Luka 21
21
Niku nabune
(Mar 12:41-44)
1N Yesu a kuku kabu ko a ku ni̱bu ki̱ni ka̱mbi̱ri̱mu ki̱mar niku chiyangu a kwa̱se nike. 2Yinu a ku wuka nabune a mar kobo yurau. 3Yinu Yesu a yi ko, “Bi̱yili̱m mi̱n fwa chimi̱nu, niku di̱lusan nabune wunu, a la wu bi̱kamu a niye kwang. 4N kawure a fwe we chi n ki̱ni ki̱ne aya di̱lusan nabunenu a ni chi n ki̱ni ki̱ne kwang.”
Di̱mwal a di swang kuteng
(Mat 24:1-2; Mar 13:1-2)
5Bi̱kamu miyari̱m a le ki̱fwadu yinangu Kan Kwamana Wurchaliman a le ki̱ni kaliyu ni̱bu a mubbi ki̱niyu n ti ki̱li̱mangu ni̱bu a tal we bwiki̱niyu. Aya n Yesu a yi ko, 6“Ti̱ku kali yiya? Ki̱swi ki̱bedu wu neta ya wuka kale a di a wukane, ka nang wuwule ka tungadu.”
Riye ki̱bede
(Mat 24:3-14; Mar 13:3-13)
7Yinu n chi a bi̱u ki̱n ko, “Naba yungke ti̱chituwu ka fwedi fere? Yinu di̱mwalu kanodi yire wu ka yungdu ti̱chitu wu yaka fwede?”
8Yinu a yi chi ko, “Ti̱ma dandan, wuka nii a buti̱du chi̱n we, di̱ne ni̱bu nabwen ka bedi di̱n mi̱n, ‘Kanang wuwule ki̱yidu ko, n ki̱n nang Masiya,’ ti̱nti̱ne, ‘Ki̱swi a lam,’ ti̱bunti̱nu chiwe. 9Yo ta nwe kumbite n ti ti̱kulaniye, ti̱wulu tayi we a mwintuwe ti̱chituwu ka mwedu ka fwedu, aya n ke di swa̱n kute.”
10N ki̱n a chakakku ki̱fwadu ko, Kuu ka kuladu n ti kuu ti̱m n ti ti̱m 11Ti̱mu ka mi̱kadu ki̱ni dukan, chun n ti di̱kumen ka fwedu a fanti nabwen. Ni ku chi taiyitu nabwen we dii.
12“Aya ka ti̱chitu wu yaka fwede, ni̱bu ka taba chi̱nu, ka ni chi̱n riye. Ka yikadu ki̱ni chi̱n a kan muraki̱n n ti loni di̱bi̱nti̱li, ka bedu ki̱ni chi̱n a kakku mati̱m mang n ti kwabnati di̱ne di̱n mi̱ne. 13Ti̱chituwu ka ni chi̱n da wu ta fwa chimi̱n ya̱m bi̱li̱me. 14Ti̱kaiyu ni̱r we ti ta fwadu ko wule. #21:14-15 Luk 12:11-12 . 15Mang ni chi̱n ti̱kwa̱liyitu n ti kassan ke ti̱yim chi ta fwaditu. Ni̱bu a ko chini̱mu a ne medu ka sute ya̱mu ka, ka kwila chitu ta yi chidite. 16Tebu chimu n ti kebu chimu, n ti nami̱n chi̱ntu n ti fati̱bu chimu ka ko chi̱nu, n chi ka chi̱be bi̱kam chimu. 17N kawure ka ko chi̱nu di̱ne di̱n mi̱ne. 18Aya kasi no ki̱riyangi kiin we duru a ne twiyadu. 19Ka ti̱ti ki̱ri̱ng we di̱n mi̱ne ta ya yuku ti̱kuri chi̱ntu ki̱diya kwadu.”
Yesu a fwa yare Wurchalima
(Mat 24:15-21; Mar 13:14-19)
20“Kati̱ ku ni̱bu ki̱rangmu a di̱ku Wurchalima a tibe, ta yindu ko yare ko a lame. 21Yinu ni̱bu a mure Yafudamu a wul kun. Bi̱bu a bi̱ni̱mu a chir, aya wu no a chir we bi̱ne, a leweduwe. 22Nang ki̱swi wu wa ti̱welane ke a rii ti̱tu ni̱bu a mwal a ya̱m Kwamamitu. #21:22 Yow 9:7. 23A no nati̱bu ki̱ni lubimu n ti bi̱bu ki̱bwa̱u bwesi̱mu! Riye nabwen ka le ti̱mu n ti ki̱fwini Kwama we ni̱bu bi̱bu. 24Ni̱bu ka chi̱be bi̱kamu ki̱ni kul, yinu ka kaar bi̱kamu ka kau ka̱bi we kuuti. Kuuti ka faba Wurchalima ka lami̱nti̱ yo ki̱swi ka ride.”
Yo Bwe Nii ka ki̱lade
(Mat 24:29-31; Mar 13:24-27)
25“Ni̱bu ka ku di̱mwalu we dii n ti swangu n ti ki̱switi. We ti̱ti̱nitu kuuti ka ka̱ta̱du ka mutedu di̱ne nabwe diir mwenu n ti ki̱kuuli kiyu. #21:25 Yic 13:10; Ese 32:7; DYo 6:12-13. 26Ni̱bu ka funu di̱ne taiyi chi ki̱lewe ti̱ti̱niye. Dukan ka ti̱ti̱le we bwadiye ka mi̱kadu. 27We ki̱dang kangu, n chi ka ku Bwe Nii ki̱bedu a ti̱twini ki̱ni dukan ki̱ni dwiyen ti̱dui. #21:27 DYo 1:7. 28Yo ti̱chitu wu a mwe ki̱fwede, ti̱kun ti̱ti yinang di̱ne yuki̱ku a lame ki̱dwan.”
Miyaku a tiyang sinang
(Mat 24:25-32; Mar 13:28-31)
29Yinu n Yesu a fwa chimi̱n ki̱ku baltaku ko, ti̱da̱ng tiyang sinangu n ti yikayu tini kwang. 30Ka a mwe ki̱twa̱ba̱ lwangi̱nte, ta kudu n ti̱n ti̱fwan ta yinti̱nu ko didi̱be a lame. 31Aya ka ti̱ku ti̱chitu wu ki̱fwede, ta yindu ti Yaa Kwama a lame.
32Bi̱yili̱m mi̱n fwa chimi̱nu, ki̱dang ki̱ku a ne sudu ka lami̱nti̱ yo ti̱chitu wu ka fwede. 33Dii n ti ti̱mu ka sudu aya ya̱m mi̱mu a ne sudu ko bayim.
34Ti̱ma daandan! Ka ni̱tu chi̱ntu a ma tureng ki̱ni chachabe n ti nori̱n n ti mabwi ti̱ti̱niye, di wu beka fu chi̱nu yinang kul a ne doku bwiyang we.
35Di wuko ka ya̱r kawure yii we a ti̱ti̱nitu. 36Ti̱swe ki̱ni doku bwiyangi kwadu, ti̱nang ma twa̱ba̱ku ditiyu ki̱da̱ng, ke ti̱chir we chi ki̱yadu ka fwede. Di̱ne ke ti me ti̱ti we kakku Bwe Nii yangu.
37Kanang wule diye, n Yesu ki̱ma miyaku we Kan Kwamana Wurchalimanu, aya ka di a lenge, ki̱chiru ki̱yika kunu ki̱ni tini Setuniye ki̱diye kum we bwako. #21:37 Luk 19:47. 38Ki̱ni kunsiin ni̱bu kwang ki̱bedu be ki̱nwe miyaku kangu a Kan Kwamana Wurchalimanu.
Dewis Presennol:
Luka 21: Tula
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.