Yɔhana 2
2
Kn sinyɛ ka gari Kaana ɓɔɔ ka tipi Galili ɓɛɛ
1Diki naa gãntɛ tɔ ziti, zang gee soro ka gari Kaana ɓɔɔ ka tipi Galili ɓɛɛ. Nàá Yeesɔ daa nɔng kaɓa kaa jong. 2Zang ti gaarɛ Yeesɔ jong nɛɛ, zang ɓɔɔ ri mantɛ vuu ka bii ɓiɓɛ ɓɛɛ. 3Mii inabi ɓɔɔ zang ɓoo ɓɛɛ waa nyaa tɔ, a nàá Yeesɔ a ka bii ɓiɓɛ, kɔɔ wu tɔɔ, “Mii inabi ɓarɛ waa nyaa tɔ nandon.”
4A kasɛ niiɓɛ nyaa tɔɔ, “Maanaa, mɔɔ a kaa bii mɛɛ kaa ruu viya? Yáa m ka nɔngkɔ, laa mɛɛ a ɓi gn kpang.”
5Nàá Yeesɔ kɔɔ zang ɓɔɔ ri arɛ, ri yi zang naa ka shonang ɓɛɛ tɔɔ, “Vuu ɓɔɔ nɛɛ kɔɔ nɔɔ piti nɔɔ pálɛ́.”
6Bɛ̀ɛ́ zang shɔ ɓawa tari kagn nɔngkɔ mangbete. Ɓɔɔ zang tɛ̃ɛ mii ɓɔɔ zang sɔɔ bii nɛɛ mani, naa ɓɔɔ zang Yahudi dang nyaa ɓɛɛ. Ɓawa gbete naa zang tɛ̃ɛ mii kagn, bɛng taati.
7Yeesɔ kɔɔ zang ɓɔɔ ri yi zang naa ka shonang keɓe nɛɛ, “Nɔɔ wisi rɛɛ ɓawa keɓe nyaa ta nɛɛ mii.” Ri wisi mii ka nyaa ɓawa lɛɛri. 8A kɔɔ ri tɔɔ, “Nɔɔ zã mii keɓe ta tɔkɔlɔng, nɔɔ daa a zang ɓɔɔ wukɔ zang bang kn sinyɛ ɓɛɛ.” A ri zã mii, ri daa nɛɛ mani. 9Ɓɔɔ zang bang kn sinyɛ ta mii, ɓɔɔ bɛ̀ɛ́ raa mii inabi tɔ ɓɛɛ, a tãayi. Yɔɔ zi nɔng ɓɔɔ mii inabi keɓe a nɔng kpang, zang ɓɔɔ ri yi zang naa ka shonang ɓɔɔ ri zã mii, ri zi ɓarɛ tɔ. A ɓaa nyaa ka sinyɛ ɓeevɛ dang gbete, 10a hɛ̃ɛ wu tɔɔ, “Zang a zang zanti ɓi mii inabi ɓɔɔ tɔ̃ɔ kɔ shɔɔnang, zang nɛɛ ɓoo tɔ, zang naa gɔɔ nyaa kaa nɛɛ ɓɔɔ la kpang ɓɛɛ. Mɔɔ yaa mii inabi tɔ̃ɔ gbongkarɛ mɔɔ naa a zang ɓaa kaa nɛɛ doo knti ka ruu viya?”
11Wee vuu ɓɔɔ zang zirɛ zang mã naa ka danggn ɓɔɔ Yeesɔ gaayu palɛnang ɓɛɛ kɔ, ka gari Kaana ɓɔɔ ka tipi Galili ɓɛɛ. Tusu zang bannang ɓiɓɛ kaa nɔngkɔ, a zang ɓɔɔ ri mantɛ vuu ka bii ɓiɓɛ ri shing danggn kaa bii ɓiɓɛ gbãng gbãng.
12Kaa nɛɛ knti, Yeesɔ daa ka gari Kafanahu nɛɛ niiɓɛ, nɛɛ jaa niiɓɛ, nɛɛ zang ɓɔɔ ri mantɛ vuu ka bii ɓiɓɛ ɓɛɛ. Ri nwang ka nɔngkɔ diki bee katɔ tɔkɔlɔng.
Yeesɔ daa ka Gãa Laa
(Mat 21:12-13; Mar 11:15-17; Luk 19:45-46)
13Làá nyaalaa pasika ɓɔɔ zang kpaa danggn diki ɓɔɔ Laa tɛɛ ɓɛɛ, yáa kaa tɔkɔlɔng, a Yeesɔ daa kaa Urushalima. 14Daa ka dàbang Gãa Laa, ĩi zang ri mãlɛ́ napo, nɛɛ mɛ̀ɛrɛ́, a ɓɔɔ ning koro. Zang ɓɔɔ ri kɔ̃sɔ zang saka ri ti nwalɛ ɓarɛ ka teeburu ɓarɛ. 15A zaa soo, pálɛ́ gbãa nɛɛ mani, a hing zang nandon, nɛɛ mɛ̀ɛrɛ́, nɛɛ napo ning, ɓɔɔ ka dàbang Gãa Laa ka biling. A ti zĩili teeburu zang ɓɔɔ ri kɔ̃sɔ zang saka, a vang saka ɓarɛ. 16A Yeesɔ rang zang ɓɔɔ ri mãlɛ́ ning koro yee nabm tɔɔ, “Nɔɔ see veɓe ta, nɔɔ yaa nɔng. Nɔɔ risi Gãa Daa mɛɛ nwang naa lumang ka ruu viya?” 17A zang ɓɔɔ ri mantɛ vuu ka bìí ɓiɓɛ, ri kpaa danggn vuu ɓɔɔ labeenang Laa kɔɔyi nɛɛ, “Sũnyaa ɓɔɔ n kaa ka ruu Gãa ɓaaɓɛ, kɔng m ka ɓoro naa waa.”
18Zang bang bang, zang Yahudi ri kasɛ wu nyaa tɔɔ, “Vuu ɓɔɔ zang zirɛ zang mã naa ka danggn ɓɔɔ mɔɔ palɛ, tɔ̀ɔ, ruu zi kagn nɛɛ zang a mɔɔ naa vuu keɓe palɛnang tɔ ɓu viya?”
19Yeesɔ kasɛ ri nyaa tɔɔ, “Nɔɔ jili Gãa Laa keɓe ta, n wisi paa tɔkn n hangsɛ nyaa ka diki taati.”
20Zang bang bang, zang Yahudi ri hɛ̃ɛ wu tɔɔ, “Zang mãa gãa keɓe saa laa ziti tu mangbete, mɔɔ nɛɛ mɔɔ wisi paa ɓaa diki taati kɔ nwani ya?”
21A ɓeekpang, ruu Gãa ɓɔɔ wu rang ɓɛɛ, tɔɔ ɓi bii ɓiɓɛ. 22Ka ɓɔɔ Laa naa wisi wu paa nɛɛ sàa, zang ɓɔɔ ri mantɛ vuu ka bii ɓiɓɛ ri naa kpaa danggn kati nɛɛ bɛ̀ɛ́ kɔ̀ɔ ri vuu keɓe tɔ kagn. A ri shing danggn kaa vuu ɓɔɔ zang bee ka yeti labeenang Laa, nɛɛ vuu ɓɔɔ Yeesɔ kɔ̀ɔ ɓɛɛ ning.
Yeesɔ zi vuu ɓɔɔ shɔnzang rɛ̃rɛ tɔ
23Ɓɔɔ bɛ̀ɛ́ Yeesɔ doo ka Urushalima, ka diki nyaalaa ɓɔɔ zang kpaa danggn diki ɓɔɔ Laa tɛɛ ɓɛɛ, zang dɔɔli ri shing danggn ka bii ɓiɓɛ, ka ruu ɓɔɔ, ri zili vuu ɓɔɔ zang zirɛ zang mã naa ka danggn ɓɔɔ wu pálɛ́ ɓɛɛ. 24Yeesɔ ti á ri yuu ɓiɓɛ kpang, ka ruu ɓɔɔ zi naa shɔnzang ɓi tɔ nandon, 25daa naa ɓɔɔ zang ɓɔɔgn kɔɔ wu ruu shɔnzang kpang ɓɛɛ. Ka ruu ɓɔɔ Yeesɔ nɛɛ yuu ɓiɓɛ zi vuu ɓɔɔ shɔnzang rɛ̃rɛ ka yeti ɓarɛ tɔ ɓɛɛ.
Dewis Presennol:
Yɔhana 2: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust