Luka 2
2
Tɔ̂ Yɛsu Kristi
(Mat 1:18-25)
1E jeng yane mo, Da vwel BeRoma de bá tang ɛ, à Augustus á nɔng nu, be basa nepyak mwa bemât bavwel mɛ. 2Hane há sè basâ bemat hê susu mo, ko e jeng o, Kwirinyus á sè gwɔmna e sevwêl Sirya. 3Yaga basâ bemat hane mo, kawɛ mwat á kyè vɔk e repomô lɔ mɛ, na be jɛk reza mɛ e bwok-basa baza gwo basâ bemat o.
4Yɔsɛf arɔng a sogo yi e repomô Nazarɛt e sevwêl Galili, ko a kyè vɔk e sevwêl Yudiya vɔk e repomô Bet-Lɛhɛm; kwɔn a hane de bà kana tɔ Gbɔng Gwɔ̀m Davit. A kyè wɔ e hwomo, yaga yɛ a sé wo lɔ Davit o. 5A jut Marya de a sé hwono hɛ, ko ba kyè vɔk e Bet-Lɛhɛm, na be jɛk baza mɛn e bwok-basa baza gwo basâ nepyak bemat. Marya mo a vɔk jim, 6ko jeng de bá sè e hwomo, jim tɔ ya hwo kaba hɛ. 7A tɔ hwêy mɛsɛng mɛ, wen o; a gunung hɛ na cɛ̂k rugu, ko a lasha hɛ e ji pyɛ de ngyāma ye re ɛ̀ pyɛ́. A ra ano, yaga yɛn á kana sɛ̀ kwɔ̂n sangal e lɔ bekɛnɛt wɛt.
Betom-lagwi na belêk vyēl
8E yɛnɛ̂ sevwel o, belêk vyēl behak bá sè pɔlɔs e hey, ba gyenges kwarâ tyimit mɛn e hwomo. 9Tom-lagwi hwak wo Darwey a wɔ́ na yɛn, ko nedyɛt Dagwi na gwɔrɔ hɛn. Yɛn a vo bengyip sizɔng, 10ko tom-lagwi o a yang ɛn, “Yin wok bengyip wɛt! Ma vey a yin na yɛgɛt yat de yê tɛ̀ bemat min mwa be vɔk yey pyɛng sedesi. 11Yunung, e ji repomô Davit, ba ga tɔ Mwât Sey in. E yɛ, à Kristi, Darwey. 12Gwong de yin ê tɔk, pyɛ mo ya sé ano a gwot ngan: Yin a rɔda di hwey cereng de ba gunung hɛ na cɛ̂k rugu, ko ba lasha hɛ e ji pyɛ de ngyāma ye re ɛ̀ pyɛ́.”
13E ji jeng o, ba di gbɔng regyɛng betom-lagwi tanga tom wane mo, ba somo Dagwi, ba tē,
14“Tik na Dagwi a vɔk gbɔng nerey, yɛ de a sé e lagwi,
ko e jey, tik na neyey bemat de be pɛngɛ a yɛ yey ne dyɛng!”
15Jeng de betom o ba hàla hɛn na be to ɛn vɔk e lagwi, belêk vyēl o ba yâng bemɛn, “Tik na wot wɔ́ e Bet-Lɛhɛm, na wot wɔ̀ di pyɛ de ya té mo, yemo de Darwey a ga ha a wot e ra yɛ.”
16Ano kwong, yɛn a kyè dey-dey vɔk e hwomo, ko yɛn a sɛ̀ Marya, na Yɔsɛf, tanga hwey cereng o de ha sé e dyɛngɛ e ji pyɛ de ngyāma ye re ɛ̀ pyɛ́. 17Jeng de belêk vyēl o ba di hɛ, ba ha a yɛn rehâ pyɛ́ de tom-lagwi a ga kana ha a yɛn e ra hwey o. 18Mwa bemat de ba wok ba langat hɛn pyɛ́ de belêk vyēl o ba ha. 19Ko Marya a vɔk pyɛ́ mo mwa, a kyě tɔrɔng na yɛ̄ e yey mɛ. 20Belêk vyēl o ba toyo vɔk e kwɔn mɛn, ba sé nɔ̂ng Dagwi nerey, ba somo hɛ yaga pyɛ̂ mwa de yɛn a ga wok, ko yɛn a to di yɛ̄ arɔng. Pyɛ́ mo ya sé tyɛng na pyɛ de tom-lagwi o á kana ha a yɛn gyam.
Ba vo a Yɛsu reza
21Tuk hê rwit, sede jeng ya vey na be wɔ́ a hwey o e cwɛl, ba vo a hɛ rezâ Yɛsu. Reza ma rane de tom-lagwi á kana nɔ̂ng hɛ gyam na be vɔk jîm hɛ.
Ba wɔ̀ nára Yɛsu e nuyêl Dagwi
22Jeng ya vey de be ra negwɔn tɛ́ ɛn jɛrɛ, tyɛng na pyɛ de bà jɛk e ji Badu Mose. E bama mo, Yɔsɛf tanga Marya yɛn a jut hwey o vɔk e Yɛrusalɛm na be wɔ̀ nára hɛ e nuyêl Darwey, 23sede remo de bà jɛk e Bwok-basa Badu wɔgɔ, “Kahɛ hwey wen hê mɛsɛng de ba tɔ, ba rɔda nára a Darwey hɛ na he sè mɛ́.” 24Ba to wɔ̀ nára nɔrɔ̂ yas de be yɛt vɔk na Dagwi na be bin sila mɛ̀ pyɛ de bà jɛk e Bwok-basa Badu wɔgɔ, “Bē nára begumurus beba kɛ nèy bebɔp neba.”
25E jeng yane, mwat hwak de ba tang ɛ, à Simɛyɔn á sè e Yɛrusalɛm. Negwɔn mɛ ná sè cik e bayîs Dagwi, á to sap ɛ naka, ko á sè gyeng jeng de Dagwi a rɔda ba sɛlɛ BeIsrayɛl. Gabik Jɛrɛ há sè na yɛ, 26ko há kana dura a yɛ dɛdɛɛt, yɛ a rɔda ku wɛt, sɛ̌ a tānga di Mwat de Darwey a kasa na a sey bemat. 27Ko Gabik o ha tɛ̀ ɛ a kyè vɔk e Gbɔng Duk Re Fongol. Jeng de da na nêng Yɛsu ba vey na hwey o, na be ra a hɛ tyɛng na pyɛ de Badu Dagwi ba simo, 28Simɛyɔn a wɔ̀ sey hɛ e vɔ mɛ, ko a feng a Dagwi, a ye,
29“À Darwey, hwà ga ra pyɛ de hwà kana sira, hwô ra;
yaga ano, tik na hwo tɛ̀ me, sam mō, e gwong,
a remo de yey hom ya ga dyɛng.
30Yaga ma ga di na bayis hom womo de ê sey bemat;
31hwà yong ɛ, yaga na mwa yére bemat jey be di ɛ.
32Yɛ a sé negbey de ne tɛ̀ bemât yére dyuk be tɔk pyɛ de hwó simo,
ne to tɛ̀ bemat mō BeIsrayɛl be vɔk gbɔng nerey.”
33Da na nêng hwey o yɛn a langat hɛn na pyɛ́ de Simɛyɔn a ha e ra hɛ. 34Ano Simɛyɔn a tɛ̀ nerat e ra yɛn, ko a yâng Marya, nêng hwey o, “Dagwi a ga yong ɛ̀ gyam, na hwey hemo he tɛ̀ bemat pyak e ji BeIsrayɛl ba rɔda gabsa, ko behak arɔng ba rɔda toyo vey na yɛ. Hā rɔda to sè pyɛ dura yi na Dagwi de bemat pyak ba rɔda kyɛ́ ɛn yɛ. 35Ko yi ano, bê dura wɛshɛrɛk barê neyey mɛn detidetu. Ko yey mō ya rɔda lashe hɛ sede ba kulu yɛ na wal.”
36Hwā hwak de á sè zarap Dagwi á sè e hwomo arɔng. Bá tang ɛ, à Ana, á sè hwêy Fanuwel wo yere Ashɛr. Á kana kwop kpushuk. Á kana sangal tanga rwas mɛ neshey netaama e bamâ weneng mɛn. 37E bama de rwas o á ku, á hàla hɛ kuma, ko á to sangal ano neshey kuru rwit na nɛ nenaas (84). Á hàla Gbɔng Duk Re Fongol wɛt, ko á sǎ e de re a Dagwi fongol nagwi na naturuk, á tik rê pyɛ́, na a ra won arɔng. 38Ana mo a kyè vey pom na bedâ Yɛsu e jeng o. A hwo feng a Dagwi, ko a ha e ra hwey o vɔk na mwa vemo de ba sɛt bayis mɛn e ra jeng de Dagwi a rɔda to ba viri Yɛrusalɛm.
Bedâ Yɛsu na hwey mɛn ba to ɛn vɔk e Nazarɛt
39Jeng de Yɔsɛf na Marya ba ga ra kayɛ pyɛ de be simo na yɛn a ra na be sila mɛ̀ Badu Darwey, yɛn a to ɛn vɔk e sevwêl Galili, vɔk e repomo mɛn e Nazarɛt. 40Hwey o ha ras, ko ha gwɛ̌ gap. Ha vɔk netsitsɛng pyak, ko Dagwi a nɔ̂ng hɛ nerat mɛ.
Yɛsu a sangal e tê bemât basa e jeng de á sè rɔ̌ wen
41Kahɛ shey, bedâ Yɛsu ba kyese e Yɛrusalɛm yaga Nzem Gyilsit Nelɔ BeIsrayɛl. 42Jeng de Yɛsu a sila shey kuru na hɛ ba, yɛn a wɔ́ e hwomo yaga nzem o tyɛng na negwɔn mɛn. 43Bama de ba ga yɛnɛ nzem o, beda mɛ ba sé to ɛn wɛrɛn e lɔ, ko wen o, Yɛsu, a nàra e Yɛrusalɛm sana tɔ̂k beda mɛ mo. 44Yɛn a bare, a sé tanga yɛn e ji rwâng bemat. Yaga ano, yɛn a kyè kwɛngɛl tuk hining; ko e bama mo, yɛn a hwo jāma hɛ e tê cáng mɛn na besa mɛn. 45Sede yɛn a sɛ̀ ɛ wɛt, yɛn a to ɛn vɔk e Yɛrusalɛm na be wɔ̀ jāma hɛ. 46E bamâ nepɔlɔ netat, yɛn a sɛ̀ ɛ e Gbɔng Duk Re Fongol e sangal e tê bemât basa, a sé wokos há mɛn, ko a sé rangsal hɛn e ra pyɛ́ detidetu arɔng. 47Kawɛ mwat de a wok ɛ, a langat hɛ pyɛ́ de a tɔk, na begwong de e toysa a yɛn na nerangsal mɛn. 48Jeng de beda mɛ ba di ɛ, a yang ɛn kpɔrɔk. Neng mɛ a yang ɛ, “À hwey, yaga sɛ́ de hwà ra a wot ano arɛt? Me tanga da mō, neyey mot na ga beseng e de jāma hwo.”
49Yɛsu a rangal neng-gwɔ mɛ mo, a yang ɛ, “Yaga sɛ́ de yin a kyě jāma me arɛt? Yin a tɔk, a sé gbing-gbing na me sè e duk Da hom wɛt arɛt?” 50Ko yɛn a tɔk pyɛ de a ha a yɛn wɛt.
51Ano Yɛsu a kyè tanga yɛn vɔk e Nazarɛt, ko a gyenges há mɛn. Ko neng mɛ a vɔk pyɛ́ mo mwa e ji yey mɛ. 52Yɛsu a gwɛ̌ ras e rebek na e netsitsɛng, ko pyɛ́ de a ra ya jam a Dagwi mwa na bemat.
Dewis Presennol:
Luka 2: bomBI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust