Adnodau Beiblaidd Poblogaidd o Génesis 6

Rhanna

Enga jé u uje Dupade chojninga: "¿Jé gotique gu a uje yipésu jnani nanique iji taningai nanique?" Enga gajnarenguipise Dupade iji ore jmainie, enga jnusiétaguipíse nanique ome ore ipesutique cucha gajnareque nanique enga áyuguhebátac iji jmainie.

Iji dirode udojo nanique enga Pangarádejnai Dupade chajire jnumi jnese nanique. Mu e chimo erámi unirisórone udore uje que ore áyipieraque jnopóji cucha gajnarétique nanique rĩ. Enga íjnoque puajatiguei ome Dupade nanique iji ore ipesudode cucha gajnarécho jmainie.

Dupade urúo udore mu qué jnani uñai déji nanique uje pésu Dupade ojningane cucha. Dupade chajire uté to nanique mu ajei tejnu ome nanique enga chimesẽre nanique enga chirógaja daroquéode jeta pésu.

A qué yingome uaque jne Noé uté isocade. Jnani uté ate ujñapetaguipise nanique enga jecucha pésu Dupade ojningane cucha nanique. Enga gusu uté nanique iji dojode jnanío ujade uje pésu Dupade ajegaidode nanique.

Enga Dupade chijáro daruode iji jnumi enga chojningápo rĩ: "¿Jé gotique gu a uje yipésu ore nanique? A yiji jnenga yĩro yipesudode ayoré ore jnese jne. Enga a yátaja cuchiso ponáyone jnese jne, jé aja cuchisode uñane rĩ uje quĩrique ore dique iji jnumi tudé, jé aja chugúperone ore jnese to jne rĩ."

Diga erámi unirisórone jiépisi ore iji erámi údode jnese enga udore urodie cuse to. Mu Dupade iro casodica uje ore tṍra ore ica aja gaté yui, uje ore chĩ́care Dupade abode aja ore nanique, udore uñane ore chajire erámi unirisórone ore urodie. Enga ueradépisei ore urodie ome ore ajéode. Enga jé u uje ore chisa dajegaidedie iji ore ujade. Enga gapudíe udire, udore ore chisa ñane enga ore chóji ñane gari nanique. Enga jé u nanique uje Pangarádejnai Dupade chojninga nanique: "Angoninguite pariguipise erámi unirisórone ore enga cho ujetiga ca ore áyipieraque cuse, enga cho ujetiga gusu ore aoi tiji ore. Yujopié Espíritu Sánto qué chaquĩ́ra ore ome ore ate gajnaréngone ujetiga ore chécãre dasocade. Mu a sequeredie 120 jne enga Yujopié Espíritu Sánto cha catecã́ri ore, enga jé u jne ujetiga yujuyaquei e di ome ore." Enga jé u uje Dupade iro casodica ore chisa dacotedie iji erámi unirisórone urodie nanique enga ore abode base enga umáño ore enga uje e jnacáño ore ga yorícojna ore nanique. Que gusu ore mu jé cho ore ape disi ejode to nanique rĩ. Enga ujnomerãque ore ome dojode jnani bajácho uje etoque ore nanique ome dajocaningane.

Enga jé u uje Noé dopísi Dupade uruode quigode nanique uje tangaripísi gu.

Enga jé u nanique uje Dupade catecã́ri Noé to nanique enga chojningame: "Noé á, a yĩro pisijnaringuéone ipesungórone ore jnese iji erámi údode jne. Máraque ore jnese gu ome dasijnaringuéone ome yu. Enga que ore isijnaringuéone doi jnutígome ñane ome dajocaningane. Que gusu ore mu a yátaja erámi jogonórone cucha uñane ore jnese to jne rĩ iji erámi údode jnese ujetiga yejna ore."

Enga Dupade qué jno daruode údi ome Noé enga chojninga: "Be ga apésu cucórique jne iji poridie uñáringui uje udire irisode etoguipíso ome dojodie pore ore. Enga apésu ujetiga ajéode jiei jne mu ajéode cãra ome ñane jne. Enga be cucha otate utatai uje tṍraji jnumi enga apésopo gaté rĩ enga jé u ujeta ameso cucoi cutádode ujade ome jetiga catája ñane ome, jé iji ajei, guesi ore jnese. Yigaidi tu gu ujetiga ca yotique chacája ajei.

Enga Pangarádejnai Dupade chimo uje ore chécãre uruode quigode enga ore pésu dajegaidode cucha gatuácapo ome re rĩ. Enga Dupade que chise ate onique iji ore ujade, gusu ate gajnaréngone iji erámi údode jnese nanique.

Enga bé cuchisode enga ajnime chequé, choqui ore iji cuchiso chojmara, chojmarane ore jne enga ajnája cucoi ga ãrája cucoi ajei. Yigaidi tu gu ujetiga ore nóna uágaja cucoi ajei enga jé u ujetiga uacaquecáyo iji uté ajei jnese jne, enga cuchisode a jé cho uaque ujetiga ore eca to.