If you would like a copy of this version please contact info@davaraudiobibles.org

Tavoyan: Dawei Bible, CC-BY-SA-4.0, The Word for the World International, 2024. (Text)
Tavoyan: Dawei New Testament Audio Bible, CC-BY-SA-4.0, Davar Partners International, 2025. (Audio)

Tavoyan: Dawei New Testament

ယေရှုဟှာ တဗဲ့တော် ဆယ့်နှေ့ပါးဟှို ခေါ်ဘီးဟှာ ညစ်ညူးဟှူနတ်လေဟှို နှန်ထုဟှို့တွပ်န ရောဂါဘောင်းဇောင်ဟှို ပျော့‑က်ကင်းစေဟှို့တွပ် ခွမ့်တဂိုးအာဏာဟှို ပေးအပ်တော်မူလေဟှယ်။ တမန်တော်ဆယ့်နှေ့ပါးရဲ့ နာမယ်လေဟှာ ပေတရု ဆိုဘီးခေါ်ဟှူ ရှိမုန်န သူ့ညီ အန္ဒြေ၊ ဇေဗေဒဲရဲ့သား ယာကုပ်န သူ့ညီကို ယောဟန်၊ ဖိလိပ္ပုန ဗာသောလမဲ၊ သောမန အခွန်ကော့‑က်မား မဿဲ၊ အာလဖဲရဲ့သား ယာကုပ်န သဒ္ဒဲ၊ မျိုးရှစ်စိအားထတ်သန်ဟှူ ရှိမုန်န ယေရှုဟှို သစ်စာဖော့‑က်ဟှူ ယုဒရှကာရုတ် ဖြစ်လေဟှယ်။


ဆယ့်နှေ့ပါးဟှို ယေရှုဟှာ စေလွှတ်လိုက်ဘီး မိန့်မှာလိုက်ဇာဟှ “လူမျိုးခြားဒေသန ရှမာရိဗြို့လေဟှို သွားဂေ့န။ ဣသရေလလူမျိုးရဲ့ ပျော့‑က်နေဟှူ သိုးလေနားဟှိုဘဲ့ ရင်ဦးဆောင်းသွားဂေ့ပါ။” “သွားဘီးဟှာ ‘ကောန်းဂန်နိုင်ငံတော် တည်ထောန်ဟှို့နီးဘီ!’ ဆိုဘီး ဟောပြောဂေ့ပါ။ လူနာလေဟှို ကျန်းမာစေပါ။ လူသေလေဟှို ပ္လန်ရှင်စေဂေ့ပါ။ နူနာသယ်လေဟှို သန့်ရှင်းစေဂေ့ပါ။ နတ်ဆိုးလေဟှိုလည်း နှန်ထုဂေ့ပါ။ နန်းနို့လေဟှာ ဖိုးခပေးရဘဲန လတ်ခံရရှိဟှူမျိုး ဖိုးခယူဘဲန ပေးကမ်းဂေ့ပါ။ နန်းနို့ရဲ့ ခါးဗတ်ထဲမာ ရွှေ၊ ငွေ၊ ကြေးဒန်းဂါးလေဟှို ထည့်သွားဂေ့န။ ခရီးတွပ် လွယ်အိ၊ အန်းဂီပို၊ ခေနပ်န တောန်အူးဟှိုလည်း ယူဆောန်ဂေ့န။ လောက်လောက်ဟှူ သူဟှာ ကျွေးမွေးဇာဟှို ရထိုက်ဟှယ်။”
“ဗြို့တဗြို့၊ ဝါတဝါဟှို ဝမ်ဟှူ ခီမာ နန်းနို့ဟှို ကြိုဆိုဟှူ သူဟှို ရှာဘီး အယ်နေရာဟှ နန်းနို့လေ ထွပ်ဟှားခန်ခီထိ သူးနို့နတူးဒူနေဂေ့ပါ။ နန်းနို့လေ အီထဲဟှို ဝမ်ဟှားခီမာ ‘နန်းနို့နတူးဒူ ငြီသတ်မှုရှိပါစေ’ ဆိုဘီး နှောက်ဆစ်ဂေ့ပါ။ အယ်အီမာရှိဟှူ လူလေဟှာ နန်းနို့ဟှို လတ်ခံကြိုဆိုဟှယ် ဆိုဟှာ နန်းနို့လေ နှော့‑က်ဆစ်ဟှူ ငြီသတ်မှုဟှာ ကျန်ရစ်ပါစေ။ အယ်ဘေမဲ့ နန်းနို့ဟှို လတ်ခံဂေ့ဘဲနေဟှယ် ဆိုဟှာ နန်းနို့နားဟှို ပ္လန်လာစေ။ တယော့‑က်ယော့‑က်ဟှ နန်းနို့လေဟှို လတ်ခံဟှ ဆိုဟှာ နန်းနို့စကားဟှို နားထောန်ဂေ့ဘဲနေဟှယ် ဆိုဟှာ အယ်အီဟှ ထွပ်ဟှားဟှူ ခီမာ နန်းနို့ခေဖွားဟှ မ္လေမုဟှို ခါခ္လလိုက်ဂေ့။ ငါ မှန်ပြောမယ်၊ တရားစီရင်ဟှူ နေ့မာ ဘုရားသခင်ဟှာ အယ်ဗြို့ထတ် သောဒုံဗြို့န ဂေါမောရဗြို့ဟှို ပိုဘီး ကရုဏာတော်ဟှို ပြသလေ့မယ်!”


“နားထောန်ဂေ့! ဝံပုလွေအောက်ထဲဟှို သိုးလေဟှို လွှတ်ဟှူမျိုး နန်းနို့လေဟှို ငါစေလွှတ်မယ်။ အယ်ကြောန့် ဗွီမျိုးလီမာဘီး ချိုးငှတ်မျိုး ဖ္လူစင်ရမယ်။ လူလေဟှို ဒိထားဘီးနေဂေ့ပါ။ ဖြားဖြစ်ကြောန့်နူးဆိုဟှာ နန်းနို့လေဟှို ဖမ်းဆီးဘီးဟှာ တရားရောင်းဟှို အပ်လေ့မယ်။ ဝါလယ်ဇရပ်လေမာ ရိုက်ခံရဂေ့လေ့မယ်။ အယ်သူလေန လူမျိုးခြားလေရှေ့မာ သတ်သေဖြစ်ဟှို့တွပ် ဗြို့ဝန်မန်းလေန မန်းဂီးလေ ရှေ့ဟှို ငါ့ကြောန့် နန်းနို့ဟှို စစ်ဆေးဟှို့ ခေါ်ဆောန်ဟှားဇာ ခံရဂေ့လေ့မယ်။ နန်းနို့ဟှို စစ်ဆေးဟှို့ ခေါ်ဟှားခီမာ ဖယ်မျိုးပြောရဟှို့ ဆိုဘီး စိုးရိမ်ဂေ့န။ အယ်ခီမာ နန်းနို့ပြောရဟှို့စကားဟှို ရဂေ့လေ့မယ်။ ဖြားဖြစ်ကြောန့်နူးဆိုဟှာ နန်းနို့လေဟှာ ကိုယ့်ကိုယ်ကိုယ် ပြောနေဇာ မှုဟှ။ နန်းနို့ဖ ဘုရားသခင်ရဲ့ ဝိညာဉ်တော်ဟှာ နန်းနို့အားဖြင့် ပြောတော်မူလေဟှယ်။”
“လူလေဟှာ သူးနို့ရဲ့ ညီကိုရှင်းရှင်း သေစေဟှို့တွပ် အပ်ဂေ့လေ့မယ်။ ဖလေဟှလည်း သားလေဟှို အပ်လေ့မယ်။ သားမီးလေလည်း သူးနို့ရဲ့ မိဖလေဟှို ရန်ပြုဘီးဟှာ သတ်ဂေ့လေ့မယ်။ လူလေဟှလည်း ငါ့နာမကြောန့် နန်းနို့လေဟှို မူးတီးဂေ့လေ့မယ်။ အယ်ဘေမဲ့ ငါ့နာမဟှို ဆောင်းထိ ဆွဲကိုင်ဟှူသူဟှာ ကယ်တန်ရှင်းဟှို ခံရလေ့မယ်။ ဗြို့တဗြို့မာ နန်းနို့ဟှာ ညှဉ်းဆဲခံရဟှူ ခီမာ တခြားဗြို့ဟှို ထွပ်ပ္လေးဂေ့ပါ။ ငါ မှန်ပြောမယ်၊ ဣသရေလ ဗြို့လေ ဂူလောင်းဟှို သွားလာဟှို့ ပီးခန်မာ လူ့ရဲ့သားဟှာ ကြွလာလေ့မယ်။”
“တဗဲ့လည်း ဆရာထတ် သာဟှ။ ကျွန်လည်း သခင်ထတ်သာဟှ။ တဗဲ့လည်း ဆရာဟှူမျိုး၊ ကျွန်လည်း သခင်ဟှူမျိုး ဖြစ်ဟှယ် ဆိုဟှာ ရလော့‑က်ဘီ။ အီးထောန်ဦးစီးဟှို ဗေလဇေဗုလ ဆိုဘီး ခေါ်ခံရဟှယ် ဆိုဟှာ အီသူအီသားလေဟှို ပိုဘီး ခေါ်ဂေ့လေ့မယ်!”


“အယ်ကြောန့် သူးနို့လေဟှို ကြော့‑က်ဂေ့န။ ဖောင်းဟှားဟှူ ဇာလေ ဂူလောင်း ပေါ်လာလေ့မယ်။ ဝှပ်ဟှားဇာလေ ဂူလောင်းဟှာလည်း ထန်ရှားလာလေ့မယ်။ မှောန်ထဲမာ နန်းနို့ဟှို ငါပြောဟှူ စကားလေဟှို လန်းရောန်ထဲမာ နန်းနို့လေ ကြေညာဂေ့ပါ။ နန်းနို့ရဲ့ နားနားမာ တိုးတိုးဟှားကြားဟှူ စကားလေဟှို အီးခေါန်မိုးထတ်မာ အော်ဘီးကြေညာဂေ့ပါ။ ကိုယ်ခန္ဓာဟှိုဘဲ့ သတ်နိုင်ဘီးဟှာ သတ်ဝိညာဉ်ဟှို သတ်နိုင်ဂေ့ဘဲသူလေဟှို ကြော့‑က်ဂေ့န။ ကိုယ်ခန္ဓာန သတ်ဝိညာဉ်ဟှို ငရဲမာ ဖျစ်ဆီးနိုင်သူဟှိုဘဲ့ ကြော့‑က်ဂေ့ပါ။ အီးဇာဟှား နှေ့ကောန်ဟှို ပဲနီတပ္လားန ရောန်းဟှယ်မှုဟှလော။ နန်းနို့ဖရဲ့ ခွမ့်မှေ့ဘဲနေဟှာ အယ်မူအီးဇာဟှားလေ တကောန်လည်းဘဲ့ မ္လေထတ်ဟှို က္လဂေ့ဟှ။ နန်းနို့ခေါင်းထတ်ဟှ ဆားဗန်လေ ဂူလောင်းဟှိုလည်း ရေတွပ်ဘီးသား ဖြစ်ဟှယ်။ အယ်ကြောန့် ကြော့‑က်ဂေ့န! နန်းနို့လေဟှာ အီးဇာဟှားလေထတ် ရရာတိုင်း ဖိုးကီးဟှယ်။”


“ဖယ်သူဘဲ့ဖြစ်ဖြစ် လူလေရှေ့မာ ငါ့ဟှို ကယ်တန်ရှင် သခင်နေန ဝန်ခံလေဟှယ်။ ကောန်းဂန်ဘောင်မာ ရှိတော်မူဟှူ ငါ့ဖရှေ့မာ အယ်သူဟှို ငါဝန်ခံမယ်။ အယ်ဘေမဲ့ လူလေရှေ့မာ ငါ့ဟှို ငြင်းပယ်ဟှယ် ဆိုဟှာ ကောန်းဂန်ဘောင်မာရှိဟှူ ငါ့ဖရှေ့မာ အယ်သူဟှို ငါငြင်းပယ်မယ်။”


“အယ်လောကဟှို ငြီသတ်ရှင်းပေးဟှို့တွပ် ငါလာဟှယ် ဆိုဘီး ထန်ဂေ့န။ ငြီသတ်ရှင်းပေးဟှို့ လာဟှူဇာ မှုဟှ။ အယ်ဘေမဲ့ ရှင်းရှင်းကွဲပြားဟှို့တွပ် ငါလာဟှူဇာ ဖြစ်လေဟှယ်။ ဖနသား၊ မိနမီး၊ ယောက္ခမန ချွေးမလေ ရှင်းရှင်း စိဝန်းကွဲစေဟှို့တွပ် ငါလာဇာဖြစ်ဟှူကြောန့် နန်းနို့ရဲ့ အီသူအီသားလေလည်း နန်းနို့ရဲ့ ရန်သူလေ ဖြစ်လာလေ့မယ်။”
“ယော့‑က်ယော့‑က်ဟှာ ငါ့ထတ် သူးနို့ရဲ့ မိဖဟှို ပိုဘီး ရှစ်လေဟှယ်။ အယ်သူဟှာ ငါ့နထိုက်တန်ဟှ။ ယော့‑က်ယော့‑က်ဟှာ ငါ့ဟှို ရှစ်ဟှူထတ် သားမီးလေဟှို ပိုဘီး ရှစ်လေဟှယ်။ အယ်သူဟှာလည်း ငါနထိုက်တန်ဟှ။ သူးနို့ရဲ့ လတ်ဝါးကပ်တိုင်ဟှို ထမ်းဘီး ငါ့နော့‑က်ဟှို လိုက်ဂေ့ဘဲနေသူဟှာ ငါ့တဗဲ့လေဖြစ်ဟှို့ ထိုက်တန်ဂေ့ဟှ။ သူးနို့ရဲ့သတ်ဟှို တွိဟှူသူဟှာ သတ်ရှောင်းလေ့မယ်။ အယ်ဘေမဲ့ ငါ့ကြောန့် သူးနို့ရဲ့ သတ်ရှောင်းဟှူသူဟှာ သတ်ဟှို တွိရလေ့မယ်။”


“နန်းနို့ဟှို လတ်ခံဟှူ သူလေဟှာ ငါ့ဟှို လတ်ခံဇာဖြစ်လေဟှယ်။ ငါ့ဟှို လတ်ခံဟှူ သူလေဟှာလည်း ငါ့ဟှို စေလွှတ်ဟှူသူဟှို လတ်ခံဇာဖြစ်လေဟှယ်။ ဘုရားသခင်ရဲ့ နာမတော်ဟှို ထော့‑က်ဘီး ဘုရားသခင်ရဲ့ ပရောဖက်ဟှို လတ်ခံဟှူသူလေဟှာ အယ်ပရောဖက်ရဲ့ ကျိုးဟှို ခံစားရလေ့မယ်။ ဖြောန့်မတ်ဟှူသူဟှို ထော့‑က်ဘီး ဖြောန့်မတ်ဟှူသူဟှို လတ်ခံဟှူသူဟှလည်း ဖြောန့်မတ်ဟှူသူရဲ့ ကျိုးဟှို ခံစားရလေ့မယ်။ ငါ မှန်ပြောမယ်၊ ငါ့နာမဟှို ထော့‑က်ဘီး ငါ့တဗဲ့လေထဲဟှ အားနဲဟှူသူတယာ့‑က်ယော့‑က်ဟှို ရေတခွပ်တိုက်ဟှယ် ဆိုဟှာ အယ်သူဟှာ ကျိုးဟှို ခံစားရလေ့မယ်” ဆိုဘီး မိန့်မှာဟှားလေဟှယ်။

Gwranda ar မဿဲ 10