Yowana 6
6
N Yesu a chabi ki̱ni ni̱bu a la kuniyi yunu
(Mat 14:13-21; Mar 6:30-44; Luk 9:10-17)
1A kuteng ki̱ku, n Yesu a yabu far di̱dun Ka̱lili, di̱du ni̱bu ki̱yalu ko far Tiberiya. 2Ni̱bu nabwen a bung ki̱mi̱n ti̱n di̱ne n chi a ku chi ka̱ta̱kitu, n ki̱n ki̱madu a ni̱bu ti̱buramitu. 3N Yesu fal a fi̱l kun a swe ware ti miyari̱m ki̱mu. 4Ki̱swi Yiye yabake ni̱bu Yafudame a mwatawe.
5Kangu n Yesu a kuku nuiyu a ku ni̱bu nabwen ki̱be bwa a di̱ki̱nengu, a yi Filibu ko, “Ni ta̱nne chabti̱tu a fi̱re wu beka lwe ni̱bu bi̱be?” 6N Yesu a ma di̱bi̱du di̱du, ko ke ki̱nweeng chitu n Filibu ka fwaditu. Di̱ne Yesu a tu a yim chitu ka madite.
7N Filibu a ke ko, “Kano chabtu ti̱tu muraki̱ ki̱duwang kani̱n chadu a sure diti kuliti turabitu a ne lwedu yinangu n kawure, ka yadi bayi̱m bayi̱mangu.”
8We miyari̱m ki̱mu wuka wu di̱n ki̱nu n Andi̱riya, ke Simun Biti̱r, a yi Yesu ko, 9“Da̱ng be bwele wu ki̱ni ki̱daniyi yunu yiyu a miim seyire, ti chingiyi yurau. Aya ki̱chitu wu ka ma nabwe ni̱be mi̱n wureni?”
10N Yesu a yi miyari̱m ki̱mu ko, “Ti̱yi ni̱bu tiko a sweswe.” Fiko ki̱ni fili̱nu n ti swa̱ki̱ku nabwen kana kwartabu bi̱bu a swemu a mwatan kuniyi yunu. 11N Yesu a da̱u ki̱danniyu a twa̱ba̱ bunitu we di̱Kwama, yinu a wulan a kera ni̱bu mi̱n, n kawure a yiu yinangu ka lwe ki̱nangu, a mati̱ chingiyi yiko. N kawure a ya yinang kangu n ka ki̱badangu.
12Yo n chi a chab a lwenge, a yi miyari̱m ki̱mu ko, “Ti̱mur ti̱buken ti̱tu a kulenitu ke chitu a kaiyaduwe kwang.”
13Ti̱buken ti̱tu miyari̱m ki̱m a muritu a ri ti̱ti̱ngriti kub chiri turau. Kanang chikiye, ti̱buken seyire ti̱tu ni̱bu a chau we ki̱danni bali yunu a dubitu.
14A kuteng ki̱ku ni̱bu, a ku chi ka̱ta̱ki ti̱tu n Yesu a mangitangu, n chi a yi ko, “Ki̱kumang, wu nang fa̱ku Kwama#6:14: Da̱ng Yow 1:21. wu ka be ti̱ti̱niye.”
15Yinangu Yesu a swaan ko ni̱bu bi̱bu ki̱baddu beka tau ki̱ni dukan ka ni ki̱n maiyangu, a kun a ki̱lati̱ kunnuwe, n ki̱kun.
N Yesu a ya yayu a dii a mwe
(Mat 14:22-33; Mar 6:45-52)
16Yinangu di a lengu, miyari̱m ki̱mu a suu bwa fare. 17Ti̱mu a mwe ki̱sedu we ki̱swi wuko, aya n Yesu a tibu be fi a di̱chiye. Miyari̱m ki̱mu a le kwa̱mbi̱re mwe ki̱yabu faru ki̱yika Kafanawu. 18Ki̱dang kangu, ki̱fi̱be fare a bwilan, ki̱fi̱be wuduwe a mikku faru. 19N chi a si kwa̱mbi̱re mwe yinang siriyi#6:19 siriyu: Si̱re nang Kilomita ki̱ni yi bati̱le. Yuunu ka yurukune yinu n chi a ki̱la ku Yesu ki̱yadu a mwe, ki̱be bwa kwa̱mbi̱re mwe, miyari̱m ki̱mu a nwe taiyi. 20Aya n Yesu a yi chi ko, “M mi̱n! Ti̱nwedu taiyu we.” 21Yinu fal n chi a ke ko a le kwa̱mbi̱re mwe a lam bwanu n chi ki̱yade.
Ni̱bu a babba Yesu
(Mat 14:22-33; Mar 6:45-52)
22Bafi̱nenangeko, ni̱bu a swe a ki̱ti̱ku fari̱mu, a swaan ko kwa̱mbi̱re mwe a be fiko win, n chi a twar miyari̱m Yesumu a lewe kwa̱mbi̱re mwe, n chi, n chikun. N Yesu a lebu. 23Aya yikai kwa̱mbi̱ri mwei a benga bi̱n di̱du a Tiberiyanu, a be ti ki̱dwang n ti finu ni̱bu a chan ki̱danniye a kuteng ki̱ku, n Tewuduwe a twa̱ba̱bunitangu. 24Tiyangu ni̱bu a ku a ne Yesu we fiko ka miyari̱m ki̱mangu, n chi a le kwa̱mbi̱re mwe a yika Kafanawu ki̱babba Yesu.
N Yesu ki̱danne ti̱kuriye
25N chi a ya Yesu a ki̱ti̱ku lang, n chi a bi̱u ki̱n ko, “Tete, naba yungke, m be fi fere?”
26N Yesu a ki̱nta chi ko, “Bi̱yili̱m tibaiyedu di̱ne ta chau ki̱danniyu ta riin fure. Aya n ke di̱ne ta ku chi ka̱ta̱kite.” 27Ti̱madu nangang baku chabtu ti̱tu ka kaiyadu kaiyanetuwe. Ti̱ma nangang baku chabtu ti̱tu a ne kaiyadu kaiyadi, ti̱tu ki̱ni ti̱kuri ki̱diya kwadi. Ti̱tu nang chabti̱tu Bwe Nii ka ni chi̱nitu. N Kwama a tu a ma di̱mwar di̱du ka swani̱n Bweko wu n ki̱n a ke ki̱ne.
28Ni̱bu bi̱bu a bi̱u Yesu ko, “Nang ma wule ke a ri ki̱ke Kwama?”
29N Yesu a ke ko, “Chitu n Kwama ki̱baddu ta maditu nang ti̱tu. Kanang chikiye, ti̱ke bi̱yili̱m we wu n ki̱n a tumme.”
30Yinu ni̱bu bi̱bu a bi̱ti̱ Yesu ki̱da ko, “Yoye chi ka̱ta̱ki ti̱tu mwang madu ke ni̱n ku ni̱n ke bi̱yili̱mitu nang ti̱ti̱le? Mwang ma wureni? 31Kanang chikiye, Tukebi̱ ni̱mu feredimu, a chau manna#6:31 Manna: Manna chabtu ti̱tu n Kwama a tum Yisrela mi̱ne a di we ki̱dangu n chi a nwe chun a di̱kirangu. we di̱kiru, yinangu ni̱bu a mwalangu ko, ‘A ni chi chabti̱tu a chirenga bwadi ke a chau.’ ” #6:31 Chi̱ 16:4,15; Sa̱b 78:24.
32Yinu n Yesu a ke chi mi̱n a yi ko, “Bi̱yili̱m mi̱n fwa chimi̱nu nii wa ni chi̱n chabtu bwadite n ke Musa, aya Temi nang wu ki̱ni ki̱danniyu siiniye yiyu a bwadiyu. 33Ki̱danni Kwama nang ki̱n wa suwe a dii ki̱ni ni̱bu ti̱ti̱nimu ti̱kuriye.”
34N chi a yi ko, “Tewuduwe, nang ni ni̱n ki̱dum chabti̱m bi̱bi kwadu.”
35N Yesu a ke chi mi̱n a yi ko, “Mi̱n nang chabtu ti̱tu ki̱ni ti̱kuritu. Wa be a bwan di̱mi̱ne a ne nwetu chunu we ki̱ki̱da. Wu a ke bi̱yili̱m a di̱mi̱ne, a ne ka nweeng dimwenu we. 36Aya tiyangu ma fwa chimi̱nangu, ti̱kui aya ta kebu bi̱yili̱mu we di̱ mi̱ne. 37Ni̱bu bi̱bu n Kwama a niiyimu kwang ka be bwa a di mi̱ne, wa be bwa a di̱mi̱ne nemang koonduwe. 38N suwe a bwadi, n ke di̱ne mang ma ki̱ke miye aya mang ma ki̱ke wa twiye. 39Chi wa twiye a ketu, n laiyu bi̱bu a niimu we ko win, aya ke n kuku chi we di swan kute. 40Chi n Temi ki̱ badditu nang ti̱tu: Ni ki̱da̱ng Bwe, ki̱keti̱ bi̱yili̱m we di̱ki̱ne ki̱ni ti̱kuri ki̱diya kwaditu mang kukku ki̱nu we a di swan kute.”
41Yinu ni̱bu Yafudam a le kungakunga ki̱ni Yesu di̱ne a yi ko, “Mi̱n nang ki̱danne wa suwe a bwadiye.” 42Ni̱bu Yafudam a yi ko, “Nii wu n ke Yesu, bwele Yusufu wu n ne ki̱n n ti Teki̱n niyang yima? A mayire ka yidu ko ki̱suwe bwa a diye?”
43N Yesu a ki̱nta chi a yi ko, “Ti̱madu kungakunga we bwiti chiyu. 44A ne nii ka be fi a di̱mi̱ne we, ka n ke wu Te a tume a di̱mi̱ne, mang kukku ki̱nu we di swang kute. 45A mwal we tatti̱ki̱dai fa̱ku Kwamayu ko, ‘N Kwama ka miya chimi̱nu, n chi ki̱ni kwang,’ aya wa nwe ti wa miyawe Te, ki̱be bwa a di̱mi̱ne.#6:45 Yic 54:13. 46A ne ni a kuun Te we, kana ki̱n wa be we bwa di̱Kwama. N ki̱n n ki̱kun a kuun Te we.” 47Bi̱yili̱m mi̱n fwa chimi̱nu, ka n wure wa ke bi̱yili̱m a di̱ mi̱ne ki̱ni ti̱kuri ki̱diya kwaditu.
48“Mi̱n nang ki̱danne wu ki̱ni ti̱kuriye. 49Tukebu chi̱remu feredimu a chau manna we di̱kiru, aya a mwintuwe n chi a bwa. 50Aya chabtu ti̱tu ki̱suwedu a diitu nang ti̱tu, nii ka chau ki̱danni Yiye, a ne bwadu. 51M mi̱n nang chabtu ti̱kuri ti̱tu a suwe a bwaditu. Ka wuwule nii wu ka chau chabtu ti̱te, a ne bwadu ki̱diya kwadu. Chabtu ti̱tu nam bwimiye wu mang nidu ke ti̱ti̱nitu a ya ti̱kuri ki̱diya kwadite.”
52Ni̱bu Yafudam a le ki̱tuka ya̱m bi̱bu ki̱ni dukan we bwiti chiyu ko, “A mayire nii wu ka yidu ko ka ni chi̱ni nam bwikiye ni wude?”
53Yinu n Yesu a yi chi ko, “Bi̱yili̱m, mi̱n fwa chimi̱nu, ka ta wubu nam Bwe Nii, ta noti̱bu ki̱tum mi̱me, ti̱newe ki̱ni ti̱kuri we bwi chiyu. 54Kwang ka nang wuwule niye wu ki̱wu nam miye ki̱ noti̱ ki̱tum mi̱me ki̱ni ti̱kuri ki̱diya kwaditu, ma kuku ki̱nu fal. 55Di̱ne nam bwi miye nang chabti̱tu siinitu, ki̱tum mi̱mu nang chi ti̱noriti siinitu 56Nii ki̱wu nam bwi miye, ki̱noti̱ ki̱tum mi̱me, ki̱swedu we bwi miyu m mi̱n wetuwe a yikiyu. 57Wu kure Te a twiye, mi̱nkadu di̱ne ki̱ne. Yiko wa wu mi̱n a kau chabtu kiye, ka swedu di̱ne mi̱n. 58Wu nang ki̱danne wa suwe a bwadiye. A newe yinang ki̱danne wu tukebi̱ chim a chau, a bwarane. Aya ka nang wuwule niye wa chau ki̱danne we, ka kaddu ki̱diya kwadu.”
59N Yesu a fwara ya̱mi yiyu a ki̱swi wu n ki̱n a yaki̱ miyadu a kan muraku di̱du a Kafanawu.
Miyari̱mu nabwen a du Yesu
60Kangu n chi a nwe ya̱m bi̱bangu, nabwen we miyari̱m ki̱mu a yi ko, “Ya̱m bi̱bu a ma bwar wure ka kedu.”
61Yinangu n Yesu a ku kungakunga a le tibe miyari̱m ki̱mangu. A yi chi ko, “Chi mang fwa a kai chimi̱n ni̱ra? 62Yinu ta ma wule ka ti̱ku Bwe Nii ki̱fi̱lu ki̱yika bwanu n ki̱n a bemi̱ne? 63Fi̱ki̱mu nang ti̱kuritu. Nam a nibu ti̱kuri. Chi mang fwa chimi̱ne Fi̱ki̱m n ti ti̱kuri. 64Aya bi̱kam chimu we bi̱bu a kebu bi̱yili̱li̱mu.”
N Yesu a tu a yim bi̱bu a kebu bi̱yili̱mu feredi n ti ki̱n wu ka kwa̱l ki̱ne.
65Yesu a ki̱la fwa chimi̱n ko, “Nang chi a yo ma fwa mi, a ne ni ka medu ka be fi a di̱ mi̱ne we, ka n ke wu Te a ke ki̱mi̱ne.”
66Di̱ne ya̱m bi̱bu Yesu a fwamu, nabwen we miyari̱mu a du ki̱n a bun ki̱mi̱nti̱bu.
67Yinu n Yesu a bi̱u miyari̱m ki̱mi kub chiri burabi̱mu ko, “N ti̱n ti̱badu ta yika ti̱na?”
68Simun Biti̱r a ke ki̱mi̱n ko, “Tewuduwe, nang ya bwa a di̱wure? Mun nang nii ki̱ni ya̱m bi̱bu ki̱ni ti̱kuri ki̱diya kwadi̱me. #6:68-69 Mat 16:16; Mar 8:29; Luk 9:20. 69Ni̱n fal ni̱n ke bi̱yili̱mu, ni̱n yinti̱n ko m mun nang wu wauwade wu Kwama.”
70Yinu n Yesu a ke ko, “N sutu chi̱ni kub chiri burau, aya wuka chi̱n n Setan.”
71Kanang chikiye, ki̱fwa Yafuda, bwele Simun Yiskariyoti, di̱ne nang nii yaka kwa̱l ki̱ne, kasi ki̱ku n ki̱n wetuwe miyari̱mi kub chiri burabi̱mu.
Dewis Presennol:
Yowana 6: Tula
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.