Luka 7
7
Yesu wa Shaana Maavi ɓu̱ Gorkir Soje ngguri
(Mat 8:5-13)
1Nu̱ Yesu woɗaki zu̱ ɓalarku nang ye ndukyang, tu̱ gaɓ varan nu̱ mbu̱ ghai Kaparnakhum. 2Gorkir soje ɓu̱ Rome nggur a nje mbu̱ ghayang nu̱ke maavi nu̱ke a shimndan maɗyi a me mu̱ti ku̱me varan mu̱n ɓa. 3Nu̱ gorkir soja tu̱kki labar ɓu̱ Yesu tu̱ ru̱k nduk kudaandi ɓu̱ Yakhudeku ma ku̱ khuɗ Yesu ku̱ ɗa ɓa ma shaana maavi ɓaranang. 4Nu̱ khu̱lki ku she Yesu, tu̱ khuti nda ku maɗyi a zu̱ran ku za, “Njif nang wa khu̱l ku̱ shaata na nda, 5ku̱me a ndola nduki ɓaarem maɗyi, wonji chin du̱nki kib tabar ɓaarem nang yerem.” 6Tu̱ Yesu ɗu̱ su̱yen ndu̱ wora.
Nu̱ shiki bing ndu̱ raftang, tu̱ gorkir sojang ru̱k raptanku ku̱ ze nda za, “Zhinerem gwaanji, damtana va nu̱gha nu̱ ɓar sha ɓa, ku̱me nang khu̱l a ɓa na kaa ɓang ɓa. 7Yang nang khu̱l ɗu̱ nga sho zum ɓa, ku̱me nang, shi ba ɓalar ye maa nu̱ke ta si, maavi ɓang kaa shaana. 8Nga zu̱n nang ku̱me nga ma nu̱ gumera ku a nje, yang sojeku a nje mbu̱ bu̱na tu̱k, mbu̱ ngaa ze nduk da chele ɓaanda za, ‘Ɗu,’ kaa ɗi; ‘a ɓo,’ kaɗa ɓa; ‘shi kaa,’ kaa shi.”
9Nu̱ Yesu tu̱kki ɓalar nang, tu̱ shi lazham maɗyi, tu̱ mbu̱m nu̱ she tabar ndukyang tu̱ ze wor za, “Ngaa zu̱ran ye nu, sar da nang na pooni maito nang mbu̱ Israila ɓa.”
10Gaɓti ɓu̱ nu̱ ru̱ktikwang nu̱ kaari, ta gwa maavi ɓu̱ sojang wa shaana.
Yesu wa Nakha Mu̱ti Woi ɓu̱ Nokhzi nggur nu̱ke Ku̱du̱wang
11Nu̱ shoɓ qu̱rsan ɓa, tu̱ Yesu ndu̱ nu̱ mburi nda ku ɗu̱ mbu̱ ghai nggur dlu̱man za Nayin su̱yen ndu̱ tabar nduki khang nu̱ mbuki gaanje nda. 12Khu̱dli ɓu̱ Yesu bing ndu̱ me vi garuk ghayang ke shar, tu̱ na nduki nu̱ ɗa daki mu̱ti woi nggur nu̱ke chin ɗyenda kha man, wonji manang ku̱du̱wang. Nduki khang a su̱yen ndu̱ nokhzang ma du̱ng nda. 13Nu̱ Zhinerem gwaanji naki nokhzang, tu̱ na zhiyaye ɓaran, tu̱ ze nda za, “Shi na gho ɓa.”
14Nu̱ Yesu ɗu̱ki ta su̱ɓa ɗye dar mu̱tang, tu̱ nu̱ dar mu̱tikwang ching gha, tu̱ Yesu ze mu̱tang za, “Nyakhtli, ju nu̱ viɗi!” 15Tu̱ mu̱tang ji tu̱ kha gha ndu̱ me geesan tu̱ nggasi ɓalar ye nduki nu̱ke a she nda, tu̱ Yesu sa nda nu̱ mbu̱ khar man.
16Tu̱ tabar ndukyang gor dlu̱m Magham su̱yen ndu̱ tu̱kti sawar maɗyikandi a zu̱ran ku za, “Annabi gwaanja vi chele ɓaarem, chem wa na zalale ɓu̱ Magham meeni.”
17Tu̱ labar ɗyi nu̱ Yesu shiki nang ɗu̱ aa fu̱n mbu̱ ghai Yakhudiya ndu̱ ghaiku nu̱ke a bing.
Yokhana nu̱ Baptismya Ru̱k nu̱ Mburi nda ku nu̱ she Yesu
(Mat 11:2-19)
18Nu̱ nduki ku nu̱ mbu Yokhana nu̱ baptismya zu̱ki ɗyi nu̱ke Yesu a shiran yenda, 19tu̱ qa nduki rap chele ɓaanda. Tu̱ ru̱k wor nu̱ she Yesu ndu̱ zhamndi za, “To ke Masiya nu̱ke chem a buranang mu yang nggu̱t mi njiv ɓar ɓu̱ njif nggur zum mu?”
20Sarchi nu̱ khu̱lki ku she Yesu, tu̱ zu̱ ku za, “Yokhana nu̱ baptismyang ru̱kki rem za zhammi ro, ɗa, to ke njif nu̱ke a ɓara mu yang ku̱rsami njif nggur mu?”
21Baa ye sarchi nang, tu̱ Yesu shaana nduki khang nu̱ khaatiku san zum zum tu̱ fed khu̱kheeti malkandiku ɓar mbe nduki su̱yen ndu̱ qu̱ndi yiti pugumku. 22Tu̱ yang Yesu tlogha ye wor za, “Gaɓ ma tun a zu̱ ɗyi nun naki ndu̱ nun tu̱kki ye Yokhana. Tun ze nda nun za, pugumku a na maari, zu̱ɓtiku a yiri, nu̱ khaati gwaanji ku a gwa shaanari, tuurangku a tu̱k ɓalari, mu̱tiku a nakhari nu̱ nungndiku a tu̱k labar mbarkandang.” 23Tun ze nda tu̱k nun za, “Barkya ve aaki nu̱ke nang kha yenda ma ɗye ji sar ɓa.”
24Gaanje nu̱ mbu Yokhana kwa wa ɗu̱ vaanda, tu̱ Yesu nggaasi ɓalar ɓu̱ Yokhana nu̱ baptisma ye tabar ndukyang za, “Tun ɗu̱ mbu̱ gaarang ma na nu̱ma? Njif nun naki nda wa shipa wuzu̱ndi kirkandi nu̱ke a yakhtar mbu̱ khu̱kheeti wa pi worang mu? 25Tun ɗu̱kya ma na nu̱m ɗo? Tamandi ɓaanu tun ka na nda ndu̱ lukti me mu̱zhindi saran ve nda mu? Auwo, mbu̱ tun a shim na nduki nu̱ sar lukti me mu̱zhindi a khar yele ɓaanda, tun ɓu̱ gwa wor gar ɓa, tun ka gwa wor patla she kuji. 26Yang ɗa, tun ɗu̱kya ma na nu̱ma? Annabi mu? I, wanang, ngaa zu̱ran ye nu, wa duk Annabi. 27Nang ke Yokhana nu̱ lagarkatang shiki ɓalar ɓaran za,
‘Nggu̱ɗu, ngaa tu̱pa nu̱ ru̱kti ɓang gumero
ku̱me ku̱ daasa njiv ɓar ɓaaro.’
28“Ngaa zu̱ran ye nu, chele nduki nu̱ man wor shulki gha tu̱ kha wora, nduk nje nu̱ dukki Yokhana nu̱ baptisma gwaari ɓa. Yang kap ndu̱ nang, njif nu̱ dukki koɗomme mbu̱ kwaaɗar ɓu̱ Magham, wa duk Yokhana nu̱ baptisma gwaari.”
29Nu̱ ndukyang tu̱kki wanang, tu̱ nu̱ dlu̱r zhaanggalku ndu̱ ɓeena ndukyang kap tlogha za ɗyi nu̱ Magham shikyang wa shi torop, ku̱me wor nu̱ va nda wa shi baptisme ku she Yokhana. 30Yang Pariseku ndu̱ nu̱ zu̱ndi Taurete kwa wa zhang ɗyi nu̱ Magham shimki wor si, ma nu̱ke wa zhang baptisme ɓu̱ Yokhana gha ku.
31Tu̱ Yesu zu̱m guma ndu̱ ɓalarang za, “Ngga ku̱r nduk zaman nang ndu̱ nu̱ma? Nduk nang shipa kya nu̱m shoɗa? 32Wa shipa qusonggi nu̱ke a palam me gomari, tu̱ yang kaa qa yen ku za,
‘Chem wa pi pelnggum ye nu ma sapa nu,
yang tun wa zhang saparan gha.
Chem gaɓ chem qa taazi gho mu̱ti ye nu,
yang tun wa zhang yaaɓaran gha
rong ma kaani.’
33“Ku̱me Yokhana nu̱ baptisma nu̱ka zu̱m ɗye zu̱m ɓa, yang nu̱ka za ɗyema ɓa, ku̱me kaa shi zhumti maɗyi, yang tun sa dlu̱m yenda nun za, ‘Ɗya nu̱ khu̱kheet.’ 34Yi ɓu̱ nduk a ɓa a zu̱mndi a zari nun za kaa shi zu̱m ndu̱ za maɗyi, nun za, ‘Ɗya rapti nu̱ dlu̱r zhaanggalku ndu̱ nu̱ solarku.’ 35Kap ndu̱ nang, nduk ka na kaɗari ɓu̱ Magham mbe khar viti ɓu̱ nduki nu̱ mbuki nda.”
Nokhzi nu̱ Solar nggur nu̱ Puki Mor ye Saari Yesu
36Tu̱ Parise nggur qa Yesu ma zu̱m ɗye zu̱mndi kaari she nda, tu̱ Yesu vi ta kha gha ma zu̱m ɗye zu̱mndang. 37Tu̱ nokhzi nu̱ solar nggur tu̱k labaran za Yesu a nje a zu̱m ɗye zu̱mndi mbu̱ rafti ɓu̱ Parise ngguri, ta ɓa ndu̱ mor nggur mbu̱ bungndi ndogdi alabasta zhiran mu̱nkandi nu̱ke mu̱zhindan khang. 38Tu̱ ching gha gaanje nda a ghoori. Nu̱ ɗyim ghoorang nggaki su̱ jiti nu̱ ɗyin saari Yesu, tu̱ nokhzang ki pasha ɗyim ghoorang ɓar ndu̱ ghosi ɗyinan. A sa men nu̱ ve saaranang, a pu mor zhiiran mu̱nkandang nu̱ si.
39Nu̱ Parisyang naki ɗyi nu̱ke nokhzang a shiran ye Yesu, tu̱ shi kwaari mbu̱ memu̱naran za, “Mbu̱ njif nang ɗya annabi ɓu̱ Magham, tu̱k wa zu̱n pooni nokhzi nu̱ke a su̱ɓa nda nang ku̱me ɗya nu̱ sola.”
40Tu̱ Yesu ze nda za, “Siman, bu zu̱ nga ɗyi nggur yoro.”
Tu̱ Siman tlogha za, “Maalu̱m, zu̱.”
41Tu̱ Yesu ze nda za, “Njif nggur a nje nu̱ vu̱rki kudum mu̱zhindi ye nduki rap, njif dandang mu̱zhindang wa khu̱l ɓi tlu̱nar ɓu̱ nduk da me sonyi da ndu̱ mbeeri. Njif nu̱ rapndang dlu̱kya kudum mu̱zhindi nu̱ khu̱l ki ɓi tlu̱nar ɓu̱ nduk da me qaandi ɗyin qurmun. 42Gaanje nu̱ dlu̱r kudum kwa wa ku̱na ɓiiran, tu̱ ndu̱m mu̱zhindang ye wora. Ye nar ɓaaro, ki kaa dukki nu̱ ndolar nda?”
43Tu̱ Siman tlogha za, “Ye nar ɓanga, njif nu̱ ndu̱mki mu̱zhindi khang nda yenda.”
Tu̱ Yesu ze nda za, “Wanang ni, ta tlogha torop.”
44Tu̱ Yesu dambu̱r nu̱ she nokhzang dong, kom tu̱ ze Siman za, “Ta na nokhzi nang? Ngaa ɓa kya kaa ɓaaro, yang no vu̱r ɗyim shiɓti saari ya ɓa, wonji nokhzi nang wa shiɓ saara nu̱gha ndu̱ ɗyim ghoori ɓaran tu̱ pasha nu̱ gha ndu̱ ghosi ɗyinan. 45Ma ɓar ɓang kaa ɓaaro, no khaapa nga ɓa, yang nokhzi nang nu̱ njig sa men nu̱ ve saara ma ɓar ɓang ɓa. 46No pasha mor ye ɗyina ɓa, yang nokhzi nang wa pu mor nu̱ zhaaji ye saara. 47Ku̱me nang nga zu̱ran yoro, wa yaapa solar khangndi nu̱ shikya yenda, nang ke ɗyi nu̱ saki tu̱ wuɗ ndolar maɗyikandi.”
48Tu̱ Yesu ze nokhzang za, “Wa yaapa solar ɓa yoro.”
49Tu̱ nduki nu̱ke a zu̱m ɗye zu̱mndi su̱yen ndu̱ chinang nggaasi ɓalar chele ɓaanda a zu̱ran ku za, “Woɗye njif nang daa ɗyinan ma ki kwa, nu̱ke ka zu̱ki za chin wa yaapa solara?”
50Tu̱ Yesu gaɓ tu̱ ze nokhzang za, “Maito ɓa wa ɗanaro, ɗu̱ laya.”
Dewis Presennol:
Luka 7: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016