OBUCHACHILO Okhumanyisia akalimwo
Okhumanyisia akalimwo
Eshisina shieliira mbu, Obuchaachilo, ni “Omusuule.” Eshitabu shino shiboolanga khukhulongwa khweshialo. Shiboolanga khandi khu akobuchaachilo bwomundu, obuchaachilo bwobwonooni nende obunyakhani mushialo, nende injila eya Nyasaye amenyelangamwo nabandu.
Eshitabu shino shiakabulwamwo ebitonye ebikhongo bibili: 1. Omuliango kwambeli okhuula khu kwekhumi nalulala (1-11) shiboolanga khu akobulongwi bweshialo nende akobulamu bwakhale bwolwibulo lwabandu. Khunyoolamwo akobulamu bwa Adamu nende Hawa, Kaini nende Habili, Noa nende omuyembo kweifula, nende omunara#1:0 omunara: Inzu yirambi eyenyekha okhuula mwikulu ewa Nyasaye. kwa Babuloni.
2. Omuliango kwekhumi nakhabili okhuula khu okwa amakhumi karano (12-50) shiboolanga khu akobulamu bwabakuuka ba Abaisiraeli. Owambeli ni Aburahamu, owamanyikhana khulwa obusuubilibwe nende khulwa obuhulilibwe khu Nyasaye. Akalondakhwo namakhuwa komwanawe Isaaka, nende omwitsukhuluwe Yakobo (oulangwa khandi mbu, Isiraeli), nende abasiani ba Yakobo ekhumi nababili, abachachisia tsimbia ekhumi natsibili etsia Abaisiraeli. Amakhuwa amanji kaboolwa nikachoomile khu Yosefu, mulalala khubasianibe, nende akachila Yakobo nende abasianibe bandi, nabetsinzu tsiabwe nibatsia okhumenya mushialo shia Misiri.
Ne kata olwa eshitabu shino nishikhwinoosinjia akobulamu obwabandu, akambeli amakhongo muno aka shinoosinjia, naka Nyasaye yakhola. Shitsiilililanga nende okhutinyilisia mbu, Nyasaye niye owalonga ebindu biosi, khandi shimalilisinjia nende obusuubisi bwa Nyasaye mbu, alatsiililila okhuliinda abandube. Mushitabu shino shiosi, ouboolungwakhwo muno muno ni Nyasaye, oukhalachilanga nende okhuhaana eshinyasio khubakholanga obumayanu, yemililanga abandube nabakhoonya mubulamu bwabwe nende okhukololosia akobulamu bwabwe. Khandi eshitabu eshikhulu shino, shiahandikwa khulwa okhubiikha nende okhumanyia akobusuubili bwabandu nende okhubakhola batsiililile okhumenya mubusuubili obwo.
Akalimwo mubwimbichiti
Okhulongwa khweshialo nende abandu 1:1–2:25
Okhuchaaka khwobwonooni nende obunyakhani 3:1-24
Okhurula khu Adamu okhuula khu Noa 4:1–5:32
Noa nende omuyembo kweifula 6:1–10:32
Omunara kwa Babuloni 11:1-9
Okhurula khu Shemu okhuula khu Aburamu 11:10-32
Abachaachia olwibulo: Aburahamu, Isaka, Yakobo 12:1–35:29
Abokhulwibulo lwa Esau 36:1-43
Yosefu nende abasianibe 37:1–45:28
Abaisiraeli mushialo shia Misiri 46:1–50:26
Dewis Presennol:
OBUCHACHILO Okhumanyisia akalimwo: OLUDC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda