Luuk 16
16
Balnunzunni bɛl wia
1Yeesu kaa ŋɔ u hiŋra be, “Dɔɔŋ bɛllɛ izee di dɔɔ u balii bɛl n na binni u kuna ni. Denii baŋhina ŋɔ u wia, dí u ra chɔgi u kunaa pɛɛ. 2U yir u balii la pɛɛzuu, ‘Kennaa minna nuu i wia naa, wibiire gɛɛ? Bagliŋ gunla maa hiŋ ɛɛ dɛmɛdɛmɛ kuna la ni, dikuubɛɛwiai, n daŋ lizii i huma naa biini.’
3U balii la fɛ nfɛrɛ di ŋɔ u biini, ‘N dɔɔri n ŋɔ ú liziŋ u huma biini naa, ɛrɛɛ ń ɛɛi? Maa kpeg lugɔ min niŋ par. Di n kaa wa suŋŋi kuna ge ra di, n di hiihzii. 4N zum gunla min niŋ ɛɛ, di n dɔɔri wa liziŋ huma naa biini, nɛ́ra lɛɛŋ ra du ba be.’
5U jaa yir banla maa n di u dɔɔri kima la kpaŋkpaŋa, di pɛɛzi lugli hiŋ la, ‘Aŋmɛnɛɛ i di n dɔɔri kim lai?’
6U ŋɔ, ‘Nuu garwazi kalfa kinnɛ n diu.’ U ŋɔ, ‘Na i kim hɔŋ ni. Kaa sɛbi bɛl á ɛɛ garwazi tokkoanɛɛ ni fi bɛŋ.’
7U kaa yir bɛl pɛɛzi, ‘Aŋmɛnɛɛ i di n dɔɔri kim lai?’
U ŋɔ, ‘Mia kɛɛgɔzi kagboŋ kinnɛ n diu.’
U ŋɔ, ‘Na i kim hɔŋ la ni. Kaa sɛbi bɛl á ɛɛ kɛɛgɔzi kalfaanaazu bɛŋ.’
8Denii u dɔɔri chɔli u balchɔgii la zumaa. Yeesu ŋɔ, ‘Durnya naa hina zum gunla ban niŋ ɛɛ ba dɔŋa hinaa kaali Kɔraawiizi bɔchaaŋ hina, ka bá ŋmɛnɛ wa na tɔna. 9Ií gil n ŋɔ ii be. Ií kpa durnya daama ra nyiŋŋi dammuzi, di a daama waa kaa wa du de, Kɔ́raawiizi lɛɛ ia du u bol la n du de saŋa maa la.
10Nɛr la wia n dɔɔ wibii kuntama ni, u wia daŋ dɔɔ wibii kuŋkpila ni. Ka nɛr la wia n waa wibii dɔɔwɛ kuntama ni, u wia wàá dɔɔ wibii kuŋkpila gba ni.#Mat 25:21 11Di i wia waa wibii dɔɔwɛ durnya daama wia ni, nɛr maa wàá sɛɛ kpa daama himmaa tɛi. 12Di haa wette í binni nɛbɛl kuna ni ani wibii, nɛr maa wàá sɛɛ tɛi i himmaa kuna í ra binni.
13Balii maa wàá wer hum dɔɔra banɛɛ. Di u ŋɔ ú ɛɛ guŋ, u daŋ hah bɛl ka nɔŋŋi bɛl, di ra tɔgzi bɛl ka ra gbɛlli bɛl. Ii wàá wer hum Kɔraawiizi, ka kaa gil kebee ge dɔɔ ia, ii ra hum a ge.’ ”
14Farisizi la ɛɛ kebinyiŋŋee. Awia, ba ɔɔ ra nuu u wiŋɔzii ka ra chuuzuu. 15Yeesu ŋɔ ba be, “Ii ra nyiŋŋuu lugɔ nɛra ra yir ia nɛnanaa. Ka Kɔraawiizi zum ii bampireere. Wia la newea n na tɔgzi, aabuu Kɔraawiizi ra gbɛlli.#Sɛɛ 16:5
16Moosis Hɔŋ ni Kɔraawiizi dɔgtɛɛzi hɔna la du denii guŋŋ wa hel Jɔɔn saŋa la. Denii amaniyesuma la n ɛɛ Kɔraawiizi Kora dii wia la wa lii, ba ra bagli. Nɛra jaa ra hurgi dɔŋa bá zuu u Kora la biini.#Mat 11:12-13 17Chiŋ ni hɛri tunaarɛ du manaŋ kaali Gbɔgjiga bɛl maa pɛɛ birgaa.
18Baal la maa n vɛɛ u haaŋ ka kaa kpa haaŋ bɛl, ɛɛ sɛnsɛnnii. Baal la maa ge n kpa haaŋ la u jaari n vɛɛwɛ, u gba ɛɛ sɛnsɛnnii.#Mat 5:31-32; Maak 10:11-12
Dɔɔŋ bɛl ni Lazarɔs wia
19Dɔɔŋ bɛllɛ izee dɔɔ u laalinanaa la yoola n kpolle di ra laali, di ra di diupazi hɔpizibii maa. 20Nyaari bɛl ge du de. U sɔnnɛ Lazarɔs. U bɔra maa ɛɛ ŋmɛraa. U ɔɔ chɔɔ dɔɔŋ la dominua, 21di ra nyiŋŋi diwee la a dɔɔŋ n diwee a chogli la. Nuuzihina ɔɔ ba waa lenni u ŋmɛra la.
22Denii nyaari la wa siu. Mɛlikazi kpau la u naabaal Abraham bɔr. Dɔɔŋ la ge siu. Ba kpau hug. 23U zuu Sitaani niŋ, di ra di tɔɔrɔɔ werge. Denii u binni di na Lazarɔs la bɔɔnɛɛ, un du Abraham bɔr la. 24U yir, ‘N naabaal Abraham, na n sinyɛna, ka hum Lazarɔs ú kpa u nonibii lii nii ba wa sɔɔni n nuuzuŋŋi, dikuubɛɛwiai, a ra nuumbuu niŋ naa biini.’
25Ka Abraham ŋɔ, ‘N bie, a liizi gunla hiŋ faa di suma i de dui saŋa, ka Lazarɔs ge di dɔgnya la. Ka filaŋkeŋ, waabuu jaa ra di suma di dɔɔ bampirsɔna la, ka hiŋwaa bir ra di dɔgnya. 26Wii naa ge kaa jaa. Bɔɔlunzenzenne du yaa maa baambaaŋ. Di nɛr maa ra nyiŋŋi u lii ɛŋ gilli la ii be naa, u daŋ gilli huhzi. Ii ge wàá wer lii de gilli ba ɛŋ.’
27Denii dɔɔŋ la ŋɔ, ‘Di gunnɛ, n na fɔrgiibuu, n mɛ. Humuu u la n mɛɛ dia, 28n niuna banue la be, di ga ŋɔ ba be bá gilɛɛ waa hiŋ gunla miŋ faa hiŋŋɛ la, di ge wa zuu tɔɔrɔɔ naa biini.’
29Abraham ŋɔ, ‘Ba dɔɔ Moosis ni Kɔraawiizi dɔgtɛɛzi hɔnaa. Gil ba ra nuu gunla hɔna la n na ŋɔ ba be.’
30U ŋɔ, ‘N mɛɛ Abraham, ba wàá nuu. Ka di nɛbɛl izi siu biini di la ba be, ba bampiree daŋ bir.’
31U ŋɔ u be, ‘Di ba waa sɛɛwɛ tɛɛ gunla Moosis ni Kɔraawiizi dɔgtɛɛzi n ŋɔwɛɛ la, di nɛbɛl izi siu biini gba, ka ba wàá sɛɛ tɛu.’ ”
Dewis Presennol:
Luuk 16: vag
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.