Tio 17
17
Uvaʼs ijalp tilix quBʼaal Jesuus
Kuxh 9.2-13; Luk 9.28-36
1Vajqilichetz vet qʼij talt Jesuus vikameʼ tuchʼ u titzʼeʼv inpaqte, tul tiqʼo Jesuus Luʼ s-tiʼ tuchʼ Jakoovo tuchʼ Xhun u titzʼin Jakoovo. Tul yekich jaʼ Jesuus viʼ val u nimla vitz tuchʼ oxvaʼl inqʼa nikich itxhus tibʼ s-kʼatza. 2Tul ech ivatz inqʼa nikich itxhus tibʼ kʼatz Jesuus, jalp tilix Jesuus. Tul litzʼkabʼinyichxh vet ikaʼy Jesuus, eche tilix u qʼij. Tul oqxhich vet isaqal u toksaʼm Jesuus, eche tilix isaqbʼeʼ.
3Yaʼne ajtxh motx til inqʼa nikich itxhus tibʼ kʼatz Jesuus uvaʼ atich vet Moisees tuchʼ Eliias kʼatz Jesuus. Tul sebʼtichaq iyolon vet tuchʼ Jesuus. 4Tul ech tal vet Luʼ te Jesuus s-eche: —¡QuBʼaal, bʼaʼn uvaʼ laʼ kaj oʼ tzitza! Pet axh laʼ alon, tul toq qubʼit oxvoʼq tal patxh. Vaʼletz eetz; vaʼt tetz Moisees; atz vaʼt tetz Eliias, —xeʼt Luʼ.
5Yeʼnaqichetzxh yaʼoq iyolon Luʼ, tul ajtxh motx til ikuʼl val u suʼtzʼ s-tiibʼa, uvaʼ txilanyichxhtuʼ. Tul ajtxh motx tabʼi iyolon tzaan val u qul xoʼl u suʼtzʼ. Tul ech tal s-eche: —Aʼetz naqe vinKʼaol uvaʼe, uvaʼ kamxh in s-tiʼ. Tan aʼ naq nik chiibʼisan u vaanima. Aʼetz eqej kam uvaʼ nik tal naq, —xeʼt u qul.#Isaiias 42.1; Tio 3.17; Kuxh 1.11; Luk 3.22
6Tabʼietz vet inqʼa nikich itxhus tibʼ kʼatz Jesuus u yol, tul mam xoʼval motx bʼanonaq veteʼ. Atz ijoqbʼaaq vet tibʼ t-txʼavaʼ.
7Yaʼne ijetxhoʼk tibʼ Jesuus kʼatz inqʼa nikich itxhus tibʼ s-kʼatza. Tul junun pal ikant Jesuus. Tul ech tal Jesuus s-eche: —Txakpoq ex. Tul yeʼ xoʼv ex, —xeʼt Jesuus.
8Yaʼne motx saqin veteʼ. Tul ajtxh til yeʼxhabʼil atich veteʼ. Pet taʼn kuxh Jesuus atich vet s-junal.
9Aalichetz vet ikuʼl Jesuus viʼ u vitz tuchʼ inqʼa nikich itxhus tibʼ s-kʼatza, tul itiila bʼekʼu Jesuus s-te. Tul ech tal Jesuus s-eche: —Atoq kuxh sekʼuul kamxh uvaʼ qat etila. Atz yeʼxhabʼil invaʼq laʼ etal s-te. Pet yaʼn laʼ etaltaʼ uvaʼs laʼ vitzʼeʼv vet inpaqte, in, u Kʼaola uvaʼ qat bʼen s-alam aanima, —xeʼt Jesuus.
10Yaʼne ech tal inqʼa nikich itxhus tibʼ kʼatz Jesuus s-eche: —Poro ¿kametz s-tiʼil yeʼ asaʼ laʼ qala uvaʼ qat uy vet Eliias? Tan ech nik tale inqʼa txhusul tetz inqʼa bʼekʼbʼal s-quxoʼl uvaʼ, aʼ Eliias bʼaxa laʼ tuleʼ, yaʼne laʼ ul naq uvaʼ alel ka u tulebʼal taʼn Tiuxh, —xeʼtaqe.#Malakiias 4.5
11Yaʼne ech tal Jesuus s-eche: —Echetzxhte qʼaoq. Tan aʼ Eliias bʼaxa laʼich tul tiʼ ibʼanax tutxh inqʼa kam s-kaqaayil. 12Pet toq val sete uvaʼ uy naq u Eliias. Tul yeʼl bʼeeq bʼen te inqʼa xaol. Pet aʼl kam kuxh motx ibʼan inqʼa xaol te naq. Tul echatetz kuxh toq ikʼaxbʼisat in inqʼa xaole, in, u Kʼaola uvaʼ qat bʼen s-alam aanima, —xeʼt Jesuus.#Tio 11.14{*}#17.12 ¿Kam s-tiʼil tabʼi inqʼa nikich itxhus tibʼ kʼatz quBʼaal Jesuus uvaʼ maq aʼ Eliias bʼaxa laʼich tul vatz u Kriisto, eche uvaʼ nik tal tu Malakiias 4.5? Tiʼ uvaʼ tan, yaʼnaqichxh motx tilt Eliias tuchʼ Moisees viʼ u vitz tuul u suʼtzʼ. Tan ulaq vet s-kʼuul kame uvaʼ nikich itxhus inqʼa txhusul tetz ibʼekʼbʼal inqʼa tij imam Israeel. Tan aʼ nikich motx taleʼ uvaʼ, aʼ Eliias laʼich ul s-bʼaxa tiʼ ijikbʼixsal taanima inqʼa xaol tiʼ ikʼulux u Kriisto. Yaʼne tal quBʼaal Jesuus inuqul te oxvaʼl inqʼa nikich itxhus tibʼ s-kʼatza uvaʼ jit aʼ koqxh Eliias laʼich uli. Pet aʼ vaʼl u qʼexsan tetz viyol quBʼaal Tiuxh uvaʼ echatxh u taqʼon laʼ ibʼan, eche uvaʼ ibʼan Eliias, atz echatxh vitxumbʼale, atz u tiqleʼm. Poro aʼe tan, yatzʼaxi. Tul aʼ bʼak nikich elkaʼp inqʼa yol tiʼ Xhun, uvaʼ nikich aqʼon kuʼ inqʼa xaol xeʼ aʼ. Tuchʼetz kuxh vikʼutxht tibʼ Eliias viʼ u vitz kʼatz quBʼaal Jesuus, tul aʼetz telaʼpun uvaʼ ul bʼakxh Eliias vatz txʼavaʼ. Atz aʼetz bʼak telaʼpun inqʼa yol uvaʼ tzʼibʼamal ka taʼn Malakiias. Poro kaʼvaʼl telaʼpun u yol uvaʼ itzʼibʼa ka Malakiias tu 4.5. Tan aʼ nik tal s-bʼaxa uvaʼ bʼaxa laʼ tul Eliias vatz u Kriisto. Aʼetze Xhun, u aqʼol kuʼ xaol xeʼ aʼ. Vikaʼv telaʼpun u yol, aʼetze vaʼl u qʼexsan tetz viyol quBʼaal Tiuxh uvaʼ laʼ ul s-bʼaxa vatz vikaʼpaq tul quBʼaal Jesuus, tuulbʼal uvaʼs yeʼnaq uloq u mam kʼaxkʼo tiibʼa inqʼa xaol, inqʼa palsan yol. Tan ech uvaʼe nik tal tu Apokaliipsis 11.3-14. Jankʼaletzxh u yol uvaʼ nik tal s-bʼaxa, atz uvaʼ nik tal vet tikaʼpaq, tan bʼane aʼ koqxh nik tal tiʼ Eliias, pet aʼ kuxh nik taleʼ uvaʼ echatxh u tiqleʼm, atz ech vitxumbʼal laʼ ibʼan echiche u tiqleʼm Eliias tiʼ tok bʼen inqʼa xaol tiʼ quBʼaal Tiuxh.
13Yaʼne bʼen vet te inqʼa nikich itxhus tibʼ kʼatz Jesuus uvaʼ, aʼ nikich talvat Jesuus inqʼa yol tiʼ Xhun, uvaʼ nikich aqʼon kuʼ inqʼa xaol xeʼ aʼ.
Uvaʼs ibʼant quBʼaal Jesuus bʼaʼn val u xaak uvaʼ atich kʼulichla yaabʼil s-kʼatza
Kuxh 9.14-29; Luk 9.37-43
14Kuʼetz vet ul Jesuus viʼ u vitz tuchʼ inqʼa nikich itxhus tibʼ s-kʼatza. Tul yekichaq vet xoʼl mamala xaol. Aqʼbʼetz vet val u vinaq, tul qael ikuʼ vatz Jesuus. Tul ech tal s-eche: 15—InBʼaal, txum ivatz naq vatz inkʼaol. Tan il naq bʼeenoxh nik tel taʼn val u kʼulichla yaabʼil. Tan nima paqx kuxh ok naq t-xamal taʼn. Atz nima paqx kuxh bʼen naq xeʼ aʼ taʼn u yaabʼil. 16Qatetz viqʼo tzaan naq vatz txhaqnaq inqʼa nik itxhus tibʼ sakʼatza, poro yeʼl txhaqnaq nik toleʼv tiʼ ibʼant bʼaʼn vinkʼaol, —xeʼt u vinaq.
17Yaʼne ech tal Jesuus s-eche: —¡Tiyiilaq palsan yol, atz tiyiilaq elnaʼq viʼ t-bʼey! Echetz kol kuxh laʼ vatine sexoʼl nik enatxheʼ. Atz echetz kol kuxh laʼ intxʼebʼt ibʼen inuqul u yole sete. Pet aqʼvaq tzaan naq u xaak sinvatz, —xeʼt Jesuus.{*}#17.17 ¿Kam s-tiʼil tal quBʼaal Jesuus ‹tiyiilaq palsan yol› te inqʼa xaol? Aʼ s-tiʼil tan, yeʼxh jankʼal inqʼa tij imam Israeel nikich qeon uvaʼ, aʼich quBʼaal Jesuuse u Kriisto, kʼuxh mamala inqʼa kaebʼal aanima motx ikʼutxh quBʼaal Jesuus s-vatz. Echetz talt quBʼaal Jesuuse s-palsan yol. Atz ¿kam nik elkaʼpun u yol ‹tiyiil› tal quBʼaal Jesuus? Aʼ nik tiqʼo tzaan quBʼaal Jesuus s-tuul u yol uvaʼ itzʼibʼa ka Moisees uvaʼ nik tal tu Deuteronoomio 1.32-36 tuchʼ uvaʼ tal quBʼaal Tiuxh tu Nuumeros 14.35. Tan nikich tulsa Moisees s-kʼuul inqʼa imol s-tijaq imam Israeel, inqʼa imolich tibʼ s-tuchʼ motx tel tzaan tu tenam Ejiipto. Tul motxetz ipalsa inqʼa imol Moisees viyol quBʼaal Tiuxh. Tan tiʼ vipalsat viyol quBʼaal Tiuxh, tul tira motx kam ka tiʼ bʼey tu tzaqa txʼavaʼ, tuulbʼal u txʼavaʼ Kaades Varneea. Yeʼichetz isaʼ Moisees uvaʼ ech laʼich motx ibʼane inqʼa chelem xaol, eche uvaʼ motx ibʼan inqʼa kʼuy imam. Echetz talt Moisees inqʼa yole tiʼ inqʼa motx kam ka tiʼ bʼey tiʼ vipalsan yol. ¿Kametz motx ibʼan inqʼa imol Moisees s-tijaq imam Israeel tiʼ vipalsat viyol quBʼaal Tiuxh tu tzaqa txʼavaʼ? Aʼetz motx ibʼana uvaʼ yeʼ motx isaʼ vibʼant txhʼaʼo tuchʼ inqʼa aj Kanaan tiʼ tok tuul vitxʼavaʼ. Eche uvaʼ nik tal tu Nuumeros 13.31—14.38. Echetz tiʼ vipalsataq yol, tul tal quBʼaal Tiuxh uvaʼ tetxhal kuxh laʼich atin tu tzaqa txʼavaʼ tuulbʼal kaʼviinqil yaʼbʼ, tul tetxhal laʼich motx ikamka tzitzi. Aʼetz inqʼa palsan yole inqʼa itzʼlel s-txheel, xeʼt quBʼaal Tiuxh s-tiʼ; tul echatxh tal Moiseese s-tiʼ. Aʼetz uvaʼe, tiqʼo tzaan quBʼaal Jesuus tiʼ viyol tiʼ inqʼa xaol, inqʼa nikich palsan yol tuulbʼal uvaʼ atich quBʼaal Jesuus vatz txʼavaʼ. 18Yaʼne ituki el Jesuus u demoonio uvaʼ atich ok t-taanima u xaak, tul yekich el vet el u demoonio s-kʼatza. Atz yekich ibʼan vet u xaak bʼaʼn.
19Xamtichetz veteʼ uvaʼs ijunalich kuxh vet Jesuus tuchʼ inqʼa nikich itxhus tibʼ s-kʼatza, tul ech motx tal te Jesuus s-eche: —¿Kametz s-tiʼil yeʼ qat oleʼv oʼ tiʼ teleʼl u demoonio t-taanima naq u xaak? —xeʼtaqe.
20Tul ech tal Jesuus s-eche: —Tiʼ uvaʼ yeʼ txʼakel ok kʼuqlebʼal ekʼuul s-viʼ, tul yeʼ qat oleʼv ex tiʼ teleʼl u demoonio. Echetz toq valte sete uvaʼ, ech koq u kʼuqlebʼal ekʼuul, eche u unutzʼla iiya tetz tzeʼ u mostaasa, tul laʼetz isaʼa uvaʼ ech laʼ etal te invaʼq u vitz s-eche: «Elen el tzitza. Tul yekl axh tzitzi,» chaq ex s-te, tul laʼxh ibʼana. Tan kam koq invaʼtoʼq yeʼ laʼ oleʼv ex s-tiʼ oq laʼ etxʼakoʼk u kʼuqlebʼal ekʼuul s-viʼ.#Tio 20.20 21[Pet eche u demoonio uvaʼe, tan yeʼxhkam invaʼq laʼ oleʼv tiʼ teleʼl. Pet taʼn kuxh laʼ oleʼv tiʼ teleʼl uvaʼ laʼ emaq etxʼaʼon tiʼ inatxhax Tiuxh,] —xeʼt Jesuus.
Uvaʼs talt quBʼaal Jesuus tikaʼpaq uvaʼ tetxhal laʼich kam quBʼaal Jesuus, atz laʼich itzʼeʼv inpaqte
Kuxh 9.30-32; Luk 9.43-45
22Sebʼtichetz ipaxsat Jesuus viyolbʼal quBʼaal Tiuxh tuchʼ inqʼa nikich itxhus tibʼ s-kʼatza tuulbʼal Galileea. Tul ech tal Jesuus s-xoʼl s-eche: —Tetxhal kuxh toq aqʼaxoq ok in tiqʼabʼ inqʼa xaol, in, u Kʼaola uvaʼ qat bʼen s-alam aanima. 23Tul toq yatzʼaxoq el in taʼn. Poro titoxv qʼij, tul laʼ itzʼeʼv in inpaqte, —xeʼt Jesuus. Tul mam txumuʼm ibʼan vet inqʼa nikich itxhus tibʼ kʼatz Jesuus tiʼ u yol.
Uvaʼs itxhusun quBʼaal Jesuus tiʼ vitxhojt inqʼa xaol u tatineʼ
24Yaʼne opoon vet Jesuus tuchʼ inqʼa nikich itxhus tibʼ s-kʼatza tu tenam Kapernauum. Tul aqʼbʼ kaʼl inqʼa xaol kʼatz Luʼ, kaʼl inqʼa nikich kʼulun kaʼvaʼl draakma puaq tiʼ tatin inqʼa xaol tu tostiuxh. Tul ech motx tal te Luʼ s-eche: —¿Nik kol itxhoj naq u txhusul etetz tatin tu qutostiuxh? —xeʼtaqe.#Eeksodo 30.13; 38.26
25Tul ech tal Luʼ s-eche: —Bʼantan nik taqʼ naq, —xeʼt Luʼ.
Yaʼne bʼen vet Luʼ tu otzotz tal uvaʼ atich Jesuus. Tul aʼ Jesuus qʼiilan Luʼ s-bʼaxa uvaʼs tokaʼp Luʼ tu otzotz.
Tul ech tal Jesuus s-eche: —Simoon, ¿kam toq aal tiʼ u yol uvaʼ toq vabʼi see? ¿Jabʼile u xaol nik txhoon tatin te txhaqnaq inqʼa mam iqʼesal inqʼa tenam tzitza vatz txʼavaʼ? ¿Maq antxh inqʼa xaol, inqʼa titenam txhaqnaq? Pet ¿maq aʼ inqʼa xaol, inqʼa jit itenam txhaqnaq nik txhoon? —xeʼt Jesuus.
26Tul ech tal Luʼ s-eche: —Aʼ inqʼa xaol, inqʼa jit eela itenam txhaqnaq s-tuchʼ, nik txhoon tatineʼ, —xeʼt Luʼ.
Yaʼne ech tal Jesuus s-eche: —Echxhte. Tan yeʼ laʼ isaʼa uvaʼ laʼ ijaq txhaqnaq puaq te inqʼa xaol uvaʼ antxh itenam txhaqnaq. 27Echetz laʼ kuxh isaʼa uvaʼ yeʼ laʼ qutxhoj u qatineʼ. Pet, tiʼ uvaʼ yeʼ laʼ qutxhoʼnisa naq inqʼa nik kʼulun u puaq tiʼ qatin tu tostiuxh, tul quxh tziʼ u mam aʼ. Tul bʼen akʼoni bʼen u txeybʼal txay xeʼ u mam aʼ. Jabʼisteetz u txay uvaʼ bʼaxa laʼ atxeytaʼ, tul laʼ eeqʼo jaʼul. Yaʼne laʼ ajaq vitziʼ, tul laʼ eeqʼo jaʼul u estateero puaq uvaʼ at titziʼ. Tul bʼen atxhoj u qatin s-qukaʼbʼil, —xeʼt Jesuus te Luʼ.{*}#17.27 U txhʼitxhʼ puaq estateero uvaʼ nikich ibʼanbʼel t-Rooma s-naʼya, aʼe vijaʼmil kajvaʼl qʼij aqʼon.
Dewis Presennol:
Tio 17: ixlC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2016, Wycliffe Bible Translators, Inc. All rights reserved.