Luka 12
12
Ki̱kure a di̱bebelin
(Mat 10:26-27)
1We ki̱dang kangu, ni̱bu nabwen a muran ki̱fabati̱ bi̱kami nani. Yesu a mwe kiyi miyari̱m ki̱mu ko, “Ti̱ma daandaan ki̱ni yis ni̱bu Farisamu.” Kanang chikiye ni̱bu di̱bebelinu. #12:1 Mat 16:6; Mar 8:15. 2A ne chi ti̱yingeri ti̱tu a ne kwa̱laditu we. Ti̱nti̱ne, a ne chi ti̱lairi ti̱tu ni̱bu a ne yinditu we. #12:2 Mar 4:22; Luk 8:17. 3Di̱ne yiko, kasi no ti̱ti̱le chi ti̱tu niyang fwa kumitu ni̱bu ka nwedu yo ti̱mu a kwiyane. Yinu chitu ta fwa ta lailaiye a mure kanitu ni̱bu ka nwedu yinang yilang.
Ti̱nwedu tayi we
(Mat 10:28-31)
4“Fati̱bi̱ mi̱m, mi̱n fwa chimi̱nu, ti̱wulu taiyi bi̱bu ki̱chi̱u bwimu we, di̱ne a kuteng ki̱ku, a ne chi̱u ti̱kuritu. 5Aya mang yung chi̱n wu a lwe chi tayi, ti̱nwe tayi Kwama wu ki̱ni dukan ka chi̱u ti̱kuriye, yinu ka marti̱ na fara ki̱rane. Bi̱yili̱m, nang wu ni wul tai kiye. 6Niyang mibu kwa̱la yunu a kobo yuraba? Yiko, n Kwama a tabi̱bu ko wiin. 7Ki̱kumang, n Kwama a yim yinang ka rii dur niinitu wemi̱nangu. Ti̱nwedu taiyi we, di̱ne n ti̱n ti̱la kwa̱la we kakku Kwamangu.”
Nwedu taiyi we, yung dur munu
(Mat 10:32-33; 12:32; 10:19-20)
8N Yesu a yi ko, “Mi̱n fwa chimi̱nu, nii wu ka mwayi kwa̱rikwa̱ri we kakku ni̱bange, n ki̱n n wu mi̱n, Bwe Nii ka yadu ki̱ni ki̱n we kakku ni̱bu ti̱tumbi̱ri Kwamamu. 9Aya wu a koyi kwa̱rikwa̱ri we tibe ni̱be, Bwe Nii ka koti̱du ki̱ni chi we kakku ni̱bu ti̱tumbi̱ri Kwamamu.”
10“Kanang wuwule niye wu ka fwa ya̱m swa̱ba ni̱m a dur Bwe Nii ne, n Kwama ka duki̱mi̱n ti̱du. Aya wu ka fwa ya̱m swa̱bani̱m we dur Fi̱ki̱m bi̱bi Wauwadi̱me, a ne ya duki̱ku.”
11“Yo ni̱bu ka yadu ki̱ni chi̱n a kakku muraki̱ ni̱bu Yafudam ti kakku bi̱duumang n ti bi̱bu ki̱ma mati̱n, ti̱nwedu tayi we, yinu ka a kakku tikakenge, ti̱nwedu taiyi we yinang kangu ta chaki̱ dur chi̱nangu n ti chi ta fwaditu, #12:11-12 Mat 10:19-20; Mar 13:11; Luk 21:14-15. 12di̱ne, Fi̱ki̱m bi̱bi Wauwadi̱mu ka yung chi̱n chi ta fwaditu we ki̱swi wuko.”
Baltaku a dur naba kuli̱n
13Wuka we muraki̱ ni̱bangu a yi Yesu ko, “Naba yungke, yi kemi a kera kula te ni̱ne ware ti mi̱n.”
14N Yesu a ke, a yi ki̱n ko, “Nabare, n wure a yo mi̱n naba mwatake?”
15N Yesu a chakakku ki̱fwa ni̱bu mi̱nu ko, “Ti̱twar! Ti̱yodu ni̱r we kuli̱n ti̱ti̱ninu, di̱ne nabwe kuli̱ne n ke yaku ti̱kuriye.”
16Yinu n Yesu a fwa chimi̱n ki̱ku baltaku ko, “Wuka naba kuli we wu ki̱ni kuu ki̱le chitu yinange.” 17Naba kuli wu a le ki̱ma ti̱kurantu ko, “Kano ka yo chabtu ti̱tu a fi̱re, kano ka madi yire?” 18Yinu nii wu a yi dur ki̱nu ko, angso, chi mang maditu nang ti̱tu. “Mang tunga bi̱niyu ki̱ni kwang, mang mu yidui ke n yo cham mi̱mu we n ti ti̱kantu kuli̱ni mitu. 19Yinu fal mang yi dur mi̱nu mi, m mi̱ni ki̱ni chitu nabwen ti̱tu a ne ridi datii. Sweswe nang nwe ta̱ma̱ng. Chau, no! Nang nwe ta̱ma̱ngu.”
20Aya n Kwama a yi ki̱n ko, m mun di̱r! Mwang bwadu ki̱ni kum wu, yoye n wure ka chau mi̱n kuli ti̱tu mwang mur dur mun mi̱nite?
21Nang tiyangu ka kadu ka nang wuwule niiye wu a mur dur ki̱n mi̱n kuliye aya we kakku Kwamangu, n ki̱n a ne kuliwe.
Ti̱kaiyu ni̱r we
(Mat 6:25-34)
22Yinu n Yesu a yi miyari̱m ki̱mu ko, “Mi̱n fwa chimi̱nu, ti̱kuraduwe ti ta chau wule, ka ta do wule we bwiye.” 23Di̱ne ti̱kuritu a la chabti̱tu, bwiyu a la kuli̱nu. 24Ti̱da̱ng kaartiyu, n chi a fibu chi, a kabu chi, n chi a newe ki̱ni bi̱ni, aya n Kwama ki̱chadu ki̱ni chi. N ti̱n ta labu ki̱ni̱biya? 25Wuka nii we wu ka medu ka su wandiko di̱ne n ki̱n a kai ni̱ra? 26Kangu neta medu ta ma ti̱ti bayi̱mitangu, a mayire ti̱kai ni̱ru we ti̱tu chiye?
27“Ti̱da̱ng kangu fili̱ntu ki̱dwiyedangu, n chi a mabu nangang a kubi̱ kuli̱n. Aya kasi no Mai Solomon a dobu kuli̱nu yinang wuka we tibe chi. 28Ka n Kwama ka do fili̱nu n ti swa̱ki̱ku di̱kirangiye, ki̱ku di ki̱ni ti̱kuri, fi̱nenang ki̱le ki̱range, yinu ni ki̱ni ti̱kuriye ka ya ki̱ki̱le doku? N ti̱n bi̱bu bi̱yili̱m chimu bayi̱me. 29Di̱ne yiko, ti̱kuradu we ti ta chau wule ka ti̱tu ta nodite. Ti̱kuradu chi we dur ki̱nu. #12:29 2Ya̱m 9:3-6. 30Di̱ne kuuti ni̱bu ti̱ti̱nimu a yimbu Kwamamu, ki̱kura ki̱chitu wu aya n Te chi̱n wu a diye a yim chi ti̱baditu. 31Aya ti̱bau Yaa Kwama. Ka ni chi̱n ki̱chitu wu yinang.”
Kuli a bwadi
(Mat 6:19-21)
32“Ti̱wulu tayi we, kwa̱l di̱ti̱ri̱n, di̱ne Te chi̱n wu a diye ki̱nwe ta̱ma̱ng, ka ni chi̱n yaako. 33Ti̱feki̱ kuli̱n chi̱nu ti̱ni ti̱lusani. Ti̱bau yichiyu mi̱n kuli ti̱tu a ne riditu. Fi da̱a̱ku a ne da̱du, ki̱chidi a ne twai ti̱ne. 34Nangki̱n, fi kuli mwitu wemi̱ne, nang fi ni̱r munu we mi̱n ti̱ne.”
Ni ma ki̱yolang
35“Ti̱ma ki̱yolang, fiti̱lati chiyu a dumeduwe. #12:35 Mat 25:1-13. 36Ti̱kau tiyang ka̱be ki̱yam Tewuduwe ko ka ki̱ladu a Yiye ti̱kali ki̱naye. Yo a ki̱lawe a bu kwa̱re, Bi̱nabi̱na a wudu ki̱mi̱n kwa̱ru. #12:36 Mar 13:34-36. 37Ka̱biyu ka nwe ta̱ma̱ng ka Tewuduwe chi a be ya ki̱ni sobu a dabi̱ duum ki̱yang ki̱ne. Mi̱n fwa chimi̱nu, n ki̱n ka suku luke wuduwe a donge, ka yi chidu ko a sweswe, ka nabi̱du ka ni ka nang wuwule chabti̱tu. 38Ka̱bi Tewuduwe ka yadu ki̱ma ki̱yolange ka nwe ta̱ma̱ng kasi no n ki̱n ka bedi ki̱tangti̱lang kuma̱ng. 39Aya ti̱swaan bi̱bu, ka fangko lo a yim yo da̱a̱ku ka bede, n ki̱n a ne ni da̱a̱ku wa̱re ka mang kute we loko. #12:39-40 Mat 24:43-44. 40N ti̱n fal ti̱ma ki̱yolang ti̱n, di̱ne Bwe Nii ka bedu a ki̱swi wu m mun mwang kurabe.”
Ka̱be wu yile n ti wu bwila
(Mat 24:45-51)
41M Biti̱r a bi̱u ko, “Tewuduwe, ki̱ku baltaku a twaiti̱ ni̱na ka mun yi ni̱bi kwanga?”
42Tewuduwe a ke ko, “N wure nang wakili wu ki̱ni kassane? N ki̱n nang wu naba lo ka ni da ka tau kuli̱n di̱du a lokonu yinu ka ni bi̱kamu ka̱bi ki̱ti̱me chi wu a chabte a ki̱swi wu a dakane.” 43Ka̱be ka nwe ta̱ma̱ng ka Tewuduwe a ki̱lawe a ya ki̱n we nangange. 44“Mi̱n fwa chimi̱n bi̱yili̱mu, ka yo ka̱be wu kani̱n da̱ng ki̱mi̱n kuli kitu kwang. 45Aya ka ka̱be wu a yi ko, m babba, Tewuduwe a ti̱kawe, yinu n ki̱n a letuwe bi̱kamu ka̱bi bi̱bari̱m n ti bi̱wuti̱mu, ki̱ngau wu bwa, ki̱ma wu ye, ki̱chadu ki̱nodu ki̱tosadi ki̱ne. 46Naba lo ka ki̱ladu wuka di, yo ka̱be a kurabu beki̱ kange, a ki̱swi wu n ki̱n a swaanbe. Tewuduwe beka wela ki̱nu yinang ka yiti̱ ki̱n ti̱duitu ka tung ki̱nu a bale bi̱bu a yimbu Kwamame.”
47“Aya ka̱be wu a yim chi Tewuduwe ko ki̱badditu yinu n ki̱n a ko yinangu ka tum ti̱tu a dakanitange, ka ya ngachi nabwen. 48Aya ka̱be wu a yimbu chi Tewuduwe ko ki̱badde, yinu n ki̱n a ma chi a lwe ngau chiye, ka ya ti̱twalani bayim. Nii wu ni̱bu a ni nabwene a dakan ka madu nabwen. Aya wu a mwang a ya nabwene, a dakan n ki̱n ka niti̱nu nabwen.”
N Yesu a be ki̱ni bi̱ngai
(Mat 10:34-36)
49N Yesu a yi ko, “M be mang di̱ku ki̱rang we ti̱ti̱nitu, ka nang chikiye, bi̱ngai. No n kur ki̱rangu ka mwe taku. 50Aya m mi̱n ki̱ni batisma mang made didiin aya ni̱r mi̱nu a muten ka lami̱nti̱ yo ki̱chitu wu ka sude. #12:50 Mar 10:38. 51Ti̱kamadu ti m be ki̱ni li̱mang we ti̱ti̱nita? Kwako! Mi̱n fwa chimi̱nu, n be ki̱ni bi̱ngai. 52We ki̱swi wu ki̱ka̱ngu, ka lo ki̱ni ni̱bi bunuwe, bi̱ngaiyu ka le tibe chi, burab kanodu a wuka ki̱swi, bi̱ta kanodu a wuka ki̱swi. 53Bi̱ngai ka le tibe te n ti bwe, ka kadi yiko ti̱n we ne n ti fwa̱nu, we nela ti̱n n ti yire yinu kanodu yire n ti nela.” #12:53 Mik 7:6.
Di̱mwal ki̱swin
(Mat 16:2-3)
54N Yesu a yi ni̱bu ko, “Ka ti̱ku twiye a da̱ we twa̱re, ti̱yidu ko ka swi mwe. Mwe ki̱swi ti̱nu. 55Ti̱nti̱ne, yo ki̱fi̱be twa̱r wuli̱n ki̱bede, ti̱yidu tiko ti̱mu ka bisadu, ki̱bisati̱ni yiko. 56Ni̱bu di̱bebelin, ta medu ta fwadu yinang ka ti̱mu we mi̱nangu n ti dii a ki̱switiye. Wureni a yo ta yimbu fwa chi ki̱fwedu a ki̱dangu ki̱ka̱ngange?”
Dokan ti nii wu ti̱ma ya̱m ware
(Mat 5:25-26)
57“A mayire neta mwata yichiyu mi̱n chi a dakan ta madite? 58Yo kano ti̱ya kan tikake naba mwataki̱nu n ti wu a Mai kememo, funti̱bwi ti̱dokan ti ki̱n we wa̱re ke ki̱la a yo n le kang naba mwatakengu, wuko ka yiddu ka ni di̱karan, di̱karanu ka yikan di̱bi̱nti̱l. 59Mi̱n fwa chimi̱nu, ne mwang chireduwe lo di̱bi̱nti̱le a mwituwe mwang fe ka̱mbi̱ru a mwati̱ mi̱ni̱nu ki̱ni kwang.”
Dewis Presennol:
Luka 12: Tula
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.