Luka 22
22
Njirawawa'a tə Mbatə Nya aka nda Tsəya Yesu
(Mat 26:1-5; Mar 14:1-2; Yoh 11:45-53)
1Nda bəjir ladər gwazhilakə kəla tləlam nda njo na ni, “Ladər Dləgəlnda,” tə ɗa ləhəu, 2ngə ka wawa'ar fərist ka maləm gadlagadla Musa tə gwa'a ənda nda kwa tsəya Yesu. Nda mər əngə tə ɗəwa aka nda kwa ləvər nji.
Yahuda Iskərayoti tə Dləukəri Cho Tləɗanda Yesu
(Mat 26:14-16; Mar 14:10-11)
3Ngə Shantan tə gwatanyi gu ɗufwa Yahuda nda njo nga Iskərayoti, zhang ku huɗa kwabəmətlə inda. 4Cha yi ɓwanya na wawa'ar fərist ka wawa'ar njir ɓəla Mbwa'alə Hyel təkəra ənda cho tləɗanda Yesu nə nda. 5Nda mər hirgyaɗi gagaɗa, ngə nda ɓatliya ənda nda kwa kinda nyi kwaba. 6Ngə Yahuda tə dləukər ni, cha ghəya na gwa'a lakur tləɗa Yesu a da na zəndəkur nji wa.
Yesu tə Ɓatliya ka Cha Səm Ladər nə Dləgəlnda
(Mat 26:17-25; Mar 14:12-21; Yoh 13:21-30)
7Nda pəchir Ladər Gwazhilakə Kəla Tləlam tə ɓəla shili, pəshir hatəmachi na zər kətəng Ladər Dləgəlnda, 8Yesu tə sə ka Bitrus ana Yohana cha nar nda, “Ma'i ma hya ki ɓatliya mən sərsum nə Ladər Dləgəlnda məna səma.”
9Ngə nda jau nyi, “Aman ko i ea ɓatliya?”
10Cha nar nda, “Ma hya go ta mələm, hyo ɓə na vanya ndə kwa hə giɗa ɓiti. Hya nəu nyi kyo ki nda cho gwa kwa. 11Hya nar nyi nə tlakər ki nda, ‘Maləm nə tə sə ea, ea nar ngha, “Aman vi nda yo səm sərsum Ladər Dləgəlnda naea ka shawa ɗa?” ’ 12Cho char hi vanya vi bang da kya təkəra vanyi ɓatləɓatlənyi. A tangnda hyo ɓatliya mən madami.”
13Ngə nda təra ga ki həya dəhə sə tsa'atsa'a wi nda Yesu tə nar nda, ngə nda ɓatliya sərsum Ladər Dləgəlnda.
Batəbatər Sərsum nda Tlakə tə Səm ka Shawa Nyi
(Mat 26:26-30; Mar 14:22-26; 1Kor 11:23-25)
14Nda bəji tə ɗa, ngə Yesu ka shawa nyi tə ngya ka səm sərsuma. 15Ngə cha nar nda, “'Ual'ual chim ya aka ya səm sərsum Ladər Dləgəlnda nə kə'i hi təvi ya sa ɓwaɓwatəu! 16Yo nar hi, a tsə'u da yo tsakətə səm nyi səkə wa, kəl ma sənda cha kari tə nyabiyadzə ku təlkur Hyel.”
17Ngə cha hətə ɗeɗika, cha mər usaku nə Hyel, cha na, “Dləutsə ma hya təkəya ku pama hi. 18Yo nar hi fwatə tə bəji na a biyama tsəu yo tsakətə sa ɓitir anap wa kəl ma təlkur Hyel tə shili.”
19Ngə cha hətə gwazhilakə ga mər usaku nə Hyel, cha pəpasəu ga nənda cho na, “Nənna, dzaya na, nda nja lənda ka hi. Hya mər maka ənga aka ga hya ɗənghatə naya.” 20Əngə tsəu ahir sərsum nda, cha hətə ɗeɗika nda, cha na, “Ɗeɗika na, taɗər alkawal na, ku mashi ɗa nda nja pənda kə'i hi. 21Kəl ja, jan ndər tləɗa ɗa tsatlə ku pama mən kwa səm naya! 22Tuku Zər Ndə kwa tah, tang wi nda nja ɓatliya, kəl ja, sər təhuɗə na ndər tləɗanda nyi!”
23Ngə shawa inda ghəya na jau kərnənda, nda wa ngə kwa mər chul ngəna sə ku pama nda.
Wa ngə Ndə nda kwa Ɗa Dəgala?
24Ngə kəpal tə hya'atə ku pama nda a təkəra nda wa ngə kwa ndiya na dəgalkur. 25Yesu tə nar nda, “Ka təl ka təl nə nji'inda pa'a njir Yahuda kwa cha təlkur, wawa'a kənda tsəu kwa cha gyalkur, nda kwa nga kərnənda, ‘Njir vala nji.’ 26Nahi nəkə hi ngwa hya da mər əngə ku pama hi wa. Kəl nda ndə nda dəgal ku pama hi cha ɗa kushiu, gau kəhi tsə'u cha ɗa wi mava. 27Wa ngə tə ndiya na dəgalkura, ndə nda tə ngya ka səm sərsum zəma, aa ndər təkə sərsuma? Kəpal da wa, ndə nda tə ngya ka səm sərsum ngə ndə nda dəgal. Ya jan ya ku pama hi wi ndər təkə sərsuma.”
28“Nahi ngə nji'inda tə ta'i ka ya aku bəjir dzə ɗa. 29Wi nda Ada ɗa tə na'a gyalkur ya səm təlkur, əngə tsəu yo nə hi. 30Hyo səm, hyo sa naya ku təlkur ɗa, ya hyo ngya ku dzəga təlkur. Hyo səm təlkur təkəra nyavi kwabəmətlə nə Isra'ila.
Bitrus kwa da Kəpal Zəndə Yesu
(Mat 26:31-35; Mar 14:27-31; Yoh 13:36-38)
31“Shiman, Shiman! Səya himi! Shantan gwa'atə laku ka cha dzə hi, cha pibiya hi, wi nda ndər zwa kwa pibiya chachang ku alkama. 32Kəl ja Shiman, a gədi təya ka ka, tsa jirikur nghə da ba'a təuta. Maka da ɓəl shili da ya, ka tsakətə nyi dunama nə ka zamə nghə ina.”
33Ngə Bitrus tə ɓəlakə nyi, “Tlakəu, a ɓatliya təya ya ma'i bətə kyo jarum naka. Macha tə tsə'u, yo tə naka!” 34Ngə Yesu tə na, “Bitrus, yo nar ngha, təvi vəgəm kwa tiwi vu'i ənya, ko kəpal zəndə ɗa zhaka makərəu!”
Ɓatliya Ma Kərnəhi aka Bəjir Ɓwaɓwatəu
35Ngə Yesu tə jawar shawa nyi cha na, “Nda ya sə hi a kwaba wa, a mbəl wa, a ɓiɓi wa ya, vanya səda hya tar ya?”
Nda na, “A səda Tlakəu wa!”
36Cha nar nda, “Sakanə ja, ndə nda na kwaba ndara mbəl cha hətə cha gəziya, ndə nda pa'a da na katsakər tsəu, cha ɗəlnda daura nyi cha ɗəlbiya. 37Aka yo nar hi, wi nda tsəfətsəfər ɓwanya Hyel tə na, ‘Nja jigau nyi ku pama njir mər səpəla'a,’ a ɗatə tuku cha nyabiyadzə təkəra ya.”
38Shawa nyi tə nar nyi, “Tlakəu, jan katsakər mətləu.” Yesu tə na, “A njiti.”
Yesu tə Pətlənya Kyatə Dəgəl Zaitun
(Mat 26:36-46; Mar 14:32-42)
39Yesu tə ngyar ta mələm ga təra gyatə Dəgəl Zaitun wi nda cha tsəl ni, ngə shawa nyi inda nəu nyi. 40Nda cha həya mbwa nda, cha nar nda, “Pətlə ma nya tsa hi da gwa ku sərmbukəu.”
41Ngə cha tsaɗəndadza wi ɓələr vakə hangu, ngə cha uzhi ga pətlənya. 42Cha na, “Ada, macha kwa i ka, hənda ɗa ɗeɗika ɓwaɓwatə na. Dəhə ka ənga, a da sənda yo i wa, kəl nda sənda ko i ngə njo məra.”
43Kəl chama Hyel tə chabiyadzə hya'atə kya huɗamələm kwa tsakə dunama nənyi. 44Cha mbabiyadza ana pətlənya, aka ɗufwa cha ku ɓwaɓwatə gagaɗa, ngə vituku nyi tə ghəya na ndzə wi mashi.
45Nda Yesu tə wur na pətlənya, cha ɓəl ya tə mbwa nda shawa inda ti ga həya nda nda kwa njihanyi aka huɗətla. 46Cha nar nda, “Ka mi hyo njihanya? Hya'atə ma, hya pətlənya hya da ba'a gwa ku sərmbukəu.”
Nja Səya Yesu
(Mat 26:47-56; Mar 14:43-50; Yoh 18:2-11)
47Tsəu cha kəla haɗiya nya cha, kəl jan dlama nji tə shili, Yahuda, zhang ku huɗa kwabəmətlə inda ngə tə shili na nda. Ngə cha dardzə yi aka cha gaɓətə Yesu. 48Ngə Yesu tə nar nyi, “Yahuda, ana gaɓə nə kə kwa tləɗanda Zər Ndə ya?”
49Nda shawa inda kə'i cha la'a sənda kwa ɗa, nda jau nyi ga na, “Tlaka, ea mər tlər na katsakər ya?” 50Ngə zhang kənda tə dəgə mava gau fərist ga tlanda hima cha nə chisəm.
51Kəl ja, Yesu tə nar nda, “Ngyar ma, a njiti ənga.” Ngə cha tsəkar hima ndə nda ga mbandə nyi.
52Ngə Yesu tə nar nyi nə wawa'ar fərist, kə'i nji'inda wawa'ar njir ɓəla Mbwa'alə Hyel, ka nji'inda wawa'a a təkəra nji, inda tə shili aka nda səya nyi, “Hya zəbiya ka sə ɗa ana katsakər ka zəwa. Naya ndər fa'avi ya ya? 53Namən tanyi kə'i hi ku Mbwa'alə Hyel, a nahi səya ɗa wa. Kəl ja, bəji kəhi na ɗa ana nə gyalkur kutla.”
Bitrus tə Kəpal Zəndə Yesu
(Mat 26:57-58, 69-75; Mar 14:53-54, 66-72; Yoh 18:12-18, 25-27)
54Nda səya Yesu ga təra nacha yo ki gau fərist. Bitrus tsəu kwa nəu hinda naɗəu. 55Nda gəɗiya hu'u atə ghadar huɗəki nda, nda kwa tləra, ngə Bitrus tə ngyata nyi ku pama nda. 56Nda zhang ku huɗa kwatəra inda kwa mər tlər ku ki nda tə la'a Bitrus anya hu'u, ngə cha ndzamtə nyi ga na, “Ndə nə tsəu na nda ka Yesu cha!”
57Kəl Bitrus tə kəpal ga na, “Kwa na! A da yo zəndə nyi wa!”
58Ahir bəji kushiu, vanya ndə tsəu tə la'a Bitrus, ngə cha na, “A kəpal da wa, nakə ma'a zhang kənda ka!”
Kəl ja, Bitrus tə na, “Zah! A da naya ngə wa!”
59Ahir wi saka zhang, vanya ndə tə chinda dzə ga na, “A kəpal dawa, kərnya ndə nə tsəu, na nda ka Yesu, aka ndər Galili na.”
60Kəl ngə Bitrus tə na, “Zah! A da yo zəndə səngə ko ɓwanya təkər ngə pa'a wa!” Tsəu cha kəla wurandə ɓwanya, təma vəgəm tə tiwi. 61Tlakə tsəu tə sha ga ndzamar Bitrus. Ngə Bitrus tə ɗənghatə ənda Tlakə tə nar nyi, “Təvi vəgəm kwa tiwi vu'i na, ko kəpal zəndə ɗa zhaka makərəu.” 62Ngə cha təra, ga biya tiwi gagaɗa.
Nja Həyatə Yesu ga Dəgə Nyi
(Mat 26:67-68; Mar 14:65)
63Ngə nji'inda kwa ɓəla Yesu nda ghəya na mərtə nyi gyaɗi həyatəvi ga dəgə nyi. 64Nda mbiya lya cha nda kwa jau nyi, “Takər nə ea, wanga dəgə ngha?” 65Ngə nda par nyi alenya ɓwanya həyatəvi tsəu nda kwa ngəl nyi.
Nja Shili na Yesu Mar Njirawawa'a
(Mat 26:59-66; Mar 14:55-64; Yoh 18:19-24)
66Nda vi tə wura, dəhə nji'inda wawa'a təkəra nji, kə'i wawa'ar fərist ka maləm gadlagadla Musa tə tsəmtədza, ga təra na Yesu ya tə patla njirawawa'a. 67Nda na, “Par ea, nakə ngə Kəristi ya?”
Ngə cha nar nda, “Mada ya par hi, a da hyo na'a jiri wa, 68ma ya jau hi tsəu, a da hyo i ɓəlakə ɗa wa. 69Sakana ba'a biyama, Zər Ndə kwa ngya tə chisəma Hyel ndər Gyalkur.”
70Ngə dəhə nda tə na, “Nakə ya, Zər Hyel kə ya?”
Cha wuma, “Jan hya nati, Naya na.”
71Ngə nda na, “Mi ɓwanya nda məno gwa'a səka? A ngatə təmən sənda cha na ana nya cha!”
Dewis Presennol:
Luka 22: hbbNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Wycliffe Bible Translators, Inc. and © The Nigeria Bible Translation Trust 2018