Luglaa 9
9
Kɔraawiizi ni Noowa nuukpaŋ ɛɛi wia
1Denii Kɔraawiizi faa kissi Noowa ni u biibaala, di ŋɔ ba be, “Ií lul, di wazi su hɛri maa. 2A sela maa dee n na vol hɛri, zumbizi, kuntuuzaa ani nyinni maanii ninna ɔm ia. N gillɔɔ ii dɔɔ a maa fɔŋŋa. 3N kpaabuu di tɛɛ ia ií ra di, gunla miŋ tɛɛ ia mia, daazi nɔna ani paŋhoori, ii ra di la.
4Ama, ií ra dazi di gilɛɛ waa di sel maa ni u chal, dikuubɛɛwiai, kummaa miibɔɔ du u chal ninɛɛ. 5Di nɛr kpu nɛr, n daŋ tɛr u digni. Di sel ge kpu nɛr, n daŋ kpuu.
6Wibii maa, nɛr la maa
n kpu u dɔŋhiŋ,
dɛkkɔɔ bá kpu u ge
di turgi u chal kim.
Di i kpu nɛr, i kpu kunla
Kɔraawiizi n tawɛɛ
u liubuu.
7Filaŋkeŋ, ií lul biibaala, bá wazi di su a hɛri maa.”
8Denii Kɔraawiizi kaa ŋɔ Noowa ni u biibaala la be, 9“N ni ia ni ii naanna ɛɛ nuukpannɛ filaŋkeŋ, 10di kpa kunnyinee la maa ii nia n lii a muugberzeŋ biini, pir sela, kundɛɛzaa ani zumbizi jaa. 11A parimbuu n na ŋɔ nua lugɔ màá ka gil nii su di chɔgi hɛri ni kunnyinee maa. Màá ka ɛɛ guŋ maa.”
12Kɔraawiizi kaa ŋɔ, “N na ɛɛ wii bɛllɛ ra tɛi, í na di lii nuukpaŋ la n waa tunaa dɔɔwɛ, di du n nii ani a kunnyinee maa n jaa i ni la baaŋ. 13Mìŋ́ Kɔraawiizi daŋ gil n kizee lii baamazi biini, di chi n ni hɛri baambaaŋ, gunna bagli lugɔ màá ka chɔgi hɛri. 14Di n wa gillɔ baamazi tɔ hɛri, n kizee lii a biini, 15denii ya ɔɔ jaa liizi n ni ia ni kunnyinee maa nuukpaŋ la wia. Nii wàá ka su hɛri naa, di chɔgi kummaa miibɔɔ. 16Di mìŋ́ Kɔraawiizi ɔɔ wa na n kizee naa a baamazi biini, n daŋ ɔɔ liizi nuukpaŋ la n waa tunaa dɔɔwɛ maa la, di du mìŋ́ Kɔraawiizi ni kunnyinee la maa dee n du hɛri baaŋ wia.”
17Denii Kɔraawiizi jaa ŋɔ Noowa be, “Too, n kizee hiŋ ra bagli n ni kunnyinee maa n du hɛri naa nuukpaŋ wiarɛ.”
Noowa biibaala wia
18Noowa biibaala Sɛm, Ham ani Jafɛf maanii faa lii a muugberzeŋ biini. Ham la mɛɛ sɔnnɛ faa Keenan. 19Noowa ni u biibaala naa benii newea maa ni ba dee jaa lii, di yaari hɛri naa maa la.
20Noowa faa ɛɛ pattii, di ɛɛ nɛr la n luglɛɛ par grepu daazi#9:20 A grepu daazi ɛɛwɔɔ lugɔ kiliŋkaaguzi daazi ka a waa kpaŋ ɛɛwɛ. koo. 21Too, ka a hɔl bɛl u nyɔɔ siŋ werge, di dɛɛzi chɔɔ u tanti dia biini ni chakpal. 22Denii Keenan mɛɛ Ham nau, di zum lugɔ u mɛɛ chɔɔwɔɔ ni chakpal. U lii bossee di ga kali u kpɛɛnna gunla un nawɛɛ. 23Sɛm ni Jafɛf n wa nuu guŋ, ba kpa wɛjɛ yaau tɔ ba nyaŋa, di bir ba harbɔɔburumbuzi zuu a tanti dia, di kpau tɔ ba mɛɛ. Ba bir ba siweere ta bɔduma, ba gilɛɛ waa na ba mɛɛ chakpal wia.
24Noowa siwee n wa ba hɛri, u nuu gunla u biibaala maa bichala Ham n ɛɛwɛ. 25U ŋɔ,
“Nuuseei di Keenan!
U daŋ ɛɛ u lulla yom.”
26U kaa ŋɔ,
“Ií ra chɔli Kɔraawiizi
la Sɛm n na hum!
Keenan daŋ ɛɛ Sɛm yom.
27Kɔ́raawiizi gil Jafɛf dee wazi!
Ú ni Sɛm naanna
du bɔkpaŋ!
Keenan daŋ ɛɛ Jafɛf yom.”
28Noowa faa haa di binni kalfaahoro ni tokkoanɛɛ ni fii, di lii saŋa la a nii n faa chɔgi durnya maa la. 29U jaa di binni kalfa kabɛl ni tokkoanɛɛ ni fi ka siu.
Dewis Presennol:
Luglaa 9: vag
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.