Матфейица бицараб Рохалил хабар 8
8
8 бетӏер
Гӏисаца вацӏцӏалъизавула барасалъ унтарав цо чи
1Магӏардаса гъоркье гӏемераб халкъ бачӏана Гӏисада хадуб. 2Гьале барасалъ унтарав цо чи, гьесда аскӏовеги вачӏун, накабаздаги чӏун, гьардезе лъугьана:
– Я, Бетӏерчӏахъад! Дуе бокьани, дуда кӏолаха дун вацӏцӏалъизавизе.
3Гӏебеде битӏун гьесда кверги хъван, Гӏисаца абуна:
– Дие бокьун буго мун вацӏцӏалъизе. Вацӏцӏалъе мун!
Тӏад букӏараб чанхъги гъенон ун, гьебсагӏат вацӏцӏалъана гьев чи. 4Гӏисаца гьесда абуна:
– Вореха, гьаб ишалъул хӏакъалъулъ дуца лъиданиги бицунге. Мусал Къануналда рекъон, мунго вацӏцӏалъун вукӏин гӏадамазда лъазе, кашишасухъеги ун, гьесда дурго черх бихьизабе ва дудасаго къурбанги хъвезабе.
Гӏисаца сахлъизавула нусилбетӏерасул рагьтӏател
5Гӏиса Капернаумалде щведал, румазул рагъухъабазул цо нусилбетӏерас, аскӏовеги вачӏун, гьарана:
6– Я, Бетӏерчӏахъад! Дир цо рагьтӏател вуго палижалъ ккун вагъаризе кӏоларого. Кутакаб гӏазабалда вуго гьев.
7Гьев сахлъизавизе вачӏинин абуна Гӏисаца гьесда. 8Нусилбетӏерас абуна:
– Я, Бетӏерчӏахъад! Мун къавулъе лъугьине мустахӏикъав чи гуро дун. Цо рагӏи абе дуца, гьелдалъун сахлъила дир рагьтӏател. 9Дунги вуго тӏадехун ругезул амру тӏубазабулев, дир ихтияралда ругел рагъухъабазе рагӏудалъун амру-буюрухъ гьабулев чи. Айилан цоясда абуни, гьев уна. Вачӏайилан цогидасда абуни – вачӏуна. Пуланаб иш тӏубазабейилан абуни, рагьтӏателас гьеб тӏубазабула.
10Гьединал рагӏабаз гӏажаиблъизавуна Гӏиса. Жиндаго хадур рачӏунел рукӏараздехун вуссун, гьес абуна:
– Гьале дица нужеда абулеб буго: Исраилил халкъалда гьоркьобгицин лъилниги дандчӏвачӏо дида гьединаб божи-иман. 11Машрикъалдаса ва магърибалдаса гӏемерал гӏадамал рачӏина ва Зобалазул Парччахӏлъиялда Ибрагьимидаги, Исхӏакъидаги, Якъубидаги аскӏор квана-гьекъезе гӏодор чӏела. 12Аллагьас Парччахӏлъиялъе рижун рукӏарал гӏадамалги гьениса бецӏаб къотӏноре рехила. Гӏодилел ва цаби къерщезарулел хутӏила гьел.
13Дов нусилбетӏерасда Гӏисаца абуна:
– Гьанже дурго рокъове а. Мун божун вугеб жо лъугьина дуе.
Рагьтӏател гьебсагӏатго сахлъанила.
Гӏисаца Пётрил якьад сахлъизаюла
14Цинги Пётрил бакӏалде щведал, гьесул якьад цӏа-кан бахун бусада егун ятана Гӏисада. 15Гӏисаца гьелъул квер ккуна. Цӏа-канги ун, якьад тӏаде яхъана ва гьесие квен-тӏехалда квалквадизе лъугьана.
16Маркӏачӏубер рукӏкӏарабго, Гӏисахъе рачун рачӏана жундуз ккурал гӏемерал гӏадамал. Амру гьабун рачахъана гьес жундул. Киналго унтаралги сахлъизаруна. 17Гьеб гьедин ккана Ишая аварагасда Аллагьас абураб гьадинаб калима ритӏухълъизе: «Гьесин росун арал нижер гӏузраби, нижер унтабиги раччун ана гьес».
«Дида цадахъ вилълъа»
18Жиндаго сверухъ халкъалъул руккел бихьидал, Гӏисаца муридазда абуна ралъдал доб рахъалде рахине кколин нилъилан. 19Аскӏове вачӏун цо динияв гӏалимчияс абуна гьесда:
– Я, Насихӏатчи, мун киве аниги, дуда цадахъ вилълъина дунги.
20Гӏисаца гьесда абула:
– Царал жиндирго рукӏун буго, хӏанчӏил бусен буго, амма Гӏадамил Лъимадул бетӏер бегьизе бакӏ гьечӏо.
21Цоги муридас абуна гьесда:
– Я, Бетӏерчӏахъад! Дир хварав эмен вукъизе ине изну кье дие.
22Гӏисаца гьесда абуна:
– Хвараца рукъизе хварал чагӏиги тун, мун дида цадахъ вилълъа, – ян.
Гӏисаца гьури къотӏизабула
23Гӏиса росода рекӏараб мехалъ, муридалги ана гьесда цадахъ. 24Гьале кутакаб гьури бахъана, ралъад гьалаглъана, карачалабаз раса тӏерхьинабизехъин букӏана. Гьебмехалъ Гӏиса кьижун вукӏана.
25– Я, Бетӏерчӏахъад! Нилъ гъанкъизехъин руго! Хвасар гьаре! – янги абун, муридаз ворчӏизавуна гьев.
26Гӏисаца гьезда абуна:
– Я, иман дагьаб уммат! Щай нуж хӏинкъулел?
Тӏадеги вахъун амру гьабун гьес гьури къотӏизабуна. Ралъад гӏодобе буссана. Тӏубанго сихӏ къотӏун дуниялги хутӏана. 27Гьуриги ралъадги жиндие мутӏигӏав гьавго кинав чийилан гӏажаиблъун хутӏана гӏадамал.
Гӏисаца сахлъизавула жундуз ккурав кӏиго чи
28Ралъад бахун добехун бугеб гадареназул ракьалде щведал, Гӏисада ватана жундуз ккурав кӏиго чи, хабалазул нохъаздаса#8:28 Жугьутӏазул гӏадат букӏана хварал чагӏи кьурулъ рикӏарал нохъазда рукъулеб. къватӏиве вачӏунев. Гьеб рахъалдасан ине лъиданиги кӏолареб хӏалалда гӏасилъун рукӏана гьел. 29Гьале гьел Гӏисаде ахӏдезе лъугьана:
– Ле, Аллагьасул Вас, нижедасан щиб дуе къваригӏараб? Заман щвелалдего нижее гӏакъуба-гӏазаб кьезейищ мун вачӏун вугев? – абун.
30Болъоназул кӏудияб рехьедги бугоан доба рикӏкӏадегӏан кваналеб. 31Кӏиявго чиясулъ ругел жундуз Гӏисада гьарана:
– Дуца ниж рачахъулел ругел ратани, гьадаб болъоназул рохьдолъе ритӏе, – ян.
32Айилан абуна Гӏисаца гьезда. Гьедин ун болъоназулъе лъугьана гьел жундул. Гьале тӏолабго рехьед цо борхатаб бакӏалдасан ралъдалъе кӏанцӏун, лъадалъ гъанкъана. 33Болъоназул гӏухьби гьениса лъутун ана. Шагьаралдеги рачӏун, жундуз ккурав дов кӏиявго чиги рехсон, гӏадамазда бицана гьеб кинабго. 34Гьебмехалъ шагьаралъул тӏолабго халкъ Гӏисада аскӏобе бачӏана. Гьев вихьаравго, жидер ракьалдаса нахъе айилан гьарана гьез.
Dewis Presennol:
Матфейица бицараб Рохалил хабар 8: AvrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Библия таржама гьабиялъул институт Москва 2008