘One nili Lusawo lwa Nguluvi’? UDaada yumwene yuna anibagwile na kinifilikha mu nyi. 37Nda nisisenga insengo sa Daada sina isenga, apo baheene musikhanihuvililaga. 38Leelo nda nisenga insengo sina uDaada ikisisenga, hata nda musihuviilila gina nilogola, lino huvililaji insengo iso. Kwa nsila iyo, baheene musiimanye kiija uDaada ali munyangu, na yuune nili mwa Daada.” 39Lino aVayahuudi vamonga vaganaga kipulikha ago, vakhandi visakula kimukhata khanji, leelo uYeesu wávapulumukha mu mawokho gaanave.
40Baheene uYeesu wáaluta khanji ku mwambwa ya mukhoga gwa Yolodani, wáafikha uluvala luna uYohana akhandi itwinia avaanu ulwamwandi, ukho wáakhala kwa luhaavi. 41UYeesu pina ali kukula, avaanu vinshi vamulutila na kilogola vaveene vaajova, “UYohana asikhagahile shimanyilo shoshoona, leelo imola soona sina akhandi iijova ulwa Yeesu, sikhandi sa shiyooli.” 42Ndeeno, avaanu vinshi vamuhuviilila ukho.
Dewis Presennol:
Yohana 10: Shisangu
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020, Wycliffe Bible Translators, Inc. All rights reserved.