Luka 13
13
Yesu Tak Á̱niet ba̱ Ghwon A̱ka̱tuk Nyia̱ mba wu
1Di̱n jen a̱ja, á̱ghyang á̱niet si̱ hyia̱ ma̱ng Yesu nang gwomna Bilatut ka̱n tyia̱ á̱ hyaai á̱ghyang á̱niet ba̱ neet mi̱ fam a̱byin Ga̱lili, di̱n jen nang ba̱ ku nshya̱ di̱ nwuat za̱náng Mali Nwuat Za̱nang A̱gwaza ka a̱ni.
2Huhwa Yesu si̱ lyip ba nyia̱, “Nyi fa á̱niet Ga̱lili a̱bya swak á̱kum á̱niet Ga̱lili ka ma̱ng nyia̱ a̱ka̱tuk nyia̱; huhwa mbyia̱ ba̱ nswuo a̱bung kaa? 3Kaai, ku ma̱ chunchwiit! A̱wot nyin meang, si̱ nang nyi ghwon a̱ka̱tuk nyia̱ nyin wu, nyi si̱ khwi A̱gwaza; kalak nyi na kwi mut!
4“Ma a̱nia wa, á̱niet swak ma̱ a̱ni̱nai ba, ba̱ ku kwi di̱n jen nang a̱gba̱ndang a̱di̱ri̱m a̱ shya̱ da̱ a̱fang Si̱luwam ka ku nkwa da̱ mba a̱ni; bibya ku swak ma̱ng nyia̱ a̱ka̱tuk nyia̱ hu ma̱ á̱niet Urusha̱lima baa? 5Kaai, ku ma̱ chunchwiit! A̱wot n bu na tak ma̱ng a̱nyin; ka̱ nyi ghwon a̱ka̱tuk nyia̱ nyin wu, nyi si̱ khwi A̱gwaza bah, nyin meang nyi na kwi mut!”
Kidee tazwa A̱kwon A̱la̱n ka̱ nwai Tyei Sum a̱ni
6A̱wot Yesu si̱ lyiat ma̱ng á̱kpa á̱niet ka di̱ kidee nyia̱, “A̱kwon a̱la̱n#13:6 Lyuut cha̱chaat: “A̱kwon a̱bwabwap.” kya nang a̱tyu khap a̱ghyang ku ti̱p ma̱ a̱byin nggu. A̱ si̱ chong kuzang a̱lyia̱ a̱ cham, a̱ li ka̱ a̱la̱n ka na tyia̱ sum. A̱wot a̱ si̱si̱ shya̱ nang ka̱ tyia̱ sum bah. Ku si̱ byian nggu fwuo. 7A̱wot di̱ ngaan hu, a̱ si̱ nyia̱ ma̱ng a̱tyu a̱ nyia̱ nggu nta̱m ma̱ a̱byin ka a̱ni, ‘A̱lyia̱ a̱tat kya ka nang n fwuong a̱kwon a̱la̱n#13:7 Lyuut cha̱chaat: “A̱kwon a̱bwabwap.” kani ka̱ sum. A̱wot ka̱ si̱ tyia̱ sum bah. Mat a̱nia, tyap ka mat a̱byin! Ka̱ yong wa fwun a̱vwuo ma̱ a̱byin ka.’
8“A̱tyu nta̱m wu si̱ nwuak a̱tyu byia̱ a̱byin wu shim nyia̱, ‘A̱tyoli, bu ya nnwuak a̱kwon a̱kya jen a̱leang. Ghwon nka ka̱ nyia̱ a̱lyia̱ a̱nyiung, a̱wot n na nggo nka shansham, n bu ntyia̱ nka bwum gba̱mgbam. 9Ki̱ ka̱ tyia̱ sum ma̱ a̱lyia̱ chobai, ku yet a̱sham. Ki̱ ka̱ ma ntyia̱ sum bah, huhwa zi̱ na ntyap ka mat a̱byin!’ ”
Yesu Choot Á̱niet Nzwán A̱tuk Mam Fwung
10A̱tuk Mam Fwung A̱yahudawa á̱ghyang, nang Yesu nshya̱ di̱ tyiet mi̱ tutu a̱tung mba hu a̱ni; 11a̱ si̱ li a̱byii̱k a̱ghyang nang a̱ka̱tuk ntswa ta̱luk gu a̱ti̱tak ba a̱ni. A̱lyia̱ swak ma̱ a̱ni̱nai kya ka nang a̱ka̱tuk ntswa wu nghwap a̱byii̱k wu a̱ni. A̱wot a̱ si̱ mi̱n doot a̱ yong a̱ka̱tsak bah.
12Nang Yesu ndi nggu a̱ni, a̱ si̱ yorong gu gu bai, a̱ si̱ nyia̱ ma̱ng a̱nggu, “A̱yang a̱li, á̱ choot ang zwan ang ji!” 13A̱jawa Yesu si̱ byiam guu. A̱wot mi̱ di̱ yong a̱hwa a̱byii̱k wu si̱ kin choot, a̱ si̱ doot a̱ yong ka̱tsak! A̱byii̱k wu si̱ ta̱bat dyep A̱gwaza ba̱t.
14A̱wot a̱kwak a̱son tutu a̱tung A̱yahudawa wu si̱ ka̱n mwai lyen di̱ si̱sak ji Yesu nchoot a̱byii̱k wu A̱tuk Mam Fwung ka a̱ni. Huhwa gu si̱ nyia̱ ma̱ng á̱kpa á̱niet ka, “Mam a̱taa nia nshya̱ na̱ myim nyi nnyia̱ nta̱m a̱ni! Nyi ni̱ mbai mi̱ mam a̱nia, á̱ choot nyin; kang ma̱ng A̱tuk Mam Fwung ka!”
15A̱wot A̱tyoli Yesu si̱ nyia̱ ma̱ng a̱mba a̱ni, “Nyin á̱bubuk á̱niet! Konyan ma̱nyin ni̱ nyia̱ ta̱m a̱tuk Mam Fwung! Mee nyi ni̱ byii̱k nyak ku a̱ka̱za̱nki di̱n tyan la̱p ji a̱tuk Mam Fwung kya, nyi nat ma̱ng a̱nji ji̱ swuo a̱sa̱khwot naa? 16Di a̱yang a̱li wuni, a̱ yet a̱ka̱mbwon Ibrahim kya. A̱wot A̱ta̱nyeang#13:16 Lyuut cha̱chaat: Sha̱tan. ka la̱p gu a̱lyia̱ swak ma̱ a̱ni̱nai kya ka. Ku myim á̱ byii̱k guu á̱ kai ghwon a̱tuk Mam Fwung ka baa?”
17A̱lyiat Yesu na si̱ tyia̱ á̱niet ba̱ nyia̱ fi̱p ma̱ng a̱nggu a̱ni, ba̱ si̱ fa̱k nsum. A̱wot a̱mgba̱m á̱kum á̱niet ka si̱ gwai ba̱t ma̱ng a̱tsatsak nkyang nang gu nyia̱ a̱ni.
Kidee tazwa Tswa Mustat
(Mat 13:31-32; Ma̱r 4:30-32)
18A̱jawa Yesu si̱ nyia̱, “Yihwa nang zi̱ na ntyan Tyok A̱gwaza hu? Ke zang kidee ja zi̱ na ntyan hu kpa̱sai? 19Ku li nang a̱bada̱dei ntswa mustat nang á̱ ti̱p mi̱ a̱ti̱tam a̱ni. A̱wot ka̱ á̱ ti̱p jii, ji̱ si̱ ta ji̱ si̱ laai. Ji̱ na tyia̱ a̱gba̱ndang a̱kwon! A̱wot a̱ka̱man mi̱ kyai tswazwa ni̱ bai na̱ ba̱ ntat a̱ka̱le di̱ mbwak na.”
Kidee tazwa Yit
(Mat 13:13)
20Yesu si̱ bu nyia̱, “Yihwa á̱ bu na ntyan Tyok A̱gwaza hu? 21Ku li nang yit wa nang a̱byii̱k kyiak a̱ si̱ nnyia̱ burodi a̱ni. Ku nang gu ntyia̱ a̱bankyuo yit ka ma̱ chunchwiit, a̱ si̱ kyiai mi̱ nkyuo a̱lka̱ma na mundu tat a̱ni; yit wu si̱ teak a̱ kai a̱mgba̱m nkyuo a̱lka̱ma na nang gu nu a̱ni.”
Kidee tazwa A̱bafa̱fap A̱zana̱nyuo
(Mat 7:13-14)
22Nang Yesu ntyia̱ fwuo a̱ nat Urusha̱lima a̱ni, a̱ si̱ nwuai ma̱ a̱cha̱chet ma̱ng a̱chyuang a̱ka̱keang a̱ tyiet á̱niet a̱ sweap. 23Á̱ghyang á̱tuk, a̱ghyang a̱niet si̱ lyip gu nyia̱, “A̱tyoli, á̱niet ma̱ a̱da̱dei bya na shya̱ san hu a?”
24Yesu si̱ nwuak gu shim nyia̱, “Nyi kwan nyi nwuo Tyok A̱gwaza hu da̱ a̱bafa̱fap a̱zanunyuo. Mat, á̱niet ma̱ a̱di̱di̱t na kwan ba̱ nwuo. A̱wot ba na shya̱ nwuo hu bah. 25Jen nang a̱tyoli wu na nnyim nyinyiit a̱zanunyuo hu a̱ni, nang jen nwuo ji wa ka̱n swaak. Nyi na yong a̱ta̱usa nyi tsot nyinyiit hu naai fat a̱sa̱kut nyia̱, ‘A̱tyoli! A̱tyoli! Khwuk nzi̱t nyinyiit hu la!’ A̱wot a̱tyoli wu na nwuak nyin shim nyia̱, ‘N dyen nyin ku tyan nang nyi neet a̱ni bah!’
26“A̱jawa nyi bu na nyia̱, ‘A̱wot zi̱ ku ya tsa nswuo ma̱ng a̱nwan! A̱wot a si̱ bu tyiet di̱ nvak a̱ka̱keang nzi̱t na!’
27“A̱wot a̱tyoli wu bu na nwuak nyin shim nyia̱, ‘Yok n bu ntak ma̱ng a̱nyin; n dyen nyin bah za̱m! Nyin á̱niet a̱ka̱tuk nyia̱, nyi doot a̱ji nyi ghwon nung!’
28“A̱ja wa nyi na nywai a̱nyunyung ntwei zwa ndyen. Mat nyi na li Ibrahim, Ishaku ma̱ng Yakubu, mbeang a̱mgba̱m a̱yaata̱m a̱kwonu A̱gwaza ba mi̱ Tyok A̱gwaza hu. A̱wot nyin, á̱ na sak nyin ma̱ zan a̱ta̱usa!
29“A̱wot á̱niet na bai á̱ neet mi̱ kuzang fam a̱byin swanta hu; a̱tyin ma̱ng jenshyung, a̱za ma̱ng a̱tak; ba̱ ka swan di̱ tityan swat mba ji ma̱ a̱yet Tyok A̱gwaza wu. 30A̱wot ku myim nyi lyen si̱ huni:
Á̱ghyang á̱niet ba̱ yet a̱ngaan ka ma̱nini a̱ni;
bibya na yet a̱son ka di̱n jen a̱ja.
Ma a̱nia wa, á̱ghyang á̱niet ba̱ yet a̱son ka ma̱nini a̱ni;
bibya na yet a̱ngaan ka di̱n jen a̱ja.”
Yesu Byian Fwuo tazwa Urusha̱lima
(Mat 23:37-39)
31Di̱n jen a̱ja, A̱fa̱risawa á̱ghyang si̱ neet á̱ bai da̱ a̱vwuo Yesu. Ba̱ si̱ nyia̱, “A̱tyoli, a̱gwam Hiridut Antibat chat hyat ang! Ka̱ a chat swuan ang ji, a doot a̱nggang a ghwon a̱vwuo kani!”
32A̱jawa Yesu si̱ nyia̱ ma̱ng a̱mba, “Nyi bwuok nat nyi hyia̱ ma̱ng a̱bang a̱byin a̱wa, a̱ li nang a̱kyong a̱ni, ‘N ni̱ shya̱ a̱ji a̱fwun ma̱ng a̱tson khai á̱ka̱tuk ntswá ba̱ ghwut ma̱ á̱niet. N bu nchoot á̱niet nzwán ba. A̱wot a̱tuk mam tat ka, n na ntyak nta̱m nung na!’ 33A̱tsak a̱lyiat, a̱mgba̱m ma̱ng a̱nia, a̱fwun, a̱tson, ma̱ng a̱ti̱kyia̱, ku yet ta hwa n gya a̱son da̱ a̱chyet nung ka naat Urusha̱lima. Mat á̱ nyia̱ ku myim á̱ hyat a̱ta̱m a̱kwonu A̱gwaza zan bah; si̱ mi̱ Urusha̱lima hwa.
34‘Urusha̱lima! Ka̱a̱t nyin á̱niet Urusha̱lima!
Nyi ni̱ hyaai a̱yaata̱m a̱kwonu A̱gwaza ba.
Nyi bu mang a̱yaata̱m A̱gwaza ba ma̱ng nfang!
A̱ka̱mang kya n ka̱n kwan n tung á̱niet ang ba dundung;
ma̱nang a̱yang nywan ni̱ nkup mman gu a̱tafa nfeap nggu a̱ni.
A̱wot nyi si̱ lak nung ndyo!
35A̱wot ma̱ninika, nyi li!
A̱gwaza na kai A̱li Nwuat Za̱nang nyin ka a̱ ghwon!
A̱wot nyi bu na li nung bah;
si̱ nang nyi hyia̱ nyia̱,
“A̱tyu a̱ bai da̱ a̱lyoot A̱gwaza a̱ni, a̱ na shya̱ a̱li̱ba̱rka!”#13:35 Za̱b 118:26. ’ ”
Dewis Presennol:
Luka 13: TyapNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.