Yohana 5
5
Yesu tə Mbandə Ndər Shiləkə Dəɗtəkər
1Ahir nga, Yesu tə hya'atə ga təra yi Urshalima ku bəjir ladər nə njir Yahuda. 2Avu Urshalima, ləhə dzər vanya nyaki nda njo nga Nyaki Kətəng, vanya fa'a da tləm nyi Baitasda ana nya njir Yahuda, nja ɓandə na madləɓa tufu. 3Aku madləɓa inda, dlama njir shiləkə da pampaməu, ka njir wuləfəu, njir gadal, ana nji'inda dzanda kuɗəkuɗənyi, nda kwa səkə ənda njo gwaɗətə ɓiti nda. 4Aka ka bəji ka bəji Chama Tlakə kwa səya gwaɗətə ɓiti nda. Ahir nga, ma ndə nda gwa tangərma, mada aman shiləkə nda cha nə tlakə nyi kwa mbəa. 5Vanya ndə da tangnda tə fa makərkumənyi parnya chisəu ana shiləka. 6Manda Yesu tə la'a nyi tə piya, ya a zəndətə cha ənda ndə nda səkar tə dzə na shiləkə nda, ngə cha jau nyi, “Kwa i kə nja mbandə nghə ya?”
7Ngə ndər shiləkə nda wum ga na, “Maləm, A ndə da pəlakər kwa həu ɗa go fa'a ngə aku bəji nda nja gwaɗətə wa, ma yo gwa'a gwa, kəl vanya ndəu kwa zhibiya ma ɗa.”
8Kəl ngə Yesu tə nar nyi, “Hya'atə ka hətə sərpiya ngha ka ma'i!” 9Təma ndə nda mbə ga pəɗətə sərpiya nyi ga təra.
Pəchir Ngyaməngya ngə səngə tə ɗa. 10Aka ənga ngə njir Yahuda nar nyi nə ndə nda Yesu tə mbandə nda, “Ənya Pəchir Ngyaməngya, tsaubar katə ka hə sərpiya ngha.” 11Kəl cha wum ga nar nda, ndə nda tə mbandə ɗa nga nar ɗa “Hya'atə ka pəɗətə sərpiya ngha ka təra.” 12Ngə nda jau nyi, wa ngə ndə nga nar ngha, “Pəɗətə sərpiya nghə ka təra nga?” 13Kəl ja, ndə nda Yesu tə mbandə nda, da zəndə nda nacha wa nda wa, aka Yesu wurtə hya'atə ga gwatanyi ku dlama nji.
14Ahir ngə Yesu tə həya nyi ku Mbwa'alə Hyel ngə cha nar nyi “Ndzama, janə ka mbəti, ka ngyar mər səpəla'a tsa səɗimi nda ndiya ngə da uya ngha.” 15Kəl ndə nda təra ga yi nar nyi nə njirawawa'a nə Yahuda, ənda Yesu nda mbandə nyi. 16Aka Yesu kwa mər sə'ingə tə Pəchir Ngyaməngya, ngə njirawawa'a nə Yahuda tə ghəya ɗa məndza'u na cha. 17Ngə Yesu tə wum ga nar nda “Ada ɗo mər tlər mənakəkur ba'a sakana, naya tsəu yo məra.” 18Aka əngə ngə njirawawa'a nə Yahuda tsakətə gwa'a nyi kanda tsəya nyi, a da ka cho mər tlər tə Pəchir Ngyaməngya tanyi wa, kəl nda cho nga Hyel Ada nyi ba'a cho məməla kərnyi na Hyel.
Gyalkur Yesu Zər Hyel
19Kəl Yesu tə wum ga nar nda, vəlvəl yo nar hi, a Zər da kwa nau mərtə madami təkərnyi wa, kəl nda sə nda la'a cha Ada nyi kwa məra. Aka dəhəkura sə nda Ada kwa məra, nacha ngə Zər kwa mər tsəu. 20Aka Ada kwa nyida Zər, ngə cha chabiyanyi dəhə sə nda kərnyi kwa məra, ətsəu cho chabiyanyi alenya tlər inda tə ndiya inən na, ka ga cha ɗaka sər məngəl nə hi. 21Wi nda Ada kwa hya'andə ndə təta, əngə tanyi tsəu Zər kwa mər nə madawa cha i. 22Ada do mər nəuma nə madawa wa, kəl nda cha tsau nyi nəuma ku cha Zər. 23Ga madawa la'a səlir Zər wi nda njo la'a səlir Ada, dəhə ndə nda pa'a tə la'a səlir Zər, a cho la'a səlir Ada nda tə sə nyi wa. 24Jiri yo nar hi, madawa tə ngatə ɓwanya ɗa, ga nənyi jiri nə Hyel nda tə sə ɗa, pi nda ba'anawa tsa cha, aka a tsə'u nja kwa mərtə nyi nəuma wa, aka a wurtə cha Dləgəlnda nəuma, ga təra ya ku pi.
25Jiri yo nar hi, bəji kwa shili jan ma'a a ɗati, nda nji kuɗəkuɗə kwa ngatə kuraka Zər Hyel, ma nji'inda tə ngatə nda kwa uya pi. 26Wi nda pi tə tsə tsa Ada ku kərnyi, əngə tanyi tsəu cha nənyi gyalkur ga pi tsə təwa Zər ku kərnyi, 27ngə cha na'a gyalkur nəuma, aka Zər Ndə ya. 28Ngwa hya da mər məngəl wa, aka bəji da kwa shili, nda dəhə nji'inda ku hwa kwa ngatə kuraka cha, 29nda kwa zəbiya. Dəhə nji'inda tə mər sə mənakəu nda kwa hya'atə yo pi nda ba'anawa, nji'inda tə mər səɗimi nda kwa hya'atə aka a tlanda nda tə nji nəumar tah.
Ɓwanya Jiri nda təkəra Yesu
30A yo nau mər madami təkərɗa wa. Sə nda ya ngatə tsa Ada nacha yo nəuma ni. Aka nəuma nda yo məra tsa'atsa'a cha, a da jigadəmar kərɗa yo nəu wa, kəl nda jigadəmar ndə nda tə sə ɗa. 31Ma ya ɓwanya təkəra kərɗa, nji do dləukər wa. 32Kəl ja, vanya ndə da kwa dəkə sə mənakə təkəra ya, ya a zəndətə ya sə nda cho dəka jiri. 33Kərnəhi a sətə hi yada Yohana, ngə cha par hi jiri. 34A da bəra ya ta'ita ɗa təkəra ɓwanya ndə tanyi wa. Kəl ja, ya nar hi wi nga, ka ga hya ngabiya hya uya mbəɗa. 35Yohana ɗatə nə hi wi təkəsəu nda kwa gəɗa, kwa mbəla, a dləukərtə hi ɓwanya nyi wi vicham ga mər hirgyaɗi nə ku bəji kushiu.
36“Ɓwanya jiri nda təkəra ya, chabiya ɗa tə matsa nə Yohana. Aka ba tlər nda Ada tə na'a, ga ya məra, ya jan ya kwa məra, nacha ngə kwa chabiya ənda Hyel tə sə ɗa. 37Hyel Ada nda tə sə ɗa, na cha ngo chabiya tə kərnyi tsəu. A da hya ta ngatə kuraka cha wa, ya a da hya ta la'a ənda cha wa. 38Ɓwanya nyi da ku ɗufwa hi wa, aka a da hya nənyi jiri nə ndə nda cha sə wa. 39Hyo ngwahi likatəkatə Hyel aka hyo ɗari ənda akwa hyo uya pi nda ba'anawa. Ya likatəkatə nga kwa ɓwanya jiri təkəra ya. 40Dəhə ka ənga a ngyar tə hi shili uya pi nda ba'anawa tsa ya.
41“A da yo gwa'a fal tsa nji wa. 42Kəl ja, naya a zəndə hi tə ya, a nyidar Hyel da ku ɗufwa hi wa. 43Naya ku tləmər Ada ɗa ya shili, ya a da hya dləutsə ɗa wa. Kəl ja, ma vanya nda tə shili ku tləmər kərnyi hyo dləutsə nyi. 44Aman hyo ɗana nənyi jiri nə ɓwanya ɗa ma tə ɗa fal ngə hyo dləu tsa kərnəhi, ya a da hyo gwa'a fal nda tə hya'atə tsa Hyel sənyi wa? 45Ngwa hya da hari bəra yo wula hi nə Ada ɗa wa, aka Musa na kərnyi nda hyo wovi ni, nacha ngə ndər wula hi. 46Ma cha nənyi tə hi jiri nə Musa, kwa nda hya na'a jiri tsəu, aka a təkəra ya ngə cha tsəfa. 47Kəl ja, ma nda a da hya nənyi jiri nə sə nda cha tsəfə təkəra ya wa, aman hyo ɗa na nənyi jiri nə ɓwanya ɗa?”
Dewis Presennol:
Yohana 5: hbbNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Wycliffe Bible Translators, Inc. and © The Nigeria Bible Translation Trust 2018