Lahu Bible Edited © Thailand Bible Society and Bible Society of Myanmar, 2010, 2020.

Oˇ ve hkʼaw‸ nawˉ, Gʼuiˬsha Noˉa‸ hta‸ chi hkʼe kʼoˆ piˇ ve yoˬ. Nawˬ awˬ to leh nawˬ ve yehˬ yaˇ kʼa yaˇ hkʼa peu-eˬ, haw lo‸ kʼoˍ hkʼaw lo‸-e loˬ. Awˬ lawn kʼo, miˬguiˬ yaˇ chi ma ve awˬ hkʼaw lo nawˬ teˇ gʼaˇ ceh tiˉ hteˇ ve cawˇ ve chaw hpeh‸ ve hta‸ ngaˬ gʼa mawˬ ve yoˬ. Hkʼe te leh, to nuˇ to shaˆ leh ngaˆ teˇ hpaˍ miˬguiˬ hkʼoˆ kʼaw‸ caˉ leh cawˬ kʼai tuˬ, da‸ kehˬ ve to nuˇ to shaˆ hkʼa peu-eˬ ve awˬ paˍ awˬ ma suhˍ ceh, maˇ da‸ kehˬ ve to nuˇ to shaˆ hkʼa peu-eˬ ve awˬ paˍ awˬ ma teˇ ceh leh, ngaˆ teˇ ceuˬ le le ve awˬ paˍ awˬ ma suhˍ ceh nawˬ geh yuˬ keu-o. Suhˍ nyi peuˬ hkʼaw‸ nawˉ, awˇ chi nyi awˇ chi haˉ ngaˬ mvuhˇ yeˬ laˬ piˇ lawˬ leh, miˬguiˬ chi awˬ hkʼoˆ lo ngaˬ hkʼa te hpanˍ taˍ ve to nuˇ to shaˆ hkʼa peu-eˬ ve hta‸ te luˬ te sheˆ piˇ tuˬ yoˬ, teh‸ Noˉa‸ hta‸ kʼoˆ piˇ ve yoˬ. Gʼuiˬsha kʼoˆ piˇ taˍ ve hkʼa peu-eˬ hta‸ Noˉa‸ na yuˬ leh te ve yoˬ.
Miˬguiˬ hkʼoˆ lo chi hkʼe iˉ kaˆ uiˍ taˆ la ve teˇ yanˇ, Noˉa‸ lehˬ a sha‸ 600 hkʼaw‸ gaˬ peuˬ ve yoˬ. Iˉ kaˆ uiˍ taˆ la ve hta‸ gʼa ponˬ tuˬ, Noˉa‸ lehˬ yawˇ ve yaˇ teˇ hpaˍ, yawˇ ve awˬ miˇ ma leh yawˇ ve awˬ hkuiˇ ma teˇ hpaˍ hta‸ shiˍ veu leh haw lo‸ kʼoˍ hkʼaw lo‸-e ve yoˬ. Noˉa‸ geh teˇ geh da‸ kehˬ ve maˇ kʼoˆ, maˇ da‸ kehˬ ve maˇ kʼoˆ, Gʼuiˬsha kʼoˆ taˍ ve hkʼe, to nuˇ to shaˆ hkʼa peu-eˬ ve awˬ paˍ awˬ ma teˇ ceh, ngaˆ teˇ ceuˬ le le ve awˬ paˍ awˬ ma teˇ ceh, Noˉa‸ geh teˇ geh haw lo‸ kʼoˍ hkʼaw lo‸-e ve yoˬ. Suhˍ nyi ponˬ peuˬ hkʼaw‸ nawˉ, miˬguiˬ hkʼoˆ lo iˉ kaˆ uiˍ taˆ la ve yoˬ.
Noˉa‸ a sha‸ 600 hkʼaw‸ biˇ leh ha pa nyiˇ maˬ teˇ maˬ, teˇ chi suhˍ nyi teˇ nyi htaˇ, naˉ jaˇ kuiˬ lo tawˆ la ve iˉ kaˆ gʼuiˬ tuˇ teˇ hpaˍ awˬ hkʼaw lo iˉ kaˆ maˇ maˇ tawˆ la ve yoˬ. Mvuhˇ naw ma yehˬ miˉ hpaw leh, miˬguiˬ hkʼoˆ lo 40 nyi 40 haˉ mvuhˇ yeˬ lonˉ laˬ ve yoˬ. Oˇ ve teˇ nyi tiˉ awˬ hkʼaw lo, Noˉa‸ lehˬ yawˇ ve yaˇ Sheˍmaˆ, Haˍmaˆ, Yaˍhpehˆ hui leh yawˇ ve awˬ miˇ ma, yawˇ ve awˬ hkuiˇ ma shehˆ gʼaˇ hta‸ shiˍ veu leh haw lo‸ kʼoˍ hkʼaw lo‸-e ve yoˬ. Haiˬ ve leh meuˇ ve to nuˇ to shaˆ, uiˍ ve leh i ve to nuˇ to shaˆ leh ngaˆ teˇ ceuˬ le le, Gʼuiˬsha kʼoˆ piˇ taˍ ve hkʼe awˬ paˍ awˬ ma teˇ ceh Noˉa‸ geh teˇ geh haw lo‸ kʼoˍ hkʼaw lo‸-e ve yoˬ. Oˇ ve hkʼaw‸ nawˉ, Gʼuiˬsha yehˬ miˉ hta‸ hoˆ piˇ ve yoˬ.
40 nyi awˬ yanˇ chi awˬ hkʼaw lo, iˉ kaˆ uiˍ taˆ la leh haw lo‸ kʼoˍ cawˬ kuiˬ lo gaˬ la ve yoˬ. Iˉ kaˆ shaˬ te shaˬ uiˍ taˆ la leh, haw lo‸ kʼoˍ lonˉ lehˬ iˉ kaˆ hkʼoˆ lo fuˇ chehˇ taˍ ve yoˬ. Miˬguiˬ hkʼoˆ lo mvuh jaˇ ve hkʼaw lonˉ teˇ hpaˍ hta‸ htawˇ iˉ kaˆ hoˆ beh sheˬ ve yoˬ. Iˉ kaˆ kʼaw‸ uiˍ taˆ la leh, mvuh jaˇ ve hkʼaw lonˉ awˬ hkʼoˆ lo htawˇ 15 jaˆ hkʼe iˉ kaˆ biˇ taˆ-e ve yoˬ. Miˬguiˬ hkʼoˆ lo a sha‸ hkʼa te‸ chehˇ ve chaw yaˇ teˇ hpaˍ, ngaˆ teˇ hpaˍ, to nuˇ to shaˆ teˇ hpaˍ hkʼa peu-eˬ suh-e ve yoˬ. Miˬguiˬ hkʼoˆ shaˉ hkʼa gʼawˬ ve awˬ ceuˬ hkʼa peu-eˬ suh peuˬ sheˬ ve yoˬ. Miˬguiˬ hkʼoˆ lo a sha‸ hkʼa te‸ chehˇ ve chaw yaˇ teˇ hpaˍ, ngaˆ teˇ hpaˍ, to nuˇ to shaˆ teˇ hpaˍ hkʼa peu-eˬ ve hta‸ Gʼuiˬsha te luˬ piˇ ve yoˬ. Noˉa‸ leh yawˇ geh teˇ geh haw lo‸ kʼoˍ hkʼaw chehˇ taˍ ve teˇ hpaˍ ceh tiˉ a sha‸ gʼa ponˬ ve yoˬ. Miˬguiˬ hkʼoˆ lo iˉ kaˆ 150 nyi hoˆ beh taˍ ve yoˬ.

Gwranda ar Awˬ hkuiˉ puiˍ ve li‸ 7