Luka 4
4
Sheɗan wa Buu Yesu
(Mat 4:1-11; Mar 1:12-13)
1Tu̱ Yesu a ji Gaawu Urdun tu̱ ɗa gaɓi nyeedlan ndu̱ Jiimbi shakhshakhndi, yang tu̱ Jiimbyang ɗu̱ ndu̱ chin gar, 2ye maa nu̱ke Sheɗan a buuki nda me qaandi ɗyin vat. Qu̱rse sarchi nanga tu̱ meeri shi yenda, ku̱me nu̱ zu̱m aa nu̱m ɓa.
3Tu̱ Sheɗan ze nda za, “Mbu̱ke to Yi ɓu̱ Magham, goɓ ndu̱ ndogdi nang ma ɗye zu̱mndi.”
4Yang tu̱ Yesu tlogha yenda za, “A nje bu̱laran mbu̱ ɓalar ɓu̱ Magham za, ‘Ɗye zu̱m ɗyenda ka ku̱rki nduk ɓa.’ ”
5Qu̱rsan, tu̱ Sheɗan ɗu̱ ndu̱ chin viɗi, nggwotang, tu̱ ɗa wuɗ kwaaɗar ku larji nanga yenda kap ba mbu̱ kelep yiti. 6Tu̱ Sheɗan ze nda za, “Ngga vu̱r kwaaɗar nanga yoro kap ndu̱ zhaaji ni, to shi zalale ɗyinan ku̱me wa vu̱r ya, yang ngga ɗu̱ma vu̱rtan ye aaki nang shimki. 7Ngga vu̱r ɓar yor kap mbu̱ke ta kurum gha to ghar ghai ya.”
8Yang tu̱ Yesu tlogha yenda za, “A nje bu̱laran za, ‘Ghor ghai ye Maghamndi ɓaaro yang to mbu su̱quran chin ɗyenda.’ ”
9Tu̱ Sheɗan daa nda nu̱ Urshalima tu̱ khu̱l ndu̱ chin vite lauɗar du̱ndi Rafti ɓu̱ Maghamang, tu̱ ze nda za, “Mbu̱ke to Yi ɓu̱ Magham ku̱m jiiri to ɗa nggu̱ɗ ye ghai. 10Jiwa a nje bu̱laran za,
‘Chin ka sa nu̱ ru̱ktiku ɓu̱ Magham
tu̱ khutloror ku,
tu̱ kaanggu̱la ku.
11Yang tu̱k ka gaɗa ro ndu̱ khar wora,
ku̱me ku̱ saror ghwaɗ ye ndooga ɓa.’ ”
12Tu̱ Yesu tlogha yenda za, “Lagarkati ɓu̱ Magham wa zu̱ za, ‘Ku̱ buu na Zhinkir gwaanji Maghamndi ɓaa ɓa.’ ”
Yesu wa Nggasi Tlu̱nar ɓaran Galili
(Mat 4:12-17; Mar 1:14-15)
13Nu̱ Sheɗan woɗaki buuri Yesu mbe aa nyi njiva, tu̱ ɗu̱ varan dong, ma bu sarchi ngguri.
14Kom tu̱ Yesu gaɓ nu̱ Galili su̱yen ndu̱ zalale ɓu̱ Jiimbi shakhshakhndi. Tu̱ labar ɓaran khu̱l aa fu̱n mbu̱ maarang. 15Tu̱ shi shogar ye nduki mbu̱ kib tabar ɓu̱ Yakhudeku, aaki a makhta nda.
Wa Zhang Yesu gha Nazaret
(Mat 13:53-58; Mar 6:1-6)
16Tu̱ Yesu a ɓa Nazaret ghai nu̱ gorki njang, tu̱ vi nu̱ mbu̱ kib tabar ɓu̱ Yakhudeku ye Su̱bji Fu̱ɗar Maasi ba wa nu̱ka shiki. Tu̱ ji tu̱ ching gha ma nggu̱ti ye chiti. 17Tu̱ zoɓa lagarkati ɓu̱ annabi Yishaya yenda ku. Tu̱ qu̱n lagarkatang, tu̱ gwa maa ni bu̱laki za,
18“Jiimbi ɓu̱ Zhinkir gwaanji a nje ɗyina,
ku̱me wa daati nga
a ɓa nga ndu̱ labar mbarkandi
ye nduki nu̱ke tun kha wor ɓa.
Wa ru̱kti nga za wopa nga
ɓalar kwatli ye nduki gu̱nkandi ku,
a qu̱n nga yiti pugumku tu̱ na maari,
a lawa nga nduki ɓar me khar
nu̱ vu̱rti bonye ye wora.
19Yang tu̱k a zu̱ nga ye aaki nga za
sarchi ɗanar ɓu̱ Zhinerem gwaanji
a khu̱dli.”
20Tu̱ za lagarkatang nu̱gha, tu̱ vu̱r ye nu̱ tlu̱nar ye maaranang, tu̱ kha gha yang wor kap ye maa tabar ɓu̱ Yakhudekwang, tu̱ gang nggu̱ti nu̱ ve nda ku. 21Yang tu̱ ze wor za, “Tun wa tu̱k ɗyi nu̱ Magham zu̱ki fanang wa khan si.”
22Tu̱ ndukyang kap tu̱k mu̱ndi ɓarani, tu̱ ku̱s lazham ɓalar ɓu̱tokhndi nu̱ke a viri mbu̱ meeni. Tu̱ vi ma zu̱ran ku za, “Woɗye, na ɗya Yi ɓu̱ Yusufu ɓa goma?”
23Yang tu̱ ze wor za, “Wanang ɗo, nga zu̱n tun ka zu̱ nggar mbu̱ ɓalar nanga ya, ‘To nu̱ kuzhi, shono vaaro, ɗyiku nyem tu̱kki za ta shi Kaparnakhumang, shi fan mbu̱ ghai ɓaa tu̱k ɓa.’ ”
24Kom yang za, “Zhire ngaa zu̱ran ye nu, nduk nu̱ka kasha annabi ɓu̱ Magham mbu̱ ghai ɓaran ɓa. 25Yang ngaa zu̱ran ye nu̱, ku̱du̱w nusuku a nje khang mbu̱ Israila mbu̱ qaandi virkir ɓu̱ annabi Iliya. Sarchi nu̱ke romndi nu̱ viɗi na ɓa ye ghai ɓa me sonyi kunung ndu̱ chere njong, maarang kap tun nje ku̱ nduk zu̱m ɓa. 26Yang nu̱ ru̱k Iliya nu̱ she aaki chele ɓaanda ɓa, ru̱kti nda nu̱ she nokhzi nggur nu̱ Zarifat nu̱ke zhimen mu̱ɗki mbu̱ dlar maa Sidon. 27Yang nu̱ khaati gwaanji kwa nje khang mbu̱ Israila sarchi qaandi virkir ɓu̱ annabi Elisha, yang nu̱ shaana aaki nu̱gha chele ɓaanda ɓa, shaana kya ba Na'aman khuzi Siriya.”
28Sarchi nu̱ ndukyang tu̱kki ɓalar nangang, wor nu̱ kya mbu̱ kib tabar ɓu̱ Yakhudekwang kap tu̱ memu̱na wor su̱bu̱ri. 29Tu̱ gu̱r nu̱ viɗi ku, tu̱ fed Yesu ɓar mbu̱ ghayang, tu̱ khu̱l ndu̱ chin ku me koɗokh dleng nu̱ke ghai ɓaanda ɗyinan nang, shimndi ɓaanda za ku̱ tu̱pa nda nda ye ghai ɗyine dlengang. 30Yang tu̱ vi varan chele ɓaanda tu̱ ɗu̱ varan.
Nu̱ Khu̱kheeti Malkandi ngguri
(Mar 1:21-28)
31Tu̱ Yesu ɗu̱ Kaparnakhum, ghai nggur Galili tu̱ vi ma shogar ye wora Fu̱ɗar Maasi 32Tu̱ shogar ɓaranang shi lazham ye wora, ku̱me a ɓalarang ndu̱ zalala.
33Yang mbu̱ kib tabar ɓu̱ Yakhudekwang, njif nggur a nje nu̱ke khu̱kheetiku malkandi a nje su̱yen ndu̱ chin, tu̱ var zhaano za, 34“Aagha! Nu̱m baki ndu̱ chema, Yesu khuzi Nazaret? Ta ɓa ma tlagha rem mu? Nga zu̱ndoro, To ke Shakhshakhndi ɓu̱ Maghamang.”
35Yang tu̱ Yesu shi wuuri yenda za, “Kho tu̱tu̱k, to vi ɓar mbe nda.” Yang tu̱ khu̱kheeti malkanda daa njifang tu̱ ghwaɗ ye ghai gume ndukyang kom tu̱ ɗu̱ varan tu̱ njigti nda, yang nu̱ ruɓa nda ɓa.
36Yang tu̱ ɗya shi lazham ye wor kap, tu̱ ku̱s zu̱ran ye yen ku za, “Na ɗya nu̱ma? Njif na wa komba khu̱kheetiku malkandi ɓar mbe nduki ndu̱ zalala, kap ndu̱ du̱mbu̱r.”
37Tu̱ labar ɓaran baara maarang kap mbu̱ dlar maa ɓaandang.
Yesu wa Shaana Nduk Khang
(Mat 8:14-17; Mar 1:29-34)
38Tu̱ Yesu vi varan ɓar mbu̱ kib tabar ɓu̱ Yakhudekwang, tu̱ vi nu̱ kaari mbu̱ rafti ɓu̱ Siman. Man nokhzi Siman nu̱ daa lawan ɓa, ɓalɓal wa ku̱si nda gu̱rgu̱r, tu̱ khuɗ Yesu ku za ku̱ shaana nda nu̱ gha. 39Tu̱ Yesu gos bing ndu̱ chin tu̱ var wuuri ye ɓalɓalang, tu̱ ɓalɓalang ngga nda gha, tu̱ ji nu̱ viɗi fan ndu̱ fan, tu̱ ndakh ɗye zu̱mndi ye wora.
40Fu̱ɗar wa nggu̱ɗi, yang kap nduki nu̱ke kheetiku ɓaanda nu̱ daa lawan ɓa, tu̱ ɗa ɓa ndu̱ wor she Yesu, tu̱ du̱ngkya kharan nu̱ ve wora, kap tu̱ shaana ku. 41Tu̱ khu̱kheeti malkandi vi ɓar mbe nduki khang, a zhaano ku, a zu̱ran za, “To Yi ɓu̱ Magham.”
Yang tu̱ Yesu wu wora tu̱ nggu̱tl wor ndu̱ ɓalarang, ku̱me wa zu̱n ku chin ke Masiya.
Yesu wa Shi Waazu mbu̱ Kib Tabarku ɓu̱ Yakhudeku
(Mar 1:35-39)
42Nu̱ maari ɗatlki tu̱ Yesu ɗu̱ varan gar, tu̱ ndukyang vi ma laɓti nda, nu̱ gwaki nda ku, tu̱ khuti nda ku za ku̱ ɗu̱ varan ɓa. 43Yang tu̱ tlogha ye wor za, “Ba ngga ɗu̱ ta nga zu̱ labar mbarkandang nu̱ kwaaɗar ɓu̱ Magham ye ɓeena ghaikwang tu̱k, ku̱me nang ke ɗyi nu̱ ɗa ɓa ki ndu̱ nga.”
44Tu̱ Yesu ku̱s shir waazu mbu̱ kib tabarku ɓu̱ Yakhudeku.
Dewis Presennol:
Luka 4: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016