Yauhas 9
9
Yexus Kho Tus Txivneej Uas Digmuag Thaum Nruabthiab los
1Thaum Yexus tabtom taug kev mus, Nws pom ib tug txivneej uas digmuag thaum nruabthiab los lawm. 2Nws cov thwjtim txawm nug Nws hais tias, “Xibhwb, leejtwg ua txhaum thiaj ua rau tus txivneej no digmuag thaum nruabthiab los? Yog nws ua txhaum los yog nws niam nws txiv ua txhaum?”
3Yexus teb tias, “Qhov uas nws digmuag li no tsis yog vim nws tej kev txhaum lossis vim nws niam nws txiv tej kev txhaum. Nws digmuag kom Vajtswv lub hwjchim thiaj yuav tshwm nyob rau hauv nws lub neej. 4Thaum uas tseem yog nruabhnub, peb yuavtsum ua Vajtswv tus uas txib Kuv los tej haujlwm; hmontuj twb los yuav txog, thaum ntawd neeg yuav tsis pomkev ua haujlwm lawm. 5Thaum Kuv tseem nyob hauv ntiajteb no, Kuv yog qhov pomkev rau lub ntiajteb.” #Math 5:14; Yauh 8:12
6Thaum Yexus hais li no tas, Nws txawm nto qaubncaug rau hauv hmoov av, thiab ua ib cov kuadis av; Nws muab cov kuadis av ntawd los pleev tus txivneej ntawd ob lub qhovmuag, 7thiab hais rau nws tias, “Koj ciali mus ntxuav muag tom lub pas dej Xilau-as.” (Lub npe no txhais hais tias, “Txib mus.”) Yogli, tus txivneej ntawd thiaj mus ntxuav muag thiab rovqab los, ces nws txawm pomkev lawm.
8Tej neeg zejzog thiab cov uas txeev pom nws thovkhawv yav tas los, lawv txawm sibnug hais tias, “Tus txivneej no tsis yog tus uas txeev zaum ntawm no thovkhawv lov?”
9Muaj qeeleej hais tias, “Yog tus ntawd ntag los mas,” tiamsis qeeleej hais tias, “Tsis yog, nws tsuas zooli tus ntawd xwb.”
Nws thiaj hais tias, “Kuv twb yog tus txivneej ntawd ntag los mas.”
10Lawv nug nws hais tias, “Ua licas nimno koj ho pomkev lawm?”
11Nws teb tias, “Tus txivneej uas npe hu ua Yexus ua ib co kuadis av pleev kuv ob lub qhovmuag, thiab hais kom kuv mus ntxuav muag tom lub pas dej Xilau-as. Yogli ntawd, kuv thiaj mus. Thaum kuv ntxuav muag tagnrho xwb ces kuv txawm pomkev lawm.”
12Lawv nug hais tias, “Nws nyob qhovtwg?”
Tus txivneej ntawd teb tias, “Kuv tsis paub.”
Cov Falixais Sojntsuam Seb Ua Licas Tus Digmuag Ho Pomkev
13Lawv txawm coj tus txivneej uas thaum ub digmuag ntawd mus cuag cov Falixais. 14Hnub uas Yexus ua kuadis av pleev tus digmuag ntawd ob lub qhovmuag yog hnub Xanpataus. 15Cov Falixais rov nug tus txivneej ntawd hais tias uacas nws ho pomkev tau. Nws qhia rau lawv hais tias, “Nws muab mentsis kuadis av pleev kuv ob lub qhovmuag, kuv mus ntxuav muag tas ces kuv txawm pomkev lawm.”
16Cov Falixais muaj qeeleej hais tias, “Tus txivneej uas ua li no yeej tsis yog los ntawm Vajtswv los, rauqhov Nws tsis hwm hnub Xanpataus txoj kevcai.”
Tiamsis muaj qeeleej hais tias, “Tus neeg txhaum yuav uacas ua tau tej txujci tseemceeb li no?” Ces lawv txawm sibfaib thiab tsis sibhaum lawm.
17Yogli ntawd, cov Falixais rov nug tus txivneej ntawd hais tias, “Koj hais tias Nws kho tau koj ob lub qhovmuag pomkev, koj sim qhia seb Nws yog leejtwg?”
Tus txivneej ntawd teb tias, “Nws yog ib tug xibhwb cev Vajtswv lus.”
18Cov Yudais tej nomtswv yeej tseem tsis ntseeg tias tus txivneej ntawd yeej ibtxwm digmuag thiab nimno nws pomkev lawm, mus txog thaum uas lawv hu nws niam nws txiv tuaj, 19thiab nug nkawd hais tias, “Tus no puas yog neb tus tub? Neb hais tias nws yeej ibtxwm digmuag thaum nruabthiab los, uacas nimno nws ho pomkev tau?”
20Nws niam nws txiv teb tias, “Wb paub tias nws yog wb tus tub thiab paub tias nws yeej ibtxwm digmuag thaum nruabthiab los tiag. 21Tiamsis wb tsis paub xyov ua licas nimno nws ho pomkev, thiab wb tsis paub tias xyov leejtwg kho nws ob lub qhovmuag zoo lawm. Nej kuj nug nws; nws twb loj txaus lawm, nws yeej yuav qhia tau rau nej!” 22Nws niam nws txiv hais li no vim nkawd ntshai cov Yudais tej nomtswv, rauqhov cov Yudais tej nomtswv tau sablaj hais tias, yog leejtwg lees hais tias Yexus yog tus Mexiyas, lawv yuav muab tus ntawd ntiab tawm hauv lub tsev sablaj mus. 23Vimli ntawd, nws niam nws txiv thiaj hais tias, “Nws twb loj txaus lawm; nej kuj nug nws xwb!”
24Lawv txawm rov hu tus txivneej uas ibtxwm digmuag ntawd los cuag lawv dua zaum thib ob, lawv hais rau nws tias, “Koj ciali coglus tabmeeg Vajtswv hais tias koj yuav qhia qhov tseeb xwb! Peb paub tias tus txivneej ntawd yog ib tug neeg txhaum.”
25Tus txivneej ntawd teb tias, “Kuv tsis paub xyov Nws yog ib tug neeg txhaum los tsis yog. Kuv tsuas paub tias kuv ibtxwm digmuag, tiamsis nimno kuv pomkev lawm xwb.”
26Lawv nug hais tias, “Nws ua licas rau koj? Nws kho koj ob lub qhovmuag licas, koj thiaj pomkev lawm?”
27Tus txivneej ntawd teb tias, “Kuv twb qhia tas rau nej lawm, tiamsis nej twb tsis mloog kuv tej lus li ne. Uacas nej tseem xav rovqab kom kuv piav dua thiab? Puas yog nej xav ua Nws li thwjtim thiab?”
28Lawv txawm txobthuam nws hais tias, “Koj ntag lau, thiaj yog Nws tus thwjtim; tiamsis peb yog Mauxes cov thwjtim. 29Peb paub tias Vajtswv thiaj nrog Mauxes tham xwb; tus neeg ntawd xyov Nws tuaj qhovtwg tuaj peb tsis paub!”
30Tus txivneej ntawd teb lawv hais tias, “Uacas yuav txawv ualuaj li! Nej tsis paub tias xyov Nws tuaj qhovtwg tuaj, tiamsis Nws ho kho tau kuv ob lub qhovmuag pomkev lawm! 31Peb paub tias Vajtswv yeej tsis mloog cov neeg txhaum tej lus; Nws tsuas mloog cov neeg uas hwm Nws thiab cov uas ua rawsli tej lus uas Nws qhia kom lawv ua xwb. 32Txij thaum chivkeeb uas muaj lub ntiajteb no los, tsis tau muaj leejtwg hnov dua tias muaj tus kho tau neeg digmuag thaum nruabthiab los kom pomkev. 33Yog tus neeg no tsis yog los ntawm Vajtswv los, Nws yeej ua tsis tau ib yam dabtsi li.”
34Lawv teb tias, “Koj yog neeg txhaum thaum nruabthiab los lawm, uacas koj tseem yuav ntuas peb thiab?” Ces lawv txawm muab nws ntiab tawm hauv lub tsev sablaj mus.
Digmuag Sab Ntsujplig
35Thaum Yexus hnov tias lawv muab tus txivneej ntawd ntiab tawm hauv lub tsev sablaj mus lawm, Yexus txawm mus ntsib nws thiab nug nws hais tias, “Koj puas ntseeg Neeg Leejtub?”
36Tus txivneej ntawd teb tias, “Xibhwb, thov koj qhia kuv seb Nws yog leejtwg, kuv thiaj paub ntseeg Nws.”
37Yexus hais rau nws tias, “Koj twb pom Nws lawm, Nws yog tus uas tabtom nrog koj tham no ntag.”
38Tus txivneej ntawd hais tias, “Tus Tswv, kuv ntseeg lawm!” Thiab nws txawm txhoscaug ntua pehawm Yexus.
39Yexus hais tias, “Kuv los hauv lub ntiajteb no yog los txiavtxim, kom cov uas digmuag thiaj yuav pomkev, thiab cov uas pomkev thiaj yuav digmuag.”
40Cov Falixais uas nyob ntawd, muaj qeeleej hnov Yexus hais li no, lawv txawm nug Yexus hais tias, “Tsis yog koj hais tias peb digmuag huv tibsi no lov?”
41Yexus teb tias, “Yog nej digmuag, ces nej yeej tsis muaj txim; tiamsis vim nej khav hais tias nej pomkev, yogli ntawd, nej tseem yog neeg muaj txim.”
Dewis Presennol:
Yauhas 9: MWW2022
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2022 United Bible Societies. All rights reserved.