Mutendeko 13
13
Abramu wakupatukana na Loti
1Abramu wakafuma mu Eguputo kuruta ku mwera kwa Kanani, iyo na muwoli wakhe, na vyose ivyo wakaŵa navyo. Loti nayo wakaruta nawo pamoza. 2Abramu wakaŵa musambazi chomene. Iyo wakaŵa na vyakuŵeta vinandi, siliva na golide. 3Abramu wakarutilira kwenda kufuma ku mwera kwa Kanani mpaka wakaya kafika ku Betele, ku malo kura wakajintha hema lakhe pakudanga pakati pa Betele na Ayi, 4apo pakudanga wakazenga jochero. Kwenekura Abramu wakasopa Fumu.
5Loti nayo, mweneuyo wakendanga na Abramu, wakaŵa na mberere na mbuzi, ng'ombe, mbumba yakhe, ŵateŵeti ŵanarume na ŵanakazi. 6Ntheura charu kuti chikaŵa chakukwanira chara, kukharamo wose ŵaŵiri pamoza pakuti vyakuŵeta vyawo vikaŵa vinandi chomene mwakuti kukaŵa kunonono kuti wose ŵaŵiri ŵakharemo. 7Ntheura pakaŵa mphindano pakati pa ŵaliska ŵa Abramu na ŵa Loti. Pa nyengo yeneyira ŵaKanani na ŵaPerezi ŵakakharanga mu charu chenechira.
8Ntheura Abramu wakati kwa Loti, “Pareke kuŵa mphindano pakati pa iwe na ine, na pakati pa ŵaliska ŵako na ŵane, pakuti ndise ŵabali. 9Asi charu chose chili panthazi pako? Tiye tipatukane. Usange iwe uti urute ku woko la mazere, ine nditi ndirute ku maryero. Panji usange iwe uti urazgenge ku woko la maryero, ine nditi ndirazgenge ku mazere.”
10Loti wakalaŵiska uku na uku ndipo wakawona kuti dambo lose la Yorodani likaŵa na maji ghanandi kosekose. Dambo lira likaŵa nga ndi munda wa Fumu, panji nga ndi charu cha Eguputo pakurazga ku Zowara. Pa nyengo iyo Fumu yikaŵa yichali yindaparanye Sodomu na Gomora.#Mut 2.10 11Loti wakajisankhira dambo lose la Yorodani ndipo wakarazga ku mafumiro gha dazi. Ntheura ŵakapatukana. 12Abramu wakaya kakhara mu charu cha Kanani, apo Loti wakaya kakhara mu misumba ya mu dambo, ndipo wakajintha hema lakhe pafupi na msumba wa Sodomu. 13Kweni ŵanthu ŵa mu Sodomu ŵakaŵa ŵaheni ndipo ŵakanangira chomene Fumu.
Abramu wakuruta ku Heburoni
14Loti na Abramu ŵakati ŵapatukana Fumu yikati kwa Abramu, “Inuska maso ghako ndipo, kufumira apo uli, laŵiska ku mpoto na ku mwera, ku mafumiro gha dazi na ku manjiliro gha dazi. 15Charu chose icho ukuchiwona nditi ndikupenge iwe na mphapu yako kwa muyirayira.#Mil 7.5 16Nditi ndandaniske ŵa mphapu yako nga ndi fuvu la charu, mwakuti usange munthu wangamanya kupenda fuvu la pa charu, ipo wangapendaso na mphapu yako. 17Wuka ndipo wendere charu mu utali wakhe na mu ufupi wakhe pakuti cheneichi nditi ndikupenge iwe.” 18Ntheura Abramu wakasezga hema lakhe ndipo wakiza kakhara pafupi na makuni ghakusoperako ghakuru gha musoro gha ku Mamure mu chigaŵa cha Heburoni. Penepara ndipo wakayizengera Fumu jochero.
Dewis Presennol:
Mutendeko 13: Tumbuka
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Bible Society of Malawi