Komo: Ɔngana á Kɛ̌kɛ (New Testament+)

Ɔngana á Kɛ̌kɛ

Ka nkpangeɔ, Moyo ɗátú ɓei. Moyo ndɔ, ɗátú kimoci na Mokonga, Moyo ɗátú Mokonga. Moyo nde ɗátú kimoci na Mokonga ka nkpangeɔ. Mokonga ɗáconji kema bui ka Moyo. Nna tanda na kema moci nde ɗágeani kángá yɛ. Yɛ, ɗátú cina á enda, enda ndɔ áoɓá owanga ka ɓakpa. Owanga ndɔ áɔbɛnya ka keiphe, keiphe ɗákáími gǎkɛ ú.
Cɔ, ɗátú na nkpa moci, mmbé Mokonga ɗánteki, ina akɛ Yoáni. Yɛ, ɗábiki ka ɓá nɗigimisi, ka ɗigimisa á owanga ndɔɔ. Ka tɔ̌mia akɛ nyɔngɔ á owanga ndɔ, aunge ɓakpa ɓɔbu ɓáɓeeki. Yɛ sasakɛ, ɗákátú owanga ndɔ. Ɗábiki ndiu ka ɗigimisa á owanga ndɔ. Owanga ndɔ unge ɗátú tɔ á ɗoni, nnde abiki ka mokonda, n'aɔbɛnya ka ɓakpa ɓɔbu.
Moyo ɗátú ka mokonda. Mokonga ɗáconji mokonda ka Moyo, ɓato á ka mokonda ɗáɓákánengekisi gǎkɛ. Moyo ɗábiki mɔtɛ-aɓɔ, ɓakpa nɛɓɔ ɗáɓákánsesi. Ɓuangbo gǎkɛ ɓunde ɗáɓánsesi na ɓeekea akɛ, áǒɓopha kɔkɔta á ɓá ɓana-Mokonga. Ɓakpa ndɔ, ɓánáoɓá ɓana-Mokonga ka nyɔngɔ á ɓɔkɔtɛana ɓea nkpa buakɛ á ka mokonda ndee, nndɔ á kokpa, ɓáɓɔkɔtɛani ndiu k'ékondi ndea Mokonga.
Moyo áoɓá nkpa, áoika sɔsɔɓɛ asu. Áotúma na ɓonjánja-ékondi na koɗoni. Ɗɛ́ɓɛɔni ɓoombia akɛ, ɓoombia nde ngɔmu atɔi ka Abakɛ. Yoáni ɗáɗigimisi nyɔngɔ nɛkɛ, áoaba n'ɛsɔ akpɛ gea: «Yɛ aámbé ɗɛ́yɔngi nyɔngɔ nɛkɛ gea: ‹Mmbé aobika mbusa ani, amɔnyɛ́nyi nga, ɗáendi mosá á ɓɔkɔtɛana ani.›» Eya, ɓî Moyo atúmi na ɓonjánja, áosogabea ɓesu ɓɔbu ka ɓonjánja kau, ɓonjánja ndɔ, áoɓika suɓi asu phɛɛ. Nga, Mokonga ɗásóphi ɛɔphi ka njaga á Mósa, Yéso aámbé asobikíí ndiu na ɓonjánja na koɗoni. Nna na nkpa nde amɔnimbɛ mɔnɔ Mokonga, na nna tɔndɔ ngɔmu nɛkɛ mmbé akengeani na yɛ phɛɛ, áoikisana na Abakɛ. Yɛ aámbé asoúbisi Mokonga base.


Cɔ, nnde ande ɓoabi ndea Yoáni. Mbenɔ nde ɓakɔta á Ɓayúda íɓunde ɓá ka Yɛusalɛ́ma ɗáɓěteki ɓatoɓeigi-phɛ́a na Ɓaláwi ka úsia akɛ te: «Onde ani?» Yoáni kangánɛ. Áǒsikisia base gea: «Ké Kiísito.» Ɓakpa ndɔ ɓâ goto omúsia: «Cɔ, onde gǎkɛ ani? Onde Elía?» Áǒsikisia: «Ɓɛɛndɔ. Ké Elía.» Ɓâ goto omúsia: «Onde Mɔtu-nyɔngɔ ndea Mokonga?» Yɛ, áǒsikisia: «Ɓɛɛndɔ.» Kaɓondɔ ɓáomúsia: «Onde gǎkɛ ani? Nga, ɓena siki á sikisia á ɓoabi ka ɓaamɛ nde ɓásoteki. Cɔ, ogi ka phɔakɔ sasakɔ ɓo?» Yoáni áǒsikisia ɓíndɔ Isáya mɔtu-nyɔngɔ ndea Mokonga ɗáɗundu: «Nende
‹nkpa nde aoaba n'ɛsɔ akpɛ ka nkanda ɓe:
Ɓɔngisiagani ka Mɔkɔta aphe dɛ!›»
Cɔ, sɔsɔɓɛ á ɓateki ndɔ, ɓunɛngbo ɗáɓátú Ɓaphaisáyɔ. Ɓáomúsia Yoáni te: «Aoɓá na kó Kiísito, na kó Elía, na kó Mɔtu-nyɔngɔ ndea Mokonga, cɔ, ooɓatisa ka ɓo?» Yoáni áǒsikisia te: «Eme, nenóɓatisi ka iɓo, nkpa a gǎkɛ sɔsɔɓɛ anu, mmbé ɓókómúbimbɛ. Aobika mbusa ani, kékeni tanda koɗa á ngoi á ɓiato nɛkɛ.»
Cɔ, nyɔngɔ ndɔ bui ɗágeani ka Bɛtanía, kubi á Yɔɔdáni, ɔma nde Yoáni ɗátú oɓatisa.

Mama í, Yoáni áɔmɔna Yéso n'ambikíí, áogea: «Mmbé ande Muna-Mɔgɔgɔ ndea Mokonga. Yɛ aámbé aophúia ɓojeɗe á ka mokonda. Yɛ aámbé ɗɛ́ɔyɔnga ka phɔakɛ gea: ‹Mmbé aobika mbusa ani, amɔnyɛ́nyi nga, ɗáendi mosá á ɓɔkɔtɛana ani.› Cɔ, eme ɗékéomúba. Nebiki gǎkɛ oɓatisa ka iɓo gea, Ɓaisilaɛ́li ɓánengekisɛ yɛ ka nyɔngɔ á oɓatisɔ ndɔɔ.» Mpɔ, Yoáni áɔtɔmia nnde ɗáɔni gea: «Ɗɛ́ɔni Měma á Mokonga n'atóki na koba, n'aodida ɓea mboe, áoika na yɛ. Cɔ, ɗékémúbi mosá á dida á Měma ndɔ. Nga, Mokonga mmbé amoteki néɓatisɛ ka iɓo, ɗámongoɗi: ‹Nɛmɔnande nkpa, Měma á Mokonga n'aodida, áoika na yɛ. Nkpa ndɔ aámbé aɓatisande ka Měma á kanga ɓojeɗe.› Cɔ, eme Yoáni ɗɛ́nɛɔni nndɔ, néoɗigimisa gea, nkpa ndɔ ande Muna-Mokonga.»

Mama í, Yoáni ɗátú goto wa, áoika na ka ɓagoigi nɛkɛ ɓaɓɛ. Ɗámɔni ye Yéso n'aɔnyɛ́nya áogea: «Cɔ, Muna-Mɔgɔgɔ ndea Mokonga aámbé.» Ɓî ɓagoigi ɓaɓɛ ndɔ ɓáɔ́ki ye ɓó, ɓâ ye tɔ omɓea Yéso. Mpɔ, Yéso áǒpháia, áɔ̌ɓɔna ɓagoigi ndɔ na ɓáomɓea. Áǒɓúsia: «Cɔ, ɓookaɓa eke?» Ɓáonsikisia: «Lábi, (ande gea te, ngoisigi) ɔma á ɓoiki nɛkɔ a wani?» Yéso áǒsikisia: «Bikani, ɓɔ́ɔnɛ.» Mpɔ, ɓáoga na yɛ, ɓáɔɔna ɓî yɛ aiki. Ɓáoosa na ɓɔ k'ésa ndɔ. Cɔ, ɗátú gǎkɛ ka yɛga á maní ɓea mbenɔ á aba-osee.
Sɔsɔɓɛ á ɓagoigi ɓaɓɛ ɓunde ɗáɓáɔ́ki nyɔngɔ ndea Yoáni na ɓeá á Yéso ɗátú: Andeé, muna-amakɛ na Simɔ́ni-Pɛ́tɛɛ. Yɛ, â phɔ́ ondonda muna-amakɛ Simɔ́ni, áongea ɓe: «Ɓɛmɔni Namisi Masíya, ande gea, Kiísito.» Mpɔ, Andeé, áonga ně mosá á Yéso. Yéso â gǎkɛ ontúmia n'iso, áongea: «Onde Simɔ́ni, muna Yoáni. Ɓákɔɔphanande Kɛ́pha, ande gea, Ɛtɛ.»

Mama í, Yéso ɗákondi gǎ na Galiláya, áondonda Philípɔ, áongoɗea: «Ómoɓea!» Cɔ, Philípɔ ɗátú gǎkɛ nto á ka Bɛtɛsaída, ntanga-nji ndea Pɛ́tɛɛ na Andeé. Philípɔ â gǎkɛ oga ondonda Natanaɛ́li, áongea ɓe: «Ɓɛmɔni Nkpa nde Mósa ɗáɗundu nyɔngɔ akɛ suɓi á ɓuku ɛ́ɔphi. Ɓaɔtu-nyɔngɔ ndea Mokonga ɗáɓáɗundu phɔtɔ nyɔngɔ akɛ. Yɛ, ande Yéso Muna-Yɔsɛ́phu, mmbé ɓa ka Najalɛ́ti.» Mpɔ, Natanaɛ́li áomúsia: «Kema ánjá aɔtɔka n'atóki ka Najalɛ́ti?» Philípɔ áonsikisia: «Bika ɔ́ɔnɛ.»
Mbusa, Yéso áɔmɔna Natanaɛ́li n'aobika mɔtɛ-akɛ. Áɔyɔnga ka phɔakɛ te: «Mɔ́nani Moisilaɛ́li á ɗoni, mmbé nna n'odemayɔ suɓi akɛ.» Kaɓondɔ, Natanaɛ́li áomúsia Yéso: «Omoúbi ɓo?» Yéso áonsikisia gea: «Mosá á Philípɔ ɔphana akɔ, nɛkɔɔnima n'okusi á me nde ɓáɔmɔphana ka kisambaye mtini.» Kaɓondɔ, Natanaɛ́li áongoɗea: «Ngoisigi, onde Muna-Mokonga, Moamɛ ndea Ɓaisilaɛ́li.» Yéso áonsikisia gea: «Omoɓeeki ka nyɔngɔ nde nekongoɗi gea, ɗɛ́kɔɔni kusi á me? Cɔ, ɔɔnande kema ángbó kɔnyɛ́nya nndee.» Mbusa í, â phɔtɔ ongoɗea: «Eya, nenóngoɗi ɗoni gea, ɓɔɔnande koba n'akoɗokani, ɓamalaéka ndea Mokonga na ɓáotáia na dida gǔ ani eme Muna-Nkpa.»

Gwranda ar Yoáni 1