Mwanzo 7
7
Nuuhi na ajamaaze ampakhira mmwaaraka
1Aphano Nnyizinku khumuuza Nuuhi yoori: “Weeyo na ajamaazo ooshi opakhire mmwaaraka. Vakatthi wa atthu apa, Miiyo kawoona weeyo paasi wiiya ntthu washariya. 2Othuule nyama za halaali sapa zeelume na sapa zeekha ila epile zohiiyi za halaali othuule piiri piiri, yeelume na yeekha. 3Owaathuule theenya anyannyi sapa eelume na sapa eekha yoori jaati yaya ehaashikhe. 4Amana zivira siikhu sapa kinlawa kanyisele vuula va tuniya siikhu arupayiini nthana na osikhu, kipweteche zumpe zooshi kumpiyeezo.” 5Nuuhi khuretta zooshi epile Nnyizinku anrumiyeezo.
6Wakathi maati aazamisiyeevo tuniya, Nuuhi aari oretta arina nyaakha miiya sitha. 7Ye khupakhira mmwaaraka vamote na muukhaawe, aanaawe na aakha aya mwaasa wa maati a nnyeri aari oteelaaye ozamisa olumwenku. 8Nyama za halaali na zohiiyi za halaali, anyannyi na nyama epile zinjipurulaaye vathi, 9khupakhira mmwaaraka vamote na Nuuhi piiri piiri zeelume na zeekha, nkhama etthiipo Nluku aamuuziyeezo. 10Ziviriyeevo siikhu sapa, maati oozamisa olumwenku khwaaza opuwa va tuniya.
11Siikhu Nuuhi afiiyeevo nyaakha miiya sitha, mweezi wa phiiri orina siikhu khuumi na sapa, khuphutuwa matthatta a vathi ooshi apale awiicha na milako za pinku khufukuwa. 12Khunya vuula va tuniya siikhu arupayiini nthana na osikhu.
13Siikhu ethiito Nuuhi, muukhaawe, aanaawe Sheemu, Haamu, Yafeeti, na aakha a ttatthu a aanaawe khweetta mmwaaraka. 14Nuuhi aapakhiriye nyama zooshi za ntthuttu, mifuwo zooshi za vaje, nyama epile zooshi zinjipurulaaye, na anyannyi a wakhula jaati na epile zooshi za wiiyana mapaphelo. 15Zumpe zooshi ziriina phuumu zoohaayi khupakhira piiri piiri mmwaaraka mphule vamote na ye. 16Nyama zooshi zeettiyeemo zaari zeekha na zeelume za wakhula jaati nkhama etthiipo Nluku anrumiyeezo. Nawiisha opakhira, Nnyizinku khufuka nlako wa aaraka.
17Nnyeri weeshiye siikhu arupayiini va tuniya. Maati khuvira eekezeleyaka mpakha olansa aaraka, mpakha khwaaza weeleela vatulu wa tuniya. 18Maati eetta ovira atepaka waatta mpakha aaraka otule khusala eeleela vatulu wa maati. 19Khwaatta channu mpakha khufiyelela ozamisa nyaako. 20Maati khuvikana nyaako epile kiyasi ya phiima sapa. 21Zumpe zooshi zoohaayi zaari va tuniya khufwa; anyannyi, mifuwo za vaje, nyama za ntthuttu, epile zinjipurulaaye vathi na anaatamu ooshi. 22Zumpe zooshi epile zaariina phuumu yoohaayi, zaari ovumulaaye voolumwenku apha khufwa. 23Nluku khupwetecha zumpe zooshi zoohaayi zaari va tuniya. Pinaatamu, nyama za ntthuttu, na epile zinjipurulaaye vathi na anyannyi ootulu zooshi khupwetheya. Khusala Nuuhi otthwe na ajamaaze na nyama epile zaari vamote na ye mmwaaraka.
24Maati aarupaziye va tuniya siikhu miiya na hamusiini.
Dewis Presennol:
Mwanzo 7: eko
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020, Wycliffe Bible Translators, Inc. All rights reserved.