Matta 16
16
Laɓti ɗye Lazham nu̱ke wor ka Naki nu̱ si
(Mar 8:11-13; Luk 12:54-56)
1Tu̱ Pariseku ndu̱ Sadukeku a ɓa she Yesu ma buuri nda, tu̱ khuɗ nda ku za ku̱ wuɗ ɗye lazham nggur nu̱ke ka wuɗki za chin a ɓa mbu̱ viɗ she Magham.
2Tu̱ tlogha ye wor za, “Ku̱ mugdi mbu̱ tun wa na maa viɗi wa shi vyang nun za, ‘Sui, maarang ka ngga wuri.’ 3Nu̱ dumaari mbu̱ tun wa na maari wa sa rikiriki, nun za, ‘Meeni nang chem ka gwa romndi.’ Tun wa ka zu̱n ɗyi nu̱ke a mu̱na viɗi, yang nun ka ɗu̱ma zu̱n sarchi ɓu̱ ɗyiku nu̱ mbu̱ qaandi virkir meeni ɓa. 4Nduki nu̱ qaandi virkir meeni mu̱naranku, nu̱ka sawa Magham ku ɓa. A shim ɗye lazham nggur nu̱ke wor ka naki nu̱ si, yang ɓu̱ wuɗ aa nu̱m ye wor ma ku̱ nanda nu̱ si ɓa, kope ɗye lazham ɓu̱ Yunana.” Tu̱ yang njig wor tu̱ ɗu̱ varan.
Shogar Galkandi ɓu̱ Pariseku ndu̱ Sadukeku
(Mar 8:14-21)
5Nu̱ dlaki nu̱ dam ku me gu̱mndi dandang, yang nu̱ mburi nda kwang wa mona nu̱ ɗa da ɓurti tolir ku ɓa. 6Tu̱ Yesu ze wor za, “Ku̱r ma vaanu, tun shakh ɗyinonu ndu̱ yis ɓu̱ Pariseku ndu̱ Sadukeku.” 7Tu̱ yang shi ɓalarku chele ɓaanda a zu̱ran ku za, “Na a ve nu̱ke nyem a ɓa ndu̱ ɓurti toli ɓa.”
8Nu̱ Yesu naki wanang tu̱ zu̱ za, “Tun nu̱ katar maito, nu̱m saki tun ki zu̱ran za ɓurti toli kha nu ɓa?” 9Alapa nun da mban ɓa, tun wa mona ndu̱ nduki du̱pu qurmundi nang zu̱mki ndu̱ wor ndu̱ ɓurti tolir qurmun ndang mu? Tun taba nu̱ khakyang kang kima? 10Kom ndu̱ sarchi nang zu̱mki ndu̱ nduki du̱pu vat ndu̱ ɓurti tolir mutndang, tun taba nu̱ khakyang kang kima? 11Nu̱m saki tun ku̱na da mban nu̱ ɗyine ngaa shikya ɓalar ɓu̱rti toli ɓa? Nga zu̱ nga za ku̱ shakh nu̱ ɗyinonu ndu̱ yis ɓu̱ Pariseku ndu̱ Sadukeku. 12Kom ɗo tu̱ da mban ku za a shikya ɓalar ɓu̱ yis nu̱ka saki nu̱ mbu̱ ɓurti toli ɓa, yang a wu kya wor za shakh nda ɗyin wor ndu̱ shogar ɓu̱ Pariseku ndu̱ Sadukekwang.
Biturus wa Saida za Yesu ke Masiya
(Mar 8:27-30; Luk 9:18-21)
13Nu̱ Yesu ɗu̱ki mbu̱ dlar ghai Kaisariya Filipi, tu̱ zham nu̱ mburindakwang za, “Nduki a zu̱ran za Yi ɓu̱ Nduk ɗya kiya?”
14Tu̱ zu̱ ku za, “Ɓeena nduki za to Yokhana Nu̱ Baptismyang, ɓeenan za Iliya, ɓeenan za Yirmiya, yang ɓeenan za to da chele ɓeeni annabikwang.”
15Tu̱ ze wor za, “Yang tun ɗa ye nar ɓaanu nga kiya?”
16Kom tu̱ Siman Biturus tlogha za, “To ke Masiya, Yi ɓu̱ Magham nu̱ nyifiri.”
17Tu̱ Yesu tlogha yenda za, “To nu̱ barka Siman, yi ɓu̱ Yunana! Ku̱me nduk wuɗki na yor ɓa, kope Zhinkir ɓang nu̱ke a mbu̱ viɗi. 18Ngaa zu̱ran yoro, to ke Biturus (ndogdi koɗommandi) yang ngga du̱n nduki nu̱ mbuki nga nu̱ ɗyine ndogdi (gwaanji) nang,#16:18 Ndogdi Gwaanjang ɗya Yesu, nu̱ Biturus zu̱ki za, “To ke Masiya Yi ɓu̱ Magham nu̱ nyifiri.” nu̱ke mu̱ɗ ɓu̱ gwa zalala ɗyine wor ɓa. 19Ngga vu̱r ɗye qu̱ndiku nu̱ kwaaɗar viɗi yoro. Kap ɗyi no gu̱nki nu̱gha larji, ka gu̱n nu̱gha viɗi yang tu̱k kap ɗyi no kolki nu̱gha larji, ka kol nu̱gha viɗi.” 20Tu̱ yang wu nu̱ mburi nda kwang maɗyi za ku̱ ze aaki za chin ke Masiya ɓa.
Yesu wa zu̱ Poona Mu̱ti nu̱ke Chin ka shiki
(Mar 8:31–9:1; Luk 9:22-27)
21Ji ye sarchi nang tu̱ Yesu nggaasi zu̱ran ye nu̱ mburindakwang za, wa ku̱s ɗu̱nji Urshalima. A za nji bonye zum zum mbu̱ khar dlegumeku, ndu̱ kuru rututundi ndu̱ Maalu̱m Taurete kwang, tu̱ tlagha nda nu̱ gha ku, yang ye fu̱ɗar nu̱ kunungan ka ji nu̱ chin viɗi mbe mu̱ti.
22Tu̱ yang Biturus qa nda nu̱ konggol tu̱ nggasi wu nda a zu̱ran za, “Ku̱ Magham nggu̱tli, Zhinerem gwaanji sar da ɗyinang ɓu̱ shi ndu̱ to ɓa.”
23Tu̱ Yesu mbu̱m tu̱ ze nda za, “Ɗu̱ ɓar ya fan, Sheɗan! Ta khar ndogdi ji sar sha, ku̱me ta shikya kwaari ɓu̱ nduku, no shi kwaari ɓu̱ Magham ɓa.”
24Tu̱ Yesu ze nu̱ mburi nda kwang za, “Kap njif nu̱ke a shim mburi nga, ku̱ zhang ɗyinan gha tu̱ da qu̱far kaatli varan tu̱ mburi nga. 25Ku̱me aaki ɗanaki nyifi ɓaran ka mbu̱ɗ nda, yang aaki mbu̱ɗki nyifi ɓaran ku̱me nga ka gwa nyifirang. 26A fu̱nke boote ɓu̱ ku̱ nduk gwa larji kap, tu̱ yang mbu̱ɗ nyifi ɓarana? Nduk ka paatakya nu̱m ndu̱ nyifi ɓarana. 27Yi ɓu̱ Nduk a ɓar ndu̱ nu̱ ru̱ktiku ɓaran, mbu̱ zhaaji ɓu̱ Zhinkir ɓaran, kom ka ɓi aaki ku̱rku̱r ndu̱ pooni tlu̱nar nu̱ nduk shiki. 28Zhire nga zu̱ran ye nu, ɓeena nduki a nje ku fan chingndan nu̱ke ɓu̱ mu̱ɗku ɓa, kope wa na ɓar ɓu̱ Yi ɓu̱ Nduk mbu̱ kwaaɗar ɓaran.”
Dewis Presennol:
Matta 16: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016