Susumo 12
12
Dagwi a yila Abram
1Dagwi Darwey a yâng Abram, “Nusu hwo yi e vwel mō, yi na cáng mō tanga lɔ da mō vɔk e vwel de ma rɔda dura a hwo.
2“Ma rɔda nɔng o yere pyak,
ko yê ba tɛ́ ɛ yerê bemât jey ryey o.
Mê tɛ̀ a hwo nerat,
ko mê tɛ̀, hwo vɔk gbong reza;
ko yaga hwo, mê tɛ̀ nerat e ra bemât jey.#12:2 ko yaga hwo, mê tɛ̀ nerat e ra bemât jey: kɛ: yi na hwo bemât jey bê masa gwông sɛ̂ nerat hom.
3Vemo de bê mok a hwo netyang,
ma rɔda nɔng ɛn netyang,
ko vemo de bê mok a hwo gawey,
ma rɔda kyini hɛn.
Mwa yére bemasi e jey yê ra won,
na me tɛ̀ nerat e ra yɛ̄,
sede remo de ma tɛ̀ nerat e ra hwo.”#12:3 Mwa yére bemasi e jey yê ra won, na me tɛ̀ nerat e ra yɛ̄, sede remo de ma tɛ̀ nerat e ra hwo: kɛ: Ko a sé yi na hwo de mê tɛ̀ nerat e ra mwa yére bemasi e jey.
4-5Abram a ra sede remo de Dagwi Darwey a kana nɔng ɛ nu. A vɔk neshey kuru bataama na nɛ netungun (75) jeng de a tik repomô Haran. Sarai, hwā mɛ, tanga Lɔt, hwêy gwà mɛ, ba kyè tanga yɛ. Yɛn a kaba gwong vɔk e sevwêl Kanaan na yas tanga besam mɛn de yɛn a kana sɛ̀ e Haran.
Jeng de yɛn a wul Kanaan, 6Abram a re nuyel na kwɛngɛl, sɛ̌ a wɔ wul cɔgɔt ouk ye More e kwɔ̂n rê fongol e Shɛkɛm. E jeng yane BeKanaan yɛn vɛ à bedâ vwel o. 7Ko Dagwi Darwey a dura to mɛ na Abram, a ye, “Ma rɔda nɔ̂ng yere mō vwel hemo.” Ko Abram a lɔk ɛ gàgbang rangâs yas vɔk na Dagwi Darwey e hwomo, yɛ de a dura to mɛ na yɛ. 8Yi e kwɔn o a gwɛ̌ sek vɔk e rwa batin vɔk e vwêl bahwol de ha sé e rwa rak na Bet-Ɛl. A tɛ̀ buk e hwomo, a gang repomô Bet-Ɛl e rwa tā ko repomô Ai e rak. E hwomo arɔng a lɔk gàgbang rangâs yas, ko a re a Dagwi Darwey fongol. 9E bama mo, a re nuyel na kwɛngɛl, a tá nu wɔ e rwa batîn vwêl Kanaan, a kyè na tɛ́sɛ nekwɔn ye ngyɔk.
Abram e Misra
10E jeng yane, vyong yá sè e ji vwêl Kanaan, ko yaga yá kat sizɔng, Abram a sogo, a raa rwa batin vɔk e sevwêl Misra, na a ka sangal ɛ. 11Jeng de a vey lɛs, na a yel e Misra, ko a yâng hwā mɛ Sarai, “Hwà sé zɛrɛ̂ hwā. 12Jeng de bemât Misra bê di o, ba rɔda bare, hwà sé hwā hom. Yɛn a rɔda mɔrɔ me, ko bê tik o na neken. 13Ko di, yang ɛn, hwà sé gwa hom, yaga na kayɛ pyɛ ye kyè a me tyang, ko bê tik me kwen yaga hwo.”
14E jeng de Abram a yel e Misra, bemât Misra mo ba di hwā mɛ a sé zɛrɛ tyɔng o wɛt. 15Ano arɔng jeng de behak e ji bemât badu gbɔng gwɔ̀m Farawo ba di hwā mo na nezɛrɛ mɛ, ba wɔ dak kaa mɛ na Farawo, ko ba jut ɛ vɔk e lɔ mɛ. 16Yaga yɛ, Farawo a ra a Abram pyɛ́ ryat. A nɔng ɛ vyēl, na berɔndɔng, na bemadung, na bemaryat tanga besam beras na beha.
17Ko Dagwi Darwey a ták a Farawo na belɔ mɛ na nezap tumbang neves, yaga a jut hwâ Abram. 18Jeng de Farawo a di ano, a yila Abram, a yang ɛ, “E sɛ́ de hwà ra a me ano ɛ? Yaga sɛ́ de hwà yang me, a sé e hwā mō a womo wɛt ɛ? 19Yaga sɛ́ de hwà ye, a sé e gwa mō a wɛ, ko ma ga jut ɛ, a tɛ́ ɛ hwā hom ɛ? Remo, nā hwā mō; jut ɛ, na yin kyè!” 20Ko a nɔ̂ng bemat mɛ nu, yɛn a pat ɛ, be kyè na yɛ vɔk e yɛnɛ̂ sevwêl Misra tanga hwā mɛ na mwa pyɛ́ de a vɔk.
Dewis Presennol:
Susumo 12: bomBI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust