Luuk 9
9
Yeesu n hum u hiŋra fidibanɛɛ wia
(Mat 10:5-15; Maak 6:7-13)
1Yeesu yir u hiŋra fidibanɛɛ la, di tɛɛ baa fɔŋŋa bá wer di ra duŋŋi tinnanchɔgaa nɛra ni, di wer ra chaa nɛra, 2ka ŋɔ ú hum baa bá la ga ŋɔ Kɔraawiizi Kora wia di ra chaa nɛra. 3U ŋɔ ba be, “Ií gilɛɛ waa kpa bunni ra la. Ií gilɛɛ waa kpa daŋkpalli, hure ani kebee, di gilɛɛ waa kpa tagtazi anɛɛgaa ra la.#Luuk 10:4-11 4Di ii wa zuu dia la maa, ií du de di ra ba ii lii saŋa. 5Di ii wa la bol maa, di ba waa nyiŋŋi ŋɔ ii du ba be, ií gil baa ka peezi ii naazi doŋa ha de, bá zum lugɔ ba benii a lii. A waa kaa hoo iawaa be.” 6U hiŋra la, la gaa gaagi bola, di ra lizi amaniyesuma la, di ra chaa nɛra bɔr maa.
7Koori Hɛrɔd gba nuu wia naa maa n na ɛɛ. A tiruu, dikuubɛɛwiai, nɛra baŋhina ŋɔwɔɔrɛ lugɔ Jɔɔn Kɔraawiizi Niisɔɔrii izi siu biini.#Mat 14:2-12; Maak 6:14-29 8Baŋhina ge ŋɔ lugɔ Kɔraawiizi dɔgtɛɛ Ɛlijaa izi siu biini di bir ba. Baŋhina kaa ŋɔ lugɔ Kɔraawiizi dɔgtɛɛzi la n faa du de saŋa maa la bɛllɛ izee di kaa ra nyiŋ. 9Hɛrɔd ŋɔ, “Mìŋ́ gillɛ ba teŋ Jɔɔn la nyuu, ka nɛr naa miŋ ɔɔ ra nuu u wia kennaa, anɛɛwɛi? U ra nyiŋŋi gunla un niŋ ɛɛ di wer nau.”#Luuk 23:8
Yeesu n dɛɛzi nɛkpila werge wia
(Mat 14:13-21; Maak 6:30-44; Jɔɔn 6:1-14)
10Yeesu hiŋra la bir ba u be wa bagli wii la maa baŋ ɛɛwɛ tɛu. U kpa baa la ga dugli bol bɛl banna yir Bɛtseida bá wer du ba bɛŋ. 11Nɛkpila la n ɔɔ ra hiŋuu la n wa nuu guŋ, ba duŋŋi u luge la de. U lɛɛ baa de, di ra ŋɔ Kɔraawiizi Kora wia ra tɛɛ baa, di ra chaa banla maa n na wii.
12Wiizi n waa chol la, Yeesu hiŋra fidibanɛɛ la ba u be wa ŋɔ, “Ɛŋ ɛɛ bɔdumaa. Gil nɛra naa la boljigzi ni kooni la n du kɛraa ga nyiŋŋi bɔra bá chɔɔgi ni diwee bá di.”
13Yeesu ŋɔ ba be, “Ií himmaa tɛɛ baa diwee bá di.”
Ba ŋɔ, “Paanuuzi anue ni nyinni anɛɛ bɛnnɛ du yaa be. Gɛɛ i ŋɔ ya la ga yauzi diweere wa tɛɛ a nɛra maanɛi?” 14Ba ŋɔ gunnɛ, dikuubɛɛwiai, nɛra la baala bɛŋ du kagboŋa anue.
Yeesu ŋɔ ba be, “Ií gil ba so sugesuge bɔnnaa tokkoanɛɛ ni fi, bɔnnaa tokkoanɛɛ ni fi guŋŋ wa kaali.” 15Ba ɛɛ guŋ. Ba maa so. 16Yeesu kpa paanuuzi anue ni nyinni anɛɛ la di binni chiŋ, di suŋŋi wiizi du a ni, ka kpaa mɔnni mɔnni ra tɛɛ u hiŋra la, ba lɛɛ kpa ra chiŋŋi nɛkpila la. 17Yeesu hiŋra paagi paanuuzi ni nyinni la baŋ heewe ka ka la, a wer su kɛɛgɔzi fidaanɛɛ.
Pitta n bagli kunla nɛdee n ɛɛ Yeesu wia
(Mat 16:13-19; Maak 8:27-29)
18A hɔl bɛl, Yeesu ra jaami Kɔraawiizi u bɛŋ. U hiŋra ge du u be. U pɛɛzi baa, “Anɛɛ nɛra ɔɔ ra yirinnɛi?”
19Ba ŋɔ, “Baŋhina ra yiriibuu Jɔɔn Kɔraawiizi Niisɔɔri. Baŋhina ge ra yirii Ɛlija. Baŋhina ge ŋɔ lugɔ Kɔraawiizi dɔgtɛɛzi la n faa du de saŋa la bɛllɛ izee di kaa ra nyiŋ.”
20U kaa pɛɛzi baa, “Ka anɛɛ ii ge ra yirinnɛi?” Pitta ŋɔ, “Hinuu Kɔraawiizi Kristo la.”#Jɔɔn 6:68-69
Yeesu n ŋɔ u tɔɔrɔɔ dii ni u siu wia
(Mat 16:20-28; Maak 8:30—9:1)
21Yeesu ŋɔ ba be lugɔ bá ra dazi di gilɛɛ waa ŋɔ nɛr maa be guŋ, 22di ŋɔ, “Mìŋ́ Newee Biibaal daŋ di tɔɔrɔɔkpila. Bol nabɔnzi, Kɔraawiizi Kizeehina Nabɔnzi ani Kɔraawiizi Hɔnzunna la daŋ vɛɛu ha, di gil bá kpuu. Ka u daŋ izi siu biini hɔpizaa ahoro hɔl.”
23U ŋɔ ba maa be, “Nɛr la maa n niŋ hiŋiŋ, ú gil u kipar ka kpa u daakaŋlii sag u baŋaa hɔpizi bii maa di ra hiŋiŋ. 24Nɛr la maa n niŋ gil u miibɔɔ wia aah u siwii, wàá na u hiŋ. Ka hinla maa n niŋ gil i miibɔɔ wia ha dikuu n wia, hìń niŋ na i hiŋ. 25Di i wetto di durnya suma maa, ka haa i hiŋ nawɛɛ bɛɛ tɔnaa i na naanɛi?
26Nɛra la maa n vɛɛ n wia ni n wiŋɔzi naa wia di ra peezi ba digna filaŋkennaa, Mìŋ́ Newee Biibaal daŋ ŋmɛnɛ wa vɛɛ ba ge saŋa la min niŋ kaa wa ba ni n girme, ni n Mɛɛ Kɔraawiizi girme ni u mɛlikananaa ni la. 27Ií gil n ŋɔ wibii maa tɛɛ ia. Ii banla n chigɛ bɔnnaa naa, baŋhina wàá siu mɔɔ, ka Kɔ́raawiizi Kora la ba, bá nau.”
Yeesu duula n birgɛɛ wia
(Mat 17:1-8; Maak 9:2-8)
28Yeesu n ŋɔ wia naa, hɔpizaa alugɔ ŋmantannaazi wa bɛri. Denii u lau Pitta, Jɔɔn ani Jems la ga tinni bizeŋ bɛl nyuu, di ra jaami Kɔraawiizi. 29Unna jaami Kɔraawiizi la, u siwee bɔr bir birgi, u laala gba bir huuhzi paratatata, di ra nyɛgzi. 30Denii ba ŋɔ bá binni di baala banɛɛ du Yeesu be, ba ni Yeesu ra ŋɔ wia. Moosis ni Ɛlijaa du u be la, 31di dɔɔ girme di ra ŋɔ wia la maa n niŋ wa ɛɛ Yeesu Jɛrusalɛm mɔɔ, ka ú haa na ŋmɛnɛɛ kaali u mɛɛ be.
32Pittawaa du de chɔɔ dɔɔ, ka izi di wa na Yeesu girme la ni baala banɛɛ la n chigɛ u be la. 33A baala n na nyiŋŋi ba kaali la, Pitta ŋɔ Yeesu be, “N Dɔɔri, yaa n du ɛnnaa, guŋ wesso. Yaa daŋ du pampannizi ahoro tɛɛ ia, í dɔɔ bɛl, Moosis dɔɔ bɛl, Ɛlija ge dɔɔ bɛl.” Pitta n ŋɔ a wia la, waa zum saŋa la uŋ ŋɔ wia gba.
34Denii baama wa tɔ ba ni zuuuu. Kafɔŋ lau baa. 35Ba nuu loobii bɛl n lii baama la biini, di ŋɔ, “N Biinɔŋŋii la miŋ lizɛɛ labuu keŋ. Ií ra nuu u be.”#Luuk 3:22 36Uŋ wa ŋɔ guŋ tuŋ, di Yeesu bɛnnɛ jaa ka. Wia la baŋ nawɛɛ la, ba waa sɛɛwɛ ba ŋɔ a wia tɛɛ nɛr maa a saŋa, ka siigi.
Biibaal bɛl n dɔɔ tinnanchɔgii chaai wia
(Mat 17:14-18; Maak 9:14-27)
37Hɔpizi, baŋ wa lii giŋgimii la nyuu tuu, nɛkpila ba wa chem Yeesu ni. 38Ba bɛl yiruu di ŋɔ, “N Nabɔma, n na chol i naazii di ra suŋŋii í na n biibaal naa sinyɛna. N biikpaŋkpannɛ a bie. 39Tinnanchɔgii ɔɔ ra izuubuu u ra chɛɛhgi di ra hassi, u nua ɔɔ ra tɔ nuuhaafufuu. U ɔɔ tɔɔruu werge ka haa wa gil. 40N suŋŋi i hiŋra ŋɔ bá duŋŋuu. Ba duŋŋuu huhzi.”
41Yeesu ŋɔ, “Ii filaŋkeŋ hina ɛɛ yarda nyaara ni wichɔgɛɛraa. Ɛrɛɛ birgaa dɔnnɛ ń haa du ii be birgi, ka ii haa zuminnɛi? Ɛrɛɛ kanyittii ń haa di iai? Kpa i biibaal hiŋ ba.”#Jɔɔn 14:9
42Unna ba la, tinnanchɔgii la izuu di kpau ha hɛri u ra hassi. Ka Yeesu hau tinnanchɔgii la ni, dí u lii, u lii. Yeesu kpa bie la ga tɛɛ u mɛɛ. 43Kɔraawiizi fɔŋŋa ni u girme wia tir nɛra la maa werge. Ba ra koobi di ra ŋɔ wia la maa Yeesu n na ɛɛ la wia.
Yeesu n kaa ŋɔ u siu wia
(Mat 17:22-23; Maak 9:30-32)
Banna ŋɔ a wia la, Yeesu ŋɔ u hiŋra be, 44“Ií gil n wiŋɔzi naa min niŋ ŋɔ naa zuu i digna nɛnnɛ. Ba daŋ kpa Mìŋ́ Newee Biibaal du n dɔma nonee biini.” 45Ka ba waa u wiŋɔzi la zɛɛ zummɛ. A suahwɔɔ ba be, ba zumaa huhzi, ka ra ɔm u pɛɛzaa.
Anɛɛ n ɛɛ nɛzeŋ Kɔraawiizi Kora biinei?
(Mat 18:1-5; Maak 9:33-37)
46Denii ba ra bil dɔŋa alugɔ unla n ɛɛ nɛzeŋ ba biini.#Luuk 22:26 47Yeesu n wa zum nfɛrɛ la banna fɛ la, u lau bichala bɛl, di gil u chi u kɛra, 48ka ŋɔ ba be, “Nɛr la maa n niŋ lɛɛ bichala naa dau dikuu n wia, minuu u lɛɛ dau la. Nɛr la maa n lɛɛŋ dau ge, unla n humiŋ labuu u lɛɛ dau la. Nɛr la n kpa u hiŋ tama, waabuu ɛɛ nabɔma ii biini.”
49Jɔɔn ŋɔ u be, “N Dɔɔri, yaa na baal bɛl n kpa i sɔŋ di ra duŋŋi tinnanchɔgaa nɛra ni. Uŋ waa yaa be hinuu ɛɛwɛ la wia, yaa ŋɔ ú gilɛɛ ka ɛɛ guŋ.”#Maak 9:38-40
50Yeesu ŋɔ, “Ií gilɛɛ ŋɔ ú gil. Di ii ni nɛr waa naa, ii nuu ɛɛ kpannɛ.”
Samaria boljiga bɛl hina n vɛɛ Yeesu wia.
51Denii saŋa la Kɔraawiizi n niŋ bir wa kpa Yeesu la u be n na dugli la, Yeesu izi di kutti ra la Jɛrusalɛm, 52di hum baŋhina bá tɔ u see. Ba kaali ga zuu Samaria hina bol bɛl, di ŋɔ bá ɛɛ sirya ú wa chɔɔ de. 53Ka a bol hina waa sɛɛwɛ bá lɛɛu dau, dikuu unna la Jɛrusalɛm la wia. 54U hiŋra Jems ni Jɔɔn n wa zum guŋ, ba ŋɔ u be, “Yaa Dɔɔri, gil ya suŋŋi wiizi, Kɔ́raawiizi gil niŋ lii chiŋ wa chol ba ni, bá siuzi.” 55Yeesu binni baa ka ŋɔ dí ba gilɛɛ waa ɛɛ guŋ. 56Ba kaa ra la bol bɛl.
Yeesu hiŋaa kpolli wia
(Mat 8:19-22)
57Banna vol ŋmɛnɛɛ la, baal bɛl ba Yeesu be wa ŋɔ, “N daŋ hiŋii la bɔr la maa hin niŋ la.” 58Yeesu ŋɔ, “Nyɛgɛzi dɔɔ a bɔɔnii, zumbizi ge dɔɔ a daŋa. Ka Mìŋ́ Newee Biibaalwaa, waa bɔr maa dɔɔwɛ ń zuu chɔɔ.”
59Yeesu ŋɔ bɛl ge be dí ú ra hiŋuu.
U ŋɔ, “N Dɔɔri, gil n la ga hug n mɛɛ mɔɔ, ka ba waa hiŋii.”
60Yeesu ŋɔ u be, “Gil banla n waa Kɔraawiizi miibɔɔ dɔɔwɛ hug bahinaa. Híŋwaa la ga ŋɔ Kɔraawiizi Kora wia ra tɛɛ nɛra.”
61Bɛl kaa ŋɔ, “N daŋ hiŋii, n Dɔɔri. Ama, gil n la dia ga suŋŋi ŋmɛnɛɛ n diahina be mɔɔ.”
62Yeesu ŋɔ, “Nɛr la maa n izee kpa huma ú hum, ka kaa ra binni har, waa dɛg Kɔraawiizi Kora biini zuui.”
Dewis Presennol:
Luuk 9: vag
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.