Yokhana 7
7
Khachinkirku ɓu̱ Yesu nu̱ Maita nda ku ɓa
1Gaanje nang tu̱ Yesu baara mbu̱ dlar ghai Galili, yang nu̱ shim yir mbu̱ dlar ghai Yakhudiya ɓa, ku̱me Yakhudeku nu̱ke a far a shim tlagha nda ku. 2Yang ba ni Tabar khar mbu̱ tantiku ɓu̱ Yakhudekwang a shiki bing,#7:2 Tabar khar mbu̱ tantiku Yakhudeku ka shi Tabarang me qaandi mut ma kor khar ɓaanda mbu̱ gaarang sarchi annabi Musa tu̱ kuna Magham ku̱me boote dam ɓaanda. 3tu̱ khachinkirku ɓu̱ Yesu ze nda za, “Wa shipa ji na ɓar fan to ɗu̱ Yakhudiya ma ku̱ nu̱ mburor kwang tu̱k na ɗye lazham nu̱ke ta shiranang. 4Ai, kap njif nu̱ke a shim ku̱ nduki zu̱n nda maɗyi nu̱ka tuka ɗyi nu̱ke chin a shiran gha ɓa. Ma nu̱ke ta ka shi pooni ɗyikunang, ai wa shipa wut na ɗyinor ye larji tu̱ zu̱ndor ku.” 5Jiwa aa khachinkirku ɓu̱ Yesu nu̱ maita nda ku ɓa.
6Tu̱ Yesu ze wor za, “Sarchi ɓang nu̱ shi dong ɓa, aa nu̱ke she nu aa nyi sarchi torop. 7Ɓaanu larji ɓu̱ zhangndo nu ɓa, a zhangkya ba nga, ku̱me ɗye shir ɓaanda malkandi nang ka zu̱ki ye worang. 8Ɗu̱ ma vaanu ma tabar ɓaanu. Nga ma yir ma tabar nang ɓa, ku̱me sarchi ɓang nu̱ shi ɓa.” 9Gaanje Yesu wa shi ɓalar nang ye wora, tu̱ ku̱rsa koɗom Galili.
10Yang gaanje khachin kwang wa ɗu̱ ma tabarang, tu̱ Yesu ɗu̱ tu̱k, yang ɗu̱ mbu̱ tuka, nu̱ ɗa vi ye dalang ɓa. 11Tu̱ Yakhudekwang ki kaala nda ye maa tabarang, a zhamndan ku za, “A fu̱n ke khuskyang na?”
12Mbu̱ tabarang, tu̱ nduki khang ki ɓalar ɓu̱ Yesu chele ɓaanda mbu̱ tuka. Ɓeenan ku a su̱paran za, “Ɗya nduk mbarkandi.” Yang ɓeenan za, “Wanang ɓa, a lamba kya nduki.” 13Yang aa da nduk a nje nu̱ ɗu̱maki ɓalar ɓu̱ Yesu ye dalang ɓa, ku̱me a sawa dlegumeku ɓu̱ Yakhudekwang.
Yesu wa Shi Shogar ye Maa Tabar Khar mbu̱ Shekhɗekhku
14Nu̱ sarchi tabarang mberki tala, tu̱ Yesu vi nu̱ mbu̱ Rafti ɓu̱ Magham tu̱ nggasi shogar ye nduki. 15Tu̱ dlegumeku ɓu̱ Yakhudekwang shi lazham tu̱ zu̱ ku za, “Njif nang magha ɗyiku nang fu̱na, nu̱ke nu̱ ɗu̱ ye maa dlu̱r shoga ɓa, yang a gwa zu̱ndi nang fu̱na?”
16Tu̱ Yesu tlogha ye wor za, “Ɗyi nu̱ke nga shogaran ɓarang, ɗya ɓang ɓa, ɗya ɓu̱ njif nu̱ ɗa ru̱kki ngang. 17Aaki datki shir shimndi ɓu̱ Magham, ka zu̱n za shogar ɓanga vi she Magham, ɗya ɓang ɓa. 18Njif nu̱ke a shoga ɗyi nu̱ke ɓaran ɓara, a shimkya gwar zhaaji she nduki. Yang njif nu̱ke a shim ku̱ njif nu̱ ɗa ru̱kki nda gwa zhaaji, chin ke nu̱ shir zhire, yang nu̱ka shi song zhire ɓa. 19Woɗye Musa vu̱rki woparang ye nu de? Yang kap ndu̱ nang aa da nduk a nje nu̱ka khutloki Woparang chele ɓaanu ɓa. Yang nu̱m saki tun a shim tlagha nga?”
20Tu̱ ndukyang tlogha za, “To nu̱ khu̱kheet, nu̱ ki kya shim tlagharang na?”
21Tu̱ Yesu tlogha ye wor za, “Nga shikya ɗye lazham kaada, yang kap ɓaanu tun wa shi lazham. 22Musa wa ze nu za dla nu sonu (aa nu̱ke chin nggaki san ɓa, ɗya zhikannu nu zhu tang). Yang kap ndu̱ nang tun wa ka dla su̱ woi Fu̱ɗar Maasi. 23Yang nu̱ke tun wa ka dla su̱ woi Fu̱ɗar Maasi ku̱me mbu nu wopar ɓu̱ Musa, nu̱m saki tun ki shokhnar ndu̱ nga ku̱me nga shaana nduk nu̱gha nggalang Fu̱ɗar Maasi? 24Njig ma kumar nar yiti, tun kuma ɗyi nu̱ke torop.”
Yesu ke Masiya
25Tu̱ ɓeeni nduki nu̱ Urshalima zu̱ ku za, “Alapa nang ke khuski nu̱ke a shim tlagha nda kwa ɓa goma? 26Wonji nda fan a ɓalar ye dalangi, yang nu̱ zu̱ aa nu̱m yenda ku ɓa. Dle gume kwang wa lauɗa san za chin ke Masiya kuji datkandi ɓu̱ Maghamang mu? 27Wonji chem wa zu̱n maa nu̱ khuski nang a viki si, yang mbu̱ Masiya zhirekandang aa ɓa, nduk a nje nu̱ke ka zu̱nki ye maa nu̱ ɗa viki su̱ ɓa.”
28Yesu a mbu̱ shogar mbu̱ Rafti ɓu̱ Maghamang, tu̱ da su̱quran nu̱ viɗi tu̱ zu̱ za, “Tun wa zu̱ndi nga, tun wa zu̱n maa nanga viki su̱ tu̱k. Nga ɓa ndu̱ zalale ɓang ɓa. Njif nu̱ ɗa ru̱kki nga ɗya nu̱ zhire, yang nun zu̱n nda ɓa. 29Ɓang nga zu̱n nda, ku̱me nga vi she nda, chin a ru̱kki nga.”
30Nu̱ Yesu zu̱ki ɓalar nang, tu̱ nduki shim ku̱si nda. Yang nduk nu̱ su̱ɓa nda ɓa, ku̱me sarchi ɓaran nu̱ shi dong ɓa. 31Kap ndu̱ nang tu̱ nduki khang mbu̱ tabar ndukyang maita Yesu, a zu̱ran ku za, “Woɗye ɗa, mbu̱ Masiya ɓa, ka shi ɗye lazham nu̱ dukki ɗyi nu̱ke khuski nang shiki mu?”
Dlegumeku ɓu̱ Yakhudekwang wa Shim Ku̱s Yesu
32Tu̱ Parisekwang tu̱k nduki a su̱pa ɓalar ɓu̱ Yesu ye yen, tu̱ kuruku rututundi ndu̱ Parisekwang ru̱k nu̱ nggu̱ti Rafti ɓu̱ Magham kwang ku̱ ɗa ku̱s nda.
33Tu̱ Yesu tlogha za, “Sarchi khar ɓang ndu̱ tun wa njig ba koɗomma. Kom ngga gaɓ nu̱ she njif nu̱ ɗa ru̱kki nga. 34Tun ka laɓti nga, tun ɓu̱ gwa nga ɓa, yang ye maa nu̱ke nga sang tu̱k, tun ɓu̱ ɗu̱ma yir njig ɓa.”
35Tu̱ Yakhudekwang shi ɓalar chele ɓaanda a zu̱ran ku za, “Ka ɗu̱kya fu̱n nu̱ke chem ɓu̱ gwa nda ɓa nda na? A ma yir kya she Yakhudeku nu̱ lakhtaki tu̱ khan chele Khelenekwang ma shogar ye wor mu? 36A taman kya nu̱m nu̱ zu̱ki za, ‘Tun ka laɓti nga, yang tun ɓu̱ gwa nga ɓa’ ndang? Tamankya nu̱m tu̱k nu̱ gaɓki tu̱ zu̱ za, ‘Ye maa nu̱ke nga yir tun ɓu̱ ɗu̱ma yir njig ɓa nda na?’ ”
Alqawar Vu̱rti ɗyim Nyifiri
37Fu̱ɗar lauɗar si tabarang, nu̱ke nang ke fu̱ɗar gwaanji nu̱ tabaran, tu̱ Yesu ching gha tu̱ da su̱quran nu̱ viɗi tu̱ zu̱ za, “Kap njif nu̱ke a tu̱k khuzhumndi ku̱ ɗa ɓa sha tu̱ za ɗyimi. 38Kap njif nu̱ maitaki nga, ‘Njiv ɗyimku nu̱ke a ɓagha ɗyim nyifiri#7:38 Njiv ɗyimku nu̱ke a ɓagha ɗyim nyifiri Pitli njiv ɗyimku nu̱ vu̱rti nyifiri a vi mbu̱ Yish 12:3 ndu̱ Zak 14:8. kaɗa kuɗa mbu̱ memu̱na aa nyi nduk nu̱ maitaki nga ba wa nu̱ bu̱lar ɓalar ɓu̱ Maghamang zu̱ki.’ ” 39Yang Yesu a shimkya ɓalar ɓu̱ Jiimbi shakhshakhndi nu̱ke nu̱ maitar nda ka ɓa dlu̱ki, jiwa ye sarchi nang nu̱ vu̱r Jiimbi Shakhshakh ndang dong ɓa, ma nu̱ke Yesu nu̱ vi nu̱ mbu̱ zhaaji ɓaran dong ɓa.#7:39 viri nu̱ mbu mbu̱ zhaajyang. A ve taɗar bonye ndu̱ mu̱ti nu̱ katli nda me qu̱farang.
Nduki wa Shi Keele ɗyine Yesu
40Nu̱ nduki tu̱kki ɓalar nu̱ Yesu shiki nang, tu̱ zu̱ ku za, “Njif nang ke Annabyang shwat.”
41Tu̱ ɓeeni ndukyang zu̱ za, “Ɗya Masiya.” Yang ɓeenan za, “Woɗye Masiya ka ɗa vi Galili mu?” 42Nu̱ Bu̱lar ɓalar ɓu̱ Magham zu̱ za Masiya ka ɗa vi mbu̱ zhikankirku ɓu̱ Dauda ɓa goma? Yang ka ɗa vi mbu̱ ghai Baitalami, ye maa nu̱ Dauda khaki nu̱ njang de? 43Tu̱ ɗyin nduki shakh ku̱me Yesu. 44Tu̱ ɓeenan shim ku̱si nda, yang nduk a nje nu̱ su̱ɓaki nda ɓa.
Song Maitar Yesu ɓu̱ Dlegumeku ɓu̱ Yakhudekwang
45Ni nu̱ nggu̱ti Rafti ɓu̱ Magham kwang gaɓki ku, tu̱ kuruku rututundi ndu̱ dlegumeku ɓu̱ Parisekwang zham wor za, “Nu̱m saki nu̱ na ɓa ndu̱ chin ɓa?”
46Tu̱ nu̱ nggu̱ti Rafti ɓu̱ Magham kwang tlogha za, “Sar da nduk a nje nu̱ shiki ɓala wa khuski nang ɓa.”
47Tu̱ Parise kwa ze nu̱ nggu̱ti Kib kwa za, “Yoori! Wa gaɓ tu̱ zu̱m ɗyinonu tu̱k mu? 48Tun wa na aa da chele ɓu̱ dlegumeku ndu̱ Pariseku wa maita nda mu? 49Nduki ku nang nu̱ke nu̱ zu̱n aa nu̱m ku mbu̱ wopar ɓu̱ Musa ɓa, ai ɗya nduki nu̱ miiki pontori ɓaanda.”
50Nikodemu nu̱ ɗu̱ki she Yesu tang fara a nje chele ɓu̱ Parisekwang, tu̱ ze wor za, 51“Wopar ɓaarem wa nggu̱tl ku kuma mi nduku, kope nduk wa tu̱k ɗyi nu̱ zu̱ki, ma ku̱ nduki zu̱n ɗyi nu̱ shiki.”
52Tu̱ yang tlogha yenda ku za, “To nduk Galili tu̱k mu? Nggu̱t mbu̱ ɓalar ɓu̱ Magham to na ɓa, annabi nggur ɓu̱ ɗa vi Galili shwat ɓa.”
53Tu̱ aaki ɗu̱ kaari.#7:53–8:1-11 Ɓeeni bu̱larku nu̱ zhu nu̱ sa ma nang ɓa.
Dewis Presennol:
Yokhana 7: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016