Emiighom 3
3
Ọḅaar ẹmhu phọ oye
1 #
Ogon 12.9; 20.2 Ẹkaraph-ịyaar kụ ịmoogh igbogh ikeḍi epu oomo ịnam mọ Ọmoogh-we Ẹnaan phọ ạlhem bọ kụ epuru ạnir phọ mọ, “Ẹnaan ịḅeni ḍịen inyina mọ kéle eemuma ạtorobo oreeny sịphe oghoony phọ?”
2Kụ ạnir phọ ạḅeni ẹkaraph-ịyaar mọ, “Ẹkpe dị yoor role ghan ni iimuma oomo ireeny phọ edi bọ sịen oghoony phọ 3emuton nyọpo odi bọ sịphe ogbo phọ. Ẹnaan mẹḅem mọ eemuma oreeny phọ ọpo yoor kúle ḅịle kẹn kụ́ḅogh rọḅogh ọbo yoor komuughu.”
4Kụ ẹkaraph-ịyaar ẹphagharanaan ạnir phọ mọ, “Akue ni. Nyina kémugh. 5Ẹnaan melhegheri mọ ḍio lọ nyina elhe iimuma oreeny phọ ọphon, pọ ariḍien anyina kẹḅaranu, nyina ẹkigh Ẹnaan elegheri igey rꞌịkaraph.”
6Mem dị ạnir phọ ạmiin bọ ẹnighe oreeny phọ, kụ ạḅile ạnaghan ịdi eemuma phọ kẹdugh, rꞌịiḍaany dị keḍighi dị oye phọ kạsu ologhi, ạnir phọ ạkapharan eemuma oreeny phọ alhe. Kụ ọdi ạngo aani olhom mọ ọdi, kụ olhom mọ alhe aani. 7Bịdi rolhe bọ bịn ariḍien ạbidi ẹḅaranu, kụ olhoghoma mọ bụno odi ẹdaḅa, kụ bịdi ọkologh rịnya ạfig ookpereghiom ẹdaḅa phọ ạbidi.
8Kụ dulhe phọ ạḍiphe phọ kụ ẹdi olhom rꞌạnir phọ ọnaghan ẹḍogh Ọmoogh-we Ẹnaan phọ dị ratelhe yogh sịphe oghoony phọ kụ bịdi ọghi ạaghian zin ireeny sịphe oghoony phọ. 9Kụ Ọmoogh-we Ẹnaan phọ ạmagh oye phọ kụ apuru mọ, “Nạ odi ẹghen?”
10Oye phọ ạphagharanaan mọ, “Mị ụnaghan ẹḍogh ạna sịen oghoony phọ, kụ aruugu usiph ịmi ịdi eḍighi bọ mị ụrol ẹdaḅa, kụ mị ạaghian bọ.”
11Kụ Ẹnaan epuru mọ, “Ạnhian kụ ạḅeni bọ nyịna mọ nạ odi ẹdaḅa? Nạ malhe eemuma oreeny phọ ẹpe mị ạḅeni bọ nyịna mọ kále phọ ḍụghum?”
12Kụ oye phọ ạphagharanaan mọ, “Ạnir phọ ọpo nạ ụngo bọ ịmi mọ itughan phọ, ọdi kụ ụngo bọ ịmi eemuma oreeny phọ kụ mị ạar bọ ale.”
13 #
2 Kọr 11.3; 1 Tim 2.14 Ọmoogh-we Ẹnaan phọ apuru ạnir phọ mọ, “Eeghe kụ nạ aḍighi bọ ịduon phọ?”
Kụ ạnir phọ ạphagharanaan mọ, “Ẹkaraph-ịyaar kụ iru iikeleghi ịmi kụ mị alhe bọ.”
Ịiruen dị Ẹnaan eegbo
14Kụ Ọmoogh-we Ẹnaan phọ ẹḅeni ẹkaraph-ịyaar phọ mọ, “Loor ịphen phọ nạ aḍighi bọ, mị masu nyịna ọkaraph ọnhu apuemi oomo ịnam aḅirini phọ. Nạ kakuuraam ghan ọkuruḅaka ạna, kụ ale ghan ịisaar oomo asiḍughul-otu aghuḍum mọ ạna. 15#Ogon 12.17Mị kạlogh ẹpomoghian igbo ạnir phọ rꞌạna; ọony ọdi rꞌọony ạna kọtol dọl ẹpomoghian oomo amem. Ọdi kabun ghan ni ẹmhu ạna, kụ nạ alom ghan eeghim ọdi.”
16Kụ ọdi ạḅeni ạnir phọ mọ, “Mị kạbughe ni ịminimiin phọ ạna mem eghun, ḅịle rꞌeephina mem ẹmaria. Esi ọto kụ ẹdi nạ kạsighe ghan kụ ạmaram nmụny aseere. Oomo ạruuphua phọ ạna kẹtol ghan esi olhom mọ ạna. Ọdi kụ kạtooghi ghan rạraar ạngo nyịna.”
17 #
Hib 6.8
Kụ ọdi ạḅeni oye phọ mọ, “Ịdipho nạ mạnaghanan bọ ọnhu ạnir phọ ạna kụ alhe bọ eemuma oreeny phọ ọpo mị ạḅeni bọ nyịna mọ kále phọ, itulughian kẹtolonaan de phọ loor ẹmhu ạna. Nạ kakumuan ni iboom oomo aghuḍum mọ ạna oḍighi ịdi ade phọ kemitiom ghan eḍien dị kẹgbaanyan nyịna olhe. 18Ade phọ kemitiom ni iitoor rꞌiiḅurom, ḅịle nạ kale ghan ịizupha dị esi bịn ẹpe eḍum mọ. 19Nạ kạkpar ri akumuan aloman oḍighi ịdi ade phọ kemitiom ịyaar olhe tụtu nạ aḅula sịphe ade phọ ọsighe bọ kụ ọlhemom bọ nyịna. Ụsighe ịisaar kụ ọlhemom bọ nyịna kụ nạ kaḅula ni aḍighi ịisaar phọ.”
20Ạdam aghol ḍien ạnir phọ ọdi mọ Iiv, ịdi eḍighi bọ ọdi kụ onhiin oomo awe. 21Kụ Ọmoogh-we Ẹnaan phọ ẹkolonaan rukpe aruzu-ịnam emunemi Ạdam rꞌạnir phọ ọdi.
Ịdi Ẹnaan ephorogh Ạdam rꞌaIiv emitiom oghoony phọ
22 #
Ogon 22.14
Kụ Ọmoogh-we Ẹnaan phọ ẹḅem mọ, “Nyịidipho oye phọ mạghigh ọnyo ayira malhegheri igey rꞌịkaraph. Kúmeera bịdi ọsighe oreeny aghuḍum mọ olhe ọbo bịdi kọtol ghan bọ kꞌagee-pọ.” 23Kụ iḍighi kụ Ọmoogh-we Ẹnaan phọ aphorogh bịdi sịphe oghoony phọ Iden kụ aḍighi ịdi bịdi kobul ghan de phọ ạḍiphe ọsighe bọ kụ ọlhemom bịdi. 24Ẹnaan rephorogh bọ bịdi remitiom kụ esereghi sịphe oghoony phọ ạga phọ ẹpe erumuḍio phọ remite ghan bọ rụukpaany aghuḍuul dị edi eye, rꞌelhool ẹgham dị reda kụ rẹpiph ghan ọman rꞌarisigh mọ ekori ghan oreeny aghuḍum mọ ọbo oye katuman ghan bọ.
Dewis Presennol:
Emiighom 3: ẠḌI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS