Matiyu 14
14
Naa ɓɔɔ zang nyɔ Yɔhana ɓɔɔ palɛ zang batizima vɔrɔ ɓɛɛ
(Mar 6:14-29; Luk 9:7-9)
1Ka diki kaɓa, Hiridu ɓɔɔ roo kpanti ka Galili tãa nyaa Yeesɔ ɓɔɔ sãlɛ nɔng, 2a kɔɔ zang shonang ɓiɓɛ tɔɔ, “Zang keɓe ɓi Yɔhana ɓɔɔ palɛ zang batizima kɔ hingsi jĩng nɛɛ vɔrɔ tɔkn, ka ruu nɔngkɔ, walɛ naa a palɛ vuu ɓɔɔ zang zirɛ zang mã naa ka danggn keɓe.”
3Hiridu kɔ kɔɔ zang nɛɛ zang yi Yɔhana, zang mãrɛ. Zang loo ka sãa ka ruu Hirodiya, soro jaa niiɓɛ Filibu ɓɔɔ wu ta ɓɛɛ. 4Ka ruu ɓɔɔ, Yɔhana kɔɔrɔ wu nɛɛ, “Dàa naa ɓɔɔ mɔɔ shing Hirodiya kpang ɓɛɛ.” 5Hiridu nɛɛ wu nyɔ Yɔhana katɔ ka tipi tang, a kaa vɔrɔ zang, ka ruu ɓɔɔ, zang tɔɔ, Yɔhana zang nyaa shonang Laa ɓɛɛ.
6Diki ɓɔɔ zang yi Hiridu kagn naa raa bii. A kpanti Hiridu gaarɛ zang nɛɛ zang naa shaa vuu shaanang. A Jaa Hirodiya ɓɔɔ soro sɔ dãng ka tĩng zang ɓɔɔ ri kpalɛ zɔɔ ɓɛɛ. Dãng ɓɔɔ jaa sɔrɛ, daa Hiridu ka yeti dɔɔli, 7a tĩ̀ng jaa kaɓa Laa ka tĩng zang ɓɔɔ ri kpalɛ zɔɔ ɓɛɛ tɔɔ, “Vuu ɓɔɔ mɔɔ kasɛ piti, n a mɔɔ katɔ.”
8A nàá jaa dɔ̃lɔ jaa nyaa tɔɔ, jaa wu gàa yuu kporontong Yɔhana ɓɔɔ palɛ zang batizima ɓɛɛ. A jaa naa kɔɔ kpanti Hiridu tɔɔ, “A m yuu kporontong Yɔhana ɓɔɔ palɛ zang batizima, ka yeti pɛntɛng kãntang keɓe.”
9Ɓɔɔ kpanti tãa naa weɓe, yeti ɓiɓɛ lasɛ dɔɔli, a vuu ɓɔɔ wu palɛ takpang, ka Ruu Laa ɓɔɔ wu tĩ̀ng jaa ka shoo zang zanti ɓɔɔ wu gaarɛ ɓɛɛ. A kɔɔ zang shonang ɓiɓɛ nɛɛ ri a jaa vuu ɓɔɔ jaa gàa ɓɛɛ ta. 10A shong zang, nɛɛ zang daa dɔ̀ng wu yuu Yɔhana ɓɔɔ ka sãa ɓɛɛ. 11A zang atɛ yuu kporontong Yɔhana, zang a jaa ka yeti pɛntɛng. A jaa daa a niiɓɛ kati. 12Zang ɓɔɔ ri mantɛ vuu ka bii Yɔhana arɛ naa tuu bii vɔrɔ ɓiɓɛ, ri daa gbãa kati. A ri daa kɔɔ Yeesɔ kati.
Zang labang maani ɓɔɔ Yeesɔ a ri vuu shaanang ɓɛɛ
(Mar 6:30-44; Luk 9:10-17; Yɔh 6:1-14)
13Yeesɔ tãa vuu ɓɔɔ zang palɛ ɓɛɛ, a seepaa nɛɛ nɔng kaɓa vang tonsi, daa ka nɔng ɓɔɔ zang kagn kpang ɓɛɛ. A zang dɔɔli ri tãa nyaa nɔng ɓɔɔ Yeesɔ daayi, ri seepaa nɛɛ gari ɓarɛ nɛɛ doo, ri dũuru wu. 14Yeesɔ shɛ̃ɛ nyaa dang gãnggãng tɔ, a zi zang dɔɔli ɓɔɔ ri kpalɛ zɔɔ, ri kɔng wu gn, a masɛ zang ɓɔɔ vuu palɛ katɔ, ka teteng ɓarɛ kati.
15Nɛɛ laarang ka diki kaɓa, zang ɓɔɔ ri mantɛ vuu ka bii ɓiɓɛ arɛ naa kɔɔ wu tɔɔ, “Laa ɓa tɔ, yaa zang naa ta, zang ɓu daa hoo vuu shaanang ɓiɓɛ ka gari, ka ruu ɓɔɔ gãa ka nihn kpang ɓɛɛ.”
16A Yeesɔ kasɛ ri nyaa tɔɔ, “Ri daa biya? Nɔɔ a ri vuu ta, ri shaayi.”
17Ri kɔɔ Yeesɔ tɔɔ, “Borodi ɓuru, yaa ɓi ka maani nɛɛ jaazĩi ziti kɔ shɛ̃ɛning.” 18Yeesɔ kɔɔ ri tɔɔ, “Nɔɔ atɛ m ta nihn.”
19A kɔɔ zang ɓɔɔ ri kpalɛ zɔɔ nɛɛ ri nwang ta ka yuu wisi. A see borodi maani nɛɛ jaazĩi ziti kaɓa, a tuu jĩng ka lapa. Zãa kpanti Laa, a shalɛ, basɛ zang ɓɔɔ ri mantɛ vuu ka bii ɓiɓɛ, a ri alɛ zang nimbang kati. 20Zang kaɓa, ri shaayi, buru ɓarɛ yirɛ, ri yaa knti. A zang ɓɔɔ ri mantɛ vuu ka bii Yeesɔ, ri kpalɛ ɓɔɔ zang yaarɛ sàáng kopi tu ziti. 21Zang varɛ ɓɔɔ ri shaa vuu kaɓa, ri daa labang maani katɔ. Zang gã zang soro nɛɛ wujɛ ɓi kagn kpang.
Yeesɔ ra ka yuu paa mii waapo
(Mar 6:45-52; Yɔh 6:15-21)
22A Yeesɔ kɔɔ zang ɓɔɔ ri mantɛ vuu ka bii ɓiɓɛ nɛɛ, ri shɛ̃ɛ ta yeti tonsi, ri ta waapo ri gbãayu ka knti ɓɔɔ ri a ɓɛɛ, ka tĩng. Nɛɛ wu jee zang nimbang doo nyaa ka gbongkarɛ, ri daayi. 23Jee zang nyaa tɔ, a naa vang ka kɔpɔ, nɛɛ wu daa gaa Laa. A laa hãa wu nyaa ka nɔngkɔ ka bm. 24Ka laa kaɓa, knti tonsi ɓɔɔ zang ɓɔɔ ri mantɛ vuu ka bii ɓiɓɛ ri vangnɛ ti bee ɓi tɔ nɛɛ nyaa dang gãnggãng. Jasung ti ráarɛ̀ tonsi kana, ka ruu ɓɔɔ, jasung raa jĩng ka bii ɓarɛ kɔ jong ɓɛɛ.
25A Yeesɔ ra ka yuu paa mii waapo nɛɛ yuu gãndi, a daa ka bii ɓarɛ. 26Ɓu doo ɓɔɔ zang ɓɔɔ ri mantɛ vuu ka bii Yeesɔ ri zi naa ɓɔɔ Yeesɔ ra ka yuu paa mii waapo naa weɓe, ri sengnɛ, ri kaa vɔrɔ. Ri kaa nyaa ka lapa, ri tɔɔ, “Raanang kaɓa.”
27A Yeesɔ rang yee kaa tantɛnang nɛɛ ri, tɔɔ, “Nɔ́ɔ kaa vɔrɔ kpang. Ɓi nkɔ.”
28Bituru kasɛ wu nyaa tɔɔ, “Kpanti, nɛɛ mɔkɔ, kɔɔ m ta, n ra ka yuu paa mii, n a ka bii ɓaaɓɛ.”
29A Yeesɔ kɔɔ Bituru tɔɔ, “A ta.” A Bituru seepaa nɛɛ yeti tonsi, ra ka yuu paa mii, daa kana bii Yeesɔ. 30A Bituru zi jasung, a kaa vɔrɔ, a gaa tɔɔsung ɔ̃nang ka mii. Kaa nyaa tɔɔ, “Ta m jong, Kpanti.”
31A Yeesɔ dĩi naa ɓiɓɛ kaa tantɛnang yi wu, kɔɔ wu tɔɔ, “Ka ruu vi, mɔɔ shing danggn ka bii mɛɛ rɛ̃rɛkɛ viya? Mɔɔ yaa danggn naa ka ruu viya?”
32Ri shɛ̃ɛ tɔ ka yeti tonsi, a jasung vɔ nyaa kati. 33Zang ɓɔɔ ka yeti tonsi dɔ̀ɔ Yeesɔ kati. Ri tɔɔ, “Mɔɔ Jaa Laa kɔ niizang.”
Zang kɔnang ɓɔɔ Yeesɔ masɛ ka Janesara ɓɛɛ
(Mar 6:53-56)
34Ri ta mii tɔ, ri a ka tipi Janesara. 35Zang tipi Janesara ri zi Yeesɔ nung, a ri shongko nyaa ka bii zang doo laa kaɓa nandon. A zang ãatɛ Yeesɔ zang kɔnang ɓarɛ kaa nandon. 36A ri gaa wu, nɛɛ wu yaa zang kɔnang jong, ri lee naa ka nyaa fɔ̃ɔrɔ ɓiɓɛ kɔ shɛ̃ɛning. Zang ɓɔɔ ri lee naa ka fɔ̃ɔrɔ ɓiɓɛ piti, kɔnang ɓarɛ yaa ri bii nandon.
Dewis Presennol:
Matiyu 14: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust