Yokhana 17
17
Yesu wa Shi Barar ku̱me Varan
1Gaanje Yesu wa zu̱ ɓalarku nang, tu̱ da yitan tu̱ nggu̱t maa viɗi, tu̱ shi barar za, “Aba, sarchi wa shi. Vu̱r zhaaji ye Yi ɓaaro ku̱me chin ma ku̱ vu̱r zhaaji yor tu̱k. 2Jiwa ta vu̱r zalale ye Woyang ɗyine aaki, ma ku̱ vu̱r nyifi nu̱ke nu̱ka shi woɗa ɓa ye nduki nu̱ke to vu̱rki yenda. 3Gwar nyifi nu̱ke nu̱ka shi woɗa ɓa ke ku̱ nduki zu̱ndor to ɗyenda to ke Maghamndi nu̱ zhire, kom ndu̱ Yesu Masiya no ɗa ru̱kki nda. 4Nga vu̱r zhaaji yor mbu̱ larji ku̱nshe shir tlu̱nar no vu̱rki ya. 5Yang leendang Aba, vu̱r zhaaji ya ndu̱ pooni zhaaji nu̱ke nga nje si gume ro me ku̱ du̱ng larji.”
Yesu wa Shi Barar ku̱me nu̱ Mburi nda ku
6“Nga wutor ye nduki no vu̱rki ya mbu̱ larji nang. Aa mbu̱r far ɗya ɓa ku, yang ta vu̱r wor ya, wa khutlo ɓalar ɓa ku. 7Yang leendang wa zu̱n ku za kap ɗyi no vu̱rki ya a vi sho ro. 8Ku̱me ɓalar no zu̱ki ya nga zu̱ ye wora, yang wa dlu̱ ku. Wa zu̱n ku za nga vi sho ro, wa maita ku za ta ru̱kki nga. 9Nga khutang ku̱me wora. Nang khuɗ ku̱me nduki nu̱ larji ɓa, nga khuɗ ku̱me nduki no vu̱rki ya nu̱ke ɗya ɓaa ku. 10Kap nu̱ mburi ku nu̱ke a khara ɗya ɓaaro, yang tu̱k kap ɗyi nu̱ke a khaaro ɗya ɓanga. Yang wa vu̱r gorkir ya ku. 11Nga gaɓti nu̱ sho ro. Ngam ɓu̱ khan larji tu̱k ɓa, yang ɓaanda a nje ku mbu̱ larji dong. Zhinkir Shakhshakhndi bu ɗyin wor ndu̱ zalale ɓu̱ dlu̱moro, nang ke dlu̱m no vu̱rki ya, ma ku̱ kha da ku, ba wa nu̱ke chem a su̱yen ndu̱ to. 12Sarchi nu̱ke nga su̱yen ndu̱ wora, nga bu ɗyin wor ndu̱ zalale ɓu̱ dlu̱moro, nang ke dlu̱m no vu̱rki ya. Nga bu ɗyin wora, yang nduk a nje nu̱ saghaki ɓa kope nduk da chele ɓaanda nu̱ke ɗya ye su̱bu̱ri. Sagha ma ku̱ bu̱lar ɓalar ɓu̱ Maghamang nyedli.#17:12 Ku̱ bu̱lar ɓalar ɓu̱ Magham nyedli A ve Yakhuda Iskariyoti Zab 17:12; Zab 41:9; Ykh 13:8.
13Nga gaɓti nu̱ sho leendang, yang nga khuɗ ɗyiku nang sarchi nu̱ke nga larji ma ku̱ kashar ɓang nu̱ke nyeedlan khan mbe nu̱ mburi nga ku nang. 14Nga zu̱ ɓalar ɓaa ye wora. Yang larji wa wut zhangndi ye wor nu̱ke ɗya ɓu̱ larji ku ɓa, ba wa nu̱ke nga ɓu̱ larji ɓa. 15Nang khuɗ ku̱ da na wor ɓar mbu̱ larji ɓa, nga shim ku̱ shakh na chele ɓaanda ndu̱ Nu̱ mu̱narang. 16Ɗya ɓu̱ larji ku ɓa, ba wa nu̱ke nga ɓu̱ larji ɓa. 17Ku̱ kha wakaran ku Shakhshakh mbe zhire; ɓalar ɓa ke zhire. 18Nga ru̱k wor nu̱ mbu̱ larji ba wa no ru̱kki ngang. 19Nga kha wakaran ku̱me wora, nga shim ku̱ gwa wakar zhirekandi ku.”
20Nga khuti nang ku̱me wor nang ɗyenda ɓa, nga khutan ku̱me nduki nu̱ke ka maitaki nga nu̱ ku̱nshe ɓalar ɓaanda. 21Ai Da, nga khuti nang ma ku̱ kha da ku. Ba wa nu̱ke ta mbya, nga mbe ro, nga khutan ku̱ khan mbeerem ku tu̱k. Kom nduki nu̱ larji ka maita ku za ta ru̱kki nga. 22Nga vu̱r zhaaji no vu̱rki yang ye wora ku̱ kha da ku ba wa nu̱ke chem da. 23Nga mbe wora, to kharan mbya tu̱k, ma ku̱ kha da ku shiku̱tku̱t. Kom nduki nu̱ larji ka zu̱n za to ru̱kki nga, yang ta ndola wor wa no ndolaki nga.
24“Aba, nga shim nduki no vu̱rki ya nang ku̱ kha su̱yen ndu̱ nga ye maa nu̱ke nga si. Nga shim ku̱ na zhaaji ɓaa no vu̱rki ya ku̱me ta ndola nga me ku̱ du̱ng larji.
25“Zhinkir nu̱ dambi aa nu̱ke nduki nu̱ larji nu̱ zu̱ndor ku ɓa, nga zu̱ndoro, yang nduki nang wa zu̱n za ta ru̱kki nga. 26Nga wutor ye wora, yang ngga zu̱m guma ndu̱ shiran, ma ku̱ ndolar no shiki yang khan mbe wora, tang khan mbe wor tu̱k.”
Dewis Presennol:
Yokhana 17: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016