If you have would like a copy of this version please contact info@davaraudiobibles.org

The Gofa Bible, CC-BY-SA-4.0, The Word for the World International and The Word for the World Ethiopia. (Text). Gofa Audio Bible, CC-BY-SA-4.0, Davar Partners International, 2018. (Audio).

ጌሻ ማፃፋ

The Word for the World International and The Word for the World Ethiopia

ፓስካ ቦንችያ ጋላሳይ ጋካናፐ ስንትድ ሀ አላምያ አግድ አዋኮ ብያ ዎደይ ጋክዳይሳ የሱሲ ኤርስ። ሀ አላምያን ደእያ ባ አሳ ኡባ ዎደ ዶስስ፤ ዉርሰ ጋካናዉካ ኤንታ ዶስስ።
የሱሳራነ እያ ታማረታራ እስፈ ካሆ ሞሶና። ሄሳፈ ካሰ ፃላሄይ ስሞና ናኣ አስቆሮታ ይሁድ የሱሳ አድ እማናዳ እያ ዎዛናን ኢታ ቆፋ ዎስ። የሱሲ አዋይ ኡባባ እያ ኩሸን ዎዳይሳ፥ እ ፆሳ ማታፐ ይዳይሳነ ስሚድ እያኮ ባናይሳ ኤርስ። የሱሲ ጋይታ ቦላፈ ደንድድ ቦላ ባጋ ማኡዋ ቃር ዎድ፥ ፖፃ ኤክድ ባ ፄሳን ማርፃፍስ። ሄሳፈ ጉየ፥ ሃ ሜቻ ሚሸን ትግድ፥ ባ ታማረታ ቶሁዋ ሜጭስ፤ ቃስ ባ ፄሳን ዳንጭዳ ፖፃን ቁችስ።
የሱሲ ስሞና ጰፅሮሳኮ ያ ዎደ ጰፅሮስ፥ “ጎዳዉ፥ ነ ታ ቶሁዋ ሜጫኔ?” ያግስ።
የሱሲ ዛሪድ እያኮ፥ “ታኒ ኦይሳ ነ ሀእ ኤራካ፥ ሽን ጉየፐ አኬካና” ያግስ።
ያትን፥ ጰፅሮስ፥ “ነ ታ ቶሁዋ ኡባራካ ሜጫካ” ያግስ።
የሱሲ እያኮ፥ “ታኒ ነ ቶሁዋ ሜጮና እፅኮ ነዉነ ታዉነ እስፈተ ባዋ” ያግስ።
ጰፅሮስ የሱሳኮ፥ “ጎዳዉ፥ ያትኮ፥ ታ ቶሁዋ ፃላላ ግዶናሽን ታ ኩሽያነ ታ ሁጵያ ሜጫ” ያግስ።
የሱሲ ዛሪድ፥ “ቦላ ሜጨትዳ ኦንካ ቶሆፐ ሀራባ ሜጨታናዉ ኮሸና፤ እያዉ ኡባሶይ ጌሽ። ህንተ ጌሽ፥ ሽን ኡባይ ጌሽ ግደከታ” ያግስ። የሱሲ ባና አድ እማና ኡራይ ኦነኮ ኤርያ ግሾ፥ “ህንተ ኡባይ ጌሽ ግደከታ” ያግስ።
ኤንታ ቶሁዋ ሜጭዳፐ ጉየ፥ የሱሲ ባ ማኡዋ ዛር ማእስ። ስም ጋይታ ቦላ ኡትድ ኤንታኮ፥ “ታኒ ህንተዉ ኦዳይሳ አኬከቲ? ህንተ ታና አስታማረነ ጎዳ ጌታ፤ ታኒ ህንተ ገይሳ ግድያ ግሾ ሎኦ ግደታ። ታኒ ህንተዉ ጎዳነ አስታማረ ግዳሸ ህንተ ቶሁዋ ሜጭኮ ህንተካ እሶይ እሱዋስ ሄሳዳ ኦናዉ በሴስ። ህዛ፥ ታኒ ህንተዉ ኦዳይሳዳ ህንተካ ኦና መላ ህንተዉ ሌምሶ ግዳስ። ታኒ ህንተዉ ቱማ ኦዳይስ፤ አይለይ ባ ጎዳፐ፥ ኪተትዳይስ ኪትዳይሳፈ አና። ህንተ ሄሳ ኤርድ ኦያባ ግድኮ አንጀትዳይሳታ።
“ታኒ ህንተና ኡባ ጊከ፤ ታኒ ዶርዳይሳታ ኤራይስ። ሽን ጌሻ ማፃፋን፥ ‘ታ ባርስዳይስ ታ ኩሽያ ሳፅስ’ ጌተትዳይስ ቱማ ግዳናዉ በሴስ። ‘ታኒ ታና ግደይሳ’ ህንተ አማናና መላ ሄስ ሀናናፐ ስንታዳ ህንተዉ ኦዳይስ። ታኒ ህንተዉ ቱማ ኦዳይስ፤ ታኒ ኪትዳ ኦናካ ሞክያ ኡራይ ታና ሞኬስ። ታና ሞክያ ኦንካ ታና ኪትዳይሳ ሞኬስ” ያግስ።


የሱሲ ሄሳ ኦድዳፐ ጉየ፥ ባ ዎዛናን ዳሮ ኡንኤትድ፥ “ታኒ ህንተዉ ቱማ ኦዳይስ፤ ታና ህንተፈ እሶይ አድ እማና” ግድ ቆንጭስድ ኦድስ።
እ ኦደባ ኦድያኮ እያ ታማረታስ ኤረቶና እፅን እሶይ እሱዋ ፄልዶሶና። እያ ታማረታፐ እሶይ፥ የሱሲ ዶሰይስ፥ የሱሳ ማታን ኡትስ። ሄሳ ግሾ፥ ስሞን ጰፅሮስ እያ ቃምኦትድ፥ “እ ኦና ግያኮ አነ ኦይቻ” ያግስ።
ሄሳ ግሾ፥ ሄ ታማረይ የሱሳኮ ሺቅድ ሀይን፥ “ጎዳዉ፥ እ ኦኔ?” ያግስ።
የሱሲ ዛሪድ፥ “ታኒ ኡይ ዎፀን ቱሻዳ ባርሰይሳ” ያግስ። ቃስ ኡይ መን ኤክድ፥ ዎፀን ቱሽድ፥ ስሞና ናኣ አስቆሮታ ይሁዳ ባርስስ። ይሁድ ኡይ ባርዳፐ ጉየ፥ ፃላሄይ ኤለስድ ይሁዳን ገልስ። የሱሲ እያኮ፥ “ኔኒ ኦናዉ ቆፕዳባ ኤለሳዳ ኦ” ያግስ። ሽን ጋይታ ቦላ ኡትዳይሳታፐ ኦንካ የሱሲ ሄሳ አይስ እያኮ ግዳኮ ኤርቤና። ይሁድ ሚሸ ኦይክያ ግሾ፥ እያ ታማረታፐ እሶት እሶት የሱሲ እያ፥ “ፓስካ ቦንችያ ጋላሳስ ባንታዉ ኮሽያባ ሻማ ዎይኮ ማንቆታስ ሙፃታ እማ ግስ” ያግድ ቆፕዶሶና።
ይሁድ ኡይ ባርዳ መላ ኤለስድ ካረ ከይስ። ሄ ዎደ ሳእ ቃማ።

ይሁድ ካረ ከይዳፐ ጉየ፥ የሱሲ፥ “ሀእ አሳ ናአይ ቦንቸትስ፤ ፆሳይካ እያ ባጋራ ቦንቸትስ። ፆሳይ እያ ባጋራ ቦንቸትኮ እ ባ ሁጰን አሳ ናኣ ቦንቻና፤ ቃስ እ ሄሳ ኤለስድ ኦና። ታ ናይቶ፥ ታኒ ህንተራ ዳሮ ዎደ ጋምእከ። ህንተ ታና ኮያና፥ ሽን ታኒ አይሁደታስ ኦድዳይሳ መላ፥ ‘ህንተ ታኒ ብያ በሳ ባናዉ ዳንዳኤከታ።’ ታኒ ህንተዉ እምያ ኦራ ኪታይ ሀይሳ፤ እሶይ እሱዋ ዶስተ። ታኒ ህንተና ዶስዳይሳዳ ህንተ እሶይ እሱዋ ዶሳናዉ በሴስ። ህንተ እሶይ እሱዋራ ዶሰትኮ ህንተ ታ ታማረ ግደይሳ አሳ ኡባይ ኤራና” ያግስ።
ስሞን ጰፅሮስ የሱሳኮ፥ “ጎዳዉ፥ ኔኒ አዉ ባይ?” ያግስ።
የሱሲ ዛሪድ፥ “ታኒ ብያ በሳ ኔኒ ሀእ ካላናዉ ዳንዳአካ፥ ሽን ጉየፐ ታና ካላና” ያግስ።
ጰፅሮስ፥ “ጎዳዉ፥ ታኒ ነና ሀእ ካላናዉ አይስ ዳንዳእክና? ታኒ ነ ግሾ፥ ሀይቃናዉካ ጊጋ ኡታስ” ያግስ።
የሱሲ ዛሪድ፥ “ታ ግሾ ሀይቃናዉ ቱማ ጊጋ ኡታዲ? ታኒ ነዉ ቱማ ኦዳይስ፤ ኩቶይ ዋሳናፐ ስን ኔኒ ታና ሄ ቶሆ ካዳና” ያግስ።

Gwranda ar ዮሃንሳ 13