Maraku 14
14
Zang tɔ̀ng zɔɔ ka naa ɓɔɔ ri nyɔ Yeesɔ vɔrɔ ɓɛɛ
(Mat 26:1-5; Luk 22:1-2; Yɔh 11:45-53)
1Diki ɓɔɔ zang shaa nyaalaa Pasika ɓɔɔ zang kpaa danggn ɓɔɔ Laa tɛɛ ɓɛɛ nɛɛ ɓɔɔ nyaalaa Borodi ɓɔɔ zang tɛ̃ɛ yisi kagn kpang, yaa kaa ziti. A rɛɛ zang bang bang, zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu, ri tɔ̀ng zɔɔ ka naa ɓɔɔ ri naa yi Yeesɔ nɛɛ nwĩiri, ri nyɔ wu vɔrɔ ɓɛɛ. 2Ri kɔɔ zɔɔ tɔɔ, “Ruu pálɛ̀ ka diki ɓɔɔ zang shaa nyaalaa ɓɛɛ kpang, ka ruu ɓɔɔ, zang nɛɛ palɛ nyaa ɓɛɛ.”
Jaa soro tungku Yeesɔ nung ka yuu
(Mat 26:6-13; Yɔh 12:1-8)
3Diki ɓɔɔgn Yeesɔ shaa vuu shaanang kana ka Bɛtani, ka gãa Siman ɓɔɔ bɛ̀ɛ́ vuu bii shaa katɔ ɓɛɛ. A jaa soro ɓɔɔgn a nɛɛ nung tũurunang ɓɔɔ shaa nyaa dɔɔli ɓɔɔ zang palɛ nɛɛ vuu ɓɔɔ zang ɓaa nɛɛ naadi ɓɛɛ, ka zàáng, a puuyi tungku Yeesɔ ka yuu. 4Zang ɓɔɔ ri kagn ka teteng zang ɓɔɔ ri ka nɔngkɔ, gnvɔ shaa ri dɔɔli. Ri kɔɔ zɔɔ tɔɔ, “Zang làsɛ́ nung keɓe ka ruu viya?” 5Zang nɛɛ tɔɔ zang mãlɛ́ nung keɓe katɔ, nɛɛ ɓa dinari laa maani dakn taati katɔ. Tɔ̀ɔ, zang nɛɛ a zang ɓɔɔ vuu ka naa kpang, saka bii kati. A ri mangkɛ jaa soro kati.
6Yeesɔ tɔɔ, “Nɔɔ yaa jaa soro ka nɔngkɔ, nɔɔ kongso wu ka ruu viya?” Pàlɛ́ m vuu ɓɔɔ tɔ̃ɔ. 7Zang ɓɔɔ vuu ka naa kpang nwalɛ nɛɛ nɔɔ diki diki. Diki ɓɔɔ nɔɔ kasɛ piti nɔɔ naa pàlɛ́ ri tɔ̃ɔ manɛ ditɔ, n nwáng m nɛɛ nɔɔ sasak kpang. 8Palɛ ɓi vuu ɓɔɔ wu zunung katɔ ɓɛɛ. Tũuru m ɓi kaa nung ɓɔɔ zang nɛɛ naa tũuru vɔrɔ mɛɛ, tɔ̀ɔ, zang gbãa kati kɔ nwani. 9N kɔɔ nɔɔ ruu ɓɔɔ niizang kɔ nwani, nɔng ɓɔɔ zang naa rang Ruu Tɔ̃ɔ Kpanti Laa kagn koo keɓe piti, zang naa kɔɔ ruu vuu kɔ jaa soro keɓe pàlɛ̀ m ɓee ditɔ. Ka ruu ɓɔɔ, danggn jaa soro keɓe nɛɛ ning zang ɓɛɛ.
Yahuda nyɔ yuu Yeesɔ
(Mat 26:14-16; Luk 22:3-6)
10A Yahuda Isikariyoti, zang gbete ɓɔɔ ka teteng zang kopi tu ziti ɓɔɔ ri mantɛ vuu ka bii Yeesɔ, daa ka bii zang bang bang zang ɓɔɔ ri dɔɔ vuu ka Gãa Laa, nɛɛ wu nyɔ ri yuu Yeesɔ. 11Ɓɔɔ ri tãa naa weɓe, ri tãa tĩnang dɔɔli. A ri kɔɔ wu nɛɛ ri naa a wu saka. A Yahuda gaa tɔɔsung gbalang kãanang naa ɓɔɔ wu naa nyɔ ri yuu Yeesɔ ɓɛɛ kati.
Yeesɔ shaa nyaalaa Pasika ɓɔɔ zang kpaa danggn diki ɓɔɔ Laa tɛɛ ɓɛɛ
(Mat 26:17-25; Luk 22:7-14, 21-23; Yɔh 13:21-30)
12Ka diki ɓɔɔ zang gaayu nyaalaa Borodi ɓɔɔ zang tɛ̃ɛ yisi kagn kpang shaanang, diki ɓɔɔ zang yele mɛ̀ɛrɛ́ nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ. Zang ɓɔɔ ri mantɛ vuu ka bii ɓiɓɛ ri hɛ̃ɛ wu tɔɔ, “Mɔɔ kasɛ nɛɛ ruu daa pàlɛ̀ mɔɔ vuu shaanang ɓɔɔ mɔɔ naa shaa ka nyaalaa ka niya?”
13A shong zang ɓɔɔ ri mantɛ vuu ka bii ɓiɓɛ ziti tɔɔ, “Nɔɔ dita yeti gari, nɔɔ daa ɓee yuu ditɔ nɛɛ zang ɓɔɔ tuu mii ka bɛng. Nɔɔ dũng wu. 14Gãa ɓɔɔ wu hãa nyaa kagn, nɔɔ kɔɔ zang gãa kaɓa nɛɛ ‘Maalang tɔɔ, yeti gãa roonang ɓɔɔ wu naa shaa vuu shaanang nyaalaa kagn nɛɛ zang ɓɔɔ ri mantɛ vuu ka bii ɓiɓɛ kiya?’ 15Tusu nɔɔ ka gãa lapa ɓɔɔ bang, ɓɔɔ zang shĩili laa nwannang tɔ kagn tɔ̃ɔ tɔ̃ɔ nɛɛ vuu piti ɓɔɔ ruu kasɛ ɓɛɛ ditɔ. Nɔɔ shĩili ruu vuu shaanang nyaalaa ka nɔngkɔ.” 16A zang ziti kaɓa, ri seepaa, ri daa gari kati. A ri daa zi vuu piti kaa naa ɓɔɔ Yeesɔ kɔɔ ri ɓɛɛ. A ri shĩili vuu shaanang nyaalaa kati.
17Kaa nɛɛ laarang, Yeesɔ naa a kaa nɛɛ zang kopi tu ziti ɓɔɔ ri mantɛ vuu ka bii ɓiɓɛ ɓɛɛ. 18Rí shaa vuu shaanang kana, a Yeesɔ kɔɔ ri tɔɔ, “N kɔɔ nɔɔ ruu ɓɔɔ niizang kɔ nwani, zang gbete ka teteng manɛ naa nyɔ yuu mɛɛ ditɔ. Zang ɓɔɔ shaa vuu shaanang kana nɛɛ n ɓɛɛ.”
19Ɓɔɔ ri tãa naa weɓe, yeti ɓarɛ lasɛ dɔɔli. Zang ɓu gaa tɔɔsung Yeesɔ hɛ̃ɛlɛnang kati nɛɛ, “Nkɔ ya?”
20A kasɛ ri nyaa tɔɔ, “Zang gbete ka teteng manɛ kɔ. Zang ɓɔɔ hãa naa kana yeti gbanti gbete nɛɛ n ɓɛɛ. 21Jaa Shɔnzang naa vɔ katɔ naa ɓɔɔ labeenang Kpanti Laa kɔɔ ɓɛɛ. Jĩng dannang kagn yuu zang ɓɔɔ naa nyɔ yuu Jaa Shɔnzang ɓɛɛ. Zang nɛ̀ɛ́ yi zang kaɓa kpang kɔ gbã̀ágbãa, wukɔ nɛɛ daa wu.”
Naa ɓɔɔ Yeesɔ shaa vuu shaanang nyaalaa Pasika ɓɛɛ
(Mat 26:26-30; Luk 22:14-20; 1Kor 11:23-25)
22Rí shaa vuu shaanang kana, a Yeesɔ tuu borodi, a zãa Kpanti Laa, a shalɛ, a zang ɓɔɔ ri mantɛ vuu ka bii ɓiɓɛ tɔɔ, “Nɔɔ tá ta, nɔɔ shaayi, wee yɔpɔ bii mɛɛ kɔ.”
23A ti tuu juwa, zãa Kpanti Laa, a á ri nɛɛ ri ɓoo vuu ɓɔɔ kagn ɓɛɛ, ri ɓooro ka nyaa zɔɔ nandon. 24A Yeesɔ kɔɔ ri tɔɔ, “Wee zĩi mɛɛ ɓɔɔ naa tusu nɛɛ, nyaa shɔɔ ɓɔɔ Laa a zang naa nwang kaa niizang ɓɛɛ kɔ. Zĩi mɛɛ ɓɔɔ zang naa tɛ̃ɛ ka ruu zang dɔɔli ɓɛɛ. 25N kɔɔ nɔɔ ruu ɓɔɔ niizang kɔ nwani, n naa ɓoo mii jĩng laa inabi tɔ̀ɔ́ nɛɛ nɔɔ tɔkn kpang. N naa ɓoo kaa ɓɔɔ shɔɔ ɓɔɔ ruu daa ɓoo nɛɛ nɔɔ ka nɔng ɓɔɔ Daa mɛɛ roo Kpanti ɓɛɛ.”
26A ri naa gaa soo, ri seepaa ri daa ka Kɔpɔ Zeetung.
Yeesɔ kɔɔ naa ɓɔɔ Bituru naa laa nyaa ɓiɓɛ ɓɛɛ
(Mat 26:31-35; Luk 22:31-34; Yɔh 13:36-38)
27A Yeesɔ kɔɔ tɔɔ, “Nɔɔ naa yuku ditɔ nandon. Ka ruu ɓɔɔ, zang beeyi tɔɔ, ‘Zang naa nyɔ jagãng vɔrɔ ditɔ, tɔɔ mɛ̀ɛrɛ́ ri naa tantɛ kati.’ 28Laa nɛɛ naa wisi m paa tɔ, nkɔ naa daa Galili shɔɔnang.”
29Bituru kɔɔ wu tɔɔ, “Náa ri yuku doo piti, ri yaa mɔɔ, n yaa mɔɔ m kpang.”
30A Yeesɔ kɔɔ wu tɔɔ, “N kɔɔ mɔɔ ruu ɓɔɔ niizang kɔ nwani, lɛɛkɔ nɛɛ zĩi keɓe, ɓɔɔ kn naa ɓaa nyaa daa doo ziti, bɛ̀ɛ́ mɔɔ laa nyaa tɔ daa doo taati, nɛɛ mɔɔ zi m nung ɓaa kpang.”
31Bituru ti kɔɔ Yeesɔ tɔkn nabm tɔɔ, “Naa zang tɔɔ zang nyɔ m doo katɔ nɛɛ mɔɔ ning piti, n laa nyaa ɓaaɓɛ m kpang.” Zang ɓɔɔ ri mantɛ vuu ka bii Yeesɔ ɓɔɔ ri ti kɔɔ doo nɔngkɔ nandon.
Yeesɔ gaa Laa ka Gesemani
(Mat 26:36-46; Luk 22:39-46)
32A ri daa ka nɔng ɓɔɔ zang ɓaa nɛɛ Gesemani ɓɛɛ. A kɔɔ zang ɓɔɔ ri mantɛ vuu ka bii ɓiɓɛ tɔɔ, “Nɔɔ nwang ta ka nihn, n daa gaa doo Laa.” 33A daa nɛɛ rɛɛ Bituru nɛɛ Yakub nɛɛ Yɔhana ning. Ɓɔɔ ri daa kana gbalang, a gaa tɔɔsung yeti lasɛnang kaa nɛɛ rɛ̃rɛnang ning. 34Kɔɔ ri tɔɔ, “Bii soo m tɔ nung vɔrɔ gbete. Nɔɔ nwang ka nihn, nɔ́ɔ gãng jĩng kagn.”
35Daa tɔ ka tĩng tɔkɔlɔng, a zuu kaa nɛɛ buru ka tipi, a gaa Laa nɛɛ, gbalang nɛ̀ɛ́ kagn, làá jĩng dannang keɓe nɛɛ a yuu ɓiɓɛ kpang. 36A gaa Laa tɔɔ, “Daa mɛɛ, vuu ɓɔɔ kpãa mɔɔ ɓaa kagn gbete kpang. Kɔsɔ m jĩng dannang keɓe katɔ. Wu vuu ɓɔɔ yeti mɛɛ kasɛ ɓɛɛ kpang, palɛ ɓaa vuu ɓɔɔ yeti ɓaaɓɛ kasɛ ɓɛɛ.”
37A gbãayu naa ĩi rɛɛ Bituru nɛɛ Yakubu nɛɛ Yɔhana ri rooro tɔ. A hɛ̃ɛ Bituru tɔɔ, “Siman, mɔɔ roo katɔ ya? Mɔɔ zunung ɓɔɔ mɔɔ gãng jĩng naa gbete kpang ya? 38Nɔɔ gãng jĩng kagn, nɔɔ ti gaa Laa, ka ruu ɓɔɔ, Sheetang nɛɛ nwãarɛ nɔɔ ɓɛɛ. Suru bii manɛ kasɛ nɛɛ wu palɛ vuu ɓɔɔ Laa kasɛ ɓi katɔ, bii manɛ kɔ lakɛ ɓi kaa takpang.”
39A Yeesɔ ti paarɛ tɔkn daa gaa Laa. Paasɛ dòo nyaa gbete ɓɔɔ wu kɔɔ tĩng shɔɔnang kɔ. 40A ti arɛ naa ĩi ri, ri rooro tɔ tɔkn, ka ruu ɓɔɔ, hingro kpiti ri jĩng tɔ dɔɔli ɓɛɛ. Ri zi vuu ɓɔɔ ri kɔɔ wu takpang.
41Yeesɔ ti naa gbãayu tɔkn daa dakn taati, a hɛ̃ɛ ri tɔɔ, “Nɔɔ rooyi, nɔɔ ɔ̃sɔ manɛ doo naa ya? Daa tɔ kati, laa palɛ tɔ. Zang nyɔ yuu Jaa Shɔnzang tɔ, ka naa zang ɓɔɔ ri palɛ vuu shi kpang ɓɛɛ. 42Nɔɔ seepaa ta ruu daayi. Zang ɓɔɔ nyɔ yuu mɛɛ a naabm tɔ.”
Yahuda a zang Yeesɔ
(Mat 26:47-56; Luk 22:47-53; Yɔh 18:3-12)
43Yeesɔ rang yee doo naa nyaa, a Yahuda zang gbete ka teteng zang kopi tu ziti ɓɔɔ ri mantɛ vuu ka bii Yeesɔ a kati. Yahuda nɛɛ zang ɓɔɔ rɛɛ zang bang, bang zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu, nɛɛ zang bang, bang zang Yahudi ri shong ɓɛɛ. Ri see yee bang nɛɛ labasaa ka naa ning. 44Zang ɓɔɔ nyɔ yuu Yeesɔ ti kɔɔ zang kaɓa ɓi tɔ ka tĩng nɛɛ, “Zang ɓɔɔ n daa kɔ̃ng wu, wukɔ Yeesɔ, nɔɔ yirɛ. Nɔɔ yiti wu tɔ̃ɔ tɔ̃ɔ, nɔɔ daa nɛɛ wu ning.”
45Yahuda naa arɛ, tantɛ daanang ka bii Yeesɔ. A ɓaa wu tɔɔ, “Kpanti, a kɔ̃ng wu kati.” 46A zang ɓɔɔ ri a nɛɛ Yahuda, ri yi Yeesɔ kati. 47Zang gbete ka teteng zang ɓɔɔ ri shiiri nɛɛ Yeesɔ, zɔ̃ng yee bang ɓiɓɛ, wɔng shoo jaafoo kpanti zang ɓɔɔ ri dɔɔ vuu ka Gãa Laa, nɛɛ mani. 48A Yeesɔ raa jĩng hɛ̃ɛ zang ɓɔɔ ri a wu yinang tɔɔ, “Nɔɔ see yee bang nɛɛ labasaa ka naa gaagaa, nɛɛ nɔɔ naa yi ɓu nkɔ, naa zang yi zang ɓɔɔ ta zang vuu nɛɛ ɓangge ɓɛɛ ya? 49N nwalɛ nɛɛ nɔɔ ka yeti Gãa Laa kɔ diki diki, n tusu zang vuu, nɔɔ yi m kpang. Vuu kɔ zang palɛ m ɓee, ɓèe ɓi nyaa vuu ɓɔɔ rɛɛ zang nyaa shonang Laa, ri bée ka yeti labeenang Laa ka tĩng tɛ̃ɛ tɛ̃ɛ ɓɛɛ.”
50Zang ɓɔɔ ri mantɛ vuu ka bii ɓiɓɛ, ri yuku nandon ri yaa wu.
51Yɔɔ jasang ɓɔɔ kagn, lu fɔ̃ɔrɔ nyaa pɛɛrɛ kɔ, ka bii shɛ̃ɛning, dũng Yeesɔ ka knti. Zang ɓɔɔ ri yi Yeesɔ, nɛɛ ri yi yɔɔ jasang kaɓa jong. 52A yɔɔ yàa ri fɔ̃ɔrɔ ɓiɓɛ, yɔɔ yuu bii naa.
Yeesɔ ka tĩng zang ɓɔɔ ri jɛ̃ɛ zang ruu ɓɛɛ
(Mat 26:57-68; Luk 22:54-55, 63-71; Yɔh 18:13-14, 19-24)
53A ri daa kaa nɛɛ Yeesɔ ka gãa kpanti zang ɓɔɔ ri dɔɔ vuu ka Gãa Laa ɓɛɛ. Zang bang, bang zang Yahudi, nɛɛ zang ɓɔɔ ri tusu zang vuu, ri kpalɛ zɔɔ tɔ ka nɔngkɔ. 54Bituru dũng wu ka knti katara, a ri daa shɛ̃ɛ dabang gãa kpanti zang ɓɔɔ ri dɔɔ vuu ka Gãa Laa nɛɛ mani. A daa nwang nɛɛ zang ɓɔɔ ri gãng jĩng ka gãa kaɓa ka nyaa waa, ka ruu ɓɔɔ, sɔɔrɔ si katɔ ɓɛɛ. 55Zang bang bang zang ɓɔɔ ri dɔɔ vuu ka Gãa Laa, nɛɛ zang dɔɔli ɓɔɔ ri doo zang ruu jɛ̃ɛnang kɔ, ri kãa gbalang ɓɔɔ ri zɛ̃ɛ wu nyaa, tɔɔ ri nyɔ wu kati. A ri walɛ kpang. 56Zang dɔɔli ri kɔɔ ruu see ka yuu ɓiɓɛ, a nyaa ɓarɛ daa gbete kpang.
57Nɛɛ knti, zang ɓɔɔ ri seepaa, a ri kɔɔ ruu see ka yuu Yeesɔ tɔɔ, 58“Ruu tãayi, kɔɔyi tɔɔ, ‘N jili Gãa Laa kɔ zang mãa nɛɛ naa ɓɛɛ ditɔ, n mãa ɓɔɔgn ɓɔɔ zang mãa nɛɛ naa kpang, ka yeti diki taati.’ ” 59Ruu ɓɔɔ zang knti keɓe ri kɔɔ ka yuu Yeesɔ piti ti daa gbete kpang kɔ doori.
60A kpanti zang ɓɔɔ ri dɔɔ vuu ka Gãa Laa seepaa, shii ka tĩng ɓarɛ, a hɛ̃ɛ Yeesɔ tɔɔ, “Mɔɔ kasɛ nyaa ka ruu kɔ zang kɔɔ ka yuu ɓaaɓɛ ɓee kpang ya?”
61Yeesɔ ti ãa nyaa ɓi kagn kpang. A kpanti zang ɓɔɔ ri dɔɔ vuu ka Gãa Laa, ti hɛ̃ɛ wu tɔkn nɛɛ, “Mɔkɔ Kirisi, Jaa Kpanti Laa ɓɔɔ zang dɔɔ ɓɛɛ ya?”
62Yeesɔ kasɛ wu nyaa tɔɔ, “Nn, nkɔ.” Nɔɔ naa zi m ɓɔɔ n Jaa Shɔnzang ditɔ ka naa nakn Kpanti Laa ɓɔɔ palɛ vuu piti ɓɛɛ. Nɔɔ ti naa zi naa ɓɔɔ n a ka yeti sãmbong ditɔ.
63A kpanti zang ɓɔɔ ri dɔɔ vuu ka Gãa Laa lɔɔsɔ fɔ̃ɔrɔ ɓɔɔ ka bii, a kɔɔyi tɔɔ, “Ruu kasɛ nɛɛ zang ɓɔɔ wu kɔɔ ruu vuu ɓɔɔ wu palɛ tɔkn ɓɛɛ takpang. 64Nɔɔ tãa ruu shi kpang ɓɔɔ wu kɔɔ ka yuu Laa ɓɛɛ tɔ. Nɔɔ zi ɓu bɛ̀ɛ́ ka yeti manɛ viya?” A zang piti ri kɔɔyi tɔɔ, “Palɛ vuu shi kpang ɓɔɔ, daa ɓɔɔ zang nyɔ vɔrɔ tɔ.”
65A zang ɓɔɔ ri gaa tɔɔsung ɓɔɔ ri tùlù wu sisãa ka bii ɓɛɛ kati. A ri mung wu jĩng, ri nyɔ wu nɛɛ naa, a ri ti kpaa wu nɛɛ, “Kɔɔ ruu zang ɓɔɔ nyɔ mɔɔ ɓɛɛ ta.” A zang ɓɔɔ ri gãng jĩng ka gãa, ri ta wu, ri ti nyɔ wu jong nɛɛ naa.
Bituru laa nyaa Yeesɔ
(Mat 26:69-75; Luk 22:56-62; Yɔh 18:15-18, 25-27)
66Ɓɔɔ Bituru doo ka dabang gãa, jaa zang soro ɓɔɔ pàlɛ́ kpanti zang ɓɔɔ ri dɔɔ vuu ka Gãa Laa shonang, naa arɛ. 67Ɓɔɔ wu zi Bituru nwáng sɔɔrɔ ka nyaa waa, pɛ̃ɛrɛ wu, a kɔɔyi tɔɔ, “Mɔɔ ɓaa doo zang ɓɔɔ bɛ̀ɛ́ dũng Yeesɔ yɔɔ Nazara ɓɛɛ kɔ.”
68A Bituru laa nyaa tɔɔ, “N zi vuu kɔ mɔɔ rang yee ka yuu ɓiɓɛ m kpang.” A seepaa nɛɛ nɔng kaɓa, daa ka nyaa gãa.
69A jaa zang soro kaɓa naa zi wu tɔkn a gaa tɔɔsung ɓɔɔ wu kɔɔrɔ zang ɓɔɔ ri shiiri ka nɔngkɔ ɓɛɛ kati tɔɔ, “Yɔɔ keɓe doo zang ɓarɛ kɔ.” 70A Bituru ti laa nyaa tɔkn. Laa nɛɛ tɔ wu ɓa tɔkɔlɔng, zang ɓɔɔ ri shiiri ka nɔng kaɓa, ti kɔɔ Bituru tɔɔ, “Mɔɔ doo zang ɓarɛ kɔ niizang, ka ruu ɓɔɔ, mɔɔ zang tipi Galili ɓɛɛ.”
71A Bituru gaa tɔɔsung ruu shi kpang kɔɔrɔnang ka yuu ɓiɓɛ, nɛɛ Laa tũnnang ning tɔɔ, “N zi yɔɔ kɔ nɔɔ kɔɔ ruu ɓiɓɛ m kpang.”
72Ɓɔɔ Bituru hangsɛ nyaa kɔɔnang hn, kpaasakn naa paasɛ nyaa daa kaa doo ziti. A Bituru naa kpaa danggn vuu ɓɔɔ Yeesɔ kɔɔ wu kati. Bɛ̀ɛ́ Yeesɔ kɔɔ Bituru tɔɔ, “Ɓɔɔ kn naa ɓaa nyaa daa doo ziti, bɛ̀ɛ́ mɔɔ laa nyaa mɛɛ tɔ daa dakn taati.” A Bituru káa kaa zɛ̃ɛzɛ̃ɛ.
Dewis Presennol:
Maraku 14: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust