約翰 4
4
耶穌㧯撒馬利亞个婦人家
1法利賽人聽講耶穌收學生㧯行洗禮比約翰較多。 2(其實，耶穌毋識親身為麼人行洗禮，係厥學生行洗禮。) 3耶穌知有這個傳說，就離開猶太，倒轉去加利利； 4佢所行个路一定愛經過撒馬利亞。
5佢來到撒馬利亞个敘加城，離雅各給厥孻仔約瑟个土地無幾遠； 6雅各井就係在該位。耶穌因為行路盡𤸁，就坐在井堘；該時差毋多係當晝。
7有一個撒馬利亞个婦人家來打水；耶穌㧯姖講：「請你分兜水𠊎啉。」 8(厥學生已經去街路買食物。)
9 撒馬利亞个婦人家應耶穌講：「你係猶太人，𠊎係撒馬利亞个婦人家，你樣會㧯𠊎討水啉哪？」 (原來猶太人㧯撒馬利亞人無來往。)
10耶穌應講：「若係你知上帝个恩典㧯這下對你討水啉个係麼人，你早就會求佢，佢也早就會將生命个水給你。」
11該婦人家講：「先生，你無打水个東西，井又恁深，你愛去㖠位拿生命个水呢？ 12𠊎等个祖先雅各留這口井給𠊎等；佢自家、厥子女，㧯佢个頭牲全部啉這口井个水；敢講你恅到你比佢還較大係麼？」
13耶穌應講：「啉這水个人全部還會再嘴燥； 14總係啉𠊎所給佢个水，該人就永遠毋會再渴。𠊎所賜个水會在佢底背成做泉源，一直湧出生命个水，使佢得到永遠个生命。」
15該婦人家講：「先生，請你將這個水給𠊎，使𠊎永遠毋會渴，也毋使再來這位打水。」
16耶穌㧯姖講：「去喊若老公，正倒轉來。」
17該婦人家應講：「𠊎無老公。」
耶穌講：「你講你無老公，無毋著。 18你識有五個老公，這下同你共下个乜毋係若老公。你講个盡著。」
19婦人家講：「先生，𠊎看出你係一個先知。 20𠊎等撒馬利亞人个祖先在這山頂敬拜上帝，你等猶太人就講耶路撒冷正係敬拜上帝个所在。」
21耶穌㧯姖講：「婦人家，愛信𠊎！時間會到了，你等毋會再來這山頂抑係去耶路撒冷敬拜天父。 22你等撒馬利亞人毋知你等所拜个係麼人，𠊎等猶太人知𠊎等所拜个係麼人，因為救恩係對猶太人來个。 23總係時間會到了，這下就係，真實敬拜天父个，愛用心靈㧯誠實敬拜，因為天父愛這種个人敬拜佢。 24上帝係靈，敬拜佢个人一定愛用心靈㧯誠實來敬拜。」
25婦人家㧯佢講：「𠊎知該稱做基督个彌賽亞愛來，佢來就會將一切个事㧯𠊎等講。」
26耶穌應講：「𠊎，這下㧯你講話个，就係佢！」
27這時，耶穌个學生倒轉來。佢等看到佢㧯一個婦人家講話，感覺盡奇怪，總係無人問該婦人家：「你愛麼介？」抑係問耶穌：「你做麼介㧯姖講話？」
28該婦人家放下姖个水罐仔，轉去城內，對大家講： 29「你等來看！有一個人將𠊎一生所做个事全部㧯𠊎講出來；佢敢係基督嗎？」 30大家就出城去看耶穌。
31這時，學生喊耶穌講：「先生，請食兜東西。」
32耶穌應講：「𠊎有東西好食，係你等所毋知个。」
33學生就彼此議論講：「敢講有人拿東西給佢食係麼？」
34耶穌㧯佢等講：「𠊎个食物就係遵行『差𠊎來个』个旨意，又完成佢交給𠊎个工作。 35你等講：『加四個月正係收成个時節。』𠊎㧯你等講，昂頭看該兜田；五榖已經熟了，做得收割了！ 36收割个人得到工錢，為永遠个生命積存五榖，使委種个㧯收割个一同快樂。 37『前人栽種，後人收成』這句話係真實个。 38𠊎差你等去收割毋係你等耕个田；別人辛苦，你等享受佢等辛苦个成果。」
39該城有盡多撒馬利亞人信耶穌，因為該婦人家講：「佢將𠊎一生所做个事全部㧯𠊎講出來。」 40該兜撒馬利亞人看到耶穌，就要求佢同佢等共下住；所以耶穌在該位住兩日。
41因為耶穌所講个道理，信佢个人就還較多。 42佢等㧯該婦人家講：「𠊎等這下信，毋係因為你所講个話，係因為𠊎等親身聽到佢个話，知佢實在係世界个救主。」
耶穌醫好一個大官个孻仔
43耶穌在該位住兩日以後，就去加利利。 44佢自家識講：「先知在自家个家鄉係毋會受人尊重个。」 45耶穌一到加利利，該位个人全部盡歡迎佢；因為佢等在耶路撒冷過𨃟過節个時，有看到佢所做一切个事。
46耶穌又倒轉去加利利个迦拿，就係頭擺佢變水做酒个所在。該地方有一個大官，厥孻仔在迦百農發病。 47佢一聽到耶穌對猶太來到加利利，就去見佢，求佢去迦百農醫好厥病到會死个孻仔。 48耶穌㧯佢講：「你等若毋係看到神蹟奇事，總係毋信。」
49該大官應講：「先生，求你在吾孻仔吂死以前同𠊎共下來去。」
50耶穌對佢講：「轉去，若孻仔好了！」
該人信耶穌个話就轉去。 51在路上，厥僕人堵到佢，㧯佢講：「你个孻仔好了！」
52佢問佢等，厥孻仔係幾時好起來个。佢等回答講：「昨晡日下晝一點鐘个時，燒就退。」 53做阿爸个想起，堵好係耶穌對佢講：「若孻仔好了」該時節。所以，佢㧯佢一家人全部就信。
54這係耶穌對猶太倒轉加利利後所行个第二個神蹟。
Dewis Presennol:
約翰 4: THV12Hdb
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2012
All rights reserved
© 台灣聖經公會版權所有 2012