Ikwaan̄ 10
10
Ukpatu kè Pita mè Kọniliọs
1Me ama Sisaria, îkaan̄ ogwu ibot akọn̄ ge ekigwen Kọniliọs, ogwu òkikpulu efit ebi akọn̄ ge me lek urum akọn̄ ebi Rom eyi ekigwen “Urum akọn̄ ido Itali.” 2Ọmọ mè otutuuk ebi ototun̄ ukan̄ kan̄ mîkaan̄ ukpook Awaji me emen, mè ikitọbọ ebum inyi Awaji. Ogwu enerieen̄ yi îkichili ubọk enenen iche inu inyi ebi ugbọọn̄ me etete ebi Ju, mè ikiriaak uriaak inyi Awaji me mgbọ me mgbọ. 3Usen ge, mgbọ òfuk-mgbọ osulube ita eyi ejit ikarek, Kọniliọs onenimun̄ ilaak ọkpọchieen̄, mè imun̄ ijaan̄ lek, ubọk ogwu osat Awaji ge ojebe inu me lek kan̄, mè inigwen ọmọ, “Kọniliọs!”
4Kọniliọs oririki, mè ikikpọ ogwu osat ya kpoo, mije ukpook, mè ido ọmọ ibe, “Ìre keke, Okaan̄-ene?”
Ogwu osat ya ofọfọọk Kọniliọs ibe, “Awaji înọ otutuuk uriaak kwun̄, mè imun̄ si otutuuk ikwaan̄ ata ejit eyi owu okirọ inyi ebi ugbọọn̄, mè ikeek owu. 5Eya orọ, mgbọ keyi, ria ene si Jọpa, mè esi egwen ogwu enerieen̄ ge ekigwen Saimọn Pita ejet owu. 6Saimọn Pita yi ìluk me uwu ogwu enerieen̄ ge ekigwen Saimọn, ogwu ikwaan̄ ikpa anam. Uwu kè Saimọn ya ìkup me agba okwaan̄ ile.”
7Mgbọ ogwu osat Awaji ya òtutumu ikọ melek kan̄ onan̄abe, Kọniliọs ogwegwen ebi ikwaan̄ kan̄ ene iba igbaalek ene ge me etete ebi akọn̄ ìkibem ọmọ, ogwu òkakaan̄ ukpook Awaji me emen, 8mè iben otutuuk inu ya òrọrọ ikpa ijeen̄ ema, mè iria ema ibe esi Jọpa esi egwen Saimọn Pita ejet ọmọ, kubọk ogwu osat ya otemebe.
Pita îmun̄ ilaak ọkpọchieen̄
9Ofit iwele kan̄, me ejit ikarek mgbọ ebi Kọniliọs oriabe ikwaan̄ cha ejebe igbet Jọpa, Pita onenene ifo inyọn̄ otoon̄-uwu ya, isi ikup ikiriaak uriaak. 10Me ere ya, uraafiọọn̄ onenitaka ọmọ, iweweek irerie inorie. Mgbọ ekitem inorie ìborie, imumun̄ ilaak ọkpọchieen̄. 11Me emen ilaak ọkpọchieen̄ ya, Pita omumun̄ ubọk isinyọn̄ ogwukube ibook, mè imun̄ inu ge òkup kubọk nga odidọ akpọk isi ile ge etobobe olik me utọn̄ agan̄ ini, mè itet me lek olik cha igele ikisiki inan̄a me isinyọn̄ isibi inu me ijọn̄. 12Pita omumun̄ owuwa anam ukot ini òkup esese esese, mè anam echi òkinyinyọnọ me ijọn̄, mè imun̄ si unọn òwulu me inyọn̄, me inyọn̄ odidọ ya. 13Ida ge okekitumu inyi Pita ibe, “Pita, nan̄a keke! Kpan̄, mè taka!”
14Pita ofọfọọk ibe, “In̄-in̄, Okaan̄-ene, m̀kpakọt, mije, ǹkararak ìkitaka inu geege òrere mbuban inu, mè echi ikatanage me isi Awaji.”
15Ida ya otutumu ikọ òso mgbọ iba inyi Pita ibe, “Inu geelek Awaji orombe itana, owu katumu ibe ke ìkatana.”
16Inu ya îrọ ikeya iso mgbọ ita. Mgbọ yaage eyi òso mgbọ ita ya orakabe, ebeben odidọ ya mè anam cha mè unọn cha me inyọn̄ isan̄a ifo isinyọn̄.
17Mgbọ Pita okikeek inu ilaak ọkpọchieen̄ ya osibibe, ebirieen̄ cha ebi Kọniliọs oriabe inu eneniweek uwu Pita olukbe imun̄, mè inikeke me otunchit uwu ya, 18mè igwen ebi uwu ya ido ibe mè ìre uwu keyi ke ogwu enerieen̄ ge ekigwen Saimọn Pita ogọọk ikup ye?
19Mgbọ Pita okikeek inu ofolek ilaak ọkpọchieen̄ ya, Ekwukwu Mbuban onenigwen ọmọ itumu inyi ibe, “Saimọn, ebirieen̄ ita mêkiweek owu. 20Eya orọ, nan̄a keke je sibi ijọn̄, mè gọọk ife cha je, mije, îre emi nria ema inu. Kpọkpọ gọọk je, kakiket ukot.”
21Pita ojeje isibi ijọn̄ igọọk ebirieen̄ cha, mè itumu inyi ema ibe, “Emi nre ogwu enerieen̄ ya enyi ekiweek. Ìre keke orọ enyi eniweek emi?”
22Ema efọfọọk ibe, “Îre Kọniliọs ogwu ibot akọn̄ oria eji inu. Kọniliọs ìre ata ene ogwu òkiriaak Awaji me atikọ, mè ire si ogwu otutuuk ebi Ju ekinyi umin. Ogwu osat Awaji ge òkup mbuban otumu inyi Kọniliọs ibe iria ikwaan̄ igwen owu, mè igban̄ utọn̄ me lek inu geelek owu môtumube.” 23Mgbọ Pita onọbe ikọ kiban̄ isan̄a, ibọbọkọ ema itap me uwu ya, mè initet ema ichen. Ema ekukup me uwu ya iwele egwe.
Pita îsi uwu kè Kọniliọs
Me ofit iwele kan̄, Pita melek ebi ife cha enanan̄a ije isi Sisaria. Usini bọn Nte ìkup me Jọpa egọgọọk ọmọ isi.
24Ema mîkup me oniin̄ ije ya ifit egwe. Me ofit iwele kan̄, ema erere uwu kè Kọniliọs me ama Sisaria. Me mgbọ ema kperere-nu, Kọniliọs oraria ikwaan̄ igwen ebi uwu kiban̄ mè ata ebi unene kan̄ ititiin̄ me uwu kan̄ iban Pita. 25Mgbọ Pita obosaba inin̄ uwu ya, Kọniliọs ojeje ikweek ọmọ, mè igele igwook me ijọn̄ me ukot kan̄, mè inyi ọmọ umin. 26Ire, Pita otetet Kọniliọs ibene, mè itumu inyi ibe, “Nan̄a keke, ke emi me lek n̄a ìre ebilene ikike.”
27Pita onenikitumu ikọ melek Kọniliọs, mè ikije iraka inin̄ uwu ya. Mgbọ Pita onin̄be emen uwu ya, imumun̄ owuwa ene etitiin̄be ikup ikikpọ ọmọ. 28Inenitumu inyi ema ibe, “Enyi mîriọọn̄ ijaan̄ lek ibe ke Ikan kiji ebi Ju, ìkanyi irek ibe ogwu Ju geege igọọk ogwu ikarege ogwu Ju igbaan̄ inu irọ. Ìkanyi si irek ibe ogwu Ju isi uwu ogwu ikarege ogwu Ju. Ire, Awaji îjeen̄ emi ibe emi nkamọnọ ene geege kubọk ogwu òchaka mbuban, mè iyaka ire ogwu ikatanage me isi Awaji. 29Eya orọ, mgbọ nnọbe igwen yi, ǹkajit. M̀kpọkpọ inan̄a ikeke mgbọ yaage, mè inu. Mgbọ keyi, ìre keke orọ mè enyi eria ikwaan̄ egwen emi?”
30Kọniliọs onenifọọk Pita ibe, “Îre ojelek ike mgbọ keyi, òfuk-mgbọ osulube ita eyi ikarek, me egwe ini òraraka, ke emi nkiriaak uriaak me uwu n̄a. Mgbọ nkiriaak uriaak ya, enerieen̄ ge òtap ofọnti okuket okpọkpọ ikana isibi, mè ikeke me isi n̄a, 31mè itumu inyi emi ibe, ‘Kọniliọs! Awaji înọ ida uriaak kwun̄, mè ikeek si owuwa ata inu owu okirọ inyi ebi ugbọọn̄. 32Eya orọ, ria ebi ene si Jọpa, mè esi egwen ogwu enerieen̄ ge ekigwen Saimọn Pita, ogwu ichen òkup me uwu kè Saimọn ogwu ikwaan̄ ikpa anam me agba okwaan̄.’ 33Eya orọ, me ekafiatge mgbọ, nraria ikwaan̄ igwen owu mgbọ yaage. Înwọn enenen ubọk owu onube. Mgbọ keyi, eji otutuuk ene mîtitiin̄ me ere keyi me isi Awaji inenigban̄ otutuuk inu geelek Okaan̄-ene otemebe owu ibe owu ònojeen̄ eji.”
Pita îtumu ikọ Awaji me uwu kè Kọniliọs
34Pita onenibene itumu ikọ inyi ife cha ibe, “Me mgbọ keyi, emi mmun̄ ibe ke îre atikọ ibe ke Awaji ìkakigobo ene geege isi. 35Ire, ke îkibọkọ ene geelek me ido geelek itap, ire ene ya ikaan̄ ukpook kan̄ me emen, mè ikirọ inu òtatat. 36Etip yi ke Awaji oria ijet ebi Ijeren inan̄a me lek ata etip eyi esuuk eyi Jisọs Karais onube inilook. Jisọs Karais yi ore Okaan̄-ene inyi otutuuk ebilene. 37Enyi mîriọọn̄ inu geelek òmọmọnọ irek me otutuuk agan̄ Judia. Inu chi ìbene me Galili mgbọ Jọn ogwookbe ene mun̄, mè itumu ikọ Awaji eyi kan̄ isan̄a. 38Enyi mîriọọn̄ ibe ke Awaji îgobo Jisọs ogwu Najeret, mè inyi ọmọ Ekwukwu Mbuban, mè unye. Enyi mîriọọn̄ si ibe ke Jisọs yi îjijen̄e ikana ikirọ ata inu, mè ikisan̄a otutuuk ebi geelek Yọk otapbe mkpọn isibi, mije Awaji okekebe melek kan̄.
39“Eji ìre ebi ata-ikọ me lek otutuuk inu Jisọs orọbe me Jeruselem mè ido ebi Ju. Ebi ene etetet ọmọ igon ikpan̄ me inyọn̄ uti nkwurieen̄. 40Ire, Awaji ojojomo ọmọ me mkpa me òso egwe ita, mè irọ inyi ebi ene emun̄ ọmọ. 41Mgbọ îjomobe me mkpa, ìkare otutuuk ene emun̄ ọmọ. Îre eji ebi ata-ikọ ebi Awaji ogobobe gaalek emun̄ ọmọ. Eji mîgọọk ọmọ ikweek irie inorie, mè inwọ miin̄ me mgbọ îjomobe me mkpa iraka. 42Ineninyi eji ida ibe eji ekelook ebi ene ata etip, mè ekeke ata-ikọ enyi ọmọ ibe ke îre ọmọ ke Awaji ogobo ibe inire ogwu òbosibi oyerebet me ibot ebi ìkup me ugwem, mè ebi ìkwakwaan̄. 43Ọmọ ke otutuuk ebi nriran ukot ikaan̄ etumu ikọ ofolek ibe, ‘Inan̄a me erieen̄ kan̄, ke mêtele ijo inyi ene geelek òchechieek me lek kan̄.’ ”
Ebi ekarege ebi Ju mîbọkọ Ekwukwu Mbuban
44Pita òkitumu ikọ ya me otu, Ekwukwu Mbuban oneninin̄ emen otutuuk ebi ìkup me uwu ya ikigban̄ ikọ ya. 45Mije bọn Nte cha ìgọgọọk Pita inan̄a me Jọpa inu erebe ebi Ju, îke ema chieen̄ enenen imumun̄ ibe ke Awaji îtap Ekwukwu Mbuban me emen ebi ekarege ebi Ju si. 46Mije, ema mînọ ubọk ife cha ekitumu ikọ me nke nke usem, mè ikitọn̄ Awaji.
Pita onenitumu ibe, 47“Eyi Awaji onyibe ife chi Ekwukwu Mbuban kubọk înyibe eji ebi Ju, ìre ekene oboyaka ikput ibe ekagwook ife chi mun̄?” 48Eya orọ, Pita onyinyi ida ibe egwook ife cha mun̄ me erieen̄ kè Jisọs Karais. Mgbọ egwookbe ema mun̄ isan̄a, ema erariaak Pita ibe igọọk ema ikup sọntiik usen inen mè inen.
Dewis Presennol:
Ikwaan̄ 10: Obolo
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.