Génesis 1
1
Dios Yaya llapanta kamanqan
1Imapis manaraq kaptinmi ciëluta kay patsatapis Dios Yaya kamarqan.#Juan 1.1-3. 2Kay patsaqa manam kanan kanqannötsu karqan, sinöqa tutapay yakullaraqmi karqan. Tsay yaku jananchömi Dios Yayapa Espïritun tumaykarqan.
3Tsaynam Dios Yaya nirqan: <<¡Atsikyay katsun!>>#2Cor. 4.6.
Niptinmi atsikyarqan. 4Atsikyayta kamaskirnam alli kanqanta rikar tutapaypita atsikyayta rakirqan. 5Atsikyaypa shutinmi churarqan junaqta y tutapaytanam paqasta. Punta kaq junaqchömi tsaykunata kamarqan.
6Tsaypitam Dios Yaya nirqan: <<Yaku ishkayman rakikarnin yaku chawpinchö azulyaraykaq katsun>>.#1.6 Tsay witsay runakunam ciëlu chukru kanqanta yarpäyarqan. Tsaynöllam yarpäyarqan ciëlu uchku uchku kaptin tamyamunqanta.
7Ninqannöllam azulyaraykaqta kamarqan. Tsaynöpam wakin kaq yaku kay patsachö quëdarqan y wakin kaqnam azulyaraykaqpa jananchö. Ninqannöllam llapanpis allilla karqan. 8Azulyaraykaqpa shutinmi Dios Yaya churarqan ciëluta. Ishkay kaq junaqchömi tsaykunata kamarqan.
9Tsaypitam Dios Yaya nirqan: <<Tsaki patsa rikakänanpaq urachö kaq yaku juk patsallaman qorikätsun>>.#2Ped. 3.5.
Tsaymi pay ninqannölla karqan. 10Tsaki kaqpa shutinmi Dios Yaya churarqan patsata. Y qorikashqa yakupa shutinmi churarqan lamarta. Tsaykunata kamaskirnam alli kanqanta Dios Yaya rikarqan.
11Tsaypitanam Dios Yaya nirqan: <<Allpapita jeqamur wiñäyämutsun tukuyläya plantakuna: muruyuq qewakuna y wayuq jachakuna karpis>>.
Ninqannöllam llapanpis allilla karqan. 12Tsaymi jeqamur wiñäyarqan tukuyläya muruyuq qewakunawan tukuyläya wayuq jachakunapis. Tsaykunata kamaskirmi alli kanqanta Dios Yaya rikarqan. 13Tsaykunatam kimsa kaq junaqchö kamarqan.
14Tsaypitanam Dios Yaya nirqan: <<Ciëluchö atsikyaqkuna kayätsun junaqwan paqaspis kaman kayänanpaq, junaqkunatawan watakunata yupayänanpaq y muruyänanpaq cosechayänanpaq imay kanqantapis musyayänanpaq. 15Tsaynölla atsikyaykuna ciëluchö kayätsun patsaman atsikyäyämunanpaq>>.
Ninqannöllam llapanpis allilla karqan.
16Tsaynöllam rupayta, killata y qoyllurkunata kamarqan. Rupaytam kamarqan junaqpa atsikyänanpaq y killatanam paqaspa atsikyänanpaq. 17Tsaykunatam Dios Yaya ciëluman churarqan kay patsaman atsikyämuptin 18paqaswan junaqpis kananpaq. Tsaykunata kamaskirmi alli kanqanta Dios Yaya rikarqan. 19Tsaykunatam chusku kaq junaqchö kamarqan.
20Tsaypitam Dios Yaya nirqan: <<Yakuchö tukuyläya kawaqkunawan patsa jananpa päriqkunapis atska kayätsun>>.
21Tsaynö nirmi Dios Yaya lamarchö jatusaq mantsaypaq wätakunatawan qochakunachö y mayukunachö pescädukunatapis kamarqan. Tsaynöllam tukuyläya päriqkunatapis kamarqan. Tsaykunata kamaskirmi alli kanqanta Dios Yaya rikarqan. 22Tsaypitam bendicionninta churar nirqan: <<Lamarchö kawaqkunawan patsa jananpa päriqkunapis, maytsikaman mirayay>>.
23Tsaykunatam pitsqa kaq junaqchö kamarqan.
24Tsaypitanam Dios Yaya nirqan: <<Tukuyläya wätakuna kayätsun: manshu kaq, chucaru kaq y lätaypa puriqkunapis>>.
Ninqannöllam llapanpis karqan. 25Tsaynöpam Dios Yaya kamarqan tukuyläya manshu y chucaru wätakunatawan lätaypa puriqkunatapis. Tsaykunata kamaskirnam alli kanqanta Dios Yaya rikarqan.
26Tsaypitanam Dios Yaya nirqan: <<Kananqa runata kamashun kikintsik rikuqta.#Gén. 9.6; 1Cor. 11.7. Noqantsiknö kananpaqmi payta kamashun.#1.26 Unay reykunam niyarqan paykunalla Dios rikuq kayanqanta. Tsaynömi niyarqan Dios rikuq kar paypa shutinchö runakunata mandayanqanta. Peru kay textuchömi sïqa llapan runakunapis Dios Yaya rikuq kayanqanta nin. Pay rikuqta runata kamanqanta nirqa Dios Yayata mandäsir kay patsachö kaqkunata shumaq rikänapaq kanqantam nin. Paypa mandädunchömi kayanqa pescädukuna, päriqkuna, manshu kaq wätakuna, chucaru kaq wätakuna y lätaypa puriqkunapis>>.
27Kikin rikuqtam Dios Yaya runata kamarqan.
Paynö kananpaqmi kamarqan.
Ollqutapis warmitapis paymi kamarqan.#Mat. 19.4; Mar. 10.6.
28Tsaypitam bendicionninta churar nirqan:
<<Kay patsaman juntanqanyaq wamraykikuna atska kayätsun.
Qamkunapa mandäduykikunachö kayätsun pescädukuna, päriqkuna y llapanpis kay patsachö kawaqkuna>>.#Gén. 5.1-2; 9.1.
29Tsaypitanam nirqan: <<Mikuyänaykipaqmi kamashkä kay patsachö tukuyläya mikuna plantakunata y wayuq jachakunatapis. 30Wätakuna, päriqkuna y lätaypa puriqkuna mikuyänanpaqmi jachakunatawan qewakunata kamashkä>>.
Ninqannöllam llapanpis karqan. 31Llapan kamanqankuna alläpa alli kanqantam Dios Yaya rikarqan. Soqta kaq junaqchömi tsaykunata kamarqan.
Dewis Presennol:
Génesis 1: qxn
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2011, Wycliffe Bible Translators, Inc. All rights reserved.