ಮತ್ತಾಯ 15
15
ಪೆರಿಯಯಿಂಗಡ ಪದ್ದತಿ
(ಮಾರ್ಕ 7.1–13)
1ಅಕ್ಕ ಯೆರೂಸಲೇಮ್ಂಜ ಚೆನ್ನ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಯೇಸುರ ಪಕ್ಕ ಬಂದಿತ್: 2ಎನ್ನಂಗ್ ನೀಡ ಶಿಷ್ಯಂಗ ಪೂರ್ವ ಕಾಲತ್‍ರ ಪೆರಿಯಯಿಂಗ ಎಣ್ಣ್‌ನ ಪದ್ದತಿನ ಮೀರಿ ನಡ್‍ಪ? ಪದ್ದತಿರ ಪ್ರಕಾರ ಕೈ ಕತ್ತತೆ ಉಂಬಲ್ಲಾಂದ್ ಕ್‍ೕಟತ್.
3ಅದ್ಂಗ್ ಯೇಸು: ಅನ್ನನಾಚೇಂಗಿ, ನಿಂಗ ನಿಂಗಡ ಪದ್ದತಿರ ಪ್ರಕಾರ ನಡ್‍ಪಕಾಯಿತ್, ದೇವಡ ವಾಕ್ಯತ್‍ನ ಬುಟ್ಟ್‌ರ್‍ವಿರಲ್ಲ? ಅನ್ನನೆ ಎನ್ನಂಗ್ ಮಾಡ್‌ವಿರ? 4ನಿಂಗ ನಿಂಗಡ ಅಪ್ಪವ್ವಂಗಕ್ ಮರ್ಯಾದೆ ಕೊಡಿ, ದಾರ್ ಅಪ್ಪವ್ವನ ದೂಷಣೆ ಮಾಡ್‌ವ ಅಂವೊನ ಕೊಲ್ಲಂಡೂಂದ್ ದೇವ ನಿಂಗಕ್ ಪಡಿಪ್‍ಚಿಟ್ಟಿತುಂಡಲ್ಲ!#15.4 ಪ್ರಯಾಣ ಪುಸ್ತಕ 20.12; 21.17, ದರ್ಮಶಾಸ್ತ್ರ ಪುಸ್ತಕ 5.16, ಯಾಜಕ ಪುಸ್ತಕ 20.9 5ಆಚೇಂಗಿ, ನಿಂಗ ಜನಕ್: ನಾಕ್ ಇಕ್ಕ ಸಹಾಯ ಮಾಡ್‌ವಕ್ ಕಯ್ಯುಲೆ, ನಾನ್ ನಿಂಗಕ್ ತಪ್ಪಕುಳ್ಳಾನ, ದೇವಕ್ ಕೊಡ್‍ಪಕ್ ಪರ್‍ಕೆ ಮಾಡಿಯೇಂದ್ ಅಪ್ಪವ್ವಂಗಕ್ ಎಣ್ಣ್‌ವಕ್ ಬೋದನೆ ಮಾಡಿಯಂಡುಳ್ಳಿರ. 6ಇನ್ನನೆ ಮಾಡ್‍ಚೇಂಗಿ ನಿಂಗ ನಿಂಗಡ ಜವಾಬ್ದಾರಿ ತ್‍ೕಂದತ್‍ೕಂದ್ ಎಣ್ಣುವಿರ, ಇನ್ನನೆ ನಿಂಗ ಮಾಡ್‍ಚೇಂಗಿ, ನಿಂಗ ನಿಂಗಡ ಪದ್ದತಿಕಾಯಿತ್ ದೇವಡ ವಾಕ್ಯತ್‍ನ ಬುಟ್ಟ್‌ರ್‌ವಿರ. 7ಕಪಟಿಯಳೇ, ನಿಂಗಡ ವಿಷಯತ್ ಯೆಶಾಯ ಪ್ರವಾದಿ:
8ಈ ಜನ ಬರಿ ತಕ್ಕ್‌ಲ್ ನನ್ನ ತುದಿಪ.
ಆಚೇಂಗಿ, ಅಯಿಂಗಡ ಹೃದಯ ನೇರಾಯಿತು ನನ್ನಿಂಜ ದೂರ ಉಂಡ್.
9ಅಯಿಂಗ ನನ್ನ ಆರಾದನೆ ಮಾಡ್‌ವ ಆಚೇಂಗಿ ಪ್ರಯೋಜನ ಇಲ್ಲೆ.
ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಜನ ಎಣ್ಣ್‌ನ ಕಾನೂನ್‌ನ, ನ್ಯಾಯಪ್ರಮಾಣವಾಯಿತ್ ಉಪದೇಶ ಮಾಡಿಯಂಡುಂಡ್‍ೕಂದ್,
ಯೇಸು ಎಣ್ಣ್‌ಚಿ.#15.9 ಯೆಶಾಯ 29.13
ಮನುಷ್ಯನ ಪಾಳ್ ಮಾಡ್‌ವ ವಿಷಯ
(ಮಾರ್ಕ 7.14–23)
10ಪಿಂಞ ಯೇಸು, ಜನಡ ಗುಂಪ್‍ನ ಕಾಕುವಂಜಿ, ಅಯಿಂಗಳ ನೋಟಿತ್: ನಿಂಗ ಇದ್‍ನ ಚಾಯಿ ಕ್‍ೕಳಿ. 11ಒಬ್ಬಂಡ ಬಾಯಿರ ಒಳ್‍ಕ್ ಪೋಪದ್ ಅಂವೊನ ಅಶುದ್ದ ಮಾಡುಲೆ, ಬಾಯಿಂಜ ಪೊರಮೆ ಬಪ್ಪದೇ ಅಂವೊನ ಅಶುದ್ದ ಮಾಡ್‌ವಾಂದ್ ಎಣ್ಣ್‌ಚಿ.
12ಅಕ್ಕ ಅಂವೊಂಡ ಶಿಷ್ಯಂಗ ಅಂವೊಂಡ ಪಕ್ಕ ಬಂತ್, ನಿಂಗ ಇನ್ನನೆ ಎಣ್ಣ್‌ನಗುಂಡ್ ಫರಿಸಾಯಂಗಕ್ ದುಂಬ ಬೇಜಾರ್ ಆಚೀಂದ್ ನಿಂಗಕ್ ಗೊತ್ತುಂಡಾಂದ್ ಕ್‍ೕಟತ್.
13ಅದ್ಂಗ್ ಯೇಸು: ನಾಡ ಪರಲೋಕತ್ ಅಪ್ಪ ನೆಡತೆ ಗಿಡತ್‌ನೆಲ್ಲ ಬೇರೋಡೆ ಬಲ್‍ಚಿತ್ ಚಾಡಿರ್‍ವ 14ಅಯಿಂಗ ಎಣ್ಣ್‌ವಾಂಗ್ ಕೆಮಿ ಕೊಡ್‌ಕತಿ. ಅಯಿಂಗ ಕುರ್‌ಡಂಗಕ್ ಬಟ್ಟೆ ಕಾಟುವ ಕುರ್‌ಡಂಗಳಾಯಿತುಂಡ್. ಒರ್ ಕುರ್‌ಡ ಇಂಞೊರ್ ಕುರ್‌ಡಂಗ್ ಬಟ್ಟೆ ಕಾಟ್‍ಚೇಂಗಿ, ದಂಡಾಳು ಕುಂಡ್‌ಕ್ ಬೂವಲ್ಲಾಂದ್ ಎಣ್ಣ್‌ಚಿ.
15ಅಕ್ಕ ಪೇತ್ರ: ನಂಗ ಉಂಬದ್‍ಲ್ ಅಶುದ್ದ ಆಪುಲೇಂದ್ ಎಣ್ಣುವ ಕಥೇರ ರೂಪತ್‍ನ ಚಾಯಿತೆ ಬುಡ್‌ತಿತ್ ಎಣ್ಣೀಂದ್ ಕ್‍ೕಟತ್.
16ನಿಂಗಕ್ ಇಂಞು ಅರ್ಥ ಆಯಿತಿಲ್ಲೆಯಾ? 17ಬಾಯಿಕ್ ಪೋಪದೆಲ್ಲ ಕೆಲಕ್ ಪೋಯಿತ್, ಕೆಲತ್ಂಜ ಪೊರಮೆ ಪೋಪಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ? 18ಆಚೇಂಗಿ ಬಾಯಿಂಜ ಬಪ್ಪದ್, ಹೃದಯತ್‍ಲ್ ಎಂತ ಉಂಡೋ ಅದೇ ಪೊರಮೆ ಬಪ್ಪ; ಅದೇ ಮನುಷ್ಯನ ಅಶುದ್ದ ಮಾಡ್‌ವ. 19ಎನ್ನನೆ ಎಣ್ಣ್‌ಚೇಂಗಿ, ಹೃದಯತ್ಂಜಲೇ ಕೆಟ್ಟ ಗೇನ, ಕೊಲೆ, ವ್ಯಬಿಚಾರ, ಲೈಂಗಿಕ ಪಾಪ, ಕಕ್ಕಂಡೂ, ಪೊಟ್ಟ್ ಪರಿಯಂಡು, ಪೊಟ್ಟ್ ಸಾಕ್ಷಿ ಪರಿಯಂಡು, ಬೋರೆಯಿಂಗಳ ನಾಶ ಮಾಡ್‌ವಕ್ ಕೆಟ್ಟ ತಕ್ಕ್ ಪರಿಯಂಡೂಂದ್ ಉಳ್ಳ ಗೇನ ಎಲ್ಲಾ ಬಪ್ಪ. 20ಇಂತ ವಿಷಯವೇ ಒರ್ ಮನುಷ್ಯನ ಅಶುದ್ದ ಮಾಡ್‌ವ. ಕೈ ಕತ್ತತೆ ಉಂಬದ್ ಮನುಷ್ಯನ ಪಾಳ್ ಮಾಡುಲೇಂದ್ ಯೇಸು ಎಣ್ಣಿ ಕೊಡ್‍ತತ್.
ಯೆಹೂದ್ಯ ಅಲ್ಲತ ಒರ್ ಪೊಣ್ಣಾಳ್‍ರ ನಂಬಿಕೆ
(ಮಾರ್ಕ 7.24–30)
21ಪಿಂಞ ಯೇಸು ಆ ಜಾಗತ್‍ನ ಬುಟ್ಟಿತ್ ಗಲಿಲಾಯತ್ಂಜ ತೀರ್ ಪಿಂಞ ಸೀದೋನ್ ಎಣ್ಣುವ ಪಟ್ಟಣತ್‍ರ ಪಕ್ಕತ್‍ರ ಜಾಗಕ್ ಪೋಚಿ. 22ಅಕ್ಕ ಅಲ್ಲಿ ಒರ್ ಕಾನಾನ್ಯ ದೇಶತ್‍ರ ಪೊಣ್ಣಾಳ್ ಯೇಸುರ ಪಕ್ಕ ಬಂದಿತ್: ಒಡೆಯನೇ, ದಾವೀದಂಡ ಮೋಂವೊನೇ, ನಾಡ ಮೇಲೆ ಕನಿಕರ ಕಾಟ್; ನಾಡ ಮೋವಕ್ ಕೂಳಿ ಪುಡ್‌ಚಿತ್ ಬಲ್ಯ ಕಷ್ಟತ್‍ಲ್ ಉಂಡ್‍ೕಂದ್ ಎಣ್ಣಿತ್ ಕಾಕ್‍ಚಿ.
23ಅದ್ಂಗ್ ಯೇಸು, ಅವಕ್ ಒರ್ ತಕ್ಕ್ ಸಹ ಪರ್ಂದಿತ್ ಜವಾಬ್ ಕೊಡ್‍ತಿತ್‌ಲ್ಲೆ. ಅಕ್ಕ ಯೇಸುರ ಶಿಷ್ಯಂಗ ಬಂತ್: ಅವಳ ಇಲ್ಲಿಂಜ ಅಯಿಚಿರ್, ಎನ್ನಂಗೆಣ್ಣ್‌ಚೇಂಗಿ ಅವ ನಂಗಡ ಬಯ್ಯ ಬಂದಂಡ್ ಉಂಡ್‍ೕಂದ್ ಬೋಡ್‍ಚಿ.
24ಅದ್ಂಗ್ ಯೇಸು: ತಪ್ಪಿ ಪೋಯಿತುಳ್ಳ ಕೊರಿಯಡನೆಕೆ ಉಳ್ಳ ಇಸ್ರಾಯೇಲ್ ಜನಕಾಯಿತ್ ದೇವ ನನ್ನ ಅಯಿಚತ್‍ೕಂದ್ ಎಣ್ಣ್‌ಚಿ.
25ಆ ಪೊಣ್ಣಾಳ್ ಯೇಸುರ ಕಾಲ್‌ಕ್ ಅಡ್ಡ ಬೂವಂಜಿ: ಒಡೆಯನೇ, ನಾಕ್ ಸಹಾಯ ಮಾಡ್‍ೕಂದ್ ಬೋಡಿಯಂಡತ್.
26ಅಕ್ಕ ಯೇಸು: ಚೆರಿಯ ಮಕ್ಕಡ ಆಹಾರತ್‍ನ ಎಡ್‍ತಿತ್ ನಾಯಿಕ್ ಕನಿಪದ್ ಸರಿಯಲ್ಲಾಂದ್ ಎಣ್ಣ್‌ಚಿ
27ಅದ್ಂಗ್ ಅವ: ಅಕ್ಕು ಒಡೆಯನೇ, ಅದ್ ನೇರ್. ಆಚೇಂಗಿಯು, ಒರ್ ಮನೆರ ಎಜಮಾನ ತಿಂಬಕ, ಅಡಿಕ್ ಬೂವ ಒಟ್ಟಿ ತುಂಡ್‍ನ ನಾಯಿ ತಿಂಬಲ್ಲಾಂದ್ ಎಣ್ಣ್‌ಚಿ.
28ಅವಕ್ ಯೇಸು: ನೀಡ ನಂಬಿಕೆ ದುಂಬ ಬಲ್ಯದ್: ನೀಕ್ ಎಂತ ಕುಶಿ ಉಂಡೋ ಅದ್ ಆಡ್‍ೕಂದ್ ಯೇಸು ಆ ಪೊಣ್ಣಾಳ್‌ಕ್ ಎಣ್ಣ್‌ಚಿ. ಅದೇ ಕ್ಷಣತ್‍ಲ್ ಅವಡ ಮೋವಕ್ ವಾಸಿ ಆಚಿ.
ದುಂಬ ಜನಳ ವಾಸಿ ಮಾಡ್‍ವದ್
29ಯೇಸು ಆ ಜಾಗತ್‍ನ ಬುಟ್ಟಿತ್ ಗಲಿಲಾಯ ಕಡಲ್‍ರ ಬರಿಕ್ ಪೋಚಿ. ಅಲ್ಲಿ ಒರ್ ಕುಂದ್‌ರ ಕೊಡಿಕ್ ಪೋಯಿತ್ ಅಳ್‌ತತ್. 30ಬಲ್ಯ ಜನಡ ಗುಂಪ್ ಅಂವೊಂಡ ಪಕ್ಕ ಕುಂಟಂಗಳ, ಕುರ್‌ಡಂಗಳ, ಕೈಕಾಲ್ ಬರತಯಿಂಗಳ, ಬಾಯಿ ಬರತಯಿಂಗಳ, ಬೋರೆ ಎಲ್ಲಾ ತರ ಕಾಯಿಲೆ ಉಳ್ಳಯಿಂಗಳ ಕಾಕಿಯಂಡ್ ಬಂದಿತ್ ಯೇಸುರ ಕಾಲ್‍ರ ಬರಿಲ್ ಅಳ್‍ಪ್‍ಚಿಟ್ಟತ್; ಅಯಿಂಗಳೆಲ್ಲ ಯೇಸು ವಾಸಿ ಮಾಡ್‍ಚಿ. 31ಮೂಡಂಗ ತಕ್ಕ್ ಪರಿವಾನ, ಕೈಕಾಲ್ ಬಕ್ಕತಯಿಂಗ ವಾಸಿ ಆನಾನ, ಕುಂಟಂಗ ನಡ್‌ಪಾನ, ಕುರ್‌ಡಂಗ ಕಣ್ಣ್ ಕಾಂಬಾನೆಲ್ಲ ನೋಟ್‌ನ ಜನ ಆಶ್ಚರ್ಯಪಟ್ಟಿತ್, ಇಸ್ರಾಯೇಲಂಡ ದೇವನ ತುದಿಚತ್.
ಯೇಸು ನಾಲಾಯಿರ ಜನಳ ಉಂಬ್‌ಚಿಟ್ಟದ್
(ಮಾರ್ಕ 8.1–10)
32ಪಿಂಞ ಯೇಸು, ಅಂವೊಂಡ ಶಿಷ್ಯಂಗಳ ಕಾಕುವಂಜಿ: ನಾಕ್ ಈ ಜನಳ ಕಾಂಬಕ ದುಂಬ ಬೇಜಾರಾಯಂಡುಂಡ್. ಈಂಗ ನಾಡ ಪಕ್ಕ ಮೂಂದ್ ದಿವಸತ್ಂಜ ಉಂಡ್, ಅಯಿಂಗ ಒಂದು ತಂದಿತ್‍ಲ್ಲೆ; ಒಂದು ಕೊಡ್‍ಕತೆ ಬರಿ ಕೆಲತ್‌ಲ್ ಅಯಿಂಗಳ ಅಯಿಪಕ್ ನಾಕ್ ಕುಶಿ ಇಲ್ಲೆ. ಅಯಿಂಗ ಮನೆಕ್ ಪೋಪಕ ಬಟ್ಟೇಲ್ ಸೊಯ ತಪ್ಪಿತ್ ಬುದ್ದ್ ಪೋಪಲ್ಲಾಂದ್ ಎಣ್ಣ್‌ಚಿ.
33ಅದ್ಂಗ್ ಶಿಷ್ಯಂಗ: ಇಚ್ಚಕ್ ಬಲ್ಯ ಜನಡ ಗುಂಪ್ ತೃಪ್ತಿ ಆಪನೆಕೆ ಈ ಮಣಬೂಮಿಲ್ ಎಲ್ಲಿಂಜ ಒಟ್ಟಿ ಕ್‌ಟ್ಟುವಾಂದ್ ಕ್‍ೕಟತ್.
34ಅಕ್ಕ ಯೇಸು: ನಿಂಗಡ ಪಕ್ಕ ಎಚ್ಚಕ್ ಒಟ್ಟಿ ಉಂಡ್‍ೕಂದ್ ಕ್‍ೕಟತ್. ಏಳ್ ಒಟ್ಟಿಯು ಚೆನ್ನ ಚೆರಿಯ ಮೀನು ಉಂಡ್‍ೕಂದ್ ಶಿಷ್ಯಂಗ ಎಣ್ಣ್‌ಚಿ.
35ಅಲ್ಲಿ ಇಂಜ ಜನಳ ನೆಲತ್‍ರ ಮೇಲೆ ಅಳ್‌ಪಕ್ ಯೇಸು ಎಣ್ಣ್‌ಚಿ. 36ಯೇಸು, ಏಳ್ ಒಟ್ಟಿ ಪಿಂಞ ಮೀನ್‌ನ ಎಡ್‍ತಿತ್, ದೇವಕ್ ವಂದನೆ ಮಾಡಿತ್, ಒಟ್ಟಿನ ಪೊಳ್‌ಚಿತ್ ಶಿಷ್ಯಂಗಕ್ ಕೊಡ್‌ತಿತ್, ಇದ್‍ನ ನಿಂಗ ಎಲ್ಲಾರ್‌ಕು ಕೊಡೀಂದ್ ಎಣ್ಣ್‌ಚಿ; ಶಿಷ್ಯಂಗ ಜನಕ್ ಉಂಬಕ್ ಕೊಡ್‍ತತ್. 37ಎಲ್ಲಾರು ತೃಪ್ತಿಯಾಯಿತ್ ತಿಂದತ್; ಏಳ್ ಕುಕ್ಕೆ ಒಟ್ಟಿ ಬಾಕಿ ಇಂಜತ್. 38ಪೊಣ್ಣಾಳ್‍ವ ಪಿಂಞ ಮಕ್ಕಳ ಕೂಟತೆ ಬರಿ ಆಣಾಳ್ ಮಾತ್ರ ನಾಲ್ ಆಯಿರ ಇಂಜತ್. 39ಬಯ್ಯ, ಅಯಿಂಗಳೆಲ್ಲ ಮನೆಕ್ ಅಯಿಚತ್. ಅಲ್ಲಿಯಿಂಜ ದೋಣಿಲ್ ಅಳ್‌ತಂಡ್ ಮಗ್ದಲ ಎಣ್ಣುವ ಪ್ರಾಂತ್ಯಕ್ ಪೋಚಿ.
Dewis Presennol:
ಮತ್ತಾಯ 15: ಕೊಡವ
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017, New Life Literature (NLL)