Luka 19
19
Zaka kasɛ nɛɛ wu zi Yeesɔ
1Yeesɔ naa a ka Jeriko, tɛɛ kana ka yeti gari. 2A yɔɔ zang bang zang saka tipi tanang ɓɔɔ ɓi zang ying, ɓɔɔ zang ɓaa wu nɛɛ Zaka kagn nɔngkɔ. 3Zaka kasɛ nɛɛ wu zi Yeesɔ katɔ, walɛ gbalang kaa takpang, ka ruu ɓɔɔ, wu ketere, a zang ti shang dɔɔli ɓɛɛ. 4Ka ruu nɔngkɔ, Zaka yuu ka tĩng, daa vang ka laa zulung ɓɔɔ ka nyaa gbalang ɓɔɔ Yeesɔ naa tɛɛ nɛɛ mani ɓɛɛ. 5Yeesɔ naa a tɔ ka doo laa ɓɔɔ Zaka vang kagn, a tuu jĩng ka lapa kɔɔ wu tɔɔ, “Zaka, shooro ta tipi pati. N daa roo lɛ̀ɛ́ ka gãa ɓaaɓɛ kɔ.”
6Zaka tantɛ kaa shɔrɔnang ka tipi, daa nɛɛ Yeesɔ ka gãa, a wu laa nwannang. Tãa tĩnang dɔɔli, ka ruu ɓɔɔ, Yeesɔ a ka gãa ɓiɓɛ ɓɛɛ. 7Zang ɓɔɔ ri zi vuu ɓɔɔ Yeesɔ palɛ, ri gaa tɔɔsung yee gɔ̃ɔrɔnang kaa nandon tɔɔ, “Yɔɔ keɓe daa roo lɛ̀ɛ́ ka gãa zang ɓɔɔ palɛ vuu shi kpang.” 8A Zaka shii paa, kɔɔ Yeesɔ tɔɔ, “Dabang, n basɛ vuu naa mɛɛ nɔng ziti, n tuu nɔng gbete n basɛ zang ɓɔɔ vuu ka naa ɓarɛ kpang ɓɛɛ, zang ɓɔɔ n nɛɛ shaa wu vuu kagn, n sɔɔrɔ wu vuu ɓɔɔ n shaa ɓɛɛ tìng dɛ̃ɛti.” 9A Yeesɔ kɔɔ Zaka tɔɔ, “Lɛɛkɔ Laa ta yuu zang ɓɔɔ ri ka gãa keɓe tɔ. Ka ruu ɓɔɔ, mɔɔ ɓaa doo jaa Ibirayi kɔ ɓɛɛ. 10Ka ruu ɓɔɔ, n Jaa Shɔnzang n arɛ nɛɛ n naa kãa zang ɓɔɔ ri ning gbalang katɔ, tɔ̀ɔ, n ta yuu ɓarɛ kati ɓɛɛ.”
Zang shonang ɓɔɔ tɔ̃ɔ nɛɛ ɓɔɔ shi kpang ɓɛɛ
(Mat 25:14-30)
11Ɓɔɔ ri tãa ruu kaɓa kana, Yeesɔ rang ri yee ɓɔɔ kaa nɛɛ nyaa vuu jeenang, ka ruu ɓɔɔ, bɛ̀ɛ́ ri yaa Urushalima kaa naabm ɓɛɛ. A zang keɓe ti kɔɔ ɓarɛ nɛɛ Kpanti roonang Laa nwáng nyaa katɔ tantɛnang. 12Yeesɔ kɔɔ ri tɔɔ, “Yɔɔ ɓɔɔ kagn zang bang, daayi nɛɛ zang daa yi wu kpanti ka koolaa ɓɔɔgn kpala kpala. Nɛɛ tɔɔ, wu gbãayu gãa ɓiɓɛ kati. 13Ɓɔɔ wu daa gn kpang, a ɓaa nyaa ka zang shonang ɓiɓɛ kopi, a ri pã́ng gbete gbete, kɔɔ ri tɔɔ, ‘Nɔɔ palɛ shonang ɓɔɔ nɔɔ walɛ ɓɔ̀ɔ́gn nɛɛ mani ka yuu weɓe, n gbãayu nɛɛ mani.’ 14A zang tipi ɓiɓɛ ri kasɛ ruu ɓiɓɛ kpang. Ka ruu nɔngkɔ, ri shong zang nyaa shonang ka knti ɓiɓɛ, nɛɛ wu daa kɔɔ zang ɓɔɔ daa yi yɔɔ kpanti nɛɛ, ‘Ruu kasɛ yɔɔ keɓe wu nwang kpanti ɓuru kpang.’
15“Zang daa yi yɔɔ kpanti ɓiri, a gbãayu. Naa shong zang ka bii zang shonang ɓiɓɛ, ɓɔɔ wu a ri saka ɓɛɛ. Nɛɛ tɔ̀ɔ wu tãa naa saka ɓɔɔ zang shonang ɓiɓɛ ri walɛ ka yuu ɓɔɔ wu a ri ɓɛɛ. 16A zang shɔɔnang ɓiɓɛ ɓɔɔ gaayu anang shɔɔnang, kɔɔ wu tɔɔ, ‘Dabang, n walɛ saka tɔ pãng kopi ka yuu ɓɔɔ mɔɔ a m ɓɛɛ’. 17Dabang gãa ɓarɛ kɔɔ wu tɔɔ, ‘Mɔɔ palɛ vuu tɔ̃ɔ tɔ, mɔɔ zang shonang tɔ̃ɔ. Mɔɔ shing jĩng ka vuu tɔkɔlɔng tɔ̃ɔ tɔ̃ɔ. Ka ruu nɔngkɔ, n a mɔɔ gari bang bang kopi mɔɔ yiti.’ 18A zang shonang dabang ɓɔɔ ɓang knti zang keɓe, naa arɛ kɔɔ wu tɔɔ, ‘Dabang, n walɛ saka tɔ pãng maani ka yuu ɓɔɔ mɔɔ a m ɓɛɛ.’ 19A ti kɔɔ wu tɔɔ, ‘Mɔ́ɔ yiti gari bang bang maani.’
20“A zang shonang ɓɔɔ ti naa arɛ kɔɔ wu tɔɔ, ‘Dabang, saka ɓaaɓɛ keɓe. Bɛɛ n mung m ka sɛ̃ɛ fɔ̃ɔrɔ n shingnɛ. 21N kaa vɔrɔ ɓaaɓɛ katɔ, ka ruu ɓɔɔ, mɔɔ kpãa nyaa ɓaa katɔ ɓɛɛ. Mɔɔ tuu vuu ɓɔɔ ɓi ɓɔɔ ɓaaɓɛ kpang ɓɛɛ. Mɔɔ ti yee vuu ɓaa ka nɔng ɓɔɔ mɔkɔ ɓaa kpang ɓɛɛ.’
22“A dabang gãa ɓarɛ kasɛ wu nyaa tɔɔ, ‘Mɔɔ zang shonang ɓɔɔ shi kpang ɓɛɛ, n dɔng mɔɔ ruu doo nɛɛ yee ɓɔɔ nyaa ɓaaɓɛ kɔɔ ɓɛɛ kɔ. Mɔɔ zi tɔ nɛɛ n kpãa nyaa katɔ, n tuu vuu ɓɔɔ wu ɓɔɔ mɛɛ kpang, n ti yee vuu m ka nɔng ɓɔɔ nkɔ ɓaayi kpang ɓɛɛ. 23Mɔɔ shing m saka mɛɛ ka nɔng ɓɔɔ zang shĩili saka kagn kpang ka ruu viya? Wee n arɛ, n nɛɛ walɛ ɓɔɔgn, ɓɔɔ zang gisi m ka yuu ɓiɓɛ kpang ya?’
24“A dabang gãa ɓarɛ kɔɔ zang ɓɔɔ ri shiiri ka nɔng tɔɔ, ‘Nɔɔ ta saka ɓɔɔ ka naa ɓiɓɛ ta, nɔɔ a zang ɓɔɔ, wàlɛ̀ pã́ng kopi ɓɛɛ.’ 25A zang ri kɔɔ wu tɔɔ, ‘Dabang, saka kagn naa ɓiɓɛ pã́ng kopi.’ 26N kɔ̀ɔ́ nɔɔ, zang ɓɔɔ vuu ɓiɓɛ kagn, zang naa gisi wukɔ vuu ɓɔɔgn ka yuu ɓiɓɛ tɔkn. Zang ɓɔɔ vuu ɓiɓɛ ka naa kpang, ɓɔɔ ka naa ɓiɓɛ tɔkɔlɔng, zang naa ta ditɔ. 27Ɓɔɔ zang kɔ ri shing jĩng nɛɛ n kpang, nɛɛ n roo kpanti ka yuu ɓarɛ kpang ɓee, nɔɔ atɛ ri ta ka tĩng mɛɛ, nɔɔ nyɔ ri vɔrɔ.”
Yeesɔ daa ka Urushalima
(Mat 21:1-11; Mar 11:1-11; Yɔh 12:12-19)
28Ɓɔɔ Yeesɔ kɔɔ tɔ naa weɓe, a sɔ̀ɔ ri tĩng Urushalima daanang kati. 29Yaa gari Bɛtafaji nɛɛ Bɛtani, ɓɔɔ ri ka kɔpɔ ɓɔɔ zang ɓaa nɛɛ Zeetung, kaa naabm, a shong zang ɓɔɔ ri mantɛ vuu ka bii ɓiɓɛ ziti. 30Kɔɔ ri tɔɔ, “Nɔɔ dita jaa gari kɔ ka tĩng dang ɓa. Nɔɔ nɛɛ tu kaa yeti gari, nɔɔ daa zi jaa seesaa ɓɔɔ zang vang gngn kpang, zang mã ka nyaa gãa. Nɔɔ kãlɛ nɔɔ a nɛɛ mani. 31Zang ɓɔɔ nɛɛ hɛ̃ɛ nɔɔ nɛɛ ‘Nɔɔ kã̀lɛ́ ka ruu viya?’ Nɔɔ kɔɔ wu nɛɛ ‘Dabang ɓuru kasɛ katɔ.’ ”
32A zang ɓɔɔ Yeesɔ shong ri, ri daayi ri daa ĩi naa ɓɔɔ wu kɔɔ ri ɓɛɛ. 33Rí kã̀lɛ́ jaa seesaa bìí doo naa, a zang ɓiɓɛ naa arɛ hɛ̃ɛ ri tɔɔ, “Nɔɔ kãlɛ jaa seesaa ka ruu viya?” 34A ri kɔɔ wu tɔɔ, “Dabang ɓuru kasɛ katɔ.” 35A ri atɛ Yeesɔ jaa seesaa bìí kati. Ri luku fɔ̃ɔrɔ ɓarɛ ka dakn jaa seesaa, a ri shing Yeesɔ ka yuu ɓiɓɛ. 36Jaa seesaa daa kana nɛɛ Yeesɔ, ri ti wɔɔrɔ fɔ̃ɔrɔ kana gbalang.
37Yeesɔ a tɔ naabm nɛɛ Urushalima, ka nɔng ɓɔɔ gbalang sòo nyaa nɛɛ Kɔpɔ Zeetung ɓɛɛ, zang ɓɔɔ ri dũng wu nandon ri gaa tɔɔsung Laa dɔ̀ɔnang. Ri tãa tĩnang, ri ti shii nyaa ka lapa gaagaa, ka ruu vuu ɓɔɔ zang zirɛ zang mã naa ka danggn ɓɔɔ ri zi nɛɛ jĩng ɓarɛ ɓɛɛ. 38Ri kɔɔrɔ kana nɛɛ, “Laa wu a Kpanti ɓɔɔ a nɛɛ nung Kpanti Laa tĩnang tãanang. Nwannang ka nyaa zɔɔ kagn lapa. Zang wu ti dɔɔ Laa ɓɔɔ ka lapa kpala kpala ɓɛɛ ta.” 39A zang Farisi ɓɔɔ ka teteng zang nimbang kɔɔ Yeesɔ tɔɔ, “Maalang, mangkɛ zang ɓɔɔ ri mantɛ vuu ka bii ɓaaɓɛ, nɛɛ ri vɔ̃ nyaa ta.” 40A kasɛ ri nyaa tɔɔ, “N kɔɔ nɔɔ, naa zang keɓe ri voo nyaa doori, tari kɔ ka tipi ɓee, ri dɔɔ m ditɔ.”
Yeesɔ kaa ka ruu Urushalima
41Yeesɔ a tɔ, yaa Urushalima kaa naabm, naa zi gari, a wɔsɔ miiri. 42Kɔɔyi tɔɔ, “Nɔɔ nɛɛ zi vuu gbete ɓɔɔ atɛ nwannang ka nyaa zɔɔ katɔ, wukɔ nɛɛ tɔ̃ɔ. A zang waasɛ nɔɔ katɔ, nɔɔ zi kaa takpang. 43Diki ɓɔɔ zang ɓɔɔ ri shing jĩng nɛɛ nɔɔ kpang, ri kiiri nɔɔ nyaa ka teteng a kana. Ri naa nɔ̀ɔ́ nɔɔ, ri a ka yuu manɛ nɛɛ nɔng piti piti. 44Ri ningsi nɔɔ nɛɛ wujɛ manɛ ka yeti gari manɛ kɔ nɔɔ mã̀ayi nɔɔ ɓèe nyaa ka zɔɔ nandon ɓee. Ri naa yaa tari gbete wu pãng ka yuu zɔɔ kpang, ka ruu ɓɔɔ, nɔɔ zi laa ɓɔɔ Laa arɛ nɛɛ wu ta yuu manɛ kpang ɓɛɛ.”
Yeesɔ daa ka Gãa Laa
(Mat 21:12-17; Mar 11:15-19; Yɔh 2:13-22)
45A Yeesɔ naa daa ka Gãa Laa, gaa tɔɔsung zang ɓɔɔ ri mãlɛ́ vuu kagn hingkinang kati. 46Kɔɔ ri tɔɔ, “Zang bee ka yeti labeenang Laa tɔɔ, ‘Gãa keɓe ɓi gãa Laa gaanang.’ A nɔɔ raayi nwang nɔɔ manɛ kaa nɔng ɓɔɔ shɔngɓɔ ri kpalɛ zɔɔ kagn ɓɛɛ.” 47Tusu zang vuu kaa nɔngkɔ diki, diki. A rɛɛ kpanti zang ɓɔɔ ri dɔɔ vuu ka Gãa Laa, nɛɛ zang ɓɔɔ ri tusu zang vuu ɓɔɔ ri zi labeenang Laa dɔɔli, nɛɛ rɛɛ zang bang bang zang gari, ri kasɛ nɛɛ ri nyɔ wu vɔrɔ katɔ. 48A ri walɛ gbalang kaa takpang, ka ruu ɓɔɔ, zang piti ri ɓaa shoo, ri tãa yee ɓɔɔ wu rang ɓɛɛ, ri kasɛ nɛɛ yee gbete wu ɓa ri kpang.
Dewis Presennol:
Luka 19: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust