Jọn 11
11
Aḍuugh phọ ạLazaros
1 #
Luk 10.38, 39 Oniin oye ọlo aBetani dị oghol mọ ạLazaros ạrol li emoon. Ẹpe phọ kụ ẹmha aMeri rꞌạMata umarani phọ ọdi. 2#Jọn 12.3Phọn kụ aMeri phọ ọpo ạsighe bọ elo phọ asugh Ọmoogh-we phọ kụ ạsighe bọ sịlaal phọ ọdi agbuuroghom ruwol phọ ọdi. Ọdi kụ umarani ạLazaros phọ úmoon bọ. 3Abumarani phọ ạbuen phọ urom ni dom ọghiomaan Jịzos mọ, “Ọmoogh-we, nạghan! Ọpo nạ ạphomoghian bọ ómoon.”
4Mem dị ạJizos ạnaghan bọ ịduon phọ, ọdi ạḅem mọ, “Eephina phọ ẹphen kẹ́lo aḍuugh, ịtuan ịlo eghuan phọ Ẹnaan, pịdi Ọony phọ Ẹnaan ạtuan ạmoogh eghuan.”
5ẠJizos ạphomoghian ni Mạta rꞌumarani phọ ọdi rꞌạLazaros. 6Ọdi ạrol bọ ạnaghan mọ ạLazaros ómoon phọ, ạḅile ghụn ni bịn ạmina ịyal aḍughul-otu, 7kụ agbi ọḅeni ạbumatuan phọ ọdi mọ, “Ọḅile ọghi ẹpe Judia!”
8Kụ ạbumatuan phọ ọdi ọḅeni nyọdi mọ, “Ọtughemia, tọ pụruku ạbuo aJu phọ ọwa ni oroḅol ạna ikpo, kụ nạ kạḅile kẹn ạki ẹpe?”
9Kụ ạJizos ạḅeni bịdi mọ, “Ḍioph rꞌịyal ạwa kụ ílho ghan bọ ẹmhu aḍio ḍụghum? Oye lọ arelhe ootaany ráakpeteghaan ghan, ịdi eḍighi bọ ọdi rạmiin ni ḍịḅaal aḅirini phọ. 10Kụ oye lọ arelhe ḍughul kaakpeteghaan ni, ịdi eḍighi bọ ạḍiḅaal loor ọdi ílho.” 11Ọdi rọghaaph ịphen phọ rọman, kụ ạḅeni bịdi mọ, “ẠLazaros ọyaghiri phọ ayira mameel rạlha, kụ mị rạki ọsumeeny ọdi.”
12Kụ ạbumatuan phọ mọ, “Ọmoogh-we, eḍighi ịyaar dị ọdi rạnaani, pọ kạsuma ni.”
13Kụ bịdi úlegheri aani bọ mọ ạJizos ạghaaph ghan ịlo aḍuugh phọ ạLazaros, ugbiom ghan mọ ọdi ạghaaph ghan ịlo oopho ạralha. 14Kụ ạJizos ạghaaph amitiom ạḅeni bịdi mọ, “ẠLazaros mamugh. 15Kụ ologhi ạmi ạḅaal li esi ẹmhu anyina ịdipho mị ụ́tol bọ rꞌọdi, pịdi nyina emeeraam. Ọghi ni ọmiin nyọdi!”
16Kụ ạTomos, ọpo oghol bọ mọ ạDidimos phọ, ạḅeni bụeri phọ ạbumatuan phọ mọ, “Ọghi aani ni, pịdi yira omugh aani rꞌọdi!”
ẠJizos kụ raḅerion ghan we esi aḍuugh kạngo ghuḍum
17ẠJizos aru bọ asi Betani, ạmiin ni mọ ạLazaros mạrol pạ oḍi phọ oomo inya aḍughul-otu. 18ABetani atuman ni Jeruselem dị ọḍua rọki ị́man ịraar itobi. 19Ịbadi ạbuo aJu phọ ụghiighi ni ọsenyaan ạMata rꞌaMeri ịlo aḍuugh umor phọ ạbidi.
20Kụ ạMata ạnaghan bọ mọ ạJizos ratu phọ, ạghi ni azuan nyọdi, kụ aMeri ạrol li ologhi otu. 21Kụ ạMata ạḅeni Jịzos mọ, “Ọmoogh-we, mọ nạ ụrol li sịen, ọbo umor phọ ạmi múmugh. 22Mị alegheri ni mọ ghạlamo ạnyiidipho, tọro ịlo nạ ạlom Ẹnaan, Ẹnaan kẹngo ni nyịna.”
23Kụ ạJizos ạḅeni nyọdi mọ, “Umor phọ ạna kạḅile ni aḅetenu.”
24Kụ ạMata mọ, “Mị alegheri ni mọ ọdi kạḅile ni aḅetenu esi aḍuugh ruukuna phọ.”
25Kụ ạJizos mọ, “Mị phọ kụ raḅerion ghan bọ we esi aḍuugh kạngooghi ghuḍum. Kụ ọlo umeeraam ịmi, ghạlamo amugh ni, kạmoogh ni ghuḍum. 26Kụ ọpo odi bọ kụ umeeraam ịmi kámugh rꞌamem. Nạ ameeraam ni ịphen phọ?”
27Kụ ọdi ameera mọ, “Ii, Ọmoogh-we. Mị mameeraam ni mọ nạ kụ aMesaya phọ Ọony phọ Ẹnaan, ọpo katu bọ sịen aḅirini phọ.”
ẠJizos amoghi yogh
28Ọdi rọghaaph ịduon phọ, kụ asi ologhi otu ạmagh Meri, umarani phọ ọdi atenom ọgbal kụ ạḅeni mọ, “Ọtughemia phọ maru, kụ rạmagh ni nyịna.” 29Kụ aMeri rọnaghan ịduon phọ, bịn gburughutuph aḅetenu anyeene ọteeny ọdi. 30Kụ ạJizos kőmite ẹmha phọ, odi ni ẹpe ạMata azuan bọ nyọdi. 31Kụ mem dị ạbuo aJu phọ, ạbuphe ọrol bọ sịphe ologhi otu phọ rọsenyaan ghan Meri ọmiin bọ mọ ọdi maḍighi gburughutuph aḅetenu amite phọ, ụdaph ni nyọdi, ogbiom ghan mọ ọdi ranyeene ẹpe oḍi phọ kụ ọrol omoghi yogh.
32Kụ aMeri ạghi bọ asi sịphe ạJizos ạrol bọ, rọmiin nyọdi bịn akpuḍian pạ aruwol phọ ọdi, kụ ạḅeni mọ, “Ọmoogh-we, mọ nạ ụrol li sịen, ọbo umor phọ ạmi múmugh.”
33Mem dị ạJizos ạmiin bọ dị ọdi rꞌạbuo aJu phọ ạbuphe ọdaph aani bọ nyọdi romoghi yogh, iroor ri nyọdi, kụ ẹeḅaghami uwaloor ọdi, 34kụ apuru mọ, “Nyina iḍi nyọdi ḍighen?”
Kụ bịdi mọ, “Ọmoogh-we, tue ạmiin.”
35Kụ ạJizos amoghi yogh. 36Kụ ạbuo aJu phọ ọḅem mọ, “Ịmiin ịdi ọdi ạphomoghian ghan nyọdi.”
37Kụ abuniin mọ, “Oye phọ ọphon ạḅarion bọ riḍien oye ikpom ariḍien phọ, ọdi mútue uḍighi ịyaar dị ạLazaros múmugh ḍụghum?”
Oḅeton Lạzaros esi aḍuugh
38Ịḅile ni eroor Jịzos kụ ạghi pạ oḍi phọ. Oḍi phọ aḍighi epogh, kụ ọsighe ḍighiigh opukiom ọnhu-aḍibuo phọ. 39Kụ ạJizos ạḅem mọ, “Iikilemi ḍighiigh phọ ẹsighe.”
Kụ ạMata umarani ọpo mamugh bọ ạḅeni nyọdi mọ, “Ọmoogh-we, nyịidipho ọdi rapur. Ọdi amugh bọ sịen inya aḍughul-otu.”
40Kụ ạJizos apuru nyọdi mọ, “Mịna ḍịen nyịna ụ́ḅeni, mọ eḍighi ịyaar dị nạ ameeraam ni, mọ nạ kạmiin ni eghuan phọ Ẹnaan?” 41Kụ bịdi ookilemi ḍighiigh phọ ọsighe pạ ọnhu oḍi phọ. Kụ ạJizos aphogh ạnyu, kụ ạḅem mọ, “Ọde, mị rạseph ni nyịna, ịdipho nạ mụnaghanan bọ ịmi, 42kụ mị alegheri mọ nạ rụnaghanan ghan ni ịmi oomo amem: mị ụtuan dị awe phọ ạbuen ọmeregha bọ sịen kụ rạḅem bọ ịduon phọ, pịdi bịdi omeeraam mọ nạ kụ urom bọ ni ịmi.” 43Ọdi rọḅem ịduon phọ, kụ ạlho ạghiom ạnyu mọ, “Lạzaros, tue amite.” 44Kụ ọpo mamugh bọ ni aru amite rꞌạraghaagh rꞌaruwol dị ọphiinyom ọmur ukpe, rꞌaghisigh dị ọkagh ạpookisi. Kụ ạJizos ạḅeni bịdi mọ, “Ịikpo nyọdi, ọdi agheel!”
Omitenom Jịzos ẹkaraph ezue
(Matiu 26.1-5; Mạk 14.1-2; Luk 22.1-2)
45Kụ ịbadi ạbuo aJu phọ oru bọ ọsenyaan aMeri ụmiin ni ịpe ạJizos aḍighi bọ kụ omeeraam nyọdi. 46Kụ buniin ạbidi ọghi ọghaaph ịpe ạJizos aḍighi bọ ọḅeni Farisi phọ. 47Kụ aFarisi phọ rꞌạbuo ạrumhu ariil ạrikia phọ ookpomoghi ikpolom awe phọ kụ opuru mọ, “Yira koḍighi ika? Ọpo phọ raḍighi yogh ni ịbadi ịiḍaany. 48Yira ọwile nyọdi bịn, oomo awe komeeraam ni nyọdi, kụ ạbuo aRom otu ạar iyira Otu Ịiḅereghi phọ rꞌạbuo eelhe phọ.”
49Kụ oniin ọnyo ạbidi, dị oghol mọ ạKayafas, ọpo aḍighi bọ uwo ẹmhu oyil ạrikia phọ lhạ phọ ạḍiphe, ạḅeni bịdi mọ, “Nyina aweye dị mạar ílegheri, 50ḅịle kẹn nyina rẹ́etughian ghan mọ ẹkpianaan ni dị oniin oye kaghol we phọ amugh, ọbo oomo ạbuo eelhe phọ kope ghan bọ?” 51(ẠKayafas ọ́sighe ịitughian ọdi bịn kụ ạghaaphom bọ ịphen phọ. Ịdipho ọdi aḍighi bọ uwo ẹmhu oyil ạrikia lhạ phọ ạḍiphe phọ, ọdi ạmiin ni ịmiin mọ ạJizos kụ kamughanaan bọ bụo aJu phọ, 52kạ́buo aJu phọ bịn, kạḅaram aani ni nmụny phọ Ẹnaan ọwalala bọ kụ aakpomoghi ạtolomi ḍiniin ạdol.)
53Emiigh kꞌaḍio phọ ạḍiphe phọ, ạbuo ạrumhu phọ ụḅoph ni ọnhu oosophoghian ghan ịlo oghiigh ọdi. 54Kụ ạJizos ạwile omite ghan egaan ogbo ạbuo aJu phọ, kụ ạḍua agheel eelhe dị etuman ẹdala phọ aḍigh ẹmha dị oghol mọ Ifraim, kụ ọdi rꞌạbumatuan phọ ọdi ọrol ẹpe phọ.
55Retu ọteeny amem ẹyaal ạbuo aJu phọ oghol bọ mọ ẹyaal ọphel otene phọ, kụ ịbadi awe ạramha kịrokiro oḅonom osi Jeruselem ịlo oselemian asiloor ạbidi. 56Bịdi ụwa ghan ni ọmiin ạJizos, kụ bịdi ookpomoghan bọ sịphe Otu Ịiḅereghi phọ oniin apuru ghan ni nyoniin mọ, “Nyina regbi ghan ika? Tọ, nyina elegheri ni mọ ọdi kátu aani olhe ẹyaal phọ, katu ni ḍụghum?” 57Kụ ạbuo ạrumhu ariil ạrikia phọ rꞌaFarisi phọ oogonoghian ghan bọ osiph ọdi ụlogh ni ologh mọ oye lọ alegheri ekpisi lọ ọdi odi aru ạḅeni bụno.
Dewis Presennol:
Jọn 11: ẠḌI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS