Luuk 11
11
Yeesu n bagli wiisuŋŋaa wia
(Mat 6:9-13; 7:7-11)
1A hɔl bɛl Yeesu du bɔr bɛl di ra suŋŋi wiizi. Uŋ wa suŋŋɛɛ tuŋ, u hiŋra ŋɔ u be, “Yaa Dɔɔri, bagli yaa wiisuŋŋaa alugɔ Jɔɔn n faa bagli u hiŋra la.”
2U ŋɔ, “Di ii ŋɔ ií suŋŋi wiizi, ií ɔɔ ŋɔ,
‘Yaa Mɛɛ Kɔraawiizi, yaa ra nyiŋŋi i sɔŋ dɔɔ girme,
di ra nyiŋŋi i Kora ba ɛŋ.
3Tɛɛ yaa diwee ya di zinaa,
4di gil yaa wichɔgaa tɛɛ yaa,
gunla yaa ge n ɔɔ ra gil
yaa dɔŋahina wichɔgaa
di ra tɛɛ baa la.
Hiini yaa wifittii gilɛɛ ɛɛ yaa ya chol.’ ”#1Kɔr 10:13
5U kaa ŋɔ ba be, “Di ii bɛl dɔɔ u dammu, di la u be saŋkara ni, di ŋɔ u be, ‘N dammu, kimiŋ paanuuzi ahoro. 6N dammu bɛl lii yembɛllɛ ba n dia. Maa kummaa dɔɔwɛ ń tɛu ú di.’
7Di i suŋŋuu guŋ, u daŋ tɛi. Wàá ŋɔ i be, ‘Giliŋ! N kar dominuarɛ. N biizi ge du n be di ra chɔɔ dɔɔ. Màá wer izi nyiŋŋi kummaa tɛi.’ 8Ií gil n ŋɔ ii be. Di wàá sɛɛ izi dikuu i nuu dammunaa la wia, ka u daŋ izi dikuu hinna tɔɔruu la wia di tɛi kunla maa hinna nyiŋŋi.
9Ií gil n ŋɔ ii be. Di ii suŋŋɔɔ, u daŋ tɛɛ ia. Di ii ra nyiŋŋi kuŋ u be, ii daŋ nau. Di ii lɔwɔɔ ɛɛ gaafura, u daŋ pilli ia ii zuu u be, 10dikuubɛɛwiai, nɛr la maa n suŋŋuu kuŋ, u daŋ tɛu. Nɛr la maa n nyiŋŋee ge daŋ na. Nɛr la maa n lɔwɛɛ ɛɛ gaafura ge na bɔttɛ ra zuu.
11U bɛɛ biere niŋ ŋɔ ú tɛu nyiŋ, ú sɛɛ kpa hɛrikuŋ tɛuwaa? 12Di u kaa suŋŋuu hal ge, u daŋ kpa nuuma tɛuwaa? Akai! 13Too. Iiŋ ɛɛ nɛchɔgaa ka ɔɔ wer ra tɛɛ ii biizi kunnanaa naa, amɔ, ii Mɛɛ Kɔraawiizi wàá kpa u Dumnanii tɛɛ banla n suŋŋuu laa?”
Yeesu ni Bɛɛlzɛbub wia
(Mat 12:22-30; Maak 3:20-27)
14Denii Yeesu duŋŋi tinnanchɔgii bɛl gɛnii bɛl ni. Tinnanchɔgii la n liwɛɛ la, gɛnii la wer ra ŋɔ wia. A tir nɛra la. 15Ka baŋhina ŋɔ, “Tinnanchɔgaa maa nabɔma Bɛɛlzɛbub fɔŋŋa biinii u wer ra duŋŋi tinnanchɔgaa la.”
16Baŋhina ge ra nyiŋŋi u ɛɛ wikpeg bɛl chiŋ, bá na zum u wibii. 17Yeesu zum gunla banna fɛ di ŋɔ ba be, “Di bol hina waa nuukpaŋ dɔɔwɛ, ba dɔma daŋ kpu baa, bá wia maa chɔgi. Di diahina ge waa nuukpaŋ dɔɔwɛ, ba wia daŋ chɔgi. 18Di Sitaani ni u bol hina ge waa nuukpaŋ dɔɔwɛ ka ra yoo dɔŋa, ɛrɛɛ u kora wer chinɛi? Ka ii ŋɔ dí Bɛɛlzɛbub fɔŋŋaa n kpa ra duŋŋi tinnanchɔgaa nɛra ni. Nau! 19Di ii ŋɔ n na duŋŋi tinnanchɔgaarɛ Bɛɛlzɛbub la fɔŋŋa biini, amɔ, ii hiŋra naa n na duŋŋi tinnanchɔgaa naa, anɛɛ fɔŋŋa biinii ba ge ra duŋŋaa naanɛi? Baabuu niŋ di ii ni ii wiŋɔzi naa seriya, di bagli lugɔ ii hor waa sum. 20Ama, di Kɔraawiizi fɔŋŋa biinii n na duŋŋaa, guŋwaa Kɔraawiizi Kora dii hel iabuu la.
21Di kpegleg kpogli dɔŋkuna ra du u dia tau, wiimaa wàá ɛɛ u kuna. 22Ama, di baal bɛl ballɔ dɔɔ fɔŋŋa kaaluu, u nuu yoo, u daŋ kpegluu di lɛɛ u dɔŋkuna la uŋ faa dɔɔ a tamii lugɔ a daŋ wer lɛɛu la, ka foozi kuna la ge uŋ faa foozee u dɔma be la.
23Nɛr la maa n waa n wia ra sɛɛ, u ra yoombuu. Di waŋ hiinee ra chaali kuna, amɔ, u ra yaaraabuu.
Tinnanchɔgii birbalaa wia
(Mat 12:43-45)
24Tinnanchɔgii n ɔɔ wa lii nɛr ni, ɔɔ ra vol bɔdumazii ra nyiŋŋi bɔr ú so heezi. Di waa bɔr nawɛɛ, ɔɔ ŋɔu, ‘N daŋ bir la dia la miŋ liiwɛ la.’ 25U bir la, di a dia maa chaanɔɔ di kuari nɛnnɛ. 26Denii ú la ga nyiŋŋi tinnanchɔgaa la n chummɛ kaaluu la aniidaanɛɛ, á maa la ga zuu de, baal la wia bir nyaŋŋi kaali gunla uŋ faa duwɛɛ la.”
Suma nuui himmaa wia
27Uŋ wa ŋɔ wia naa, haaŋ bɛl du nɛkpila la biini, di ŋɔ kpegzi ni, “Haaŋ la n lulii, di tɛi il i ɔzi la, u nuu sumaa.”
28Yeesu ŋɔ, “Banla n nuu Kɔraawiizi wiŋɔɔlii di ra hiŋaa, ba nuu sumaa.”#Jems 1:22-25
Baŋ ŋɔ Yeesu ɛɛ wizeŋ wia
(Mat 12:38-42)
29Nɛkpila n faa ra ba u be di ra jaa la, Yeesu jaa ra ŋɔ ba be, “Filaŋkeŋ hina ɛɛ nɛchɔgaarɛ. Ba ɔɔ ra nyiŋŋuu bá na fɔŋŋa wii bɛl, ka haa zum n wibii. Ka màá ɛɛ wiimaa bagli baa. Unnii bɛnnɛ ií kpa zum n wibii, waabuu Kɔraawiizi dɔgtɛɛ Joona wii la.#Joon 1:17 30Gunla Joona wia n bagli Ninɛvɛ hina wibii la, gunnɛ Mìŋ́ Newee Biibaal ge wia wa bagli filaŋkeŋ hina naa wibii. 31Wiifurii nodig wiikakag hɛri Wiche gba daŋ lii Kɔraawiizi seriya dii hɔpizii la biini tɛɛ ii filaŋkeŋ hina baala chɔgri, dikuubɛɛwiai, u faa lii bɔɔnɛɛ maanii ú wa nuu Koori Solomɔn nunzuma la wia. Ka unla n ɛɛ nɛzeŋ kaali Solomɔn la du iawaa benii, ka ii waa sɛɛwɛ tɛu.
32Ninɛvɛ hina daŋ lii Kɔraawiizi seriya dii hɔpizii la biini tɛɛ ii filaŋkeŋ hina chɔgri, dikuubɛɛwiai, Joona n faa bagli baa Kɔraawiizi wia la ba biine faa chɔkkɔɔ dikuu ba wichɔgaa wia, ba gilaa ha.#Joon 3:5 Ka unla n ɛɛ nɛzeŋ kaali a Joona du iawaa benii, ka ii waa sɛɛwɛ tɛu.
Bɔrahɔŋ fintina wia
33Di ba choŋŋi fintina, ba wàá kpau du diisee. Ba wàá kpa kɛɛgɔ gba chig u ni. Akai. Ba daŋ kpaubuu hɔŋ chiŋ ú wer ra chaani banla maa n niŋ zuu de. 34Siwee ɛɛ bɔrahɔŋ fintinaa, di ɔɔ gil u ra na bɔchaaŋ. Di ii siwee wesso, bɔr maa daŋ chaani ii be. Di ii ɛɛ sisɔna hina, ii biine daŋ chaani. Ka di ii ɛɛ sikpegii hina ge, ii biine maa daŋ biri. 35Awia, ií ra du tau nɛnnɛ, ii biine gilɛɛ waa biri. 36Di ii biine maa ɛɛ bɔchaaŋ, bɔbiri maa waa hoo, a maa danna chaani nɛnnɛ alugɔ bɔr la baŋ chiŋŋi fintina, de chaani la.”
Farisizi ni Kɔraawiizi Hɔnzunna jugmaa wia
(Mat 23:1-36; Maak 12:38-40)
37Yeesu n wa ŋɔ wia tuŋ, Farisi bɛl ŋɔ ú ba u nuu ga di. U hiŋuu zuu u dia ga so u diiribɔr. 38Waa ba samaa bɛl dee sammɛ mɔɔ ka so. A tir Farisi la.
39Awia, Yeesu ŋɔ u be, “Ii Farisizi naa, ii ɔɔ loori libizi ni tassazi haraa, ka gil a biine doŋa. Kuŋfoozaa ni wikuna su ii biinee. 40Ii waa nfɛrɛ dɔɔwɛ. Unla n ma newea la, ba ni ba biine maa lɛi u maa? 41Ka ií kpa ii hɛnni ni libizi biini kuna di ra sunzi nyaara. Denii ii wiimaa du wer.
42Farisizi, wia daŋ wa huuzi ia. Ii ɔɔ lizi Kɔraawiizi hotte tɛu lii ii diujigzi maa gba biine. Ka ii waa wibii dɔɔi ni Kɔraawiizi nɔŋŋaa kpawɛɛ su siwii. Ii vii kpa annii wia su siwii, ka kaa ra ɛɛ anla gba ra jaa.
43Farisizi, wia daŋ wa huuzi ia, dikuubɛɛwiai, ii ɔɔ ra nyiŋŋi nabɔŋkassii ii jaamaa diini biine ií ra so, di ra nyiŋŋi nɛra ra tɔgzi ia di ra jaami ia yauzi biine.
44Wia daŋ wa huuzi ia, dikuubɛɛwiai, ii ɛɛwɔɔ lugɔ ŋmama la nɛra n waa na. Ba waa zummɛ ka ra vol a ni.”
45Kɔraawiizi Hɔnzunni bɛl ŋɔ u be, “N Nabɔma, hinna ŋɔ wia naa, yaa Hɔnzunna gbaa i ra gbɛlli la.”
46Yeesu ŋɔ, “Ii Hɔnzunna naa, wia daŋ wa huuzi ii ge gba, dikuubɛɛwiai, ii ɔɔ giluu nɛra chi buntɔga werge maa. Ka ii himmaa wàá sɛɛ kpa ii nonibee gba gbɔgzaa.
47Wia daŋ wa huuzi ia, dikuubɛɛwiai, ii ɔɔ ma Kɔraawiizi dɔgtɛɛzi la ii naabaala n faa kpuwɛɛ la ŋmamaa nɛnnɛ. 48Awia, ii ɛɛ bá kpui daansɛɛ hinaa, di ra sɛɛ ii naabaala wiɛɛlaa la lugɔ a wessoo. Baabuu kpu baa ka ii ge waa ma ba ŋmama. 49A keŋ wiarɛ Kɔraawiizi ŋɔ u Nunzunna Hɔŋ la biini, di ŋɔ, ‘N daŋ hum n dɔgtɛɛzi ni n huŋhunna ba be, bá kpuuzi baŋhina di kaa tɔɔri baŋhina.’ 50Denii n dɔgtɛɛzi la maa baŋ kpuwɛɛ di lii durnya luglaa maa la, ba kpuirɛ ń kaa pɛɛzi filaŋkeŋ hina naa. 51Ba maa chal, di haŋ kpa Abɛl la guŋŋ wa hel Zɛkaria#2Faa 24:20-21 la baŋ faa kpuwɛɛ mbusu lizibɔr ni Kɔraawiizi Bɔnaniinanii baambaaŋ la, ba maa maa challii niŋ du filaŋkennaa hina nonee ni, bá pɛɛzi baa.
52Ii Hɔnzunna naa, wia daŋ wa huuzi ia, dikuubɛɛwiai, ii lizi saafiibii la n na pilli zumaa bɔr labuu. Ii himmaa waa de zuuwɛ, ka kaa tɔ banla n faa ra nyiŋŋi zuui la bɔr.”#Mat 22:15
53Yeesu izi de di ra lii. Unna lii la, Hɔnzunna ni Farisizi baŋhina aah siwii werge maa, di ra pɛɛzuu wia di ra nyiŋŋi u ŋɔ wikpila#Luuk 20:20 54bá he u nua lawuu u wiŋɔzi la biini.
Dewis Presennol:
Luuk 11: vag
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.