Adnodau Beiblaidd Poblogaidd o Matayo 5

Rhanna

Kangi avaanu vasiikunga itala neke vagubikile ni ndiilo, nda haamu, vakuyiviika pa kinenevekelo, ukuta yivamulikage vonda avali mu nyumba. Ndeeni nu lumuli lwenyo, luvamulikage avaanu ukuta vagiwonage imigendele gyenyo minofu, ukuta vamupeelage indolo uDadiinyo ye ali kukyanya.

“Unyeenye lwe lumuli ku vaanu va mwe naanyi. Uwudzenge úwudzengiilwe pakyanya pa kidunda, wiilemwa ukufihwa.

Váfuunyiliilwe avanya numbula ndzelu, pakuva valamuwona uNguluvi.

Váfuunyiliilwe ávadagiine ni ngʼelo ya wugolofu, pakuva valiiguta.

Neke kangi uneene ndikuvalongela ndiitigila, muveendage avanya wukava veenyo, nu kuvalapangilila kwa Nguluvi vonda avakuvapumusa

“Váfuunyiliilwe avakwiwona vákeepile uNguluvi mu numbula, pakuva uwutwa wa kukyanya waawo.

Váfuunyiliilwe avateepudzi, pakuva valaakemeelwa ukutigila vaana va Nguluvi.

Váfuunyiliilwe avanyonyovafu, pakuva uNguluvi alavanyaamadza.

Váfuunyiliilwe aviipumuswa wiimila wa kulima idza wugolofu, pakuva uwutwa wa kukyanya waawo.

Váfuunyiliilwe aviipyanila, pakuva uNguluvi alavapyanila navo.

“Múfuunyiliilwe ngana avaanu vakuvaliga, vakuvapumusa nu kuvalonga wuviifu mu wudesi wiimila wa neene. Mukeelage nu kuheeya, pakuva uNguluvi ávaviikiye uluwonolo lwenyo lukomi kukyanya. Pakuva avavidzi navo avavalonguwe unyeenye ndeeni kye vaapumwiswe.

Váfuunyiliilwe avaleele, pakuva uNguluvi alavapeela inyi yonda.

“Unyeenye gwe muunyo ku vaanu va nyi. Neke kangi umuunyo ngana gúhuukile, gwisopwa kiki, ukuta gunoge kangi? Umuunyo ndawuli ugo gungaya malimo, apo gwivagila ukutaagwa kwivala gulivatwage na vaanu.

Lino muvedzage vakwilifu, ndawuli uDadiinyo ye ali kukyanya kye mukwilifu.

Lino, ngana mwikwidikila, mutigilage, ‘Eena,’ enewuli ngana mwikaana, mutigilage, ‘Nambi.’ Ngana mwikoongeledza madzwi agangi, ago giihuma kwa Setano.

“Kangi múpuliike ukutigila, avanyakataali vaalongeliilwe ukutigila, ‘Liiho pa liiho, ni liino pa liino.’ Neke kangi uneene ndikuvalongela ndiitigila, utanage ukumulumbila mukole umuunu ye akukulimila imbiifu. Nda haamu, umuunu ye akukudzagula uludzeedze ulwa kundiyo, umupituhidzage nu lwa kungʼigi.

Ngana iliiho lyako likukuhulila ulime indzanangifu, ulikopole nu kulitaaga. Kiba ukayadze akapagwa ka muvili kamwinga mu muvili gwako, kileka umuvili gwako gonda gukatoodzwe ku mooto ugusiidzima mbeepali. Kangi ngana iliwoko lyako likukuhulila ulime indzanangifu, apo ulidumule nu kulitaaga. Kiba ukayadze akapagwa ka muvili kamwinga mu muvili gwako, kileka umuvili gwako gonda gukatoodzwe ku mooto ugusiidzima mbeepali.