Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

“ᐆᒻᒪᑎᒃᑯᑦ ᕿᒃᓵᖕᓂᐊᕋᓯ; ᒎᑎ ᐅᒃᐱᕆᓯᐅᒃ, ᐅᕙᖓᓗ ᐅᒃᐱᕆᓗᖓ. ᐊᑖᑕᒪ ᐃᒡᓗᖓᓂ ᐃᓂᒃᓴᖃᕐᐳᖅ ᐊᒥᓱᓂᒃ; ᐂᓂᐊᕐᐳᖓ ᐃᓂᒃᓴᓕᐅᕆᐊᕐᑐᕐᓗᓯ, ᑍᒤᖏᑉᐸ ᑕᒪᑐᒥᖓ ᐅᖃᐅᑎᒐᔭᓐᖏᓚᑦᓯ. ᐂᓂᐊᕈᒪᓕ ᐃᓂᒃᓴᓕᐅᕆᐊᕐᑐᕐᓗᓯ, ᐅᑎᕈᒫᕆᕗᖓ ᐂᓗᓯ ᐅᕙᓐᓃᖁᓪᓗᓯ, ᓇᔪᒐᓐᓂ. ᐊᖅᑯᑦ ᖃᐅᔨᒪᕙᓯ ᐂᕕᒋᓂᐊᕐᑕᓐᓄᑦ ᑐᕌᖓᔪᖅ.”
ᑑᒪᓯᐅᑉ ᐅᖃᐅᑎᕚ, “ᐊᑕᓃᖅ ᖃᐅᔨᒪᓐᖏᓚᒍᑦ ᓇᒧᑦ ᐂᓂᐊᕐᒪᖔᕐᐱᑦ; ᖃᓄᕐᓕ ᐊᖅᑯᒻᒥᒃ ᖃᐅᔨᒪᔪᓐᓇᕐᐱᑖ?”
ᔩᓱᓯᐅᑉ ᐅᖃᐅᑎᕚ, “ᐊᖅᑯᑕᐅᕗᖓ, ᓱᓕᔫᓪᓗᖓ, ᐃᓅᓯᐅᕗᖓ; ᑭᓇᒥᒡᓘᓐᓃᑦ ᐊᑖᑕᒧᐊᕐᑐᖃᕈᓐᓇᓐᖏᓚᖅ, ᐅᕙᒃᑰᕐᓗᓂ ᑭᓯᐊᓂ. ᖃᐅᔨᒪᒍᑦᓯᓐᖓ, ᐊᑖᑕᒐ ᖃᐅᔨᒪᒐᔭᕆᕙᓯ; ᒫᓐᓇᓕ ᖃᐅᔨᒪᓕᕐᐸᓯ ᑕᑯᓯᒪᕙᓯᓗ.”
ᐱᓕᑉᐴᓯᐅᑉ ᐅᖃᐅᑎᕚ, “ᐊᑕᓃᖅ, ᐊᑖᑕ ᑕᑯᔭᐅᑎᒍᒃ ᐅᕙᑦᑎᓐᓄᑦ; ᓈᒻᒪᒃᓯᓂᐊᕐᐳᒍᑦ ᑕᕝᕙ.”
ᔩᓱᓯᐅᑉ ᐅᖃᐅᑎᕚ, “ᐊᑯᓂᐊᓗᒃ ᓇᔪᓕᕐᐸᑦᓯ, ᓱᓕ ᖃᐅᔨᒪᓐᖏᓚᕐᒪ ᐱᓕᑉᐴᓯ? ᐅᕙᓐᓂᒃ ᑕᑯᓯᒪᔫᑉ ᐊᑖᑕ ᑕᑯᓯᒪᒋᕚ; ᓱᖕᒪᓪᓖ ᐅᖃᕐᐱᑦ, ‘ᐊᑖᑕ ᑕᑯᔭᐅᑎᒍᒃ ᐅᕙᑦᑎᓐᓄᑦ’? ᐅᒃᐱᕈᓱᓐᖏᓚᑏᑦ ᐊᑖᑕᒦᓐᓇᒪ, ᐊᑖᑕᓗ ᐅᕙᓐᓃᒻᒪᑦ? ᐅᖃᐅᓰᑦ ᐅᖃᐅᓯᕆᔭᒃᑲ ᐃᓕᑦᓯᓐᓄᑦ ᐅᕙᓐᓂᑦ ᓇᖕᒥᓂᓐᓂᑦ ᐱᓯᒪᓐᖏᓚᑦ; ᐊᑖᑕᐅᓪᓕ ᐅᕙᓐᓃᑦᑑᑉ ᐱᓂᐊᕐᓃᑦ ᐱᓂᐊᕐᓂᕆᕔᑦ. ᐅᒃᐱᕆᓯᓐᖓ ᐊᑖᑕᓐᓃᓐᓇᒪ, ᐊᑖᑕᓗ ᐅᕙᓐᓃᒻᒪᑦ; ᐊᔪᕈᑦᓯᓕ, ᐱᓂᐊᕐᓂᕆᔭᒃᑲ ᐱᓪᓗᒋᑦ ᐅᒃᐱᕆᓯᓐᖓ. ᓱᓕᔪᒥᒃ ᐅᖃᐅᑎᕙᑦᓯ, ᐅᕙᓐᓄᑦ ᐅᒃᐱᕐᑑᑉ ᐱᓂᐊᕐᓃᑦ ᐱᓂᐊᕐᓂᕆᔭᒃᑲ ᐱᓂᐊᕈᑎᒋᓂᐊᕆᕔᑦ; ᐊᖏᓂᕐᓴᓂᒡᓗ ᑖᒃᑯᓇᖓᑦ ᐱᓇᓱᐊᕈᒫᕐᐳᖅ, ᐊᑖᑕᒧᑦ ᐂᓂᐊᕋᒪ. ᓱᓇᒥᒡᓘᓐᓃᑦ ᑐᒃᓯᐊᕐᓂᐊᕈᑦᓯ ᐊᑎᓐᓂ, ᐱᓇᓱᐊᕐᓂᐊᕐᐳᖓ, ᐊᑖᑕ ᓂᕐᑐᕐᓇᕐᑎᑕᐅᖁᓪᓗᒍ ᐃᕐᓂᕐᒥᒍᑦ; ᑐᒃᓯᐊᕈᑦᓯ ᓱᓇᑐᐃᓐᓇᕐᒥᒃ ᐊᑎᓐᓂ, ᐱᓇᓱᐊᕐᓂᐊᕐᐳᖓ.”

“ᓇᒡᓕᒋᒍᑦᓯᓐᖓ, ᐱᖁᔭᒃᑲ ᒪᓕᖕᓂᐊᕐᐸᓯ. ᐊᑖᑕᓗ ᑐᒃᓯᐊᕐᕕᒋᓂᐊᕐᐸᕋ, ᐃᑲᔪᕐᑎᒋᑲᓐᓂᕐᓂᐊᕐᑕᑦᓯᓐᓂᒃ ᑐᓂᓯᖁᓪᓗᒍ ᐃᓕᑦᓯᓐᓄᑦ, ᐃᓕᑦᓯᓐᓃᑦᓮᓐᓇᕐᓂᐊᕐᑐᒥᒃ ᐃᓱᖃᖏᑦᑐᒧᑦ, ᑖᓐᓇᐅᕗᖅ ᐊᓂᕐᓂᖅ ᓱᓕᔪᒥᑦ ᐱᔪᖅ, ᓯᓚᕐᔪᐊᕐᒥᐅᑦ ᐱᔪᓐᓇᓐᖏᑕᖓᑦ, ᑕᑯᔪᓐᓇᖏᓐᓇᒥᑦᔪᒃ ᖃᐅᔨᒪᖏᓐᓇᒥᑦᔪᒡᓗ; ᐃᓕᑦᓯᓕ ᖃᐅᔨᒪᕙᓯ, ᐃᓕᑦᓯᓐᓃᒻᒪᑦ, ᐃᓗᓯᓐᓃᓐᓂᐊᕐᒪᓪᓗ.
“ᐃᓕᐊᕐᔪᒃᑎᑐᑦ ᕿᒪᖕᓂᐊᓐᖏᓚᑦᓯ; ᐅᑎᓛᕆᕗᖓᓕ ᐃᓕᑦᓯᓐᓄᑦ. ᐊᑯᓂᐅᖏᑦᑐᖅ ᓯᓚᕐᔪᐊᕐᒥᐅᑦ ᑕᑯᖃᑦᑕᕐᓂᐊᕈᓐᓃᕐᐹᖓ, ᐃᓕᑦᓯᓕ ᑕᑯᓛᕆᕙᑦᓯᓐᖓ; ᐃᓅᒐᒪ, ᐃᓕᑦᓯᑦᑕᐅᖅ ᐃᓅᓂᐊᕆᕗᓯ. ᐅᓪᓗᖅ ᑖᓐᓇ ᓇᓪᓕᐅᑎᒃᐸᑦ ᖃᐅᔨᔪᒫᕐᐳᓯ ᐊᑖᑕᓐᓃᓐᓇᒪ, ᐃᓕᑦᓯᓗ ᐅᕙᓐᓃᓐᓇᑦᓯ, ᐅᕙᖓᓗ ᐃᓗᑦᓯᓐᓃᓐᓇᒪ.
“ᐱᖁᔭᓐᓂᒃ ᐱᓯᒪᔪᖅ ᒪᓕᒡᓗᒋᓪᓗ, ᑖᓐᓇᐅᕗᖅ ᐅᕙᓐᓂᒃ ᓇᒡᓕᒍᓱᒃᑐᖅ; ᐊᑖᑕᒪᓗ ᓇᒡᓕᒋᓂᐊᕐᐹ ᐅᕙᓐᓂᒃ ᓇᒡᓕᒍᓱᒃᑐᖅ, ᐅᕙᖓᑦᑕᐅᖅ ᓇᒡᓕᒋᓂᐊᕐᐸᕋ ᐅᕙᓐᓂᒡᓗ ᖃᐅᔨᔭᐅᑎᓪᓗᖓ ᑖᑦᓱᒧᖓ.”
ᔫᑕᓯᐅᑉ ᐅᖃᐅᑎᕚ (ᐃᔅᑲᕆᐊᑎᐅᖏᑦᑑᑉ), “ᐊᑕᓃᖅ, ᓱᖕᒪᑦ ᐃᓕᖕᓂᒃ ᖃᐅᔨᔭᐅᑎᑦᓱᒪᕕᑦ ᐅᕙᑦᑎᓐᓄᑦ, ᓯᓚᕐᔪᐊᕐᒥᐅᓄᓪᓗ ᖃᐅᔨᔭᐅᑎᑦᓱᒪᓇᒃ?”
ᔩᓱᓯᐅᑉ ᑭᐅᕚ, “ᐅᕙᓐᓂᒃ ᓇᒡᓕᒍᓱᒃᑑᑉ, ᐅᖃᐅᓯᒃᑲ ᒪᓕᖕᓂᐊᕐᐰᑦ, ᐊᑖᑕᒪᓗ ᓇᒡᓕᒋᓂᐊᕐᐹ, ᐊᑖᑕᒐᓗ ᐅᕙᒍᒃ ᑎᑭᓛᕐᐸᕗᒃ ᑕᕝᕙᓂᓗ ᐊᖏᕐᕋᖃᓕᕐᓗᓄᒃ. ᐅᕙᓐᓂᒡᓕ ᓇᒡᓕᒍᓱᖏᑦᑑᑉ ᐅᖃᐅᓯᒃᑲ ᒪᓕᓐᖏᓔᑦ; ᐅᖃᐅᓰᑦ ᑐᓴᕐᑕᓯ ᐱᒋᓐᖏᓚᒃᑲ ᐊᑖᑕᒥᓪᓕ ᑎᓕᔨᓐᓂᑦ ᐱᕗᑦ.
“ᑕᒪᒃᑯᓂᖓ ᐅᖃᓪᓚᒡᕕᒋᕙᑦᓯ ᓱᓕ ᐃᓕᑦᓯᓐᓂ ᓇᔫᑎᓂᓐᓂ. ᐃᑲᔪᕐᑎᒃᓴᕐᓕ, ᐊᓂᕐᓂᖅ ᐃᑦᔪᕐᓁᑦᑐᖅ, ᐊᑖᑕᐅᑉ ᑎᓕᓛᕐᑕᖓᑕ ᐊᑎᓐᓂ, ᑖᑦᓱᒪ ᐊᔪᕆᕐᑐᕈᒫᕐᐹᓯ ᓱᓇᓕᒫᓂᒃ, ᐃᖅᑬᑎᓪᓗᓯᓗ ᐅᖃᐅᓯᕆᓚᐅᕐᑕᓕᒫᓐᓂᒃ ᐃᓕᑦᓯᓐᓄᑦ.
“ᐃᓱᒪᔮᕐᓇᖏᑦᑐᒥᒃ ᕿᒤᕕᒋᕙᑦᓯ; ᐅᕙᖓ ᓇᖕᒥᓂᖅ ᐃᓱᒪᔮᖏᓐᓂᕆᔭᓐᓂᒃ ᑐᓂᓯᕕᒋᕙᑦᓯ; ᑐᓂᓯᓐᖏᓚᖓ ᓯᓚᕐᔪᐊᕐᒥᐅᑦ ᑐᓂᓯᑦᔪᓯᖏᑎᑐᑦ. ᐆᒻᒪᑎᒃᑯᑦ ᕿᒃᓵᖕᓂᐊᕋᓯ, ᓯᕘᕋᓂᐊᕋᓯᓗ. ᑐᓴᕐᐳᓯ ᐅᖃᐅᑎᒐᑦᓯ, ‘ᐊᐅᓪᓚᕐᓂᐊᕋᒪ, ᐅᑎᕈᒫᕆᕗᖓᓕ ᐃᓕᑦᓯᓐᓄᑦ.’ ᓇᒡᓕᒋᒍᑦᓯᓐᖓ, ᑕᕝᕙ ᖁᕕᐊᓱᒃᑲᔭᕐᐳᓯ, ᐊᑖᑕᒧᑦ ᐂᓂᐊᕐᓂᕋ ᐱᓪᓗᒍ; ᐊᑖᑕ ᐊᖏᓂᕐᓴᐅᖕᒪᑦ ᐅᕙᓐᓂᑦ. ᑕᒪᓐᓇ ᐃᓕᑦᓯᓐᓄᑦ ᐅᖃᐅᓯᕆᕙᕋ ᓇᓪᓕᐅᑎᖅᑳᕐᑎᓐᓇᒍ, ᑕᒪᓐᓇ ᓇᓪᓕᐅᑎᒃᐸᑦ ᐅᒃᐱᓕᖁᓪᓗᓯ. ᐊᑯᓂ ᐅᖃᓪᓚᕕᒋᓂᐊᕈᓐᓃᕐᐸᑦᓯ, ᓯᓚᕐᔫᑉ ᑕᒪᑐᒪ ᐊᐅᓚᑦᓯᔨᖓ ᕾᓕᕐᒪᑦ. ᐅᕙᓐᓄᓪᓗ ᐱᔪᓐᓇᕐᓂᖃᕋᓂ; ᓯᓚᕐᔪᐊᕐᒥᐅᑦ ᑐᑭᓯᓕᖁᓪᓗᒋᑦ ᐊᑖᑕ ᓇᒡᓕᒋᒐᒃᑯ; ᑍᒤᒻᒪᑦ ᐱᓇᓱᐊᕐᐳᖓ ᐊᑖᑕᒪ ᐱᓇᓱᐊᕐᑕᐅᖁᓚᐅᕐᑕᖏᓐᓂᒃ.
“ᒪᑭᓪᓗᓯ, ᑕᒫᓐᖓᑦ ᓅᓕᕐᑕ.”

Gwranda ar ᔪᐊᓇᓯᐅᑉ ᐊᒡᓚᖏᑦ 14