Nta̱m A̱yaata̱m 2
2
1Jen nang mam a̱yet Pentikot hu bu nkaat a̱ bai a̱ni, a̱mgba̱m á̱niet khwi Yesu ba si̱ tung ndung da̱ a̱vwuo a̱nyiung. 2Ma̱nang but á̱ghyi a̱ni, ba̱ si̱ kin fa̱k wun ku khwom ma̱ vwuu a̱ hyap mi̱ chet, neet tswazwa#2:2 Wa̱i a̱lyiat: Tswazwa. Ku fa, “Ma A̱gwaza tswazwa” ku “Kyai tswazwa.” a̱ ba̱ hyat a̱li ka nang ba̱ nshya̱ a̱ni! 3Ba̱ si̱ li á̱kpa nkyang nang a̱ka̱lyera̱p ndong a̱ni, na̱ si̱ ghai á̱ chyok á̱ swan tazwa a̱pyia̱ kuzang a̱yin ma̱ mba. 4A̱za̱za̱rak Ntswa wu si̱ kin tyia̱ kuzang a̱yin ma̱ mba chet, ba̱ si̱ kin ta̱bat lyiat di̱ lilyem ghyáng da̱nang ba̱ mi̱ mmyiam a̱ni bah; ma̱ cha̱chaat ma̱nang A̱za̱za̱rak Ntswa wu nnang konyan za̱nang chet ji a̱ni!
5Di̱n jen a̱ja nang A̱yahudawa ma̱ a̱di̱di̱t ba̱ yet á̱niet fwuong a̱wun A̱gwaza, á̱ swan mi̱ Urusha̱lima a̱ni, ba̱ ku neet mi̱ kuzang a̱byin mi̱ swanta hu. 6Jen nang ba̱ nfa̱k a̱khwom gwun a̱nia a̱ni, á̱niet ma̱ a̱di̱di̱t si̱ tung. Hu si̱ yet konyan kyang a̱ga̱de, mat konyan ma̱ mba ku fa̱k nang á̱niet khwi ba lyiat di̱ lilyem nang á̱ ntyei mba a̱ni!
7Ba̱ si̱ fa̱k a̱ga̱de, ba̱ si̱ ya ndyi̱ri̱m á̱ghyang mba nyia̱, “A̱mgba̱m á̱niet ba̱ lyiat lyiat huni a̱ni, n gyei ba̱ neet mi̱ fam a̱byin Ga̱lili hwaa? 8Ku li ni wa nang konyan ma̱ nzi̱t nfwuong a̱lyiat mba na di̱ lilyem nang á̱ ntyei nzi̱t a̱ni?
9“Nzi̱t bya ba, zi̱ neet mi̱ nfam bibyin Fa̱tiya, Ma̱diya, Ela̱m; á̱ghyang nzi̱t zi̱ neet ma̱ a̱byin Mesopotamiya, ma̱ng nfam bibyin Yahudiya, Ka̱fa̱dokiya, Funtut, A̱siya, 10Fi̱ri̱jiya, Ba̱mfiliya, ma̱ng a̱byin Ma̱sa̱r, ma̱ng nfam a̱byin Li̱biya na̱ shya̱ kpa̱mkpaan ma̱ng Si̱ri̱n a̱ni. Á̱ghyang ma̱ a̱nzi̱t si̱ yet á̱nietchen zi̱ neet Rom zi̱ bai song a̱yet ji a̱ni; 11ma̱ng á̱ghyang nzi̱t zi̱ yet kwai A̱yahudawa, ma̱ng á̱ghyang zi̱t zi̱ yet Nnwap na̱ nwai yet A̱yahudawa a̱ni, a̱wot zi̱ fwuong a̱wun A̱gwaza A̱yahudawa; ma̱ng á̱ghyang zi̱t zi̱ neet ma̱ a̱byin a̱ka̱wa̱tyia̱ a̱sa̱khwot nang á̱ ngyei Ka̱rita a̱ni; ma̱ng á̱ghyang zi̱t zi̱ neet mi̱ fam a̱byin A̱rabiya a̱ni. A̱mgba̱m zi̱t, zi̱ fa̱k á̱ lyiat a̱cha̱chet nkyang na̱ tak a̱mgba̱m chet A̱gwaza hu mi̱ lilyem nang á̱ ntyei nzi̱t a̱ni!”
12Ku si̱ yet mba kyang a̱ga̱de. Ba̱ si̱ tyia̱ ma̱ a̱tai ba̱ si̱ ya nnwuo lyi̱ri̱m á̱ghyang mba nyia̱, “Yihwa nang a̱lama wuni fa?”
13Á̱ghyang á̱niet ma̱ á̱kpa á̱niet ka si̱ ta̱bat mai mba nyia̱, “Ba̱ swuo a̱kan nia; ni̱nia ba̱ hyeng!”
Bitut Shei A̱sham Nkhang Yesu A̱tuk Pentikot
14A̱jawa Bitut ma̱ng á̱kum a̱yaata̱m swak ma̱ a̱nyiung ka si̱ shya̱i á̱ yong a̱zanson. Bitut si̱ ta̱ngam a̱nwuat mi̱ chet, a̱ si̱ nyia̱ ma̱ng á̱kpa á̱niet ka, “Nyin á̱na̱nyiuk nung ba nyi yet A̱yahudawa a̱ni, ma̱ng á̱niet nyi swan mi̱ Urusha̱lima a̱ni, yok n ngwa̱i nyin á̱lyiat nani! Nyi myiai a̱fufwuo nyi fa̱k á̱lyiat nung na! 15Á̱niet bani hyeng a̱kan nia nang nyi nfa a̱ni bah; tswam a̱kubunyiung ja ji a̱tsotson kani! 16A̱wot kyang hu nang Yowel a̱ta̱m a̱kwonu A̱gwaza wu ku lyiat a̱ni, hwa hu:
17‘A̱gwaza nyia̱,
“Di̱n jen ngaan ji,
n na nang a̱mgba̱m á̱niet mi̱ swanta ba
A̱za̱za̱rak Ntswa nung wu gba̱mgbam!
Mman á̱sam ma̱ng mman á̱nap nyin na,
na̱ na shei nkyang da̱ a̱kwonu nung á̱zanson.
Nfi̱ng á̱tyok nyin na na nwuan a̱ma̱bwoi;
ma a̱nia wa, á̱khwukhwop á̱niet nyin ba na laat a̱laat.
18A̱wot, ku á̱khwo nung ba, á̱tyok ma̱ng á̱nyiuk,
mi̱ mam a̱nia,
n na nang mba A̱za̱za̱rak Ntswa nung wu gba̱mgbam.
Mba meang, ba̱ na shei kyang ku na bai á̱zanson a̱ni da̱ a̱kwonu nung.
19N na nyia̱ nkyang a̱ga̱de mi̱ kyai tswazwa,
ma̱ng a̱di̱di̱t a̱lama a̱ na ghwut a̱byin!
Ni̱nia yet a̱sok, ma̱ng long,
ma̱ng a̱dyundyung a̱kyi̱ri̱p a̱chunchung,
a̱ li nang á̱ni̱nian a̱ni!
20Á̱ na bwuak mam hu ku tyia̱ lyin.
A̱wot á̱ tyia̱ zwat ji ji̱ shong nang a̱sok a̱ni,
a̱gba̱ndang mam tyok ma̱ng shi A̱gwaza hu ku sii bai.
21Di̱n jen a̱ja, konyan wa naai A̱gwaza ma̱ng fwuo nyiung,
a̱ na shya̱ san!”#2:21 Jow 2:28-32. ’
22“Nyin á̱niet Isi̱rela, nyi myiai a̱fufwuo, nyi fa̱a̱k! Yesu a̱tyu Na̱za̱ra̱t wa nang A̱gwaza tak nyin kpa̱sai, a̱ si̱ ta̱m ma̱ng a̱nggu. A̱gwaza tak si̱ huni, di̱ tyia̱ Yesu a̱ nyia̱ kuzang tangka̱i a̱ri̱bi̱di, nkyang a̱ga̱de, ma̱ng a̱lama; ma̱nang nyin ma̱ á̱pyia̱ nyin ndyen a̱ni.
23“A̱wot A̱gwaza ku tyia̱ Yesu mbwak nyin di̱ si̱sak ji nang A̱gwaza nda̱p a̱ sak, ma̱ng lyen á̱zanson nggu hu a̱ni. Nyin meang, nyi si̱ tyia̱ á̱ka̱tuk á̱niet si̱ kpang nggu da̱ a̱team a̱khwu, nyi si̱ hyat gu. 24A̱mgba̱m ma̱ng a̱nia, A̱gwaza si̱ ti̱n nggu mi̱ swuo a̱bung a̱khwu. A̱ si̱ ta̱ngam gu ma̱ng swuan ma̱ á̱niet ba̱ ka̱n kwi a̱ni. Mat a̱khwu ka byia̱ chet ku maai ba̱ng nggu a̱ni bah! 25Ma̱nang A̱gwam Da̱wuda ku ndyiat tazwa nggu a̱ni nyia̱,
‘N nwuan A̱tyoli nung wu kuzang jen.
A̱ shya̱ a̱zayak nung,
n na nfa̱k a̱wun bah.
26Mat a̱nia, fwuo nung hu sai,
a̱wot a̱lyem nung ka si̱ dyep gu mi̱ chet ba̱t!
Ku nang n byia̱ vam ku na khwu a̱ni,
n na swan ma̱ng ntyia̱ fwuo.
27Mat#2:27 Ku: “Nang.” a na ghwon swuan nung ji
da̱ a̱vwuo á̱niet ba̱ ka̱n kwi a̱ni bah.
Da̱ nwan, a na ghwon a̱za̱za̱rak
a̱khwo ang wu, a̱ bwui mi̱ lyak hu bah.
28A tyiet nung vak shya̱ swuan.
A̱wot a na tyia̱ nung fwuo sai gba̱mgbam,
di̱n jen nang a nshya̱
dundung ma̱ng a̱nung a̱ni!’
29“Á̱niet Isi̱rela, n na ngbang a̱lyia̱ n dyiat ma̱ng a̱nyin tazwa Da̱wuda, a̱tyia̱ a̱khwop nzi̱t wu. A̱ ku khwu. Á̱ si̱ niat gu. Ba̱ng ba̱ tat a̱fwun, a̱bi nggu ka ni̱ shya̱ ma̱ng a̱nzi̱t. 30A̱wot Da̱wuda ku yet a̱tsak a̱ta̱m a̱kwonu A̱gwaza wa. A̱ si̱ lyen a̱li̱ka̱uli nang A̱gwaza nyia̱ nggu ndyo a̱ni. A̱gwaza ku nyia̱ a̱li̱ka̱uli ma̱ng shyishyi, nyia̱ a̱ka̱mbwon Da̱wuda kya na swan ka̱ nyia̱ tyok da̱ a̱gba̱ndang chuk tyok nggu ji.
31“Da̱wuda si̱ li kyang hu nang A̱gwaza na nyia̱ á̱zanson a̱ni, a̱ si̱ lyiat tazwa doot Kristi a̱tyu nang A̱gwaza kup gu tyok a̱ni; nyia̱ a̱ na doot ma̱ng swuan ma̱ á̱niet ba̱ ka̱n kwi a̱ni. A̱ ku nyia̱, da̱ A̱gwaza na ghwon nggu da̱ a̱vwuo á̱niet ba̱ ka̱n kwi, ku a̱ ghwon vam nggu hu ku bwui mami lyak bah.
32“A̱gwaza ta̱ngam Yesu wuni ma̱ng swuan ma̱ á̱niet ba̱ ka̱n kwi a̱ni. A̱wot a̱mgba̱m nzi̱t, zi̱ ku li kyang huni ma̱ng á̱ghyi nzi̱t ba. 33Ma̱ninika, á̱ nwuak Yesu shi. Á̱ si̱ sak gu da̱ a̱vwuo a̱gba̱ndang shi a̱zayak A̱gwaza, a̱ nyia̱ tyok dundung ma̱ng a̱nggu tswazwa. A̱wot A̱tyia̱ wu si̱ bu nang Yesu A̱za̱za̱rak Ntswa wu nang gu nyia̱ a̱li̱ka̱uli a̱ na ta̱m a̱ni. A̱wot Yesu meang, si̱ nang nzi̱t A̱za̱za̱rak ntswa gba̱mgbam; ma̱nang nyi ndi, nyi si̱ bu nfa̱k a̱fwun a̱ni. 34Mat Da̱wuda wa ku nyeak a̱ nat A̱ma A̱gwaza tswazwa ka bah. A̱wot Da̱wuda ma̱ a̱pyia̱ nggu ku nyia̱,
‘A̱gwaza wa nyia̱ ma̱ng A̱tyoli nung wu;
“Swan da̱ a̱vwuo a̱gba̱ndang shi a̱zayak nung,
35ba̱ng si̱ nat jen nang n na ntyia̱
a shai á̱niet lak li ang ba
ma̱ng kpai a̱ti̱tak ang ji#2:35 Lyuut cha̱chaat: “Kyang saai a̱ti̱tak tafa kpai a̱ti̱tak ang ji.” a̱ni!” ’#2:35 Za̱b 110:1.
36“Mat a̱nia, ku myim nyin á̱niet Isi̱rela, nyi lyen za̱m nang Yesu wuni nang nyi kpang da̱ a̱team a̱khwu wu a̱ni; A̱gwaza khai ngguu a̱ yet A̱tyoli ma̱ng Kristi, a̱tyu nang A̱gwaza kup gu tyok a̱ni!”
37Nang ba̱ nfa̱k á̱lyiat Bitut na a̱ni, na̱ si̱ kpaat ba mi̱ nfwuo mba na. Ba̱ si̱ fi̱k nang ba̱ mbwuo a̱bun, ba̱ si̱ lyip Bitut ma̱ng á̱kum a̱yaata̱m ka nyia̱, “Á̱na̱nyiuk, yihwa zi̱ na nyia̱?”
38Bitut si̱ nyia̱ ma̱ng a̱mba, “Ku yet ta hwa, konyan ma̱ nyin a̱ ghwon a̱ka̱tuk nyia̱ nggu wu, gu bai á̱ nyia̱ gu ba̱ptisman da̱ a̱lyoot Yesu; á̱ ka chi a̱ka̱tuk nyia̱ nyin wu. A̱nia wa A̱gwaza bu na nnang nyin za̱nang A̱za̱za̱rak Ntswa nggu ji. 39Nyin bya nang A̱gwaza wu ku nyia̱ nyin a̱li̱ka̱uli wuni, ma̱ng mman nyin na, ma̱ng Nnwap na̱ nwai yet A̱yahudawa a̱ni, ma̱ng á̱niet ba nang A̱gwaza bu na yei ba̱ ka bai da̱ a̱vwuo nggu a̱ni.” 40Bitut si̱ ya a̱son ma̱ng gba mba ma̱ng á̱lyiat ma̱ a̱di̱di̱t nyia̱, “Nyi naai A̱gwaza gu san nyin di̱ swuo a̱bung, ku chobai tazwa a̱ka̱tuk nche wuni a̱ni!”
41A̱wot a̱tuk a̱kya á̱kpa á̱niet ma̱ a̱di̱di̱t si̱ san á̱lyiat nggu na; ba̱ ku shim tat chyikwop tsat! Ba̱ si̱ nwuak nfwuo mba na, á̱ si̱ nyia̱ mba ba̱ptisman. A̱wot ba̱ si̱ mun á̱pyia̱ ma̱ng á̱kum sot á̱niet khwi Yesu ka.
Swat Ntsa Á̱niet Khwi Yesu ma̱ng Á̱ghyang mba
42A̱mgba̱m á̱niet khwi ba si̱ ntyia̱ a̱lyia̱ di̱ khwi tyiet nang a̱yaata̱m Yesu ba tyiet mba a̱ni. Ba̱ si̱ mun á̱pyia̱ ma̱ng ya nkyayak dundung ma̱ng á̱ghyang mba, (mbeang ya nkyayak a̱di̱dam a̱khwu Yesu hu#2:42 Lyuut cha̱chaat: “Ba̱ kpa̱ra̱m burodi.”,) ba̱ si̱ bu naai A̱gwaza á̱ nchi̱ri̱ng. 43A̱yaata̱m Yesu ba ku nyia̱ nkyang a̱ga̱de ma̱ng a̱ri̱bi̱di. A̱wot na̱ si̱ tyia̱ konyan si̱ nwuak A̱gwaza ma̱ng a̱mba shi ba̱t. 44A̱mgba̱m á̱niet khwi ba ku mun á̱pyia̱ ma̱ng á̱ghyang. Ba̱ si̱ tung dundung á̱ nchi̱ri̱ng. Ba̱ si̱ ka̱u á̱ghyang nkyang mba na dundung. 45Ba̱ si̱ lyiai nkyang mba na nang ba̱ byia̱ a̱ni, ba̱ si̱ ka̱u á̱ghyang mba kurum hu ma̱ cha̱chaat ma̱ng kyang nang konyan chat a̱ni.
46Kuzang a̱tuk ba̱ ku tung mi̱ didyaat A̱li Nwuat Za̱nang A̱gwaza hu. Ba̱ si̱ bu tung á̱ ya nkyayak ma̱ a̱ka̱sa á̱ghyang ma̱ng ya kyayak a̱di̱dam a̱khwu Yesu ma̱ng a̱lyia̱ sai, ma̱ng fwuo nyiung, 47ma̱ng dyep A̱gwaza. A̱wot a̱mgba̱m á̱niet ba si̱ fwuong shok á̱niet khwi ji. A̱wot kuzang a̱tuk A̱tyoli Yesu ku mban á̱niet a̱fai ba̱ san gu a̱ni mi̱ sot á̱niet khwi ji!
Dewis Presennol:
Nta̱m A̱yaata̱m 2: TyapNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.