Text: © Christian Far East Ministry, 2012 Audio: ℗ 2012 Hosanna

Ruching Palaung - 2012 Edition (Drama NT)

วาย อัน ตี เฌา เยซู วี ฮาว แบน โปละ แบน โปละ แคง อืง ฆาลีเล. อัน ตู ซี ฮาว แคง อืง ยูดา โกบ เหรต เฆ ดา ตาง ยูดา ดี อัน, แตห เฆ ปึอน ดี ง็อห อาซาก อัน. ดอ กาตัด ดี โบง เฆ ดูอี อายูดา บลอย โลว กอย แคง ทึบ, อึณ มูห เฆ วา เฌา เยซู เฆ ต็อห ดี อัน, “แม โลว เลห ดี นี, ฮาว อืง ยูดา, แตห เฆ ดีแบ แม วี ปึอน ดี ยึร อี หมึอม อาม กาเซา ปี โบง แม. อาเซ ซี แตห ดูอี กืน นับ ลอง อัน, อัน ตู เครียง ดี โบง ฆาน อัน. โกบ โบง แม ฌึร ตี, แตห แม แตห ดอน อี แดง กาดาย ยึร ปี โบง แม.” เฆ วา เฌา เยซู กาลาง โฆรห ตี โกบ ตู บอ หณึม เฆ.
โคว, เฌา เยซู วี กาลาง ดี เฆ, “เฌาพรา หณัม แตห โอว ฮาว. เบ ยี ตู ลืก ฮาว ดอ เหมา. เฆ ดูอี แดง กาดาย เฆ ตู ฌ็อง เบ. เฆ ยี ฌ็อง โอว โกบ กาลาง โอว ลอง ปี โบง เฆ, อึณ ตู หมึอม, อึณ ฮาย. แตห เบ ฮาว ลึบ บลอย ตี. โอว หณัม ฮาว. อาคราว ดี โลว ฮาว โอว หณัม ฌัม.” เฌา เยซู แฮะ ฮอต กาลาง โฆรห ตี, อัน มืร กอย ดี ปัน แคง อืง ฆาลีเล.
วาย แฮะ ฮอต ฮาว เฆ วา อัน ดี บลอย ตึอน, บอ อัน วี ฮาว. อัน ยี ตู แตห อี เฮา นับ ลอง ฮาว อัน. อัน ฮาว, แกวะ แตห อี ยึร. ดอ โบง เฆ บลอย ตึอน, เฆ ดา ตาง ยูดา ยี เหรต อัน ต็อห, “เหมา อัน กอย?”
เฆ ดูอี กืน กาลาง ดอน โมยว กาแต เฆ, แกวะ แตห อี เฮา ยึร. มัง อี ต็อห, “อัน มูห ดูอี หมึอม.”
มัง อี ต็อห, “อาว มูห. อัน กาโลว อี, แกวะ แตห เฆ โดบ นา หมาน.” อึณ ยี ตู มึห อาเซ, อี ยัะ กาลาง ฌึร ตี, แตห ดูอี กืน ปึอน ดี ยึร. เฆ บอกาเฆลียด โยว เฆ ดา ตาง ยูดา.
ดอ อัน ตี ดอ ซีงยา โบง เฆ บลอย, เฌา เยซู ฮาว ลึบ แคง แวง โฮว เฌาพรา, วี จูห ดี มาโนว อี. เฆ ดา ตาง ยูดา วี อาม บอ ต็อห, “เหมา อึณ ปาย ปี ปึอน อัน อางยาน กืน แคะ ตี? อัน ตู ดึอม เฮน ทัม ดอ เหมา.”
เฌา เยซู วี ต็อห ดี เฆ, “ปี มาโนว โอว, อึณ ตู เลห แคง อางยาน โอว. อึณ มูห อางยาน อัน เฌา อี แฮะ ตึย โอว ตัห ดี นี. เซ อึณ ยี มึห ดูอี อี ต็อห ดี โบง อี ล็อะ น็อห เฌาพรา, อัน ดี บอ นับ ซีคยา ลอง ปี มาโนว โอว, โยว อึณ มูห อางยาน เฌาพรา, โยว อึณ เลห อางยาน โอว. อาเซ กาลาง โฆรห อี เลห แคง อางยาน อัน, อัน กาลาง แตห ดูอี โรวเซ อัน. อาเซ ยี โรวเซ วี ปี ตึย เฌาพรา, อัน มูห ดูอี อี โบง นา หมาน, ตู นับ ดี โบง นา ตู หมาน. อึณ มูห ดา ซารา อาโมวแซ ตึอน, อัน แฮะ ดัว ดารา เฌาพรา ดี เบ. อึณ ยี ตู มึห ดูอี อู วี กาแต เบ, อี โดบ ดารา ตี. เซ อึณ ปาย ตี, เหมา อึณ ปาย ปี ซี ง็อห เบ อาซาก โอว?”
เฆ ดูอี กืน วี ต็อห, “แม มึห กานัม ฮาย กอย แคง โดว แม. อาเซ แฮะ ต็อห ดี ง็อห อาซาก แม?”
เฌา เยซู วี ต็อห, “โอว แฮะ โบง นา หมึอม อาม กาเซา อู โมยว. แฮะ ฮอต, เบ บอกาเฆลียด อาม. ดา ซารา อาโมวแซ ตึอน, อัน แฮะ จัร เบ ซัวะ แวน ฮูน ลัะคานา อีมาย. โคว, เบ วี โบง ปาย ตี ดอ มูห ซีแง แกม ซีณ. (มาแล อึณ ตู มูห อาโมวแซ อี จัร เบ โบง ปาย ตี. อึณ มูห ฆูณ ดัง เบ). เบ ควาง อี ซัวะ แวน ฮูน ลัะคานา อีมาย ดอ มูห ซีแง ดีเหลา, แกวะ แตห ดารา อาโมวแซ ลึร. เบ ยี รู ดี โอว, เซ โอว ปีแกน ดูอี อู วี ดอ มูห ซีแง ดีเหลา. แกวะ ซูงพยาด อามู อี โกบ ยอด เบ อารึบ อี. แตห เบ โดบ นา หมาน ดอ ซูงพยาด เบ แบน โมยว แบน โมยว.”

ปัน ตี อึณ มูห เฆ ดูอี อี กอย แคง มืง เยรูซาแลม. เฆ จูห ดี ดีหมอด. เฆ ต็อห, “เย ทาง, อึณ มูห ดูอี วี ตี, ปี คราม เฆ ดี ง็อห แวน. อัน กอย ดี นี, กาลาง โฆรห, แตห ดอน อี ปึอน ดี โทม. เฆ ดา ตาง ยี ตู ต็อห มาเซ ดี อัน. อึณ ปี, เฆ ทาง ดูอี วี ตี มูห ดูอี ปี ร็อห ปี ตึย เฌาพรา แตห อัน คยอด ดูอี. เย ยี นับ ซีคยา โดง กอย บรีม อัน. เซ อึณ ยี มูห ดูอี ปี ร็อห ปี ตึย เฌาพรา แตห อัน คยอด ดูอี, เซ อัน ดี ตัห, อาว มึห อาเซ นับ โดง กอย บรีม อัน.”
ดอ อัน ตี เฌา เยซู ซี กอย แคง แวง โฮว เฌาพรา, มาโนว ดูอี. อัน วี ดัด ตาง ต็อห, “แฮะ หมาน, เบ ทาง เบ นับ โอว. เบ บอ ทาง เบ นับ ซีคยา โดง กอย บรีม โอว. โอว ยี ตู ตัห ดี นี โกบ มึห โอว น็อห ซี ตัห. โอว แฮะ ตัห โกบ มึห อัน เฌา อี ตึย โอว. เบ ยี ตู นับ อัน เฌา ตี. โอว ยี นับ อัน โกบ ตัห โอว โดง กอย อัน, อัน มืร แฮะ จัร โอว ตัห ดี นี.”
โคว อัน ตี เฆ ดา ตาง ยูดา ซี เหมต อัน. อึณ ยี ตู มึห อาเซ ยัะ เหมต อัน. เฌาพรา หณัม แตห เฆ โบง ฌึร ตี. อึณ ยี มึห ดูอี กืน, เฆ หณึม อัน. เฆ ต็อห, “เซ ดูอี ปี ร็อห ปี ตึย เฌาพรา ดี ตัห, อัน ตู โกบ นับ ดี โบง นา หมึอม อาม กาเซา หลึอม ดูอี วี นี.”
เฆ ดูอี แคง พึง พารีแซ, เฆ บอ ยึร ดูอี ลาย โฆรห ลาย พูพาบ กาแต เฆ ฌึร ตี. ปัน ตี เฆ ดา ตาง อี แยต เฆ ดูอี อี หลู ดี เฌาพรา บอ เฆ ดูอี แคง พึง พารีแซ, เฆ จัร ดูอี อี บัร โฮว เฌาพรา มัง อี, แตห เฆ เหมต เฌา เยซู.
เฌา เยซู วี ต็อห ดี ดูอี อี โทม โฆรห อัน, “โอว ดี กอย รึม โดบ เบ อาดา อู กาจัน. แฮะ ฮอต โอว ดี วี เวณ โดง กอย อัน เฌา อี จัร โอว ตัห ดี นี. วาย อัน ตี เบ ดี วี เหรต โอว. เบ ยี ตู กาตูณ โอว. โดง กอย โอว, เบ มืร ตู ปึอน ดี ตัห ฌัม.”
อัน แฮะ ฮอต กาลาง โฆรห ตี, เฆ ดา ตาง ยูดา วี ลาย กาลาง ต็อห, “เหมา อัน ดี ฮาว? ดี เหมา อึณ มูห, ปี ตู ปึอน เอ ฮาว. โยว อัน ปี คราม ดี ฮาว โดง กอย ดูอี อายูดา แคง มืง ฆรีก แบน โปละ แบน โปละ, วี มาโนว เฆ ดูอี ฆรีก. มาเซ อึณ มูห ลอง ดาง อัน, ดอ ต็อห อัน, ‘เบ ดี เหรต โอว, ยี ตู กาตูณ โอว.’ บอ, ‘โดง กอย โอว เบ ตู ปึอน ฮาว.’”
อึณ ยี ฌัม ซีแง ดี ฮอต บลอย. อึณ มูห ซีแง ตาง หลึอม ดอน ซีแง. ดอ อัน ตี เฌา เยซู วี ยีต, กาลาง โฆรห ตาง. อัน ต็อห, “เซ อึณ มึห ดูอี อี ซี เดียง อึม, แตห อัน ตัห ดี โอว. โอว ดี ดัว ปี ดี เดียง ดี อัน. อาเซ หณึม โอว ปี ปี แดม อูน แคง บับ เฌาพรา, อึณ ดี ปี แบลง อึม อี เลห แคง โดว โบ็ง อัน. อึม ตี ยี มูห อึม อี นับ ดี ดัว อาซาก กามาย.” อัน ยี กาลาง โฆรห ตี ลอง น็อห พึอม เฌาพรา. น็อห พึอม เฌาพรา ตี ดี ลึบ แคง น็อห อี หณึม. ดอ กาลาง อัน โฆรห ตี, เฌาพรา หณัม ดัว น็อห พึอม อัน ดี ดูอี. โคว, เฌา เยซู หณัม ปึอน อาพูง ดังโคว อัน.
ดอ โทม เฆ โฆรห เฌา เยซู ตี, มัง อี บอ ต็อห, “แฮะ หมาน, แฮะ มูห. ดูอี นี, อัน มูห ดูอี อี บยาน โฆรห เฌาพรา, อี ปี ต็อห เฌาพรา ดี ตึย.”
มัง อี ต็อห, “อัน มูห ดูอี ปี ร็อห ปี ตึย เฌาพรา แตห อัน คยอด ดูอี.” บอ มัง อี ยี ต็อห, “เซ อึณ มูห ดูอี ปี ร็อห ปี ตึย เฌาพรา, อัน ตู ตัห อืง ฆาลีเล. แคง บับ เฌาพรา อึณ ต็อห, ดูอี ปี ร็อห ปี ตึย เฌาพรา แตห อัน คยอด ดูอี, อัน มูห ดูอี แคง ครึร อาดาวีด, ตัห มืง เบดแลม อี มูห โดง กอย อาดาวีด ตึอน.” ปาย ตี, เฆ ดูอี ตู ลาย โพรม ลอง เฌา เยซู. มัง อี ต็อห ดี เหมต อัน. ยี ตู มึห อาเซ, ยัะ ตัห ปา อัน.

วาย อัน ตี เฆ ดูอี อี บัร โฮว เฌาพรา ตึอน, เฆ วี เวณ โดง กอย เฆ ดา ตาง อี แยต เฆ ดูอี อี หลู ดี เฌาพรา บอ เฆ ดูอี แคง พึง พารีแซ ตึอน. เฆ วี ดีหมอด ดูอี อี บัร โฮว เฌาพรา. เฆ ต็อห, “เหมา อึณ ปาย ปี ตู ดึห ตัห เบ อาเยซู?”
เฆ วี ต็อห, “อึณ ตู ดึอม มึห อาเซ, อี กาลาง โฆรห ปี อัน.”
เฆ ดูอี แคง พึง พารีแซ วี ต็อห, “เซ อึณ ปาย ตี, อัน แฮะ ปีหล็อก บอ ดี เบ. แตห เบ ยอด, แคง ดา ตาง ยูดา อี อึบ มืง บอ แคง พึง พารีแซ อาว มึห อาเซ อี แฮะ หณึม อัน. อึณ ยี มูห ดูอี กืน เฆ นี, เฆ ตู นับ มาเซ ลอง ดารา เฌาพรา, โลว ดืง เฆ.”
อึณ ยี มูห อานีโคเดม, อี ดึอม ตัห กาลาง โฆรห ดี เฌา เยซู. อัน มูห ดูอี แคง พึง เฆ. อัน วี ต็อห, “เซ เอ โดบ ดารา, อาว ปึอน ดัม หมาบ ดี อี อาต โทม เอ โฆรห อัน. เอ โลว นับ ดี อาต ลอง แปะ แฮะ โบง อัน.”
เฆ ยี ต็อห ดี อัน, “เย ทาง บอ แม มูห ดูอี อาโมยว ฆาลีเล. แตห แม กาดัวะ ซีคยา. แม ดี บอ นับ, อึณ ตู มึห ดูอี อี บยาน โฆรห เฌาพรา, อี ตัห อืง ฆาลีเล.” วาย อัน ตี ดอน อี วี เวณ กาง อาเซ กาง อัน.

Gwranda ar ยฮ 7