LUCAS 20
20
Jesosa Eyacuiñajjija huoojea poa, oyaneitii poe pojjeama
(Mt 21.23-27; Mc 11.27-33)
1Majoya aje oe pojjajo Jesosaa Eyacuiñajjija equi-aiquiquibojo aniya esohui queapame huohuicanijo Eyacuiñajjija equi-aijo chacochacopoquiani etii poanicuana, Moisesja tehuehuohuijjicuana pea-ai, ojee poecapoa pea judío etii poanicuananijje Jesosa aniyasijje. 2Jesosa huohuiajjacañapoa cuaa jama ba'a: —¿Ajea esohuijo acuae mi poeyanaje jiquiacua ona sohuihuohuiya, jiquio ehuone quiapoequicuana huoojeacuayajeaa pea-ai? ¿Ajea huoojea acuae mi?—
3Etii poanicuaa jama acajje Jesosaa jama huohuime acapoa etiicuana jama ba'a: —Ebionei eyaya miquiana esohui huohuiajjapea-aije so'o. Saja-acue mo, 4¿aya shai Juan huoojeacanaje ona enaojjohuasijje iñajeanobiaa, a'a Eyacuiñajjiya, a'a dejjacuaa?—
5Majotii ani etii poanicuana onijje etii poanicuananijje oopana mimimimiapoa jama ba'a: —Eseyaya jama saja-ame ajo ba'a: “Eyacuiñajjiya oya Juan huoojeacanaje.” Jama saja-ame ajo ohuaya eseya jama acaje ba'a: “Jamajjeya ¿yajjajo shai miquiaaya oja esohui mishajja-ajjanaje?” 6Eseyaya jama saja-ame ajo ba'a: “Juan Eyacuiñajjija huoojea pojjeama, oya ca dejjacuanaja huoojea poanaje.” Jama saja-ame ajo, ojjaña jiquio ejjachichaqui anicacuaa eseya jajahuejjajeacaje'yo mei-aiya quenequenemajje. Juan Eyacuiñajjija huoojea esohuihuohuijji e'ejojonei poanaje bacanitii cuaa.—
7Majoya ojee mimijeyomajje etii poanicuaa Jesosa jama acapoa ba'a: —Ecuanaja bajjima, ajea huoojea shai poanaje Juan ona iñajeanobiaa enaojjohuasijje.—
8Jamajjeya dejja etii poanicuana saja-acapoa Jesosaa jama ba'a: —Miquianaja bajjimajo ecuea ehuohuijji pojjeama pea-ai poaje ajea esohuijo ona sohuihuohuiya, jiquio ehuone quiapoequicuana Eyacuiñajjija equi-aiquiquibojo ani huoojeacuayajeaa eya poeyanaje.—
Jesosaa huohuicapoa esohui ebameesahuajji echacochacojji poani dejja queamasecuanajo
(Mt 21.33-44; Mc 12.1-11)
9Majoya quijjepishana Jesosaa esohui ebameesahuajjijo pea huohuicapoa cuana jama ba'a: —Oe dejja equemeseya oja quejo uvajjono banameecanaje. Majoya ojo chacochacoani dejjacuana oja uvajjajja que ache echacojji ojaya acajji huohuinanamajje oya poquinaje queahuesha pea meshiyasijje. 10Majoya quijje uvajjajjacuana oja banamee jahuajo, equemeseya pea ojo chacochacoani dejja huoojeacanaje cuamaya oja meshijo uvajjajja aniyasijje oja sejja ma ojayanei yajji huisotii jjequi'yohua nisho. Jamatii uvajjajja chacochacoani dejjacuaa oja huoojea dejja cuiamajje huacuaya huoojeacuayajeaca'yonaje emejjeetii. 11Jamajjeya equemeseya pea ojo chacochacoani dejja huoojeacao'oyanaje oja sejja ma ojayanei yajji jjequi'yohua nisho. Oya pea-ai mata-amajje cuiacanaje cuaa. Majoya huoojeacuayajeaca'yonaje oya jayojja pea-ai emejjeetii. 12Majoya quijje equemeseya pea ojo chacochacoani dejja huoojeacao'oyanaje. Oja quejo chacochacoani dejjacuaa oya pea-ai cuianeineimajje huoojeacuayajeaca'yonaje huacuaya jamatii pea-ai.
13—Majoya equemeseya jama acanaje ba'a: “¿Yajja ecuea acajji? Jiquio ecue bacuaejja ecuea queajeanee poani, eyaya huoojeaje. Jamajje pojja'a oya ecue bacuaejja poani bamajje ecue quejo chacochacoani dejjacuaa queapame acajjequije.” 14Jamatii oja bacuaejjanei poeje bamajje ca oja que chacopo-anicuana ojee mimimiminaje jama ba'a: “Bacue, jiquio poeje dejjaa ojjaña jiquio meshi mesenacaje'yo, ojayaneitii poaje'yo oja chii mano'yajo. Jamajjeya oe jjeyahuanei oya ejjacuiajeaqui'yo. Majoya jiquio meshi esejayatii poaje'yo.” 15Jamajjeya equemeseja bacua poeajo oja que chacochacoanicuaa oya iñaca'ajeacajjequinaje. Majoya oya uvajjajja quejo ani queahueshapishana dojomajje cuiahuejjajeaca'yonaje cuaa.—
Jesosaa esohui huohuijeyomajje majo ejjachichaqui anica huohuiajjacapoa jama ba'a: —¿Yajja jjashahuabaquiani quiana equemeseya oja quejo chacochacoanicuana acañaquije?— 16Jesosaa huohuitiicapoa jama ba'a: —E'ejojonei oja queyasijje poquimajje ojjaña oja quejo chacochacoanicuana quecuajeameecaje'yo. Majoya ohuaya pea dejjacuana oja que chaco'yojji epojji bacaje'yo.—
Jesosa jama poaje shajja-ajjamajje etii poanicuaa jama acapoa ba'a: —¡Chojja, jama ameemeesapo-ajjaneinei!—
17Jesosaa ca judío etii poanicuana jjabajeaquimajje jama huohuime acapoa ba'a: —Jamajjeya, ¿yajja poanijje jiquio Eyacuiñajjija esohui jama poani ba'a?:
“Jiquio mei-ai equi-ai peeijji enequiacoo ani queapame cajaa acanaje equi iyajji cuaa.
Jamatiiya Eyacuiñajjiya onaja cajaa'ya oya mei-aiya nequiasohuaca'yonaje.”
18Dejja joya mei-ai aniyasijje oquemajje jjacuiasejjajeaquije'yo ma mei-aijo. Ma dejja o anibiajje oquemajje mei-aiya jajapashajeacaje'yo— jamaya huohuicapoa Jesosaa.
19Eyacuiñajjija equi-aijo chacochacopoquiani etii poanicuana, fariseo dejjacuana pea-ai Jesosaa esohui ebameesahuajjijo jama huohuime acani shajja-ajjamajje jjabaquiapoa Jesosa ojo mimiani. Jamajjeya Jesosanijje queaquenenee pomajje o ejeanobiameejjijo jjashahuabaquiapoa ma pojjajotii. Jamatii etii poanicuaa oya mi-iñameecapoa ona queahuiso ejjachichaqui anica yajjajo.
Jesosaa huohuicapoa emeshimesecuanaja yajji bejjojo
(Mt 22.15-22; Mc 12.13-17)
20Majoya ma judío etii poanicuaa pea dejjacuana huoojeacapoa a'a Jesosaa queaquehua huohuicaje baa. Ma dejjacuaa Jesosa esohui queaquehua huohuimeesa-acapoa Roma emeshimesejo. Ohua esohui queaquehua huohuicajo oya etii poanicuaa iñameecaje edojojji Roma emeshimeseja nequimee dejja etii poaniyasijje oja o queanee pomeeya. 21Jamajje oja huoojea dejjacuaa Jesosa huohuiajjacapoa jama ba'a: —Esohuihuohuijji, ecuanaja eba miyaya e'ejojonei esohui aña, miya siajje po-ajjanei, pea dejja minijje ejjapeequijjijo pojjeama huohuiaña cuana. Miyaya e'ejojonei Eyacuiñajjija esohui oenei huohuiaña. 22Jamajjeya ecuana huohuicue, ¿a'a esejaya eso'dojjo quiacapoquijji Roma emeshimese Cesarja yajji ma ohua tehuemeecanaje huisotii, a'a quiaca-ajja pojja'a? ¿Yajja miya poani?—
23Jesosaja ebatii poa ojaya ejjashahuabaquijji o queaquehua huohuimeejjijo nisho. Jamajjeya ohuaya jama saja-ame acapoa cuana ba'a: 24—Bameecue mo ache eso'dojjo acue quiaa emeshimeseja yajji quiapoquiaña. ¿Ajea ecojja jiquio, ajea bajjani etehue jaa?—
Saja-acapoa cuaa jama ba'a: —Roma emeshimeseja ecojja jiquio ani.—
25Majoya Jesosaa jama huohuime acapoa cuana jama ba'a: —E'e, ojaya ecojja yani, oja bajjani etehue jaa pea-ai jiquio eso'dojjojo. Jamajjeya cua Roma emeshimeseya sacani oja tehuemee huisoajjatiiya eso'dojjo oya quiapoquiacue quiaa. Eyacuiñajji pea-aiya oe quiapoquiacue cua ohua mi quiameesa-acani huisotii— jamaya saja-acapoa Jesosaa.
26Ojjaña joya oja esohui queaja'anee huohuicaje shajja-ajjajji poanajecuana jjabaneineiquicapoa ojo. Esohui queaquehua Jesosa huohuimeejjimanei acapoa. Jamajjeya mimima' anica'yapoa.
Jesosaa huohuipea-aicapoa dejja emano'yo shequi'yojjijo
(Mt 22.23-33; Mc 12.18-27)
27Majoya aje saduceocuana poquiapoa Jesosa baa. Saduceo dejjacuana queaquehua jjashahuabaquipoquiapoatii dejjacuana mano'yomajje eshequi'yojjitii pojjeama poaje. Jamajjeya ma esohuijoya mimiapoa cuana Jesosanijje jama ba'a: 28—Esohuihuohuijji, yahuajonei Moisesya jama tehuecapoa ba'a: “Dejja cua bacuama'tii nequi mano'yajo oja chahuaa oja quijjojea ehuanase huanacaje'yo. Oja jeajo oja o'i bacuajji poaje. E'ejojonei oja o'ija jea jayojja ebacua bacaje cuaa” jama tehuemeya Moisesya yahuajonei acapoa. 29Bacue, ecuanaja meshijo siete huisome dejja nequiapoa o dohue pea-ai. Ma ebionei etii dejja edohuemese jjahuanaquiapoa. Jamatii bacuama' nequi oya mano'yapoa. 30Jamajjeya oja chahuaa oquiquishi'yojjiya oja huanase huanaca'yapoa. 31Oya jayojja pea-ai oja chahua bacuama'tii nequi manopea-ai'yapoa oya eponajotiiya. Oya jayojja pea-aiya pea oja chahua poa. Ojjañatii o dohue pea-ai oya jayojjaya bacuama'tii nequi manocapoqui'yapoa oya eponajotii ejjahuanaqui nequi. 32Majoya aje oe-ejjenei ma epona manopea-ai'yonaje. 33Jamajjeya ecuaa miya huohuiajjaña, ¿ache oja dohueja ehuanase poaje ma epona shequi'yomajje? Ojjaña o dohue pea-ai siete huisomeya ma oe eponaya huanacapoqui'yapoa.—
34Jesosaa saja-acapoa cuana jama ba'a: —Jiquio meshijo ba'ecacuana eponacuana jjahueaquiani, dejjacuana jjahuanaquiani pea-ai. 35Joya Eyacuiñajjiya shequimeecaje'yo cuana eba'etiitiipoqui'yojji ma ohua ojjañacuana huoojeacapoquianitii meshi Eyahuasijje dejja, eponacuana pea-ai ca ejjahuanabecaquio'oyajjitii pojjeama poaje'yo, ejjahueabecaquio'oyajjitii pojjeama poaje'yo cuama. 36Macuana emanobeca'yojji pojjeamatii poaje oya angelcuana jayojja pea-aiya pojea'yojjejojoya. Eyacuiñajjija bacuatii popoquije oya shequi'yonajejjejojoya. 37Ohuaya Moisesya eseya bameecapoa pea-ai emano'yocuana shequimeecaje'yo. Eyacuiñajjiya tata quiyojeyoajjajo Moisés jama huohuime acapoa ba'a: “Eya ca iña Eyacuiñajji ma Abrahamya, Isaacya, Jacobya pea-ai bihuiacapoquianitii Eyacuiñajjitiiya poani.” 38Jamajjeya esejaya ebatii oya Eyacuiñajji emano'yocuanaja pojjeama poani, oya caca eshe ba'ecacuanaja Eyacuiñajji nequi. Ohuaya ojjañatii eshe bacani joya eseya emano'yo baña cuana pea-ai.—
39Majoya beca Moisesja tehuehuohuijjicuaa Jesosa jama acapoa ba'a: —Esohuihuohuijji, miyaya esohui queaja'anee huohuinaje.—
40Jamajjeya ma dejjacuaa Jesosa esohui huohuiajjapajeaca'yapoa oya queaquehua jjahuohuimeequiajjapoajojoya.
Eyacuiñajjija huoojea ojjaña nahue'yojji epojji, ¿ajea osecua poaje?
(Mt 22.41-46; Mc 12.35-37)
41Majoya aje Jesosaa Moisesja tehuehuohuijjicuana huohuiajjacapoa jama ba'a: —¿Yajjajje jama huohuime acani cuaa jama ba'a: “Eyacuiñajjija huoojea ojjaña nahue'yojji epojji Davidja osecua poaje?” 42Davidya, Eyacuiñajjija esohui Salmosjo tehuecapoa jama ba'a:
“Emeshimesenei Eyacuiñajjiya jama huohuime acanaje ecue Emeshimesenei ba'a:
Ecuea ebañeimijijjetii anioquecue.
43Quijje eyaya ojjaña mi cajaa ajji poanicuana,
mi sapo-ajja poanicuana huoojeapoquiajji epojji pomeeje.”
44Emeshimese Davidya Eyacuiñajjija huoojea ojaya Emeshimesenei poani bacapoa. Ohua o jama bacajo, ¿achajjajo oja huoojea Davidja osecuanei pome?— jama huohuime acapoa Jesosaa.
Jesosaa Moisesja tehuehuohuijji poanicuana huohuicapoa queamimishi nequica
(Mt 23.1-36; Mc 12.38-40; Lc 11.37-54)
45Majoya ojjaña majo anica cojjaneijo Jesosaa o shajja-ajjajji poanicuana huohuicapoa jama ba'a: 46—Jjajaahuananeineiquicue quiana oe Moisesja tehuehuohuijjicuanajo. A'a oya jayojja pea-ai posapojji. Oya peacuanajo jjabameequisapomajje ohuaya daqui quea-aonee queanahuenee huoshocani. Moisesja tehuehuohuijjicuana queabihuinee poani peacuaa oya esohui queapame ojo huohuicajje ojjaña ejjachichaqui anicajo. Judiocuanaja equi-ai ejjachichaquijji aniyasijje nobiquimajje ehuiyasijje anioqueani equii-anijji queapamenee nequijo. Oya jayojja ojee eijjiaijjiajji equiyasijje nobiquimajje anioqueñani equimesepejjeneijo oya queaca'anee poani peaja ebajji. 47Jamatii epona eahuemano'yocuanaja equicuana ohuaya jjesheca'yani siajjejo. Peacuanaja ebajji oya queasohui-aoneenee miminishoani Eyacuiñajjinijje. Jamajjeya oya queaneenee pomeecaje'yo quijje oya queamimishitii poanajejojoya.—
Dewis Presennol:
LUCAS 20: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006